གངས་སྐྱེས་སྒྲུབ་པ་སྐྱབས་ལགས་དང་བསམ་འགྲུབ་ལགས་གཉིས་རྒྱ་གཞུང་ཉེན་རྟོག་པས་བསྐྱར་དུ་འཛིན་བཟུང་བྱས་ཡོད་འདུག
བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཉེ་སྔོན་ཕྱི་ཟླ་ ༡༦ ཉིན་ཀློད་གྲོལ་བཏང་བའི་གངས་སྐྱེས་སྒྲུབ་པ་སྐྱབས་ལགས་ཟླ་འདིའི་ཕྱི་ཚེས་ ༡༧ ཉིན་གྱི་སྔ་དྲོའི་ཆུ་ཚོད་ ༡༠ པའི་ཐོག་བསྐྱར་དུ་རྒྱ་གཞུང་ཉེན་རྟོག་པས་འཛིན་བཟུང་བྱས་ཡོད་པ་དང་། དེ་བཞིན་ཁོང་གི་གྲོགས་པོ་བསམ་འགྲུབ་ལགས་འདི་ལོའི་ཕྱི་ཟླ་ ༨ ཚེས་ ༡༣ ཉིན་བཙོན་གྲོལ་བཏང་ཡོད་ཀྱང་། ཟླ་འདིའི་ཕྱི་ཚེས་ ༡༨ ཉིན་གྱི་ཉིན་རྒྱབ་ཆུ་ཚོད་ ༢ པའི་ཐོག་བསྐྱར་དུ་འཛིན་བཟུང་བྱས་ཡོད་པ་དང་། ཁོང་གཉིས་འཛིན་བཟུང་བྱེད་སྐབས་ཉེན་རྟོག་ཁང་དུ་འགྲོ་དགོས་སྐོར་ཙམ་བརྗོད་ཡོད་པ་ལས་རྒྱུ་མཚན་གང་ཡང་འགྲེལ་བརྗོད་བྱས་མེད་པ་རེད།
གངས་སྐྱེས་སྒྲུབ་པ་སྐྱབས་ལགས་དཀར་མཛེས་ཁུལ་གསེར་རྟ་རྫོང་རགས་བཀྲམ་ཡུལ་ཚོའི་གེ་འཕེན་སྡེ་པ་ནས་ཡིན་པ་དང་། རགས་བཀྲམ་ཡུལ་ཚོའི་སློབ་ཆུང་དང་གསེར་རྟ་རྫོང་སློབ་འབྲིང་བཅས་རིམ་པར་བརྒྱུད་མཐར། དཀར་མཛེས་རྫོང་དུ་ཡོད་པའི་དགེ་འོས་སློབ་གྲྭ་རུ་སློབ་ཐོན་བྱུང་རྗེས། བརྡར་ཚང་དང་ཧོར་ཤུལ་ཡུལ་ཚོ་གཉིས་ཀྱི་སློབ་གྲྭ་རུ་སྔ་རྗེས་དགེ་རྒན་གྱི་ཕྱག་ ལས་གནང་ཡོད་ལ། ཁོང་འཛིན་བཟུང་སྐབས་མཁན་པོ་ཚུལ་ཁྲིམས་བློ་གྲོས་ཀྱིས་བྲག་མགོ་རྫོང་ཁོངས་སུ་ གསར་འཛུགས་གནང་བའི་སློབ་གྲྭ་ཞིག་ཏུ་དགེ་རྒན་གྱི་ཕྱག་ལས་གནང་བཞིན་ཡོད་འདུག
རྩོམ་པ་པོ་ཁོང་གིས་ལས་ཞོར་དུ་རྩོམ་ཡིག་མང་པོ་བྲིས་ཡོད་པ་དང་། ཁོང་གིས་བྲིས་རྩོམ་གནང་པའི་རྩོམ་དེབ་ཁག་ཅིག་ཀྱང་སྤྱི་ཚོགས་ཁྲོད་འགྲེམས་ སྤེལ་བྱས་ཡོད་པ་མ་ཟད། ༢༠༠༨ ལོར་བོད་ས་ཡོངས་སུ་ཞི་རྒོལ་བྱུང་སྐབས་ཀྱི་གནས་ཚུལ་རྣམས་རྩོམ་བྲིས་གནང་སྟེ། << ས་བྱི་ཁྲག་བྲིས་དམར་པོ>> ཞེས་པའི་དཔེ་དེབ་ཁག་ཅིག་ཀྱང་བཏོན་ཡོད་པ་རེད། གཞན་ཡང་། བསམ་འགྲུབ་ལགས་ནི་གསེར་རྟ་རྫོང་མགོན་མཆོག་སྡེ་པ་ནས་ཡིན་པ་རེད།
གསར་འགོད་པ། པདྨ་མཚོ།
