ཧྥ་རན་སིའི་གསར་འགོད་པ་ཞིག་གིས་རྒྱ་ནག་གཞུང་གི་དབང་བསྒྱུར་སྲིད་ཇུས་འོག་ལྷ་ས་གཙུག་ཁང་གི་མཚོན་པའི་བོད་ཁུལ་གྱི་དགོན་སྡེ་ཁག་ནང་ཆོས་ལུགས་དད་མོས་རང་དབང་མེད་སྐོར་བརྗོད་འདུག
ཁ་སང་ཧྥ་རན་སིའི་གསར་ཁང་ (AFP) གིས་གནས་ཚུལ་སྤེལ་བ་ལྟར་ན། མིང་བརྗོད་མེད་པའི་ཧྥ་རན་སིའི་གསར་འགོད་པ་ཞིག་གིས། ཁོང་ཉེ་ཆར་བོད་ནང་དུ་བསྐྱོད་ཡོད་པ་དང་། སྐབས་དེར་ཁོང་གིས་བོད་ཁུལ་གྱི་བོད་མི་དང་རྒྱ་རིགས་ཡུལ་སྐོར་སྤྲོ་འཆམ་པ་ཁག་གི་བསམ་ཚུལ་ལ་རྒྱུས་ལོན་བྱས་པ་བརྒྱུད། པེ་ཅིན་གཞུང་གི་དབང་བསྒྱུར་སྲིད་ཇུས་འོག་ལྷ་ས་གཙུག་ལག་ཁང་གི་མཚོན་པའི་བོད་ཁུལ་གྱི་དགོན་སྡེ་ཁག་ནང་ཕྱིའི་རྣམ་པ་ཙམ་ལས་དོན་དངོས་སུ་ཆོས་ལུགས་དད་མོས་རང་དབང་མེད་པ་དང་། པེ་ཅིན་གཞུང་གིས་བོད་མི་གནས་མཇལ་བ་དང་ཕྱིའི་ཡུལ་སྐོར་སྤྲོ་འཆམ་པ་ཚོའི་འགྲོ་འདུག་རང་དབང་ལ་དམ་དྲག་ཤུགས་ཆེན་བྱེད་བཞིན་ཡོད་པ་དང་། ལྷ་ས་གཙུག་ལག་ཁང་གི་གཡས་གཡོན་གང་སར་ལག་ཏུ་མེ་མདའ་བཟུང་བའི་རྒྱ་ནག་དྲག་ཆས་ཉེན་རྟོག་པས་སྐོར་གཡེང་བྱེད་བཞིན་འདུག་སྐོར་བརྗོད་ཡོད་འདུག
ཡང་གསར་འགོད་པ་དེས་རྒྱ་རིགས་ཡུལ་སྐོར་སྤྲོ་འཆམ་པ་དང་བོད་མི་གནས་མཇལ་བ་ཁག་ལ་བཅར་འདྲི་ཞུས་པའི་ནང་། ལྷ་སའི་ཇོ་ཁང་གི་ཕྱི་ཕྱོགས་སུ། ཕ་ཡུལ་སི་ཁྲོན་ཞིང་ཆེན་ནས་ཡིན་པའི་གྲྭ་བ་རང་ལོ་ ༣༣ ཅན་ཞིག་གིས། ང་ཚོར་རང་དབང་ཡོད་པ་མ་རེད། ང་ཚོ་ཞིང་ཆེན་ཁག་ནང་ཕར་ཚུར་འགྲོ་འོང་བྱེད་སྐབས་ཐོབ་ཐང་ལག་འཁྱེར་གྱི་ཨང་གྲངས་དང་རང་མིང་། སྡོད་གནས་ཁ་བྱང་སོགས་གསལ་བོར་དགོས་པ་མ་ཟད། ཐོབ་ཐང་ལག་འཁྱེར་དེ་ལ་ཆོས་དོན་ལས་ཁང་དང་ཞིང་ཆེན་རིམ་པའི་ཉེན་རྟོག་ཁང་གིས་ཆོག་མཆན་བཀོད་དགོས་ཀྱི་ཡོད་སྐོར་བརྗོད་འདུག
རང་ལོ་ ༢༢ ཡིན་པའི་རྒྱ་རིགས་ཕང་མང་ (Peng Meng) ཟེར་བ་ཞིག་གིས། གུང་ཁྲན་ཏང་གི་སྲིད་ཇུས་ཀྱི་རྐྱེན་པས་རྒྱ་ནག་གི་ས་ཁུལ་གཞན་ནང་ཆོས་ཀྱི་ལྟེ་གནས་ཁང་གྲངས་མེད་ཅིག་གཏོར་བཤིག་བཏང་ཚར་ཡོད་ནའང་། བོད་ཁུལ་དུ་ས་གནས་གཞན་དང་ཅུང་མི་འདྲ་བར་བོད་མི་ཚོར་ཆོས་དད་ཆེན་པོ་ཡོད་པ་དང་། བོད་མི་ཚོས་ནང་བསྟན་ཆོས་ལུགས་ལ་བདག་གཅེས་སྲུང་སྐྱོབ་བྱེད་བཞིན་འདུག་སྐོར་བརྗོད་འདུག
གཞན། འཇར་མན་གྱི་མ་ཁི་སེ་མེ་ལེན་ (Maximilian) གཙུག་ལག་སློབ་གཉེར་ཁང་གི་བོད་ཀྱི་ཆོས་ལུགས་དང་བོད་རིག་པའི་ཆེད་མཁས་པ་སྐུ་ཞབས་རྗིན་སི་ཧར་ཊི་མན་ (Jens Hartmann) ཞུ་བ་ཞིག་གིས། བོད་ཁུལ་གྱི་དགོན་སྡེ་དང་ཆོས་ཀྱི་ལྟེ་གནས་ཁག་ཡོངས་སུ་རྒྱ་གཞུང་གིས་བཏང་འཛིན་བྱེད་བཞིན་ཡོད་སྐོར་བརྗོད་འདུག
གནས་ཚུལ་དེའི་མཇུག་ཏུ། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་གནས་ཚུལ་ཞིག་དྲངས་ཡོད་པའི་ནང་། འདས་པའི་ལོ་ངོ་ ༧ རིང་བོད་མི་ ༡༤༥ ཡིས་པེ་ཅིན་གཞུང་གི་དབང་བསྒྱུར་སྲིད་ཇུས་ལ་འདོད་མོས་མེད་པའི་ཐོག་ནས་རང་ལུས་མེར་བསྲེགས་གནང་ཡོད་པ་དང་། རང་ལུས་མེར་སྲེག་གནང་མཁན་བོད་མི་ ༡༡༧ འདས་གྲོངས་ཕྱིན་ཡོད་སྐོར་སོགས་བཀོད་འདུག
གསར་འགོད་པ། པདྨ་རྒྱལ།
