པེ་ཅིན་གྱིས་རམ་འདེགས་བྱས་པའི་བོད་ཡིག་འཚོལ་བཤེར་མ་ལག་དེ་ཅི་ཙམ་ཡག་པོ་ཡོད་དམ།

སྦི་སྦི་སི་ཡི་གསར་གནས།
ཚེ་རིང་དོན་གྲུབ་ཀྱིས་བསྒྱུར།

བདུན་ཕྲག་འདིའི་ནང་བོད་ཡིག་ནང་གི་འཚོལ་བཤེར་མ་ལག་ཆེས་ཐོག་མ་འདི་འགྲེམས་སྤེལ་བྱས་ཡོད།

རྒྱ་ནག་གཞུང་གི་རམ་འདེགས་འོག་འགྲེམས་སྤེལ་བྱས་པའི་ཡོངས་འཛིན་(འཚོལ་བཤེར་མ་ལག་)ནི་སྐད་ཡིག་དེའི་ནང་དུ་རྙོག་འཛིང་ཆེ་བའི་ཚིག་ཚོགས་དུ་མ་འཚོལ་བཤེར་བྱེད་ཕྱོགས་ཐད་འཚོལ་བཤེར་མ་ལག་གཞན་ལས་བཀོལ་སྤྱོད་བྱེད་སྟབས་བདེ་བ་ཡོད་ཚུལ་བརྗོད།

འོན་ཀྱང་བོད་མིའི་སྒྲིག་འཛུགས་ཀྱི་མགྲིན་ཚབ་པ་ཞིག་གིས་སྦི་སྦི་སི་གསར་ཁང་ལ་བརྗོད་གསལ་ལྟར་ན། འཚོལ་བཤེར་མ་ལག་འདི་ནི་ “ རྒྱ་ནག་གཞུང་གིས་བོད་ཁྲིམས་འགལ་གྱི་དབང་སྒྱུར་བྱེད་བཞིན་པ་དེ་ཁྲིམས་མཐུན་དུ་བསྒྱུར་ཐབས་ཀྱི་དྲིལ་བསྒྲགས་གོང་མཐོར་དུ་གཏོང་བའི་སྡིངས་ཆ་” ཞིག་ཏུའང་བཀོལ་སྤྱོད་བྱེད་སྲིད་པ་ཞིག་ཆགས་ཡོད་འདུག

བོད་ནི་རྒྱ་ནག་གི་རང་སྐྱོང་མངའ་ཁུལ་ཞིག་གི་ཚུལ་དུ་འཛིན་སྐྱོང་བྱེད་བཞིན་ཡོད། པེ་ཅིན་གྱིས་ཧི་མ་ལ་ཡའི་མངའ་ཁུལ་དེའི་ཐོག་དུས་རབས་མང་པོའི་རིང་བླ་ན་མེད་པའི་དབང་ཚད་ཅིག་བཟུང་ཡོད་སྐོར་བརྗོད། དེ་ནའང་བོད་མི་མང་དག་ཅིག་གི་དད་གུས་དང་དགའ་ཞེན་ནི་བཙན་བྱོལ་དུ་ཡོད་པའི་ཆོས་ཀྱི་དབུ་འཁྲིད་ཏཱ་ལའི་བླ་མར་ཡོད་པ་རེད་ལ། ཁོང་ནི་རྒྱ་ནག་གིས་ཁ་བྲལ་རིང་ལུགས་པའི་འཇིགས་སྐུལ་ཞིག་ཏུ་ལྟ་བཞིན་ཡོད་པ་རེད།

འཛམ་གླིང་ཁྱོན་ཡོངས་སུ་ཡོད་པའི་བཙན་བྱོལ་གྱི་ཤོག་ཁག་དང་གཞུང་འབྲེལ་མ་ཡིན་པའི་ཚོགས་པ་རྣམས་ཀྱིས་པེ་ཅིན་གཞུང་གིས་བོད་པའི་རིག་གཞུང་དང་སྲོལ་རྒྱུན་སོགས་ལ་གཏོར་བཤིག་དང་བཙན་གནོན་བྱེད་བཞིན་ཡོད་པར་སྐྱོན་འཛུགས་བྱེད་བཞིན་ཡོད་ལ། བོད་ཀྱི་སྐད་ཡིག་དེ་ནི་བཙན་གནོན་དེའི་ཆ་ཤས་ཆེ་ཤོས་ཤིག་ཡིན་པ་རེད།

འདི་ནི་བོད་ཡིག་གི་འཚོལ་བཤེར་མ་ལག་ཐོག་མ་དེ་ཡིན་ནམ།

གྷོ་གྷིལ་(གོ་གྷིལ་ནི་རྒྱ་ནག་ནང་བཀག་ཡོད་སྟབས་བོད་ནང་དུའང་བཀག་ཡོད་པ་རེད)དང་། རྒྱ་ནག་གི་འཚོལ་བཤེར་མ་ལག་པའེ་ཏུ་གཉིས་ཀའི་ནང་དུའང་བོད་ཡིག་ཐོག་འཚོལ་བཤེར་བྱེད་ཐུབ་ཀྱི་ཡོད།

འོན་ཀྱང་། ཡོངས་འཛིན་ནི་དེ་ཉིད་ཀྱི་འབྲེལ་མཐུད་མཉེན་ཆས་ཀྱི་ཆ་ཤས་རྣམས་ཐེ་བའི་ཆ་ཡོངས་སུ་རྫོགས་པ་བོད་ཡིག་ནང་དུ་ཡོད་སྟབས། ཆ་རྐྱེན་དེ་དག་གི་ངོས་ཐད་ནས་བཤད་ན་ཡོངས་འཛིན་ཟེར་བ་དེ་དོན་དངོས་ཐོག་ནས་དང་པོ་ཆགས་ཡོད། བོད་ཡིག་གི་འཚོལ་བཤེར་མ་ལག་དེའི་མིང་ལ་ “སློབ་དཔོན་”ནམ་ཡང་ན། “དགེ་བའི་བཤེས་གཉེན་” དུ་གོ

དེས་ན་ཡོངས་འཛིན་.com འདི་དགོས་དོན་ཅི་ཞིག་ཡིན་ནམ།

རྒྱ་ནག་གི་གཞུང་གཉེར་བརྒྱུད་ལམ་ལྟར་ན་འཚོལ་བཤེར་མ་ལག་དེས་བོད་ཀྱི་སྐད་ཡིག་གོང་མཐོར་དང་བོད་ཡིག་གི་དྲ་གནས་རྣམས་ཀྱི་ཆེད་གཉེར་སྡིངས་ཆ་ཞིག་མཁོ་སྤྲོད་ཞུ་བཞིན་ཡོད་སྐོར་བརྗོད་འདུག “དེས་བོད་སྐད་རྒྱག་མཁན་གྱི་མང་ཚོགས་ཀྱི་འཕེལ་བཞིན་པའི་དགོས་མཁོ་རྣམས་དང་། བོད་ཡིག་ནང་གི་གློག་ཀླད་ཀྱི་ལས་གཞིའི་རེའུ་མིག་རྒྱ་བསྐྱེད་དང་། བོད་ཡིག་གི་གྲངས་འཛིན་ཡིག་མཛོད་བསྐྲུན་རྒྱུར་མཐུན་རྐྱེན་སྦྱོར་རྒྱུ་ཡིན་པ་རེད།” ཞེས་ལས་བྱེད་ཅིག་གིས་བརྗོད།

ཨོ་སི་ཊོ་ལི་ཡའི་བོད་མི་མང་སྤྱི་འཐུས་གདུང་འདུས་སྐྱིད་འཛོམས་ལགས་ཀྱིས། སྦི་སྦི་སི་གསར་ཁང་ལ་བརྗོད་ན། ཁོ་མོས་གསར་གཏོད་དེ་ནི་ “བོད་ཀྱི་སྐད་ཡིག་གི་བཀོལ་སྤྱོད་དར་ཁྱབ་གཏོང་ཕྱོགས་ཐད་བཟང་ཕྱོགས་ཀྱི་གོམ་སྟབས་” ཤིག་ཡིན་པར་དགའ་བསུ་ཞུ་བཞིན་ཡོད་ལ། དེ་དང་ཆབས་གཅིག་དེ་ནི་པེ་ཅིན་གྱི་ “དྲིལ་བསྒྲགས་ཀྱི་ལག་ཆ་” ཞིག་ཏུ་འགྱུར་སྲིད་པར་ཡང་དོགས་པ་ཟ་བཞིན་ཡོད་འདུག

ཨ་རིའི་ཝིར་ཇི་ནི་ཡའི་གཙུག་ལག་སློབ་ཆེན་དུ་ཡོད་པའི་རྒྱ་ནག་གི་བརྒྱུད་ལམ་ཐོག་ཆེད་ལས་མཁས་པ་ཨན་ནེ་ཀོ་ཀཱ་སི་ཡིས་ཀྱང་དེ་ནི་ “ཚན་རྩལ་གྱི་གོང་འཕེལ་ཆེན་པོ་” ཞིག་དང་ “དམ་བསྒྲགས་མེད་པའི་གནད་དོན་ཁག་འདྲི་རྩད” ཐོག་ཕན་ཐོགས་ཆེན་པོ་ཞིག་ཡོང་སྲིད་པར་འགྲེལ་བརྗོད་བྱེད། འོན་ཀྱང་ཁོ་མོས་བརྗོད་ན་དེས་རྒྱ་གཞུང་གི་ལྟ་ཚུལ་དང་མཐུན་པའི་དྲ་གནས་ཁག་གི་ཕྱོགས་སུ་ “དྲ་རྒྱའི་གནས་འཕྲིན་གྱི་འགྲོ་འོང་བསྐྱར་དུ་ཁ་བསྒྱུར་བྱེད་སྟབས་བདེ་རུ་གཏོང་གི་ཡོད་སྲིད།” ཅེས་བརྗོད་འདུག

བོད་རང་དབང་ལས་འགུལ་ཁང་གིས་བྱེད་ཐབས་དེ་ནི་སྲིད་བྱུས་ཀྱི་འཕོ་གྱུར་ཞིག་མཚོན་ཡོད་པར་བརྗོད། “ལོ་ངོ་བཅུ་ཕྲག་འགའ་ཞིག་གི་རིང་ནུས་ཤུགས་ཡོད་རྒུས་བོད་ཀྱི་སྐད་ཡིག་ལ་བཙན་གནོན་བྱས་རྗེས། ད་ཆ་རྒྱ་ནག་གིས་སྐད་ཡིག་དེར་ཕན་གྲོགས་བྱེད་པའི་མཐོང་སྣང་བསྐྲུན་རྒྱུར་དོ་ནན་བྱེད་བཞིན་ཡོད་པ་རེད།” ཅེས་མགྲིན་ཚབ་ཨ་ལི་སི་ཊར་གྱིས་སྦི་སྦི་སི་ལ་བརྗོད། ཁོས་ད་དུང་ “བོད་ནང་གི་བྱ་དངོས་ཐམས་ཅད་དང་མཚུངས་པར་སྐད་ཡིག་ཀྱང་ཆབ་སྲིད་ཀྱི་གོ་དོན་གྱིས་སྦགས་ཡོད། པེ་ཅིན་གྱིས་འཕེལ་རྒྱས་གང་རུང་ཞིག་ལ་ཆོག་མཆན་སྤྲོད་རྒྱུ་ལས་ལྡོག་སྟེ་དེ་དག་ལ་སྟངས་འཛིན་བྱ་འདོད་ཡོད་པ་རེད།” ཅེས་བརྗོད་འདུག

དེས་འཚོལ་བཤེར་གྱི་གྲུབ་འབྲས་ཅི་འདྲ་ཞིག་འདོན་གྱི་ཡོད་དམ།

ཏཱ་ལའི་བླ་མའི་(ཁོང་ནི་བོད་ཀྱི་ཆོས་དང་སྔོན་ཆད་སྲིད་ཀྱི་དབུ་ཁྲིད་ཡིན་ཞིང་། ༡༩༥༠ ནང་རྒྱ་ནག་གིས་བོད་སར་དབང་སྒྱུར་བྱས་རྗེས་བོད་ནས་བྲོས་འབྱོལ་དུ་ཕེབས་)ཐ་སྙད་འཚོལ་བཤེར་སྐབས་འདྲ་པར་སྟབས་བདེ་ཞིག་མངོན་བཞིན་མཆིས།

གྷོ་གྷིལ་དང་མ་འདྲ་བར་ཡོངས་འཛིན་གྱིས་(ཏཱ་ལའི་བླ་མའི་)འདྲ་པར་གཅིག་ཁོ་ན་ལས་གསལ་སྟོན་མི་བྱེད་ཅིང་། གྷོ་གྷིལ་གྱིས་བཅུ་ཕྲག་འགའ་ཞིག་གསལ་སྟོན་བྱེད་པ་རེད།

“ང་ཚོས་དེ་སྔོན་པའེ་ཏུ་ནས་མཐོང་བ་བཞིན་དྲ་གནས་དེར་བཀོལ་སྤྱོད་ཀྱི་ཕན་ནུས་ཆེན་པོ་ཞིག་ལྡན་ནའང་། འཚོལ་བཤེར་གྱི་བྱ་བ་རྣམས་དབུས་གཞུང་གི་སྟངས་འཛིན་འོག་ཇི་ཙམ་གྱིས་མང་བ་ཚུད་ན། དེ་ཙམ་གྱིས་ཐ་སྙད་བྱེ་བྲག་པ་ཞིག་བཀག་སྡོམ་བྱེད་རྒྱུར་ལས་སླ་བ་ཡོད་པ་རེད།” ཅེས་ཀོ་ཀཱ་སི་ཡིས་སྦི་སྦི་སི་ལ་བརྗོད།

འོན་ཀྱང་གདོང་འདུས་སྐྱིད་འཛོམས་ལགས་ཀྱིས་བརྗོད་ན། རང་ཉིད་ཀྱི་སྐད་ཡིག་ནང་དུ་ཡོད་པའི་འཚོལ་བཤེར་མ་ལག་གསར་པ་དེ་ལ་ “བོད་ནང་དུ་དྲ་ཐོག་གི་ཤེས་བྱར་གོ་རྟོགས་ཟབ་མོ་ལྡན་པའི་བོད་རིགས་གཞོན་སྐྱེས་ཤེས་ཡོན་ཅན་མང་དག་ཅིག་གིས་དགའ་བསུ་ཞུས་ཡོད་པ་རེད།” ཁོ་མོས་ “འདི་ནི་རྒྱ་གཞུང་གིས་བོད་ནང་དུ་ཡོད་པའི་ཤེས་ཡོན་ལྡན་པའི་མི་སྣ་རྩེ་ཕུད་རྣམས་ཀྱི་ཡིད་དབང་འགུགས་ཐབས་བྱེད་བཞིན་པ་ཞིག་ཏུའང་ལྟ་ཆོག་པ་རེད་” ཅེས་བརྗོད། ད་དུང་ཁོང་མོས་ “ཉེ་བའི་ལོའི་ནང་བོད་ནང་གི་གཞོན་སྐྱེས་ཤེས་ཡོན་ཅན་མང་དག་ཅིག་གིས་དྲ་ཟིན་དང་། སྒྱུ་རྩལ། རོལ་དབྱངས་བཅས་བརྒྱུད་དེ་བོད་ནང་དུ་བཟུང་བའི་རྒྱ་ནག་གི་སྲིད་བྱུས་ལ་རང་རང་གི་སྐྱོན་བརྗོད་རྣམས་གསལ་སྟོན་བྱས་ཡོད།” ཅེས་བརྗོད་འདུག

བོད་ནང་དུ་དྲ་རྒྱར་འཇུག་ལམ་སྔར་བས་རྒྱ་ཆེར་འགྲོ་བཞིན་པ་དང་སྦྲགས་མངའ་ཁུལ་དེའི་སྐད་ཡིག་གི་ནང་དུ་དྲ་གནས་དང་། དྲ་ཟིན། སྤྱི་ཚོགས་བརྒྱུད་ལམ་བཅས་ཀྱི་ཁ་གྲངས་ཀྱང་རིམ་པས་འཕེལ་བཞིན་ཡོད་སྟབས། རྒྱ་ནག་གི་དབང་འཛིན་པ་ཚོས་དེ་དག་ནང་སྤེལ་བའི་ནང་དོན་རྣམས་ལ་དོ་སྣང་ཞིབ་ཚགས་བྱེད་ཤུགས་ཆེ་རུ་བཏང་ཡོད།

དྲ་གནས་གང་རུང་ཞིག་གིས་པེ་ཅིན་མི་དགའ་བའི་ནང་དོན་ཞིག་སྤེལ་ཚེ་དྲ་གནས་དེ་སྒོ་རྒྱག་པ་དང་། དེ་རིགས་སྤེལ་མཁན་དང་འབྲེལ་ཡོད་ཚང་མར་ཉེས་ཆད་དམ་ཡང་ན། བཙོན་འཇུག་བྱེད་པའི་ཉེན་ཁར་སྐྱེལ་ངེས་ཡིན་པ་སྨོས་མ་དགོས་པ་ཞིག་རེད།

རྒྱ་ནག་གིས་སྔོན་ཚུད་ནས་རྒྱུན་དུ་ ‘མེ་འགོག་གྱང་ཆེན་’(Great Firewall)ཞེས་སུ་འབོད་པ་དེ་བཀོལ་སྤྱོད་བྱེད་བཞིན་ཡོད་སྟབས། དེས་རྒྱ་ནག་གི་ཆབ་འབངས་རྣམས་པེ་ཅིན་གྱིས་མ་དགའ་བར་ངོས་འཛིན་པའམ། ཡང་ན་ཆབ་སྲིད་དང་དཔལ་འབྱོར་གྱི་དམིགས་ཡུལ་ལ་དོ་ཕོགས་གཏོང་གཞིར་ངོས་འཛིན་པའི་དྲ་གནས་རྣམས་ལ་འཇུག་རྒྱུར་འགོག་གི་ཡོད་པ་རེད།

སྒྲོམ་གཞི་དེ་འདྲ་ཞིག་གི་འོག་སྐྱེ་བོ་མང་དག་ཅིག་གིས་ཡོངས་འཛིན་ནི་རྒྱ་ནག་གི་ཆབ་འབངས་རྣམས་ཀྱིས་དྲ་རྒྱའི་སྟེང་ཅི་ཞིག་བྱེད་བཞིན་པར་ཤུགས་རྐྱེན་དང་བཀག་སྡོམ་བྱེད་ཐབས་འཕར་མ་ཞིག་གི་ཚུལ་དུ་ལྟ་བར་ཡ་མཚན་རྒྱུ་གང་ཡང་མེད་དོ།།