འོས་བསྡུའི་སྒྲིག་གཞི་བསྐྱར་བཅོས་ཐོག་བོད་རྒྱལ་ཡོངས་མང་གཙོ་ཚོགས་པའི་བསམ་འཆར།

༄༅།། མཆོག་ཏུ་བཀུར་འོས་དཔལ་ལྡན་བོད་མི་མང་སྤྱི་འཐུས་གྲོས་ཚོགས་ཀྱི་ཆེད་བཙུགས་འོས་བསྡུའི་སྒྲིག་གཞི་བསྐྱར་བཅོས་ཚོགས་ཆུང་གིས་ཚོགས་གཙོའི་དབུས་ཚོགས་མི་ལྷན་རྒྱས་ལ་ཆེད་ཞུ།

དེ་ནས་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་གྲོས་ཆོད་ཨང་ ༢༠༡༦།༡༦།༡།༥(༩)དགོངས་དོན་བཞིན་འོས་བསྡུའི་ལས་དོན་དང་འབྲེལ་པའི་དོན་ཚན་གཉིས་ཀྱི་ཐོག་བོད་མི་སྤྱི་ཡོངས་ལ་དགོངས་འཆར་ཇི་ཡོད་ཡིག་ཐོག་དགོས་པའི་ཕྱི་ལོ་ ༢༠༡༦ ཟླ་ ༦ ཚེས་ ༢༠ ཉིན་བཀོད་ཁྱབ་ཕེབས་བ་བཞིན་འདི་ག་བོད་ཀྱི་རྒྱལ་ཡོངས་མང་གཙོ་ཚོགས་པའི་ས་གནས་དང་འབྲེལ་མཐུད་པ་ཁག་ ༣༢ དང་། དབུས་རྒྱུན་ཟུར་པ་རྣམ་པ་བཅས་འབྲེལ་ཡོད་ཡོངས་ལ་ཡིག་ངག་གཉིས་ཐོག་ནས་སྤྱི་ཟླ་ ༨ པའི་ཚེས་ ༡༥ ནང་ཚུད་དགོངས་འཆར་ཇི་ཡོད་ཡིག་ཐོག་དབུས་སྤྱི་ཁྱབ་ལས་ཁུངས་ལ་གནང་སྐྱོང་ཡོང་པའི་བཀོད་ཁྱབ་འབོད་སྐུལ་ཞུས་དོན་བཞིན་འོས་བསྡུའི་སྒྲིག་གཞི་བསྐྱར་བཅོས་སྐོར་ལ་བོད་ཀྱི་རྒྱལ་ཡོངས་མང་གཙོ་ཚོགས་པའི་བསམ་འཆར་ཕྱོགས་བསྡོམས་ཞུས་པ་དེའི་མཉམ་ལྷན་སྦྱར་ཞུས་པ་ནང་གསལ་ལགས་ན། དེ་དོན་དགོངས་བཞེས་གནང་སྐྱོང་ཡོང་བ་མཁྱེན།

འོས་བསྡུའི་སྒྲིག་གཞི་བསྐྱར་བཅོས་སྐོར་ལ་བསམ་འཆར་གཤམ་གསལ།

༡༽ བཙན་བྱོལ་བོད་མིའི་བཅའ་ཁྲིམས་ཀྱི་ལེའུ་དང་པོ། གཞི་རྩའི་ལམ་སྟོན། དོན་ཚན་དང་པོའི་ནང་གསེས་༢ ནང་༸གོང་ས་༸སྐྱབས་མགོན་ཆེན་པོ་མཆོག་གིས་དགོས་གལ་ནམ་གཟིགས་སྐབས་དང་། འགོ་འཁྲིད་རྣམས་ཀྱིས་གསོལ་འདེབས་ནམ་ཞུས་ལ་བོད་མི་རིགས་དང་། སྤྱི་ཚོགས། བསྟན་སྲིད་ཀྱི་གལ་ཆེའི་ལས་དོན་ཐོག་གྲོས་ཚོགས་དང་བཀའ་ཤག་གི་དགོངས་པའི་དཔྱད་གཞིར་དགོངས་འཆར་གནང་རྒྱུ་ཞེས་འཁོད་པའི་ཆ་སྐྱེན་འོག་སྐབས་ ༡༦ པའི་གྲོས་ཚོགས་ཚོགས་འཐུས་ ༢ པའི་ཚོགས་མགོན་དུ་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཞབས་གསོར་བཀའ་དྲིན་ཆེ་ནས་བཀའ་སློབས་ལམ་སྟོན་གནང་སྐྱོང་ཡོང་པའི་གསོལ་འདེབས་ཞུ་དགོས་རྒྱུ།

༢༽ སྲིད་སྤྱི་གཉིས་ཀྱི་འོས་བསྡུ་དུས་གཅིག་ལ་མཉམ་དུ་མ་ཡིན་པར་དུས་ཡུན་ཟླ་ངོ་གསུམ་གྱི་བར་ཁྱད་བཞག་གནང་ཐུབ་ན་ད་ཕན་མང་ཚོགས་ནང་སྲིད་སྐྱོང་སྐོར་ལ་བསམ་ཚུལ་དང་བགྲོ་གླེང་དོ་སྣང་ཤུགས་ཆེར་བྱེད་པ་ལས་སྤྱི་འཐུས་ཀྱི་སྐོར་ལ་དོ་སྣང་ཆུང་སྐྱོན་འདུག་པས། དེ་དོན་སྒྲིག་གཞི་བསྐྱར་བཅོས་ཡོང་པའི་དགོངས་བཞེས་དགོས་རྒྱུ།

༣༽ སྲིད་སྤྱི་གཉིས་ཀྱི་འོས་བསྡུའི་དུས་ཚོད་རྒྱ་གར་ནང་གནས་པའི་བོད་མི་མང་ཆེ་བ་དགུན་ཚོང་གི་དུས་ཚོད་ཁེལ་གྱི་ཡོད་ལྟབས་འོས་བསྡུའི་སྐབས་མི་མང་མཉམ་བཞུགས་བྱེད་རྒྱུར་སྤྱི་སྒེར་གཉིས་ལ་མཐུས་བཤོར་དང་དཀའ་ངལ་ཡོད་པ་དངོས་ཡོད་ཡིན་པར་བརྟེན། སླད་ཕྱིན་འོས་བསྡུའི་དུས་ཚོད་དགུན་ཚོང་གི་སྐབས་མ་ཁེལ་བ་ཞིག་འོས་བསྡུའི་སྒྲིག་གཞི་ནང་ཁ་གསལ་ངེས་པར་དུ་དགོས་པའི་དགོངས་བཞེས་གནང་དགོས་རྒྱུ།

༤༽ གཞི་རྩའི་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་ ༡༢ པའི་གཞི་རྩའི་རང་དབང་དང་ཐོབ་ཐང་གཞན་ཁག་ཞེས་པའི་ནང་གསལ་བཞིན་མང་ཚོགས་ཀྱི་རང་དབང་ལ་བཀག་འགོག་མི་མཆོག་ཀྱང་སྲིད་སྤྱི་འོས་མི་འདོན་པའི་སྐབས་ཆོལ་ཁ་དང་། ལུང་མཚན། ཆོས་ལུགས། ཕོ་མོ། རྒན་གཞོན་དབྱེར་མེད་ཀྱི་ཚོགས་པ་སྒྲིག་འཛུགས་ཁག་ནས་འོས་མི་འདོན་མཆོག་པ་ལས་ཆོལ་ཁ་དང་། ལུང་མཚན་ཤོག་ཁག་གི་རྣམ་པས་ཐོག་ནས་སྲིད་སྤྱིའི་འོས་མི་བཏོན་ན་བཙན་བྱོལ་བོད་མིའི་རྡོག་རྩ་ཆིག་བསྒྲིལ་ཀྱི་ནུས་པ་ཉམས་རྒུད་འགྲོ་རྒྱུའི་གཞི་བརྩ་ལྟ་བུ་ཆགས་རྒྱུར་ཉམ་མྱོང་དངོས་བྱུང་ལ་བརྟེན་འབྱུང་འགྱུར་གནད་དོན་དེ་རིགས་ལ་དབུས་འོས་བསྡུ་ལྷན་ཁང་ནས་སྟངས་འཛིན་ནན་པོ་དགོས་པའི་འོས་བསྡུའི་སྒྲིག་གཞི་ནང་ཁ་གསལ་འཁོད་གནང་དགོས་རྒྱུ།

༥༽ བཀའ་ཤག་སྐབས་ ༡༣ པའི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་གིས་ཕྱི་ལོ་ ༢༠༡༠ ཟླ་ ༩ ཚེས་ ༢ ཉིན་གྱི་མང་གཙོ་དབུ་བརྙེས་ནས་མི་ལོ་ ༥༠ འཁོར་པའི་གཞུང་འབྲེལ་དུས་ཆེན་མཛད་སྒོའི་བཀའ་ཤག་གི་གསུང་བཤད་ནང་༼ད་ལྟ་སྲིད་དོན་གྱི་ཚོགས་པ་གཅིག་རང་ཡོད་པ་དེ་རང་གིས་ཁུངས་སྐྱེལ་ཐུབ་ངེས་ཡིན༽ ཅེས་གཞུང་འབྲེལ་གི་བོད་ཀྱི་རྒྱལ་ཡོངས་མང་གཙོ་ཚོགས་པ་དེ་བཞིན་སྲིད་དོན་ཚོགས་པ་ཞིག་ལ་ངོས་བཞེས་གནང་པ་བཞིན་ད་ཡོད་བཀའ་སྤྱི་གཉིས་ཀྱི་འོས་བསྡུའི་སྒྲིག་གཞི་ནང་། འབྱུང་འགྱུར་སྲིད་སྤྱི་གཉིས་ཀྱི་འོས་མི་འདོན་ཕྱོགས་ཀྱང། ད་ལྟའི་སྲིད་དོན་ཚོགས་པ་གཅིག་པོ་བོད་ཀྱི་རྒྱལ་ཡོངས་མང་གཙོ་ཚོགས་པ་ངོས་ཞེས་ཡོང་སླད་འོས་བསྡུའི་སྒྲིག་གཞི་ནང་ཁ་གསལ་ངེས་པར་དུ་འཁོད་དགོས་རྒྱུ།

༦༽ སྲིད་དོན་ཚོགས་པ་མེད་པའི་ད་ཡོད་གྲོས་ཚོགས་ཀྱི་ལམ་ལུགས་འདི་བཞིན་སྲིད་དོན་ཚོགས་པ་ རང་བཞིན་ལྡན་པའི་ལམ་ལུགས་ཐོག་འགྲོ་རྒྱུའི་ཆེད་ཁྲིམས་འཆར་གྲོས་ཚོགས་ནང་སླེབས་ཐབས་གནང་དགོས་རྒྱུའི་འབོད་བསྐུལ་ཞུ་རྒྱུ།

༧༽ སྲིད་སྤྱི་འོས་བསྡུའི་སྐབས་སུ་གཞི་རིམ་མང་གཙོའི་ཆབ་སྲིད་གོ་རྟོགས་མཐོར་འདེགས་ཀྱིས་ལས་འགུལ་ཆེད་བོད་ཀྱི་རྒྱལ་ཡོངས་མང་གཙོ་ཚོགས་པ་ལྟ་བུ་སྲིད་དོན་ཚོགས་པར་གྲོན་དངུལ་གྲོས་ཚོགས་ཀྱི་སྔོན་རྩིས་བཀའ་འཁྲོལ་ནང་རྩིས་འགོ་ལོགས་སུ་དགོས་རྒྱུ།

༨༽ སྲིད་སྤྱི་འོས་འདེམས་སྐབས་སུ། འོས་བསྡུ་ལས་ཁང་གི་དབུས་ས་གཉིས་ཀྱི་ཕྱག་ལས་གནང་ཕྱོགས་ཐད་ཁྲིམས་སྒྲིག་ལ་མཐུན་མིན་དང་། བཀའ་ཁྱབ་ཚགས་ཚུད་ཡོང་མིན་ལ་རྟག་དཔྱད་གནང་མཁན་གྱིས་ཟུར་དཔང་ཚོགས་ཆུང་ཞིག་ཟུར་བཙུགས་དགོས་པ་དང་། ཚོགས་ཆུང་དེའི་རྟག་དཔྱད་བརྒྱུད་འོས་བསྡུའི་ལས་རིམ་ལ་སྐྱོན་གནད་ཚབས་ཆེན་དངོས་སུ་ར་འཕྲོད་བྱུང་ཚེ་ཚོགས་ཆུང་དེའི་ཆེས་མཐོའི་ཁྲིམས་ཞིབ་ཁང་ལ་ཛ་དྲག་ཞུ་བསྐུལ་གྱི་འོས་བསྡུའི་འགན་འཛིན་དང་འགན་འཛིན་ལས་རོགས་ཀྱི་ཕྱག་ལས་བར་མཚམས་བཞག་རྒྱུའི་སྒྲིག་གཞི་སྣོན་འཇོགས་དགོས་རྒྱུ།

༩༽ བཙན་བྱོལ་བོད་མིའི་བཅའ་ཁྲིམས་དོན་ཚན་༢༡ ནང་གསལ་སྲིད་སྐྱོང་དང། བཀའ་བློན་གྱི་འོས་ཆོས་ནང་རང་ལོ་སོ་ལྔ་ཧྲིལ་པོར་ལོན་པ་གསལ་ཡོད་པ་དང། འོས་བསྡུའི་སྒྲིག་གཞི་ལེའུ་དྲུག་པ། དོན་ཚན་དྲུག་ཅུ་རེ་གསུམ་པ། སྲིད་སྐྱོང་གི་འོས་ཆོས་ནང་རང་ལོ་ ༣༥ ཧྲིལ་པོར་ལོན་པ་གསལ་བ་དང་། འོས་བསྡུའི་སྒྲིག་གཞི་ལེའུ་བཞི་པ། དོན་ཚན་སོ་དགུ་པ། བོད་མི་མང་སྤྱི་འཐུས་ཀྱི་འོས་ཆོས་ནང་རང་ལོ་ ༢༥ ཧྲིལ་པོར་ལོན་དགོས་པ་ཅེས་འཁོད་ཡོད་པ་ལས་ཧྲིལ་པོ་ལོན་པའི་གཞི་འཛིན་སའི་ཡིག་ཆ་གང་ལ་ངོས་འཛིན་བྱེད་དགོས་མིན་ད་ཕན་ཁྲིམས་སྒྲིག་ནང་ཁ་གསལ་མེད་པར་བརྟེན་སླད་ཕྱིན་འོས་བསྡུའི་སྒྲིག་གཞི་ནང་ཁ་གསལ་དགོས་རྒྱུ།

༡༠༽ ད་བར་བོད་མི་མང་སྤྱི་འཐུས་སྐབས་ ༡༤ དང་ ༡༦ གཉིས་ཀྱི་ཚོགས་གཙོ་རེ་མོས་གནང་བཞིན་པ་དེ་དག་བཙན་བྱོལ་བོད་མིའི་བཅའ་ཁྲིམས་དང་། འོས་བསྡུའི་སྒྲིག་གཞི་གང་དུ་ཡང་ཁྲིམས་སྒྲིག་ཁ་གསལ་མེད་པར་བརྟེན་འབྱུང་འགྱུར་གནས་ཚུལ་དེ་རིགས་མི་ཡོང་པའི་ཆེད་འོས་བསྡུའི་སྒྲིག་གཞི་ནང་ངེས་པར་དུ་ཁ་གསལ་དགོས་རྒྱུ།

༡༡༽ སྲིད་སྤྱི་གཉིས་ཀྱི་སྔོན་འགྲོ་དང་དངོས་གཞིའི་འོས་བསྡུའི་དུས་ཡུན་ཧ་ཅང་རིང་དྲག་པའི་བསམ་ཚུལ་གཅིག་འགྱུར་ལ་བརྟེན་འོས་བསྡུའི་སྒྲིག་གཞི་ནང་དུས་ཡུན་ཐུང་ངུར་གཏོང་གནང་དགོས་རྒྱུ།

༡༢༽ སྲིད་སྤྱི་གཉིས་ཀྱི་འོས་བསྡུའི་སྐབས་འོས་མི་ཕན་ཚུན་བགྲོ་གླེང་གོ་སྒྲིག་ཞུ་མཁན་ཚོགས་པ་སྒྲིག་འཛུགས་དང་། མི་སྒེར། གསར་འགྱུར་བརྒྱུད་ལམ་ཁག་བཅས་ནས།   ད་ཕན་གོ་སྒྲིག་ཞུ་བཞིན་པ་དེ་རིགས་ཀྱི་གཞི་རྩའི་བགྲོ་གླེང་གི་དམིགས་ཡུལ་དང་། འཆར་གཞི་གཞིར་ཟུང་མ་སོང་པར་གང་ཟག་སྒེར་གྱི་ལྟ་ཚུལ་ལ་འགྲོ་ཡི་ཡོད་པའི་རྣམ་པ་ཤུགས་ཆེ་པས་དེའི་རིགས་དབུས་འོས་བསྡུའི་ཁྱབ་ཁུངས་དབུས་ས་གཉིས་ཀྱི་ནན་གཏན་གྱི་སྟངས་འཛིན་ནན་པོ་དགོས་བ་འོས་བསྡུའི་སྒྲིག་གཞི་ནང་ཁ་གསལ་དགོས་རྒྱུ།

༡༣༽ འོས་བསྡུ་སྒྲིག་གཞིའི་དོན་ཚན་ ༢༤ ནང་གསེས་ ༤ པ་ནང་གསལ། གཞུང་འབྲེལ་ལས་བྱེད་ཞེས་པའི་ངོ་བོ་དང་ཁྱབ་ཚད་ཁ་གསལ་དགོས་རྒྱུ།

༡༤༽ འོས་བསྡུའི་སྒྲིག་གཞི་དོན་ཚན་དྲུག་པ། དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དང་འགན་འཛིན་ལས་འཕར་གྱི་འོས་ཆོས་ནང། སྲིད་དོན་ཚོགས་པ་གང་རུང་གི་ཚོགས་མི་མ་ཡིན་པ་གསལ་པར་ད་ཡོད་འོས་བསྡུའི་སྒྲིག་གཞི་ཁྱབ་ཁུངས་ནང་སྲིད་དོན་ཀྱི་ཚོགས་པ་གང་ལ་ངོས་འཛིན་གནང་གི་ཡོད་མིན་ཁ་གསལ་དགོས་རྒྱུ།

༡༥༽ དབུས་འོས་བསྡུ་ལྷན་ཁང་ནས་ཀྱང་སྲིད་སྤྱི་གཉིས་ཀྱི་འོས་བསྡུ་ཆེན་མོའི་སྐབས་དུས་བསྟུན་འོས་བསྡུའི་སྒྲིག་གཞི་གཏན་ཕེབས་གནང་སྐབས་གང་ཟག་སྒེར་ལ་བརྟེན་ནས་ཐག་གཅོད་གནང་པའི་རྣམ་པ་མ་ཐོན་པ་གནང་གལ་མ་ཟད། ཐག་གཅོད་གང་གནང་པ་ཁྲིམས་སྒྲིག་དང་མཐུན་པ་དགོས་རྒྱུ་སྨོས་མེད་ཐོག་དབུས་ས་གཉིས་ཀྱི་འོས་བསྡུའི་འགན་འཁུར་ཕྱག་ལས་གནང་མཁན་ཡོངས་རྫོགས་ཀྱི་སྒྲིག་གཞི་ལྟར་ཕྱག་བསྟར་དོན་འཁྱོལ་ངེས་པར་དགོས་རྒྱུ།

བོད་ཀྱི་རྒྱལ་ཡོངས་མང་གཙོ་ཚོགས་པས་དབུས་སྤྱི་ཁྱབ་རྒྱུན་ལས་ཁང་ནས།

                                                           ཕྱི་ལོ་ ༢༠༡༦ ཟླ་ ༨ ཚེས་ ༣༠ ལ།

                                                                                               ཕུལ།