འདི་ནའང་ལྷག་དཀར་ལས་འགུལ་བ་ཞིག

འདས་པའི་ལོ་ཤས་གོང་ནས་ངོ་དེབ་སྟེང་ཕོ་གསར་ཞིག་གིས་བོད་པའི་རྒྱལ་དར་དང་། བོད་དོན་འབོད་ཚིག་འདྲ་མིན་འཁོད་པའི་འཕྲེད་དར་འཕྱར་བའི་པར་ཞིག་ཡང་ནས་ཡང་དུ་མཐོང་རྒྱུ་འདུག དེང་གི་བརྡ་འཕྲིན་བརྒྱུད་ལམ་སྟབས་ཇེ་བདེར་སོང་བ་དང་བསྟུན་ཏེ། མི་རྣམས་ཀྱི་ཉིན་རེའི་འཚོ་བའི་ཁྲོད་ཁ་སང་ལ་བ་ག་རེ་གྱོན་པ་དང་། དེ་རིང་ཟ་མ་ག་རེ་ཟ་བཞིན་པའང་ངོ་དེབ་སྟེང་སྤེལ་གྱིན་ཡོད་པ་དང་། བོད་ཀྱི་རྒྱལ་དར་དང་བོད་དོན་འབོད་ཚིག་སོགས་ཀྱང་བོད་དོན་ལས་འགུལ་ནས་རྒྱན་ཆས་ཀྱི་རྣམ་པར་ཡང་འགྱུར་བཞིན་ཡོད་སྟབས། ཕོ་གསར་དེའི་སྐོར་ལའང་དོ་སྣང་དམིགས་བསལ་བྱུང་མ་སོང་།

ད་ལོར་ག་ས་གང་དུ་ཕོ་གསར་དེའི་པར་མཐོང་རྒྱུ་ཇེ་མང་དུ་ཕྱིན་སོང་ལ། ཁོའི་བོད་དོན་ལས་འགུལ་གྱི་ངར་ཤུགས་ཀྱང་སྔར་ལས་ཇེ་ཆེར་འགྲོ་བཞིན་ཡོད་པ་ཞིག་ཚོར་སོང་། གདོང་ལ་ཧ་ཅང་གཟབ་ནན་གྱི་ཉམས་ཤིག་མངོན་པའི་གསེང་ལ་ཁྲོ་ཉམས་ཤིག་ངང་གིས་སྦས་ཏེ། གཞུང་ལམ་ཆེན་པོའི་ཟུར་དང་མི་ཚོགས་འདུས་པའི་དབུས་སོགས་སུ་གངས་སེང་རྟགས་ཅན་གྱི་རྒྱལ་དར་ཞིག་བཟུང་སྟེ་ཀྲོང་ངེར་འགྱང་པ་དང་། མཚམས་རེར་རོགས་པ་དབྱིན་ཇི་འགའ་རེ་དང་མཉམ་དུ་བོད་དོན་དྲིལ་བསྒྲགས་ལ་བྲེལ་བཞིན་པ་སོགས་མཐོང་རྒྱུ་འདུག་སྟབས། རང་བཞིན་གྱིས་དོ་སྣང་བཀུག་སྟེ་ཁོའི་པར་དག་ལ་རེ་རེ་བཞིན་ཞིབ་ལྟ་བྱེད་དགོས་བྱུང་སྟབས། གཞི་ནས་ཁོང་ནི་དབྱིན་ཡུལ་རྒྱལ་ས་ལོན་ཌོན་དུ་ཡོད་པའི་བོད་རིགས་གཞོན་སྐྱེས་རྩ་དོན་འཐབ་རྩོད་པ་ཞིག་ཡིན་པ་ཤེས་བྱུང་།

ད་ནིང་ལས་ཁུངས་ལ་འབྱོར་ཏེ་གློག་སྐད་སྒོ་ཕྱེ་མ་ཐག་ཏུའང་ཕོ་གསར་དེའི་བོད་དོན་ལས་འགུལ་སྐོར་གྱི་པར་གསར་པ་འགའ་མཐོང་མ་ཐག་ཏུ་གཅིག་ནས་གསར་འགོད་པའི་ལས་འགན་དང་། གཉིས་ནས་སྒེར་ངོས་ནས་ཀྱང་ཁོའི་སྐོར་ཤེས་འདོད་ཆེན་པོ་བྱུང་སོང་བས། དེ་མ་ཐག་ངོ་དེབ་བརྒྱུད་ཁོ་ལ་འབྲེལ་བ་ཞུས་པར་ཆུ་ཚོད་གཅིག་ཙམ་རྗེས་ལན་འབྱོར་སོང་། སྐབས་དེར་ངས་ཁོང་ལ་སོ་སོ་ངོ་སྤྲོད་ཅིག་བྱས་རྗེས་ངེད་གཉིས་ཁོའི་བོད་དོན་ལས་འགུལ་སྐོར་ལ་གླེང་མོལ་བྱས་པ་ཡིན།

ལྷག་དཀར་ལས་འགུལ་བ་ཁོའི་མིང་ལ་བློ་བཟང་དཔལ་ལྡན་ཟེར་ཞིང་། ཁོང་ཐོག་མ་ ༢༠༠༥ ལོར་དབྱིན་ཡུལ་ནང་སྐྱབས་བཅོལ་དུ་འབྱོར་བ་ཡིན་འདུག དབྱིན་ཡུལ་ནང་འབྱོར་མ་ཐག་ནས་བོད་དོན་ལས་འགུལ་འདྲ་མིན་ནང་མཉམ་ཞུགས་གནང་ཡོད་པ་མ་ཟད། བོད་ནང་གནས་ཚུལ་ཛ་དྲག་བྱུང་སྐབས་དང་། བཙན་བྱོལ་ནང་གི་དུས་ཚིགས་དམིགས་གསལ་ཅན་སོགས་སུའང་ལས་འགུལ་འདྲ་མིན་སྤེལ་ཡོད་པ་དང་། ལྷག་པར་དུ་ ༢༠༠༩ ལོ་ནས་བཟུང་གཟའ་ལྷག་པ་ནམ་ཡིན་ལ་ཕྱི་དྲོའི་ཆུ་ཚོད་ ༦ ནས་ ༨ བར་གྱི་ཆུ་ཚོད་གཉིས་རིང་། ཁོ་རང་གཅིག་པུས་དབྱིན་ཇིའི་རྒྱལ་ས་ལོན་ཌོན་གྱི་རྒྱ་ནག་གཞུང་ཚབ་ཁང་མདུན་དུ། བོད་དོན་དྲིལ་བསྒྲགས་དང་རྒྱ་ནག་གཞུང་ལ་ངོ་རྒོལ་ལས་འགུལ་རྒྱུན་མ་ཆད་པར་སྤེལ་བཞིན་ཡོད་འདུག

བློ་བཟང་དཔལ་ལྡན་ལགས་ལ་བོད་དོན་ལས་འགུལ་དེ་ཐོག་མ་ཇི་ལྟར་སེམས་ནང་འཁོར་ཚུལ་དྲིས་པའི་ལན་དུ་ཁོང་གིས་བརྗོད་དོན། “ཐོག་མ་ ༢༠༠༥ ལོའི་ཟླ་བ་ ༡༡ པའི་ནང་རྒྱ་ནག་གི་སྲིད་འཛིན་ཧུའུ་ཅིན་ཐའོ་ལོན་ཌོན་དུ་ཡོང་སྐབས། ང་ཚོ་བོད་པ་དང་བོད་དོན་རྒྱབ་སྐྱོར་བ་མང་པོ་ཞིག་གིས་ངོ་རྒོལ་ལས་འགུལ་སྤེལ་བ་རེད། སྐབས་དེར་ང་རང་གི་སེམས་ནང་ཕྱི་རྒྱལ་ནས་བོད་དོན་ལས་འགུལ་སྤེལ་ན་ཕན་ཐོགས་ཡོང་ས་རེད་སྙམ་པའི་ཚོར་བ་ཞིག་བྱུང་སོང་། གང་ཡིན་ཟེར་ན། ཕྱི་རྒྱལ་མི་དེ་ཚོས་སྐད་ཆ་ཞིབ་ཚགས་མོ་འདྲི་བ་སོགས་དོ་སྣང་ཆེན་པོ་བྱེད་ཀྱིན་འདུག་པ་དང་། གསར་འགོད་པ་མང་པོ་ཡོང་ནས་པར་རྒྱག་པ་དང་དུས་ཐོག་ལ་ཚགས་པར་ནང་བཏོན་ཡོང་གི་འདུག ” ཞེས་བརྗོད་སོང་།

ཡང་ཁོང་ལ་ལས་འགུལ་དེར་བོད་པ་ཚོ་དང་ཕྱི་རྒྱལ་བ་ཚོས་རྒྱབ་སྐྱོར་གང་འདྲ་ཡོད་མེད་དྲིས་པར་ཁོང་གིས་འདི་ལྟར་བརྗོད་སོང་། “བོད་པ་ཚོས་རྒྱབ་སྐྱོར་ཡག་པོ་གནང་གི་འདུག ད་ལོའི་འཁྲུངས་སྐར་ཉིན་དབྱིན་ཡུལ་བོད་རིགས་ཚོགས་པས་ང་ལ་གཟེངས་རྟགས་ཤིག་ཀྱང་སྤྲད་སོང་། དེ་བཞིན། བོད་མི་སྒེར་བ་ཟ་ཁང་འཛིན་མཁན་ཞིག་གིས་ཀྱང་ང་ལ་རྔན་པ་དབྱིན་སྒོར་ ༤༠༠ ཙམ་སྤྲད་སོང་། བོད་པ་ཚོ་མཚམས་རེར་ངའི་ལྷག་དཀར་ལས་འགུལ་ནང་མཉམ་ཞུགས་གནང་གི་ཡོད་པ་རེད། དབྱིན་ཇིའི་སྤོ་གཉིས་ཧ་ལམ་རྟག་པར་ཞུགས་ཀྱི་ཡོད་པ་རེད།” ཅེས་བརྗོད་སོང་།

བློ་བཟང་དཔལ་ལྡན་ལགས་ཀྱིས་བརྗོད་པ་ལྟར་ན། ཁོའི་ལས་འགུལ་དེའི་ནང་དབྱིན་ཇིའི་སྤོ་བོ་མཚན་ལ་ཆཱ་སི་ Chas ཟེར་ཞིང་དགུང་ལོ་ ༨༣ ཡིན་པ་ཞིག་དང་། གཞན་པ་མཚན་ལ་ Cees ཟེར་ཞིང་དགུང་ལོ་ ༦༥ ཡིན་པ་ཞིག་ནམ་རྒྱུན་མཉམ་ཞུགས་གནང་གི་ཡོད་པ་དང་། མཚམས་རེར་ཕོ་གསར་ཞིག་ཀྱང་མཉམ་ཞུགས་གནང་གི་ཡོད་འདུག

དབྱིན་ཇིའི་སྤོ་བོ་ལགས་དེ་གཉིས་བོད་དོན་ཐོག་སེམས་ཤུགས་ཆེན་པོ་ཡོད་པ་དང་། ལྷག་པར་དུ་ཆཱ་སི་ཟེར་བ་དེས་འདས་པའི་ལོ་ངོ་ ༢༠ གོང་ནས་ལྷག་དཀར་ལས་འགུལ་སྤེལ་ཡོད་པ་དང་། སྐབས་དེར་ ‘ལྷག་དཀར’ ཟེར་བའི་སྤྱི་འདུས་ཀྱི་མིང་དེ་གྲུབ་མེད་ཀྱང་། ཆཱ་སི་ཁོ་རང་གཙོས་པའི་བོད་དོན་རྒྱབ་སྐྱོར་བ་རྒན་པ་ཁག་ཅིག་གིས་ ‘wednesday vigil’ ཞེས་པའི་ལས་འགུལ་ཞིག་སྤེལ་བཞིན་ཡོད་འདུག རྗེས་ལ་ལྷག་དཀར་གྱི་ངོ་བོར་མིང་གཅིག་གྱུར་ཆགས་ཡོད་འདུག

བློ་བཟང་དཔལ་ལྡན་ལགས་ཀྱིས་བརྗོད་པ་ལྟར་ན། ཁོ་རང་གི་ལས་འགུལ་དེར་གྲོང་ཁྱེར་དེའི་ཡུལ་མི་ཚོ་དང་། ལྷག་པར་དུ་ལོན་ཌོན་ནང་གི་ཡུལ་སྐོར་སྤྲོ་འཆམ་པ་ཚོས་དོ་སྣང་ཆེན་པོ་བྱེད་ཀྱིན་ཡོད་འདུག ལས་འགུལ་སྐབས་ཁོས་བོད་དོན་སྐོར་གྱི་ཡིག་ཆ་འདྲ་མིན་འགྲེམ་སྤེལ་བྱེད་བཞིན་ཡོད་པ་དང་། མཚམས་རེར་དབྱིན་ཡུལ་ནང་སློབ་གཉེར་བྱེད་བཞིན་པའི་རྒྱ་རིགས་སློབ་ཕྲུག་འགའ་རེའང་ཡོང་སྟེ། ཁོང་ཚོར་སྐད་ཆ་འདྲི་བ་དང་བོད་ཀྱི་རྒྱལ་དར་བསྣམས་པ་སོགས་བོད་དོན་ལ་རྒྱབ་སྐྱོར་ཡོད་པའི་རྣམ་པ་སྟོན་བཞིན་ཡོད་འདུག

ནམ་རྒྱུན་རྒྱ་ནག་གཞུང་ཚབ་ཁང་གི་ལས་བྱེད་ཚོ་ལས་ཁུངས་གྲོལ་ཡོང་སྐབས། ཁོ་རང་གི་ངོ་རྒོལ་ལས་འགུལ་དེ་མཐོང་གི་ཡོད་སྟབས་འདོད་པ་ཁེངས་པའི་ཚོར་སྣང་ཡོང་གི་ཡོད་པ་དང་། ཐེངས་ཤིག་རྒྱ་མི་ཞིག་གིས་ཁོའི་ངོ་རྒོལ་ལས་འགུལ་ལ་མ་དགའ་བའི་རྣམ་འགྱུར་བསྟན་ཏེ། ཆུའི་འགྱིག་དམ་བཞུས་སོང་བར་ཁོས་དེ་ལ་ཡ་ལན་ངན་པ་མ་བྱས་པར་ཉེན་རྟོག་པར་གཏུགས་ཏེ་ཉེན་རྟོག་པས་རྒྱ་མི་དེ་འཇུ་བཟུང་བྱས་ཡོད་སྐོར་སོགས་ངོ་སྤྲོད་གནང་སོང་། ངེད་གཉིས་ཀྱི་གླེང་མོལ་མཚམས་འདིར་སླེབས་སྐབས། ཁོ་རང་ལས་ཀ་ན་ཡོད་སྟབས་ཁ་བརྡ་བྱེད་རྒྱུར་དེ་ཙམ་སྟབས་བདེ་བོ་མེད་པའི་རྣམ་འགྱུར་བསྟན་སོང་བས་ངེད་གཉིས་ཀྱི་གླེང་མོལ་འདི་ནས་མཚམས་འཇོག་བྱས་པ་ཡིན།

དོན་འགྲུབ་བཀྲ་ཤིས།