ནུབ་བྱང་མི་རིགས་སློབ་ཆེན་གྱི་བོད་སྐད་ཡིག་རིག་གནས་སློབ་གླིང་གིས་ཆེད་སྦྱོང་སློབ་གྲྭ་གནས་སྤོར་བཏང་སྟེ་ཕྱི་ནང་གི་སློབ་སྦྱོང་མཐུན་རྐྱེན་ཞན་པའི་ཐོག ད་ལོར་སློབ་ཡོན་ཚད་ལས་བརྒལ་བ་བླངས་བ་དང་བོད་རིགས་དགེ་རྒན་ཇེ་ཉུང་དུ་འགྲོ་བཞིན་ཡོད་པའི་རྐྱེན་གྱིས་བོད་རིགས་སློབ་མ་ཚོར་དཀའ་ངལ་འཕྲད་བཞིན་ཡོད་འདུག
ཉེ་སྔོན་ནུབ་བྱང་མི་རིགས་སློབ་གྲྭ་ཆེན་མོའི་བོད་རིགས་སློབ་མ་ཚོས་འབྲེལ་ཡོད་དགེ་རྒན་ཚོར་དཀའ་ངལ་ཡར་ཞུ་བྱས་ཡོད་པ་དང་སྦྲགས། འབྲེལ་ཡོད་དགེ་རྒན་རྣམས་ནས་སོ་སོའི་རྐུབ་སྟེགས་ལ་སྲུང་སྐྱོབ་བྱས་ཏེ་འགན་ལེན་མ་གནང་ཚེ། སློབ་མར་དབང་ཆ་ཆུང་ཡང་མུ་མཐུད་མི་འདོད་པའི་རྣམ་འགྱུར་སྟོན་རྒྱུ་ཡིན་སྐོར་ཞུས་ཡོད་པ་དང་། ཟླ་འདིའི་ཕྱི་ཚེས་ ༡༩ ཉིན། ནུབ་བྱང་མི་རིགས་སློབ་ཆེན་གྱི་བོད་སྐད་ཡིག་རིག་གནས་སློབ་གླིང་གི་སློབ་མ་ཞིག་ནས་གནས་ཚུལ་སྤེལ་བ་ལྟར་ན། ནུབ་བྱང་མི་རིགས་སློབ་ཆེན་མོ་བཙུགས་ནས་ད་ལྟའི་བར་དུ་བོད་ཁུལ་གྱི་ལས་སྣེ་སྣ་མང་ལ་ཞུགས་པའི་ལས་བྱེད་པ་ཕོན་ཆེན་སྐྱེད་སྲིང་བྱས་ཡོད་པ་མ་ཟད། བོད་ཀྱི་རྩོམ་རིག་གི་སྒང་ལ་ངོམ་ཆོག་ཆོག་གི་གྲུབ་འབྲས་ཐོན་ཡོད་ཀྱང་། ད་ལྟ་སློབ་གྲྭའི་ཕྱི་ནང་གསང་གསུམ་ལ་འགྱུར་བ་ཆེན་པོ་བཏང་སྟེ། རྒྱུན་མཐུད་སློབ་གསོ་དང་ལས་རིགས་སྦྱོང་བརྡར་སློབ་གྲྭ་གནས་སྤོར་བཏང་སྟེ་ཕྱི་ནང་གི་སློབ་སྦྱོང་མཐུན་རྐྱེན་ཇེ་ཞན་དུ་སོང་ཡོད་པ་མ་ཟད། དགེ་རྒན་རྣམས་སློབ་གླིང་གསུམ་གྱི་ནང་ཕར་འགྲོ་ཚུར་འོང་བྱས་ཏེ་སློབ་འཁྲིད་བྱེད་པར་དཀའ་ངལ་འཕྲད་ཀྱི་ཡོད་པ་དང་། ད་ལོར་གསར་དུ་བསྡུས་པའི་ཆེད་སྦྱོང་སློབ་མ་ཚོར་སློབ་བསྡུའི་བརྡ་ཐོའི་ནང་གསལ་བའི་སློབ་ཡོན་ལས་ཚད་ལས་བརྒལ་བ་བླངས་ཏེ། ཞིང་འབྲོག་ནས་ཡོང་བའི་སློབ་ཕྲུག་ཚོར་དཀའ་ངལ་འཕྲད་ཡོད་འདུག
ད་ལོར་བོད་སྐད་ཡིག་རིག་གནས་སློབ་གླིང་གི་འགན་འཛིན་བརྗེས་ཏེ་བོད་རིགས་མིན་པ་ཞིག་བསྐོ་བཞག་བྱས་ཡོད་པ་མ་ཟད། འཛིན་བདག་ཚང་མ་རྒྱ་རིགས་ཡིན་ལ། ད་ལོའི་སློབ་འཇུག་ཐོ་འགོད་ཀྱི་སྐབས་སུ་སྔར་གྱི་བོད་རིགས་དགེ་རྒན་རྣམས་མཐོང་རྒྱུ་མེད་པར་རྒྱ་སྐད་བཤད་དེ་ཐོ་འགོད་བྱས་ཡོད་པ་དང་། བོད་ཀྱི་ཞིང་འབྲོག་ཁུལ་ནས་ཡོང་བའི་ཁྱིམ་བདག་དང་སློབ་ཕྲུག་ཚོས་སྐད་བརྡ་མ་འཕྲོད་པའི་དཀའ་ངལ་བྱུང་ཡོད་པ་མ་ཟད།ཐོ་འགོད་སྐབས་མཐའ་འཁོར་དུ་ཉེན་རྟོག་མི་སྣས་ལྟ་སྲུང་བྱས་ཏེ་སྒྲིག་ལམ་བཀའ་བཀོད་འཇོག་པ་སོགས་སློབ་གླིང་དེར་སྔར་བྱུང་མ་མྱོང་བའི་གནས་ཚུལ་བྱུང་ཡོད་སྐོར་དང་། སློབ་འགོ་ཚུགས་ནས་ཉིན་འགའ་འགོར་ཡང་དངོས་འཕར་འཛིན་གྲྭ་སོགས་ལ་སློབ་འཁྲིད་ཐུན་གཅིག་ཀྱང་འཚོགས་མེད་སྟབས། སློབ་མར་འགན་མ་ཁུར་བའི་རྣམ་འགྱུར་གསལ་བོ་ཐོན་ཡོད་ལ། དེ་འདྲ་བྱས་ན་སློབ་མའི་སློབ་སྦྱོང་གི་ཁ་ཕྱོགས་དང་མ་འོངས་པའི་ཕུགས་འདུན་ལ་ཤུགས་རྐྱེན་ངན་པ་ཐེབས་སྲིད་པ་དང་། དེ་བཞིན། བོད་རིགས་དགེ་རྒན་ཇེ་ཉུང་དུ་བཏང་བ་དེས་བོད་ཞིང་འབྲོག་ཁུལ་ནས་ཡོང་བའི་སློབ་མ་ཚོའི་འདུན་པར་གནོད་པ་ཐེབས་སྐོར་བརྗོད་འདུག
ཡང་གནས་ཚུལ་དེའི་ནང་ཕྱི་ལོ་ ༢༠༡༤ དང་ ༢༠༡༦ ལོའི་སློབ་ཡོན་གྱི་འབྱོར་འཛིན་འདྲ་པར་དང་བཅས། ད་ལོར་བོད་སྐད་ཡིག་རིག་གནས་སློབ་གླིང་གི་ཆེད་སྦྱོང（大专）འཛིན་གྲྭ་དང་རྒྱུན་མཐུད་སློབ་གསོའི་ཆེད་སྦྱོང་སློབ་མ། ཆེད་སྦྱོང་དེ་གཉིས་ཀྱི་དངོས་འཕར་སློབ་མ（专升班）སོགས་ཀྱི་སློབ་ཡོན་ཚད་ལས་བརྒལ་བ་ཇེ་མཐོར་སོང་ཡོད་པ་དང་། དེ་སྔ་ལས་རིགས་སྦྱོང་བརྡར་སློབ་གྲྭའི་ཆེད་སྦྱོང་སློབ་མ་རེར་སློབ་ཡོན་ ༤༢༣༠ དང་ཕྱི་སྡོད་སློབ་མ་རེར་ ༣༢༣༠ ཡིན་ཡང་། ད་ལོར་ཆེད་སྦྱོང་སློབ་མ་རེའི་སློབ་ཡོན་ ༧༧༢༠ ལ་འཕར་ཡོད་པ་མ་ཟད། སློབ་མ་ཚོས་ངེས་པར་དུ་ཁ་པར་བྱང་བུ་གསར་པ་ཞིག་ཉོས་ཏེ་བེད་སྤྱོད་གཏོང་དགོས་པ་དང་། གལ་སྲིད་ཁ་པར་མེད་ཚེ་བྱང་བུ་དེ་བེད་སྤྱོད་གཏོང་བར་ཁ་པར་ཡང་ཉོ་དགོས་ཁེལ་གྱི་ཡོད་པས་བྱང་བུ་དང་ཁ་པར་གཉིས་ལ་རྒྱ་སྒོར་ ༥༠༠ ཡིན་སྟབས། ཆེད་སྦྱོང་སློབ་མ་རེས་ཁྱོན་རྒྱ་སྒོར་ ༨༢༢༠ རེ་སྤྲོད་དགོས་ཁེལ་ཡོད་པ་དང་། དེ་བཞིན་དངོས་འཕར་སློབ་མ་དང་ཆེད་སྦྱོང་ལོ་རིམ་གཉིས་པའི་སློབ་ཡོན་ཡང་ཇེ་མཐོར་ཕྱིན་ཡོད་ལ། སློབ་གྲྭའི་ཁོར་ཡུག་གསར་པ་གུ་དོག་པ་དང་དཔེ་མཛོད་ཁང་། ལུས་རྩལ་ར་བ་སོགས་གཅིག་ཀྱང་མེད་སྟབས། སློབ་གྲྭའི་ཕྱི་ནང་གི་མཐུན་རྐྱེན་ལ་བལྟས་ན་སློབ་ཡོན་ཆེན་པོ་དེ་འདྲ་སྤྲོད་དགོས་པའི་རྒྱུ་མཚན་གཏན་ནས་མེད་སྐོར་བརྗོད་འདུག
ནུབ་བྱང་མི་རིགས་སློབ་གྲྭ་ཆེན་མོ་ནི་ཕྱི་ལོ་༡༩༤༩ལོའི་ ཟླ་༧པར་ལས་དོན་གྱི་དགོས་མཁོ་དང་ཡང་སྒོས་ནུབ་བྱང་བོད་རིགས་ས་ཁུལ་དུ་ཆབ་སྲིད་ལས་བྱེད་གསོ་སྐྱོང་བྱ་བར་དམིགས་ཏེ། བཅིངས་འགྲོལ་དམག་རྐང་དམག་དམག་སྡེ་དང་པོ་དང་ཀན་སུའུ་ཞིང་ཆེན་དམག་དོན་དོ་དམ་ཚོགས་པ་ཟུང་འབྲེལ་གྱིས་ལན་ཀྲུའུ་རུ་བོད་རིགས་གནད་དོན་ཞིབ་འཇུག་འཛིན་གྲྭ་གཉེར་བ་སྟེ་ནུབ་བྱང་མི་རིགས་སློབ་ཆེན་གྱི་ས་བོན་ལྟ་བུ་བྱུང་ཡོད་པ་དང་། ལོ་དེའི་ཕྱི་ཟླ་ ༡༡ པའི་ནང་བོད་རིགས་སློབ་མ་བསྡུ་མགོ་བརྩམས་ཡོད་པ་དང་། ཕྱི་ལོ་ ༡༩༥༠ ལོར་ནུབ་བྱང་མི་རིགས་སློབ་གྲྭ་ཆེན་མོ་ཞེས་པའི་མིང་དངོས་སུ་བཏགས་ཏེ་གྲངས་ཉུང་མི་རིགས་ཀྱི་སློབ་གྲྭ་ཆེན་མོ་ཐོག་མ་དེ་ཆགས་ཡོད་པ་རེད།
གསར་འགོད་པ། པདྨ་མཚོ།
