རྒྱལ་ཁབ་ཉི་ཤུའི་ཚོགས་ཆེན་རྒྱ་ནག་ཏུ་ཚོགས།

ཨ་རིའི་སྲིད་འཛིན་ཨོ་བྷ་མས་གསར་འགོད་རང་དབང་གི་གླེང་རྙོག་ལ་བརྟེན་ནས་ཨ་རི་དང་རྒྱ་ནག་གཉིས་བར་གྱི་འབྲེལ་ལམ་ཐད་དོ་ཕོག་འགྲོ་མི་སྲིད་པའི་སྐོར་བརྗོད་འདུག

ཟླ་འདིའི་ཕྱི་ཚེས་ ༤ ནས་ ༥ བར་ཉིན་གཉིས་རིང་འཛམ་གླིང་སྟབས་ཆེན་རྒྱལ་ཁབ་ ༢༠ དཔལ་འབྱོར་ཚོགས་ཆེན་ཐེངས་ ༡༡ པ་དེ་རྒྱ་ནག་ཀྲེ་ཅིང་ཞིང་ཆེན་གྱི་ཧང་ཀྲུའུ་གྲོང་ཁྱེར་དུ་ཚོགས་ཡོད་པ་དང་། ད་ལོའི་ཚོགས་ཆེན་སྟེང་འཛམ་གླིང་མཉམ་འབྲེལ་རྒྱལ་ཁབ་ (G20) ཁོངས་གཏོགས་རྒྱལ་ཁབ་ཨ་རི་དང་ཡུ་རོབ་མཐུན་ཚོགས། ཨུ་རུ་སུ་དང་རྒྱ་ནག་སོགས་གཙོས་པའི་རྒྱལ་ཁབ་ཁག་ ༢༠ དང་། དམིགས་བསལ་སྐུ་མགྲོན་དུ་ཨ་ཧྥི་རེ་ཁ་མཉམ་འབྲེལ་སྲིད་གཞུང་གཙོ་བའི་རྒྱལ་ཁབ་ཁག་ ༨ དང་། རྒྱལ་སྤྱིའི་སྒྲིག་འཛུགས་ཁག་ནས་འཛམ་གླིང་དངུལ་ཁང་། རྒྱལ་སྤྱིའི་དངུལ་ལོར་ཐེབས་རྩ་ཁང་དང་མཉམ་འབྲེལ་རྒྱལ་ཚོགས་སོགས་སྒྲིག་འཛུགས་ཁག་ ༨ གྱི་དབུ་ཁྲིད་དང་སྐུ་ཚབ་བཅས་ཁྱོན་དབུ་ཁྲིད་ ༣༦ ལྷག་མཉམ་ཞུགས་གནང་ཡོད་འདུག

ཚོགས་ཆེན་ཐོག་རྒྱ་ནག་གི་སྲིད་འཛིན་ཞི་ཅིན་ཕིན་གྱིས། དེ་སྔའི་རྒྱལ་སྤྱིའི་ཚོང་ལས་གྲོས་ཆོད་ཁག་ཅིག་བསྒྲགས་ཏེ། རྒྱལ་སྤྱིའི་མ་དངུལ་སྒྲིག་འཛུགས་ཁག་ལ་བཅོས་བསྒྱུར་དང་རྒྱལ་སྤྱིའི་ཉོ་འཚོང་དཔྱ་ཁྲལ་ལ་གཡོལ་མི་ཆོག་པ། རྒྱལ་ཁབ་སོ་སོའི་ལྐོག་ཟ་རུལ་སུངས་ལ་གདོང་ལེན་དང་། མ་འོངས་དཔལ་འབྱོར་མཉམ་ལས་ནང་འཛུལ་ཞུགས་རྒྱལ་ཁབ་ཁག་གི་དཔལ་འབྱོར་ཉེས་དོན་གུ་ཡངས་གཏོང་ཐབས་མེད་པ། འཛམ་གླིང་ཤར་ནུབ་རྒྱལ་ཁབ་ཁག་ཚང་མ་གོ་ལའི་དཔལ་འབྱོར་འཕེལ་རྒྱས་གཏོང་ཐབས་སུ་ཁ་ཕྱོགས་དགོས་ལུགས་སོགས་བཤད་འདུག

ཨ་རིའི་སྲིད་འཛིན་ཨོ་བྷ་མས་ནམ་རྒྱུན་ཕྱིའི་རྒྱལ་ཁབ་ཁག་གི་ཆབ་སྲིད་དབུ་ཁྲིད་ཚོར་ཐུག་འཕྲད་སྐབས་སུ། ཕོ་བྲང་དཀར་པོའི་གསར་འགོད་རང་དབང་ཐད་རྩོད་གླེང་འབྱུང་བཞིན་ཡོད་པ་དང་། ཕོ་བྲང་དཀར་པོའི་ངོས་ནས་གསར་འགོད་རང་དབང་དེ་གཙོ་བོར་འཛིན་གྱི་ཡོད་ཀྱང་། གསར་འགོད་རང་དབང་གི་གླེང་རྙོག་ལ་བརྟེན་ནས་ཨ་རི་དང་རྒྱ་ནག་གཉིས་བར་གྱི་འབྲེལ་ལམ་ཐད་དོ་ཕོག་འགྲོ་མི་སྲིད་སྐོར་སོགས་བརྗོད་འདུག

ཟུར་དུ་ཚོགས་པའི་ཚོགས་འདུའི་སྟེང་། རྒྱ་ནག་གི་སྲིད་འཛིན་དང་ལྷོ་ཀོ་རི་ཡའི་སྲིད་འཛིན་གཉིས་ཐུག་འཕྲད་སྐབས། ཞི་ཅིན་ཕིན་གྱིས་ལྷོ་ཀོ་རི་ཡའི་ནང་ཨ་རིའི་མེ་ཤུགས་འཕུར་མདེལ་སྔོན་འགོག་གི་སྲིད་ཇུས་དེ་ལ་རྒྱ་ནག་གིས་མཐའ་གཅིག་ཏུ་ངོ་རྒོལ་ཡོད་སྐོར་བཤད་འདུག་ལ། ཨ་རིའི་སྲིད་འཛིན་དང་ཨུ་རུ་སུའི་སྲིད་འཛིན་གཉིས་ཐུག་འཕྲད་སྐབས་ཨོ་བྷ་མས་སེ་རི་ཡའི་ནང་གི་དྲག་ཆས་སྔོན་འགོག་གི་གྲོས་ཆོད་དེར་མོས་མཐུན་ཡོད་སྐོར་བརྗོད་ཡོད་པ་རེད།

གནས་ཚུལ་ལྟར་ན། ད་ལོའི་ཚོགས་ཆེན་ཐེངས་ ༡༡ པ་མ་ཚོགས་པའི་ཉིན་འགའི་གོང་ནས། པེ་ཅིན་གཞུང་གིས་ཧང་ཀྲུའུ་གྲོང་ཁྱེར་གྱི་མཁའ་དབུགས་འབག་བཙོག་ཉུང་དུ་གཏོང་ཆེད། ཧང་ཀྲུའུ་གྲོང་ཁྱེར་གླ་གཏོང་རླངས་འཁོར་འགོག་སྡོམ་དང་། ཨར་ལས་བཟོ་སྐྲུན་ལས་རིགས་ཁག་གི་ལས་མཚམས་བཞག་སྟེ་གཟའ་འཁོར་གཅིག་རིང་གུང་གསེང་བཏང་བ་དང་། ལྷག་པར་དུ་གྲོང་ཁྱེར་དེའི་ལྕགས་རིགས་བཟོ་སྐྲུན་དང་ཐོན་སྐྱེད་ཁག་མཚམས་འཇོག་ཏུ་བཅུག་ཡོད་པ་དང་། ཟླ་འདིའི་ཚེས་ ༣ ཉིན་ཨ་རིའི་སྲིད་འཛིན་ཨོ་བྷ་མ་དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་ཀྱིས་ན་ནིང་ཧྥ་རིན་སའི་རྒྱལ་ས་ཕ་རི་སིར་ཚོགས་པའི་གོ་ལའི་གནམ་གཤིས་འགྱུར་ལྡོག་སྐོར་གྱི་ཚོགས་ཆེན་སྟེང་གཏན་འབེབས་བྱས་པའི་ཕ་རི་སི་གྲོས་ཆོད་ (Paris Agreement) སྒྲོག་སྦྱངས་བྱས་ཡོད་པ་དང་། གྲོས་ཆོད་དེ་ལ་ཨ་རི་དང་རྒྱ་ནག་གཉིས་ཀྱིས་མོས་མཐུན་བྱས་རྗེས། འཛམ་གླིང་ཤར་ནུབ་ཀྱི་ཕྱོགས་འབྲེལ་རྒྱལ་ཁབ་ ༢༦ གིས་ཀྱང་མོས་མཐུན་ཡོད་པའི་མིང་རྟགས་བཀོད་ཡོད་པ་དང་། ཨ་རི་དང་རྒྱ་ནག་གཉིས་ནི་འཛམ་གླིང་སྟེང་གི་བཟོ་ལས་ཐོན་སྐྱེད་ཆེས་ཤོས་ཆགས་ཀྱི་ཡོད་པ་དང་འབྲེལ་ཏེ། ཨ་རིའི་ནང་མཁའ་དབུགས་འབག་བཙོག་ཆགས་པའི་ཚད་རིམ་བརྒྱ་ཆ་ ༡༨ དང་རྒྱ་ནག་ནང་བརྒྱ་ཆ་ ༢༠ ཟིན་གྱི་ཡོད་འདུག

ད་ལོའི་དཔལ་འབྱོར་ཚོགས་ཆེན་སྐོར་གྱི་བསྒྲགས་གཏམ་ནང་། རྒྱལ་ཁབ་སོ་སོའི་ནང་དཔལ་འབྱོར་ཁྲོམ་རའི་དཔྱ་ཁྲལ་ལ་གཡོལ་མི་ཆོག་པ་དང་། རྒྱལ་སོ་སོས་རང་རྒྱལ་གྱི་བཟོ་ལས་ཐོན་སྐྱེད་སྲུང་སྐྱོབ་བྱེད་ཆེད་ཕྱིའི་དངོས་ཟོག་ནང་འདྲེན་གྱི་ཁྲལ་འབབ་མང་རུ་བཏང་མི་ཆོག་པ། རྒྱལ་སྤྱིའི་དཔལ་འབྱོར་གོང་འཕེལ་ཡོང་ཆེད་རྒྱལ་ཁབ་སོ་སོའི་ཁྲལ་འབབ་སྲིད་ཇུས་ལ་ལེགས་བཅོས་གཏོང་རྒྱུ། རིགས་ཚན་རིང་ལུགས་པས་རྒྱལ་སྤྱི་ཅན་གྱི་ཁེ་ལས་ལ་འགོག་རྒོལ་བྱེད་པར་གདོང་ལེན་བྱེད་དགོས་པ་དང་། འཛམ་གླིང་སྐྱབས་བཅོལ་བར་རྒྱབ་སྐྱོར་གྱི་ནུས་ཤུགས་ཆེ་རུ་གཏོང་རྒྱུ་སོགས་འཁོད་འདུག

ཚོགས་ཆེན་འདི་མ་འཚོགས་གོང་ལ་ཨ་རིའི་གྲོས་ཚོགས་དང་། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་ཁག དེ་བཞིན་བོད་དོན་རྒྱབ་སྐྱོར་ཚོགས་པ་བཅས་ཀྱིས་སྲིད་འཛིན་ཨོ་བྷ་མ་ཐེངས་འདིར་རྒྱ་ནག་ཏུ་སྐྱོད་སྐབས། རྒྱ་ནག་གི་སྲིད་འཛིན་ཞི་ཅིན་ཕིན་ལ། བོད་དང་ཡུ་གུར་སོགས་གྲངས་ཉུང་མི་རིགས་ཀྱི་གནད་དོན་དང་། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་དང་། དེ་བཞིན་གསར་འགོད་རང་དབང་བཅས་ཀྱི་སྐོར་གླེང་དགོས་པའི་འབོད་སྐུལ་ཤུགས་ཆེན་ཞུས་པ་རེད།

གསར་འགོད་པ། པདྨ་རྒྱལ།