རྒྱ་ནག་གཞུང་ཕྱོགས་ནས་གལ་ཏེ་ཐའེ་ཝན་མཚོ་འགག་གིས་༧གོང་ས་མཆོག་ཐའེ་ཝན་ནང་གདན་ཞུ་ཞུས་པ་ཡིན་ན་ཐའེ་རྒྱ་གཉིས་ཀྱི་འབྲེལ་ལམ་ལ་དོ་ཕོག་འགྲོ་རྒྱུ་ཡིན་ལུགས་བཤད་འདུག
རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་པེ་ཅིན་གྲོང་ཁྱེར་དུ་ཡོད་པའི་ཐའེ་ཝན་ལས་དོན་ཁང་གི་མགྲིན་ཚབ་པ་མ་ཞོ་ཀང་ (Ma Xiaoguang) ཟེར་བ་ཞིག་གིས། རྒྱ་ནག་གཞུང་འབྲེལ་བརྒྱུད་ལམ་ཁག་ཏུ“ཏཱ་ལའི་བླ་མས་གྲྭ་ཆས་གྱོན་ཏེ་ཁ་བྲལ་གྱི་བྱ་འགུལ་སྤེལ་གྱི་ཡོད་པ་དང་། ཐའེ་ཝན་མཚོ་འགག་ཤོག་ཁག་གིས་ཁ་བྲལ་རིང་ལུགས་པ་ཚོ་དང་མཉམ་དུ་བོད་རང་བཙན་གྱི་དཀྲོག་རྐྱེན་བཟོ་བཞིན་ཡོད་པ་དེས་མ་འོངས་པར་ཐའེ་ཝན་མཚོ་འགག་དང་རྒྱ་ནག་སྐམ་ས་ཆེན་མོ་གཉིས་ཀྱི་འབྲེལ་ལམ་ལ་ཤན་ཤུགས་ཚབས་ཆེན་ཐེབས་སྲིད་པས། ང་ཚོས་ཏཱ་ལའི་བླ་མའི་གཟིགས་སྐོར་ལ་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན། ཞེས་བརྗོད་ཡོད་པ་དང་། ཁོའི་སྐད་ཆ་དེ་ནི་ཉེ་ལམ་ཐའེ་ཝན་མཚོ་འགག་གི་སྟོབས་ཤུགས་གསར་བའི་ཚོགས་པའི་ (New Power Party) གྲོས་ཚོགས་འཐུས་མི་སྐུ་ཞབས་ཧྥ་རི་ཌེ་ལེམ་ (Freddy Lim) མཆོག་དང་ཐའེ་ཝན་དམངས་གཙོ་ཡར་ཐོན་ཚོགས་པའི་གྲོས་ཚོགས་འཐུས་མི་ལྕམ་སྐུ་ཀོ་ལ་སི་ཡོ་ཊ་ཀ་ (Kolas Yotaka) རྣམ་གཉིས་བཞུགས་སྒར་དུ་༧གོང་ས་མཆོག་ལ་མཇལ་བཅར་སྐབས་སུ། ཁོང་རྣམ་པ་གཉིས་ནས་༧གོང་ས་མཆོག་ཐའེ་ཝན་ནང་ཆིབས་སྒྱུར་བསྐྱང་རྒྱུ་དང་། ཐའེ་ཝན་མི་མང་གི་ངོས་ནས་བོད་དོན་ཐོག་སྔར་ལས་ལྷག་པར་རྒྱབ་སྐྱོར་གནང་རྒྱུ་ཡིན་སྐོར་བརྗོད་པ་དང་འབྲེལ་ཏེ་བཤད་པ་ཞིག་ཡིན་འདུག
གཟའ་མིག་དམར་ཉིན་ཐའེ་ཝན་ཕྱི་སྲིད་བློན་ཆེན་ཌ་བེ་ཌི་ལི་ (David Lee) ཡིས་ཐའེ་ཝན་གྲོས་ཚོགས་འཐུས་མི་ཚོར་གལ་ཏེ་ཏཱ་ལའི་བླ་མ་ཐའེ་ཝན་ནང་ཕེབས་རྒྱུ་གཏན་འཁེལ་ཡོད་ན། ཕྱི་སྲིད་ལྷན་ཁང་གིས་ལས་དོན་དེའི་ཐོག་བསྐྱར་ཞིབ་ལེགས་པོ་གནང་རྒྱུ་ཡིན་ཚུལ་བཤད་འདུག
རང་མིང་བཀོད་མེད་པའི་ཐའེ་ཝན་ཕྱི་སྲིད་ལྷན་ཁང་གི་མགྲིན་ཚབ་བུད་མེད་ཅིག་གིས། གལ་ཏེ་ཏཱ་ལའི་བླ་མ་མཆོག་ཐའེ་ཝན་ནང་ཕེབས་པའི་ཐོངས་མཆན་ཞུས་ཡོད་ཚེ། ཐའེ་ཝན་གཞུང་ནས་ཕྱི་འབྲེལ་སྲིད་ཇུས་གཞིར་བཟུང་གི་ཐོག་ནས་ཁོང་ལ་ཐོངས་མཆན་སྤྲོད་ངེས་ཡིན་སྐོར་བརྗོད་འདུག
གནས་ཚུལ་ལྟར་ན། རྒྱ་ནག་གཞུང་གིས་རྒྱ་ནག་རྒྱལ་ཁབ་གཅིག་གི་ལམ་ལུགས་འོག་ཐའེ་རྒྱ་གཉིས་ཀྱི་འབྲེལ་ལམ་རྒྱུན་སྐྱོང་དགོས་ལུགས་བཤད་པ་དེ་ལ་ཐའེ་ཝན་སྲིད་གཞུང་གསར་བས་ངོས་ལེན་བྱས་མེད་སྟབས། ད་ལོའི་ཕྱི་ཟླ་ ༦ པ་ནས་རྒྱ་ནག་གཞུང་གིས་ཐའེ་རྒྱ་གཉིས་བར་གྱི་འབྲེལ་ལམ་མཚམས་བཞག་ཡོད་འདུག
གསར་འགོད་པ། པདྨ་རྒྱལ།
