རྒྱ་ནག་གི་གནོན་ཤུགས་ལ་མགོ་བསྒུར་མི་སྲིད།

ཐའེ་ཝན་གྱི་སྲིད་འཛིན་ཚའེ་ཡེན་ཝན་ལགས་ཀྱིས་རྒྱ་ནག་གཞུང་གིས་རྒྱལ་ཁབ་ཕན་ཚུན་བར་གྲོས་མོལ་མ་བྱུང་སྔོན་ལ་ཆ་རྐྱེན་མང་པོ་ཞིག་འདོན་གྱི་ཡོད་པ་དེ་འགོག་རྐྱེན་ཞིག་ཆགས་ཀྱི་ཡོད་སྐོར་བརྗོད་འདུག

དེ་རིང་ཨ་རིའི་གསར་དེབ་ཁང་ (Wall Street Journal) ཞེས་པའི་ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝན་ལགས་སུ་བཅར་འདྲིའི་སྐབས་ཁོང་མོས་རྒྱ་ནག་གི་གནོན་ཤུགས་ལ་བརྟེན་ནས་ཐའེ་ཝན་མཚོ་འགག་གིས་རྒྱ་ནག་ལ་མགོ་སྒུར་མི་སྲིད་པ་དང་། ཆབ་སྲིད་ཀྱི་ཆ་རྐྱེན་གང་ཡང་མེད་པའི་ཐོག་ནས་ཐའེ་རྒྱ་གཉིས་བར་འབྲེལ་མོལ་བྱེད་འདོད་ཡོད་སྐོར་བརྗོད་འདུག

གནས་ཚུལ་འདིའི་ནང་ལྕམ་ཚའེ་ཡེན་ཝན་གྱིས་ཐའེ་རྒྱ་གཉིས་ཀྱིས་ཕན་ཚུན་ལ་བསམ་ཤེས་གུ་ཡངས་དགོས་པའི་སྐོར་ལ་ “རྒྱ་ནག་གཞུང་གིས་དེང་གི་ཐའེ་རྒྱ་གཉིས་ཀྱི་གནས་བབ་ལ་ལོག་འགྲེལ་དང་ལོག་དཔྱད། ཡང་ན་རྒྱ་ནག་གཞུང་གི་གནོན་ཤུགས་ལ་བརྟེན་ནས་ཐའེ་ཝན་མཚོ་འགག་གིས་རྒྱ་ནག་ལ་མགོ་སྒུར་སྲིད་པའི་བསམ་བློ་མི་གཏོང་བའི་རེ་བ་ཡོད། དམངས་གཙོའི་སྤྱི་ཚོགས་ནང་གནོན་ཤུགས་འདི་འདྲའི་རིགས་ནམ་རྒྱུན་ཡོང་གི་ཡོད་ཅིང་། ཐའེ་ཝན་མཚོ་འགག་གི་སྲིད་འཛིན་ལས་ཁུངས་གང་གིས་ཀྱང་ཐའེ་ཝན་མི་མང་གི་བསམ་ཚུལ་ལས་ལྡོག་པའི་ཐོག་གཅོད་གང་ཡང་བྱེད་མི་ཐུབ་”ཅེས་བརྗོད་འདུག

ཐའེ་རྒྱ་གཉིས་བར་གྱི་ཚོང་འབྲེལ་སྐོར་ལ་ཁོང་མོས་ “ཐའེ་ཝན་ཕྱོགས་ནས་དེ་སྔོན་གྱི་ཁས་ལེན་ཁག་ཐག་གང་བྱུང་བ་དེར་འགྱུར་ལྡོག་མེད་ལ། ཕྱོགས་གཉིས་ཀྱི་བཟང་ཕྱོགས་ཀྱི་འབྲེལ་ལམ་ལའང་འགྱུར་ལྡོག་གང་ཡང་བྱུང་མེད། ཡིན་ནའང་ང་ཚོས་རྒྱ་ནག་གི་གནོན་ཤུགས་ལ་བསྟུན་མི་སྲིད་ལ། ང་ཚོ་དེ་སྔོན་གྱི་རྩོད་རྙོག་དང་ཁ་གཏད་ཀྱི་ལམ་དུའང་བསྐྱོད་མི་སྲིད” ཅེས་བརྗོད་འདུག

རྒྱ་ནག་གི་དབང་སྒྱུར་སྲིད་ཇུས་འོག་ཧོང་ཀོང་གྲོང་ཁྱེར་དང་ཐའེ་ཝན་མཚོ་འགག་གཉིས་ཀྱི་གནས་བབ་ཞིབ་བསྡུར་བྱས་པའི་ཐད་ནས་ཁོང་མོས་ “ཐའེ་ཝན་མཚོ་འགག་ནི་ཧོང་ཀོང་སྲིད་འཛིན་ས་ཁུལ་དང་མི་འདྲ་བར་རང་སྲིད་རང་སྐྱོང་དང་རང་བཙན་རྒྱལ་ཁབ་ཅིག་ཡིན་མོད། འོན་ཀྱང་ཧོང་ཀོང་མི་མང་གི་མངོན་འདོད་ཀྱང་དམངས་གཙོ་དང་རང་དབང་། འགྲོ་བ་མིའི་ཐོབ་ཐང་བཅས་ཡིན་པ་རེད་ ” ཅེས་བརྗོད་འདུག

ཟླ་སྔོན་མར་རྒྱ་ནག་གཞུང་གིས་ཐའེ་ཝན་མཚོ་འགག་ནི་རྒྱ་ནག་གི་མངའ་ཁུལ་ཞིག་ཡིན་ལུགས་བཤད་དེ། ཐའེ་ཝན་མཚོ་འགག་རྒྱལ་སྤྱིའི་ཚོང་ཟོག་སྐྱེལ་འདྲེན་སྒྲིག་འཛུགས་ (ICAO) ཀྱི་ཚོགས་ཆེན་ཐོག་མཉམ་ཞུགས་བྱེད་དུ་མ་བཅུག་པའི་སྐོར་ལ་ཁོང་མོས། “ང་ཚོར་སྔར་ལས་ལྷག་པར་རྒྱལ་སྤྱིའི་སྤྱི་ཚོགས་ཀྱི་རྒྱབ་སྐྱོར་དགོས་ཀྱི་ཡོད”ཅེས་བརྗོད་འདུག

རྒྱ་ནག་གི་ལྷོ་རྒྱུད་མཚོ་ཁུལ་གྱི་བདག་དབང་རྩོད་གླེང་བྱེད་བཞིན་པའི་སྐོར་ལ་ཁོང་མོས་ “མངའ་ཁོངས་རྩོད་གླེང་བྱེད་མཁན་རྒྱལ་ཁབ་གཞན་དག་དང་འདྲ་བར། ཐའེ་ཝན་མཚོ་འགག་ཀྱང་རྒྱལ་ཁབ་སོ་སོའི་མངའ་ཁོངས་བདག་དབང་གི་གྲོས་ཆོད་ཁག་གི་ཆ་ཤས་ཤིག་ཆགས་ཡོད་སྟབས། ཐའེ་ཝན་ལའང་མངའ་ཁོངས་རྩོད་གླེང་གི་ཆ་ཤས་ལེན་དུ་འཇུག་དགོས་” ཞེས་བརྗོད་འདུག

དེ་བཞིན་ཐའེ་ཝན་མཚོ་འགག་གི་དཔལ་འབྱོར་འཚོལ་སྒྲུབ་ཐད་ལ་ཁོང་མོས་ “ཐའེ་ཝན་མཚོ་འགག་གི་དཔལ་འབྱོར་ཡར་རྒྱས་གཏོང་ཐབས་སུ། ཐའེ་ཝན་གཞུང་གིས་ལྷོ་ཤར་ཨེ་ཤ་ཡའི་རྒྱལ་ཁབ་ཁག་ནང་ཉོ་འཚོང་གི་མ་དངུལ་འཛུགས་སྐྲུན་དང་ཚོང་འབྲེལ་མཐོར་འདེགས་བཏང་སྟེ། ལོ་རེའི་དཔལ་འབྱོར་ཡར་རྒྱས་ཀྱི་ཚད་གཞི་བརྒྱ་ཆ་ ༡.༢ ཟིན་དགོས་ཀྱི་འདུག” ཅེས་དང་། ཡང་ཁོང་མོས་ “རྒྱ་ནག་གིས་ཡུལ་ལུང་གཞན་དག་དང་མཉམ་དུ་བཞག་པའི་ཚོང་འབྲེལ་གྲོས་ཆོད་མང་པོ་ཞིག་ཆབ་སྲིད་དང་འབྲེལ་བ་ཡོད་སྟབས། ཐའེ་ཝན་མཚོ་འགག་གི་ངོས་ནས་དཔལ་འབྱོར་ཁྲོམ་ར་རྒྱ་བསྐྱེད་གཏོང་ཐབས་མ་གཏོགས་ཆབ་སྲིད་རྙོག་འཛིང་ནང་ཞུགས་འདོད་མེད” ཅེས་བརྗོད་འདུག

གནས་ཚུལ་འདིའི་མཇུག་ཏུ་ལྕམ་ཚའེ་ཡེན་ཝན་ལགས་ཀྱིས་ “རྒྱ་ནག་གཞུང་གིས་ནམ་རྒྱུན་རྒྱལ་ཁབ་ཕན་ཚུན་བར་མིང་དོན་མཚུངས་པའི་གྲོས་མོལ་མ་བྱུང་སྔོན་ལ་ཆབ་སྲིད་ཀྱི་ཆ་རྐྱེན་མང་པོ་ཞིག་འདོན་གྱི་ཡོད་པ་དེ། ངས་བལྟས་ན་རྒྱལ་ཁབ་ཕན་ཚུན་བར་བཟང་ཕྱོགས་ཀྱི་འབྲེལ་ལམ་ཡོང་བའི་འགོག་རྐྱེན་ཆེན་པོ་ཞིག་ཆགས་ཀྱི་འདུག” ཅེས་སོགས་བརྗོད་འདུག

གསར་འགོད་པ། པདྨ་རྒྱལ།