ཨུ་རུ་སུ་དང་རྒྱ་ནག་མཉམ་འབྲེལ་དམག་སྦྱོང་།

ཨུ་རུ་སུ་དང་རྒྱ་ནག་གཉིས་མཉམ་འབྲེལ་ཐོག་དམག་སྦྱོང་ཞིག་རྒྱ་ནག་ལྷོ་རྒྱུད་མཚོ་ཁུལ་དུ་མགོ་བཙུགས་ཡོད་པ་དང་། དམག་སྦྱོང་དེའི་དམིགས་འབེན་གཙོ་བོ་ཨ་རི་གཙོས་པའི་ཕྱིའི་རྒྱལ་ཁབ་ཁག་གི་དམག་དཔུང་སྟོབས་ཤུགས་ལ་ཡ་ལན་སློག་ཐབས་ཤིག་ཡིན་འདུག

རྒྱ་ནག་ལྷོ་རྒྱུད་ནངས་མོའི་ཚགས་པར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ནས་ཀུང་ཏུང་ཞིང་ཆེན་ཀྲན་ཅང་ (Zhanjiang) གྲུ་ཁར། ཨུ་རུ་སུ་དང་རྒྱ་ནག་གཉིས་ཀྱིས་ཉིན་ ༨ རིང་གི་དམག་སྦྱོང་མགོ་བཙུགས་ཡོད་པ་དང་། དམག་སྦྱོང་དེ་ནི་རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་དང་འབྲེལ་བའི་ཕྱིའི་རྒྱལ་ཁབ་ཁག་གི་དམག་དཔུང་སྟོབས་ཤུགས་ལ་དམིགས་པ་ཞིག་ཡིན་ཞིང་། ཐེངས་འདིའི་དམག་སྦྱོང་ཁྲོད་ཨུ་རུ་སུ་དང་རྒྱ་ནག་གི་མཁའ་མཚོ་གཉིས་ཀྱི་དྲག་ཆས་དམག་དཔུང་ཁག་མཉམ་ཞུགས་བྱས་ཡོད་འདུག

རྒྱ་ནག་མི་དམངས་བཅིངས་འགྲོལ་དམག་ཟེར་བའི་མགྲིན་ཚབ་པ་ལང་ཡང་ (Liang Yang) ཟེར་བ་ཞིག་གིས། ཨུ་རུ་སུ་དང་རྒྱ་ནག་གཉིས་མཉམ་འབྲེལ་དམག་སྦྱོང་ཁྲོད། མཁའ་མཚོ་གཉིས་ཀྱི་དམག་དཔུང་གིས། མཚོ་ཐོག་དམག་གྲུ་དང་ཆུ་འཛུལ་དམག་གྲུ། མཁའ་དམག་གནམ་གྲུ་སོགས་ཀྱི་དམག་སྦྱོང་བྱེད་ཀྱིན་ཡོད་ཚུལ་བཤད་འདུག

རྒྱ་ནག་གཞུང་ཕྱོགས་ནས་ཐེངས་འདིའི་དམག་སྦྱོང་དེ་ནི་ཕྱིའི་རྒྱལ་ཁབ་ཁག་ལ་དམིགས་པ་ཞིག་མིན་ལུགས་བཤད་ཡོད་ནའང་། རྒྱ་ནག་གི་དམག་དོན་རྟོགས་ཞིབ་པ་ཟུར་བ་ཡུ་ཀང་ (Yue Gang) ཟེར་བ་ཞིག་གིས། ཨུ་རུ་སུ་དང་རྒྱ་ནག་གཉིས་མཉམ་འབྲེལ་དམག་སྦྱོང་དེ་ནི་ཨ་རི་གཙོས་པའི་ཕྱིའི་རྒྱལ་ཁབ་ཁག་གི་དམག་དཔུང་སྟོབས་ཤུགས་ལ་ཡ་ལན་སྤྲོད་ཐབས་ཤིག་ཡིན་ལུགས་བཤད་འདུག

གནས་ཚུལ་ལྟར་ན། ཕྱི་འབྲེལ་དང་དམག་དོན་ཐད་ནས་ནམ་རྒྱུན་ཨུ་རུ་སུ་དང་རྒྱ་ནག་གཉིས་མཉམ་འབྱེལ་གྱིས་ནུབ་གླིང་རྒྱལ་ཁབ་ཁག་གི་དྲག་པོའི་དམག་དཔུང་ལ་ཡ་ལན་སློག་བཞིན་ཡོད་པ་དང་། ད་ལོའི་ཕྱི་ཟླ་ ༨ ནང་ཨུ་རུ་སུ་དང་རྒྱ་ནག་གཉིས་མཉམ་འབྲེལ་ཐོག་ཨུ་རུ་སུའི་ལྷོ་རྒྱུད་གྲུ་ཁ་ (Vladivostok) རུ་དམག་སྦྱོང་བྱས་ཡོད་པ་དང་། སྐབས་དེར་ཕྱོགས་གཉིས་ཀྱི་དམག་ཆས་གྲུ་གཟིངས་ ༢༢ དང་མཁའ་དམག་གནམ་གྲུ་ ༢༠། ཆུ་འཛུལ་དམག་གྲུ་ ༥༠༠ ལྷག་མཉམ་ཞུགས་བྱས་ཡོད་པ་དང་། ན་ནིང་ཡུ་རོབ་ཀྱི་མཚོ་ནག་པོ་ (Black Sea) དང་མཚོ་དཀྱིལ་རྒྱ་མཚོའི་ (Mediterranean) ཁུལ་དུ་དམག་རྩེད་སྦྱོང་བརྡར་བྱས་ཡོད་འདུག

གསར་འགོད་པ། པདྨ་རྒྱལ།