ཐེ་ལན་ཌིའི་གཞུང་གིས་རྒྱ་ནག་གི་བཀའ་ཁྱབ་ལྟར་ཧོང་ཀོང་དམངས་གཙོ་དོན་གཉེར་བ་སྐུ་ཞབས་རྗོ་ཤཱུ་ཝང་ཐེ་ལན་ཌིའི་རྒྱལ་སྤྱིའི་གནམ་ཐང་ནས་གློ་བུར་འཛིན་བཟུང་བཀག་བསྐྱིལ་བྱས་ཡོད་འདུག
བྷེ་བྷེ་སེ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཞོགས་པར་ཧོང་ཀོང་དམངས་གཙོ་དོན་གཉེར་བ་སྐུ་ཞབས་རྗོ་ཤཱུ་ཝང་ (Joshua Wong) ཐེ་ལན་ཌིའི་དམངས་གཙོ་དོན་གཉེར་བ་སྐུ་ཞབས་ཆོ་ཊེ་པ་ཊི་ཕེ་སལ་ (Chotipatpaisal) ལགས་ཀྱིས་གདན་ཞུ་བྱས་པ་ལྟར། ཁོང་ཐེ་ལན་ཌིའི་རྒྱལ་སྤྱིའི་གནམ་ཐང་དུ་འབྱོར་སྐབས། ཐེ་ལན་ཌིའི་གཞུང་གིས་རྒྱ་ནག་གཞུང་གི་བཀའ་ཁྱབ་གཞིར་བཟུང་ཐོག་ཁོང་གློ་བུར་འཛིན་བཟུང་བཀག་བསྐྱིལ་བྱས་ཡོད་འདུག
ཐེ་ལན་ཌིའི་དམངས་གཙོ་དོན་གཉེར་བ་སྐུ་ཞབས་ཆོ་ཊེ་པ་ཊི་ཕེ་སལ་ལགས་ཀྱིས། རྒྱ་ནག་གཞུང་གིས་ཐེ་ལན་ཌིའི་དཔོན་རིགས་ཚོར་ཧོང་ཀོང་དམངས་གཙོ་དོན་གཉེར་བ་སྐུ་ཞབས་རྗོ་ཤཱུ་ཝང་ཐེ་ལན་ཌིར་ཡོང་འཆར་ཡོད་པ་བཀག་སྡོམ་བྱེད་དགོས་པའི་བཀའ་ཁྱབ་བཏང་ཡོད་པ་དང་། ཐེ་ལན་ཌིའི་དབང་འཛིན་དཔོན་རིགས་ཚོས་རྒྱ་ནག་གཞུང་གི་བཀའ་ཁྱབ་དེ་གཞིར་བཟུང་གིས་སྐུ་ཞབས་རྗོ་ཤཱུ་ཝང་གནམ་ཐང་ནས་གློ་བུར་འཛིན་བཟུང་བཀག་བསྐྱིལ་བྱས་ཡོད་སྐོར་བརྗོད་ཡོད་ཀྱང་། ཐེ་ལན་ཌིའི་གཞུང་གིས་གནས་ཚུལ་དེ་ངོས་ལེན་བྱེད་ཀྱིན་མེད་པ་རེད།
རྒྱ་ནག་ནང་གི་འགྲོ་བ་མིའི་ཐོབ་ཐང་ལྟ་ཞིབ་ཚན་པའི་འགན་འཛིན་སོ་ཧྥེ་ཡ་རེ་ཆར་ཌི་སོན་ (Sophie Richardson) ལགས་ཀྱིས་ཐེ་ལན་ཌིའི་དབང་འཛིན་དཔོན་རིགས་ཚོས་སྐུ་ཞབས་རྗོ་ཤཱུ་ཝང་འཛིན་བཟུང་བཀག་བསྐྱིལ་བྱས་པ་དེ་རྒྱ་ནག་གཞུང་གི་བཀའ་བཀོད་ཡིན་སྟབས། ཐེ་ལན་ཌིའི་གཞུང་གིས་སྐུ་ཞབས་རྗོ་ཤཱུ་ཝང་མྱུར་དུ་ཀློད་གྲོལ་བཏང་སྟེ། ཁོང་ལ་འགྲུལ་བསྐྱོད་དང་སྨྲ་བརྗོད་རང་དབང་སྤྲོད་དགོས་སྐོར་བཤད་འདུག
གནས་ཚུལ་ལྟར་ན། འདས་པའི་ལོ་ངོ་འདི་དག་རིང་། ཐེ་ལན་ཌིའི་གཞུང་གིས་རྒྱ་ནག་གཞུང་གི་བཀའ་ཁྱབ་དང་དེའི་ཤན་ཤུགས་འོག་ཡུ་གུར་དང་ཧོང་ཀོང་། ཐའེ་ཝན་སོགས་ཀྱི་རང་དབང་དམངས་གཙོ་དོན་གཉེར་བ་དང་སྐྱབས་བཅོལ་བ་མང་པོ་འཛིན་བཟུང་གིས་ཕྱིར་རྒྱ་ནག་གཞུང་ལ་རྩིས་སྤྲོད་བྱེད་བཞིན་ཡོད་པའི་ཐད་ལ། མཉམ་འབྲེལ་རྒྱལ་ཚོགས་ནས་ཐེ་ལན་ཌིའི་རྒྱལ་སྤྱིའི་ཁྲིམས་དང་འགལ་བའི་བྱ་སྤྱོད་ལ་སྐྱོན་བརྗོད་ཤུགས་ཆེན་བྱེད་ཀྱིན་ཡོད་འདུག
སྐུ་ཞབས་རྗོ་ཤཱུ་ཝང་ལགས་ནི་ཕྱི་ལོ་ ༢༠༡༤ ལོའི་ཆར་གདུགས་འོག་གི་གསར་བརྗེ་ལས་འགུལ་གྱི་སྣེ་འཁྲིད་མཁན་གཙོ་བོ་ཡིན་སྟབས། རྒྱ་ནག་གཞུང་དང་ཕྱོགས་འབྲེལ་རྒྱལ་ཁབ་ཁག་གིས་ཁོང་གི་འགྲུལ་སྐྱོད་ལ་སྟངས་འཛིན་ནན་མོ་བྱེད་ཀྱིན་ཡོད་འདུག
གཞན། ད་ལོའི་ཕྱི་ཟླ་ ༥ ནང་མ་ལེ་ཞེ་ཡའི་རྒྱལ་སར་རྒྱ་ནག་གི་དམངས་གཙོའི་ལམ་ལུགས་སྐོར་གྱི་བགྲོ་གླེང་ཚོགས་འདུ་ཞིག་ཚོགས་པའི་ཐོག་སྐུ་ཞབས་རྗོ་ཤཱུ་ཝང་མཉམ་ཞུགས་བྱེད་དུ་བཅུག་མེད་པར་ཕྱིར་ཕུད་བཏང་ཡོད་འདུག
གསར་འགོད་པ། པདྨ་རྒྱལ།
