ད་ཆར་ཨ་རིའི་སྲིད་འཛིན་སྐབས་ ༥༨ པའི་འོས་བསྡུ་ཆེན་མོའི་ཚ་རླབས་ཁྲོད་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་(Hillary Clinton)མཆོག་གི་ཕྱི་སྲིད་དང་ནང་སྲིད། རྒྱལ་སྤྱིའི་ཐོག་གི་གནད་དོན་ཆེ་ཁག་བཅས་ཀྱི་ཐད་ལ་འཛིན་པའི་སྲིད་བྱུས་ལངས་ཕྱོགས་དང་ཨ་རིའི་མི་མང་གི་གླེང་ཕྱོགས་ཁག་ཅིག་བསྡུ་བསྒྲིགས་བྱས་ཡོད།
ལྕམ་ཧེ་ལ་རེ་མཆོག་གིས་ཨེ་ཤ་ཡ་ཞི་བདེ་མཚོ་ཁུལ་གཙོས་པའི་ཨ་རིའི་ཕྱོགས་མཐུན་རྒྱལ་ཁབ་ཉི་ཧོང་དང་ལྷོ་ཀོ་རི་ཡ། དེ་བཞིན། ཨ་རི་དང་རྒྱ་ནག་གཉིས་བར་གྱི་འབྲེལ་ལམ་ཐད་འཛིན་པའི་སྲིད་ཇུས་ལངས་ཕྱོགས་སྐོར་ལ། ཕྱི་ཟླ་ ༨ ཚེས་ ༢༨ ཉིན་གྱི་གཏམ་གླེང་སྐབས་སུ། ཨ་རི་དང་རྒྱ་ནག་གཉིས་ཐུན་མོང་གི་ཁེ་ལས་ཐད་ནས་ཕྱོགས་གཉིས་བར་གྱི་མཉམ་ལས་མཐོར་འདེགས་གཏོང་རྒྱུ་དང་། ལྷོ་ཀོ་རི་ཡ་དང་ཉི་ཧོང་སོགས་ཨ་རིའི་ཕྱོགས་མཐུན་རྒྱལ་ཁབ་ཁག་དང་མཉམ་འབྲེལ་གྱིས་ཨེ་ཤ་ཡ་ཞི་བདེ་མཚོ་ཁུལ་དུ་ཨ་རིའི་དམག་དཔུང་གི་སྟོབས་ཤུགས་ཆེ་རུ་གཏོང་རྒྱུ་དང་། རྒྱ་ནག་གིས་ཨ་རིའི་གཞུང་འབྲེལ་དྲ་ལམ་ནང་ལྐོག་འཛུལ་བྱས་ཏེ་ཚོང་དོན་གསང་བ་རྐུ་འཁྱེར་གྱི་དཀའ་རྙོག་ལ་གཏོང་ལེན་བྱེད་རྒྱུ། དེ་བཞིན་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་ལ་སྔར་ལས་ལྷག་པར་གནོན་ཤུགས་སྤྲོད་རྒྱུ་ཡིན་སྐོར་དང་། ཕྱི་ཟླ་ ༧ ཚེས་ ༡༢ ཉིན་སྤེལ་བའི་བསྒྲགས་གཏམ་ཞིག་གི་ནང་། ཁོང་མོས་རྒྱ་ནག་གི་ལྷོ་རྒྱུད་མཚོ་ཁུལ་གྱི་མཚོ་འགྲུལ་རང་དབང་རྩོད་གླེང་གི་གནད་དོན་དེ་ཨ་རིའི་དཔལ་འབྱོར་ཁེ་ལས་དང་འབྲེལ་བ་དམ་ཟབ་ཡོད་སྟབས། རྒྱལ་སྤྱིའི་མཚོ་འགྲུལ་ཁྲིམས་སྒྲིག་གཞིར་བཟུང་གིས་མཚོ་ཁུལ་དེའི་བདག་དབང་རྩོད་གླེང་ཞི་འགྲིག་ཡོང་ཐབས་ལ་འབད་བརྩོན་ཞུ་རྒྱུ་ཡིན་སྐོར་སོགས་བརྗོད་འདུག
ཕྱི་ཟླ་ ༨ ཚེས་ ༡ ཉིན་གྱི་བཅར་འདྲི་ཞིག་གི་སྐབས་སུ། ལྕམ་ཧེ་ལ་རེ་མཆོག་གིས་ཨུ་རུ་སུའི་གསང་བའི་ལས་ཁུངས་ཁག་གིས་ཨ་རིའི་དམངས་གཙོ་ཚོགས་པའི་རྒྱལ་ཡོངས་སྲིད་འཛིན་འོས་བསྡུ་ལྷན་ཚོགས་ཀྱི་གློག་ཀླད་ནང་ལྐོག་འཛུལ་བྱས་ཏེ་གསང་བའི་གློག་འཕྲིན་མང་པོ་ཕྱི་བསྒྲགས་བྱ་བའི་ངན་ཇུས་འཐེན་པ་དང་། ཨུ་རུ་སུས་ཨ་རིའི་རྒྱལ་ཡོངས་འོས་བསྡུ་ལ་ཐེ་གཏོགས་བྱས་པའི་གནད་དོན་དེ་ཧ་ཅང་ཛ་དྲག་ཆགས་ཡོད་པ་མ་ཟད། གནད་དོན་དེ་ནི་ཨ་རིའི་རྒྱལ་ཡོངས་བདེ་འཇགས་ཐད་ཀྱི་དཀའ་རྙོག་ཅིག་ཡིན་ནའང་། སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་མཆོག་གིས་ད་དུང་ཨུ་རུ་སུའི་སྲིད་འཛིན་ཕུ་ཊེན་ལ་རྒྱབ་སྐྱོར་བྱས་ཏེ་རྙོག་གླེང་བཟོ་ཡི་ཡོད་སྐོར་བརྗོད་འདུག
ལྕམ་ཧེ་ལ་རེ་མཆོག་གིས་དཀྱིལ་ཤར་ཡུལ་གྲུ་ཁག་ནང་འབྱུང་བཞིན་པའི་འཁྲུག་རྩོད་སྐོར་ལ། ད་ལོའི་ཕྱི་ཟླ་ ༣ ཚེས་ ༢༢ ཉིན་གྱི་གཏམ་བཤད་ནང་། གལ་ཏེ་ཁོང་མོར་ཨ་རིའི་སྲིད་འཛིན་རྒྱལ་ཁ་ཐོབ་པ་ཡིན་ན། ཁོང་མོས་ད་ལྟའི་ཨ་རིའི་གཞུང་གིས་དཀྱིལ་ཡུལ་གྲུ་ཁག་གི་ཐོག་འཛིན་པའི་སྲིད་ཇུས་ལ་འགྱུར་བ་བཏང་སྟེ། ལེ་བྷི་ཡ་དང་ཡ་མན། ཨེ་རག་དང་སི་རི་ཡ་བཅས་ཀྱི་ནང་འབྱུང་བཞིན་པའི་འཁྲུག་རྩོད་ཞི་འཇགས་གཏོང་རྒྱུ་ཡིན་སྐོར་དང་། ཕྱི་ཟླ་ ༨ ཚེས་ ༢༤ ཉིན་གྱི་གཏམ་བཤད་ནང་། གལ་ཏེ་ཨེ་རན་རྒྱལ་ཁབ་ཀྱིས་རྡུལ་ཕྲན་མཚོན་ཆར་བརྟེན་ནས་ཨེ་སི་རལ་ལ་བཙན་འཛུལ་བྱས་ན། ཨེ་རན་གཞུང་གིས་ཤེས་དགོས་པ་ཞིག་ལ། ཨ་རིའི་གཞུང་གིས་མཐའ་གཅིག་ཏུ་ཨེ་རན་ལ་བཙན་འཛུལ་བྱ་ངེས་ཡིན་སྐོར་བརྗོད་འདུག
ཕྱི་ཟླ་ ༩ པའི་ཚེས་ ༢༤ ཉིན་ནེའུ་ཡོག་དུས་བབ་གསར་ཁང་གིས་སྤེལ་བའི་དཔྱད་རྩོམ་ཞིག་གི་ནང་། འདས་པའི་མི་ལོ་བརྒྱད་རིང་གི་དམངས་གཙོ་ཚོགས་པའི་སྲིད་དབང་འོག དཀྱིལ་ཤར་ཡུལ་གྲུ་ཁག་དང་ཨེ་ཤ་ཡ། ཨུ་རུ་སུ་དང་ཡུ་རོབ་ཤར་རྒྱུད། དེ་བཞིན། དབྱིན་ཡུལ་བཅས་ཀྱི་དམག་འཁྲུག་དང་འཇིགས་སྐུལ་དྲག་སྤྱོད་པར་འཐབ་འཛིང་བྱེད་ཕྱོགས་ཐད་ནས་རྒྱལ་སྤྱིའི་ཐོག་གི་ཨ་རིའི་སྟོབས་ཤུགས་ཉམས་རྒུད་དུ་འགྲོ་བཞིན་ཡོད་པ་དང་། འདས་པའི་མི་ལོ་ ༤༠ རིང་ལ་ལྕམ་ཧེ་ལ་རེ་མཆོག་གིས་གནད་དོན་དེའི་ཐོག་ཞིབ་འཇུག་རྒྱུས་ལོན་དང་ཁ་གསལ་ལན་འདེབས་གནང་ཡོད་སྟབས། ཁོང་མོའི་སྲིད་དོན་ལངས་ཕྱོགས་ཀྱི་འཇོན་ནུས་དང་ཉམས་མྱོང་། སྲ་བརྟན་དང་བློ་སྤོབས་བཅས་ལ་ཨ་རིའི་མི་མང་གིས་བརྩི་མཐོང་བྱས་ཏེ། ཁོང་མོར་མུ་མཐུད་ཨ་རིའི་རྒྱལ་མང་ལ་ཞབས་ཞུ་བསྒྲུབ་པའི་གོ་སྐབས་སྤྲོད་དགོས་པ་དང་། དེ་བཞིན། འདས་པའི་ལོ་ངོ་ ༨ རིང་ཁོང་མོས་ཨ་རིའི་རྒྱལ་སྲིད་དྲུང་ཆེ་ཁུར་བའི་ལས་ཡུན་རིང་། ལྕམ་ཧེ་ལ་རེ་མཆོག་གིས་ཨ་རིའི་ནང་སྲིད་དང་ཕྱི་སྲིད་ཐད་ལ་བྱས་རྗེས་ཆེན་པོ་བཞག་ཡོད་པ་མ་ཟད། ཁོང་མོའི་གཞོན་དུས་ཀྱི་ལོ་ཟླ་ཡོད་ཚད་ཨ་རིའི་བྱིས་པ་དང་བུད་མེད། ཁྱིམ་ཚང་གི་འཕྲོད་བསྟེན་ལྟ་སྐྱོང་ལས་གཞིའི་ཐོག་བཏང་སྟེ། ཨ་རིའི་གཞོན་སྐྱེས་ས་ཡ་ ༨ ལྷག་གི་འཕྲོད་བསྟེན་ལྟ་སྐྱོང་གི་ཡོང་འབེབས་ཆེ་རུ་བཏང་ཡོད་པ་དང་། ཕྱི་ལོ་ ༡༩༩༥ ལོར་རྒྱ་ནག་གི་རྒྱལ་ས་པེ་ཅིན་དུ་ཚོགས་པའི་བུད་མེད་ཀྱི་ཐོབ་ཐང་སྐོར་གྱི་ཚོགས་ཆེན་ཐོག ལྕམ་ཧེ་ལ་རེ་མཆོག་གིས་བུད་མེད་ཀྱི་ཐོབ་ཐང་ནི་འགྲོ་བ་མིའི་ཐོབ་ཐང་ཡིན་པའི་ལྟ་ཚུལ་བཏོན་པ་དང་། ད་ལོར་ཡང་རྒྱལ་ནང་གི་མི་གསོད་ཁྲག་སྦྱོར་གྱི་གནད་དོན་ལ་གཞིགས་ཏེ་ཁོང་མོས་ཨ་རིའི་རྒྱལ་ནང་གི་མེ་མདའ་ཉོ་འཚོང་ངེས་པར་བཀག་སྡོམ་བྱེད་དགོས་པའི་བསམ་ཚུལ་བཏོན་ཡོད་སྐོར་སོགས་བརྗོད་འདུག
ད་ལོའི་ཕྱི་ཟླ་ ༦ ཚེས་ ༡༤ ཉིན་གྱི་གཏམ་བཤད་ནང་། གལ་ཏེ་ཁོང་མོ་ཨ་རིའི་སྲིད་འཛིན་དུ་བདམས་ཐོན་བྱུང་ན། ཁོང་མོས་ཨ་རིའི་རྒྱལ་མང་གི་བདེ་འཇགས་སྲུང་སྐྱོབ་དང་འབྲེལ་བའི་བརྙན་ལེན་འཕྲུལ་ཆས་ཀྱི་མཐུན་རྐྱེན་སྔར་བས་མཐོར་འདེགས་བཏང་སྟེ། རྒྱལ་ནང་གི་འཇིགས་སྐུལ་དྲག་སྤྱོད་པའི་གཏོར་རྒོལ་ཞི་འཇགས་གཏོང་རྒྱུ་ཡིན་སྐོར་དང་། དེང་གི་ཨ་རིའི་སྲིད་འཛིན་གྱི་ལས་འགན་གཙོ་བོ་རྒྱལ་མང་གི་བདེ་འཇགས་སྲུང་སྐྱོབ་བྱེད་རྒྱུ་དེ་ཡིན་སྟབས། ཨ་རིའི་མཐུན་ཕྱོགས་རྒྱལ་ཁབ་ཁག་དང་མཉམ་འབྲེལ་དམག་དཔུང་གི་སྟོབས་ཤུགས་དང་དེའི་འགྲོ་གྲོན་སོགས་སྔར་བས་མཐོར་འདེགས་བཏང་སྟེ། འཇིགས་སྐུལ་དྲག་སྤྱོད་པའི་རྒོལ་འཛིང་ལ་གདོང་ལེན་བྱེད་རྒྱུ་དང་། འཇིགས་སྐུལ་དྲག་སྤྱོད་པའི་བསྟི་གནས་ཁག་རྩ་མེད་བཟོ་རྒྱུ། དེ་བཞིན། རྒྱལ་ནང་གི་དྲག་ཆས་ཉོ་འཚོང་འགོག་སྒོམ་བྱ་རྒྱུ་ཡིན་སྐོར་སོགས་བརྗོད་འདུག
ལྕམ་ཧེ་ལ་རེ་མཆོག་གིས་ཨ་རིའི་ཡུལ་སྤོས་སྲིད་ཇུས་སྐོར་ལ། ཕྱི་ཟླ་ ༩ ཚེས་ ༡༥ ཉིན་གྱི་གཏམ་བཤད་ནང་། ད་ལྟའི་ཨ་རིའི་ཡུལ་སྤོས་སྲིད་ཇུས་ལེགས་བཅོས་བཏང་བ་ཡིན་ན། ཨ་རིའི་རྒྱལ་ནང་གི་ཐོན་སྐྱེད་རྩ་འབོར་ལ་ཨ་སྒོར་ཐེར་འབུམ་བརྒྱ་ཕྲག་མང་པོའི་ཁེ་བཟང་འཐོབ་རྒྱུ་ཡིན་པ་མ་ཟད། ཡུལ་སྤོས་སྲིད་ཇུས་ལེགས་བཅོས་གཏོང་རྒྱུ་ནི་ཨ་རིའི་རྒྱལ་ནང་གི་ཡུལ་གྱར་བ་ཚང་མར་མི་རིགས་འདྲ་མཉམ་དང་མི་སེར་ཐོབ་ཐང་རག་པའི་ལམ་ཁ་གཅིག་པུ་དེ་ཡིན་སྐོར་དང་། ཕྱི་ཟླ་ ༩ ཚེས་ ༢༡ ཉིན་གྱི་གཏམ་བཤད་སྐབས། ཁོང་མོས་ཨ་རིའི་ཡུལ་སྤོས་སྲིད་ཇུས་ལ་ལེགས་བཅོས་གཏོང་རྒྱུ་ནི་ངེས་པར་བསྒྲུབ་དགོས་པ་ཞིག་དང་བསྒྲུབ་འོས་པའི་ལས་དོན་ཞིག་ཡིན་ཞིང་། ཡུལ་སྤོས་སྲིད་ཇུས་ལེགས་བཅོས་བཏང་བར་བརྟེན་ནས། ཨ་རིའི་དཔལ་འབྱོར་འཚོལ་སྒྲུབ་ཐད་ལ་ཨ་སྒོར་ཐེར་འབུམ་ ༧༠༠ ཁེ་བཟང་འཐོབ་པ་དང་དུས་མཚུངས་སུ། འཛམ་གླིང་ཕྱོགས་མཐའི་ཡུལ་གྱར་བ་མང་པོ་ཨ་རིའི་ནང་ལྷན་འཛོམས་ཀྱིས་ཁེ་ལས་གསར་བ་གཉེར་ཏེ་སོ་སོའི་མི་ཚེ་དམིགས་འདུན་མངོན་འགྱུར་བྱེད་པ་དང་། སོ་སོའི་འཇོན་ནུས་ལ་བརྟེན་ནས་ཨ་རིའི་རྒྱལ་ཁབ་ཀྱི་སྟོབས་འབྱོར་དང་མཚན་མཐོང་གོང་མཐོར་གཏོང་རྒྱུ་ཡིན་སྐོར་སོགས་བརྗོད་འདུག
ཨ་རིའི་རྒྱལ་ནང་གི་འཕྲོད་བསྟེན་ལྟ་སྐྱོང་དང་ཤེས་ཡོན་སྲིད་ཇུས་སྐོར་ལ། ད་ལོའི་ཕྱི་ཟླ་ ༣ ཚེས་ ༡ ཉིན་གྱི་དྲ་བརྙན་གཏམ་གླེང་ཞིག་གི་ནང་། ལྕམ་ཧེ་ལ་རེ་མཆོག་གིས་ཨོ་བྷ་མའི་འཕྲོད་བསྟེན་ལྟ་སྐྱོང་གི་སྲིད་ཇུས་ལེགས་བཅོས་བཏང་སྟེ། ནད་པ་ཚོར་བརྟག་དཔྱད་སྨན་བཅོས་ཀྱི་རིན་གོང་འོས་མཚམས་བཟོ་རྒྱུ་དང་། ད་ལོ་གཅིག་པུར་ཨ་རིའི་འཕྲོད་བསྟེན་ལྟ་སྐྱོང་གི་ལས་གཞིའི་ཐད་ཨ་སྒོར་ས་ཡ་ ༤༠༠ དང་ནད་པའི་མཐུན་འགྱུར་ལ་ཨ་སྒོར་ཐེར་འབུམ་གཅིག་བཏང་སྟེ། ནད་པ་ཚོར་དུས་ཐོག་སྨན་བཅོས་ལྟ་སྐྱོང་རག་པའི་རེ་བ་བྱེད་ཀྱི་ཡོད་སྐོར་དང་། ཕྱི་ཟླ་ ༢ ཚེས་ ༡༥ ཉིན་གྱི་གཏམ་བཤད་སྐབས་སུ། ཁོང་མོས་ད་ལྟའི་ཨོ་བྷ་མའི་འཕྲོད་བསྟེན་སྲིད་ཇུས་ལེགས་བཅོས་བཏང་སྟེ། སྐྱེས་པ་ཚོ་ལས་བུད་མེད་ཀྱི་འཕྲོད་བསྟེན་ལྟ་སྐྱོང་ཐད་སྔར་བས་མཐུན་འགྱུར་བྱེད་རྒྱུ་དང་། འཕྲོད་བསྟེན་ལྟ་སྐྱོང་གི་གནད་དོན་ནི་ཨ་རིའི་དཔལ་འབྱོར་འཕེལ་རྒྱས་དང་འབྲེལ་བ་ཆེན་པོ་ཡོད་སྟབས། གལ་ཏེ་ཁོང་མོར་སྲིད་འཛིན་རྒྱལ་ཁ་ཐོབ་པ་ཡིན་ན། ཁོང་མོས་མ་འོངས་པར་ཨ་རིའི་ཁྱིམ་ཚང་གི་འཕྲོད་བསྟེན་གནས་སྟངས་དང་། ལྷག་པར་དུ་བུད་མེད་དང་བྱིས་པའི་འཕྲོད་བསྟེན་ལྟ་སྐྱོང་གི་གནས་བབ་ཡར་རྒྱས་གཏོང་རྒྱུ་ཡིན་སྐོར། དེ་བཞིན། ཕྱི་ཟླ་ ༩ ཚེས་ ༢༠ ཉིན་གྱི་གཏམ་བཤད་ནང་། ཁོང་མོས་ད་ལོའི་ལོ་མཇུག་ནས་ཨ་རིའི་རྒྱལ་ནང་གི་སློབ་ཕྲུག་ཚོའི་སློབ་ཡོན་བུན་དངུལ་འཕར་རྒྱུ་ཡིན་པ་དང་། ཚོད་དཔག་ལྟར་ན། ཨ་རིའི་རྒྱལ་ནང་གི་སློབ་ཕྲུག་ས་ཡ་ ༤༣ གྱི་སློབ་ཡོན་བུན་དངུལ་ཨ་སྒོར་ཐེར་འབུམ་ ༡.༣ ཟིན་གྱི་ཡིན་པ། ད་ལོའི་མཐར་ཕྱིན་འཛིན་གྲྭ་རེ་ནས་ཆ་སྙོམས་སློབ་ཡོན་བུ་དངུལ་ཨ་སྒོར་ཁྲི་ ༣༨ ཟིན་གྱི་ཡོད་དེ་ལོ་སྔོན་མ་བསྡུར་ན་བརྒྱ་ཆ་ ༦ གིས་འཕར་ཡོད་སྐོར་དང་། ཕྱི་ཟླ་ ༣ ཚེས་ ༡༠ ཉིན་གྱི་གཏམ་བཤད་སྐབས་སུ། ཤེས་ཡོན་སློབ་གསོ་ནི་མིའི་བློ་སྒོ་འབྱེད་བྱེད་ཅིག་ཡིན་ནའང་། མི་མང་པོ་ཞིག་ལ་གོ་སྐབས་དེ་རག་གི་མེད་སྟབས། ཨ་རིའི་རྒྱལ་ནང་གི་སློབ་ཕྲུག་ཚོར་སྔར་ལས་ལྷག་པར་དགེ་རྒན་ལེགས་པོ་དང་སློབ་གྲྭ་ལེགས་པོ་དགོས་ཀྱི་ཡོད་སྟབས། གལ་ཏེ་ཁོང་མོར་སྲིད་འཛིན་རྒྱལ་ཁ་ཐོབ་པ་ཡིན་ན། ཁོང་མོས་ཨ་རིའི་ཤེས་ཡོན་སྲིད་ཇུས་ལ་འཕོར་འགྱུར་གཏང་རྒྱུ་ཡིན་སྐོར་སོགས་བརྗོད་འདུག
ད་ལོའི་ཕྱི་ཟླ་ ༡ ཚེས་ ༦ ཉིན་གྱི་གཏམ་བཤད་ནང་། ལྕམ་ཧེ་ལ་རེ་མཆོག་གིས་མེ་མདའ་ཉོ་འཚོང་བྱས་པར་བརྟེན་ནས། ཨ་རིའི་རྒྱལ་ནང་དུ་ལོ་རེར་ཉེས་མེད་མི་མང་ཁྲི་ ༣༣ དམར་གསོད་ཐེབས་ཀྱི་ཡོད་སྟབས། ད་ནི་རྒྱལ་ནང་གི་མེ་མདའ་འགོག་སྡོམ་བྱེད་པའི་དུས་ལ་བབ་ཡོད་པ་དང་། ལག་ཏེ་ཁོང་མོ་སྲིད་འཛིན་དུ་བདམས་ཐོན་བྱུང་ཚེ། ཁོང་མོས་འཇིགས་སྐུལ་དྲག་སྤྱོད་དང་འབྲེལ་བའི་མེ་མདའ་ཉོ་འཚོང་གི་གནད་དོན་རིགས་གཏན་འགོག་བྱས་ཏེ། རྒྱལ་ནང་གི་མི་གསོད་ཁྲག་སྦྱོར་གྱི་དོན་རྐྱེན་སྔོན་འགོག་ལ་འབད་བརྩོན་བྱ་རྒྱུ་ཡིན་སྐོར་བརྗོད་འདུག
ཕྱི་ཟླ་ ༩ ཚེས་ ༢༥ ཉིན་ཨ་རིའི་སྲིད་འཛིན་ཟུར་བ་དང་ལས་ཐོག་སྲིད་འཛིན་བཅས་མི་སྣ་ ༥ ཡིས་དམངས་གཙོ་ཚོགས་པའི་འདས་མ་ད་གསུམ་གྱི་སྲིད་སྐྱོང་གི་ལེགས་ཉེས་ལ་གཞིགས་ཏེ། ཁོ་ཚོས་ལྕམ་ཧེ་ལ་རེ་མཆོག་ལ་རྒྱབ་སྐྱོར་བྱ་རྒྱུ་ཡིན་སྐོར་ཡོངས་ཁྱབ་གསལ་བསྒྲགས་བྱས་འདུག་ལ། གསལ་བསྒྲགས་དེའི་ནང་ད་ལྟའི་ལས་ཐོག་སྲིད་འཛིན་ཨོ་བྷ་མཆོག་གིས་ཨ་རིའི་སྲིད་འཛིན་འོས་མི་ཚོའི་ཁྲོད་དུ་ལྕམ་ཧེ་ལ་རེ་མཆོག་ལས་ལྷག་པའི་ཤེས་འཇོན་ནུས་ལྡན་ཞིག་མེད་སྐོར་བརྗོད་ཡོད་པ་དང་། སྲིད་འཛིན་ཟུར་བ་བྷེལ་ཁི་ལེན་ཊོན་མཆོག་གིས་ཀྱང་། ལྕམ་ཧེ་ལ་རེ་མཆོག་ནི་དཀའ་རྙོག་ཅི་འདྲ་ཞིག་ལ་འཕྲད་ཀྱང་། ཁོང་མོས་དཀའ་རྙོག་དེ་ལེགས་པོར་སེལ་ཐུབ་པའི་འཇོན་ནུས་ཡོད་སྐོར་བརྗོད་འདུག
ཕྱི་ཟླ་ ༩ པའི་ཚེས་ ༡༧ ཉིན་གྱི་གནས་ཚུལ་ཞིག་གི་ནང་། ཨ་རིའི་དམག་དོན་དང་ཡུལ་གྱར། དེ་བཞིན་འཕྲོད་བསྟེན་ལྟ་སྐྱོང་དང་། ལྷག་པར་དུ་བུད་མེད་ཀྱི་ཐོབ་ཐང་ཐོག་འཛིན་པའི་ལྕམ་ཧེ་ལ་རེ་མཆོག་གི་སྲིད་ཇུས་ལངས་ཕྱོགས་ལ་རྒྱབ་སྐྱོར་གནང་མཁན་མི་མང་བརྒྱ་ཆ་ ༥༧ ཟིན་གྱི་ཡོད་སྐོར་བཀོད་འདུག
ཕྱི་ཟླ་ ༩ ཚེས་ ༢༣ ཉིན་ཨ་རིའི་རྒྱལ་ནང་གསང་བའི་ལས་ཁུངས་ནས་ལྕམ་ཧེ་ལ་རེ་མཆོག་གིས་སྔོན་ཆད་ཨ་རིའི་རྒྱལ་སྲིད་དྲུང་ཆེ་སྐབས་སུ། ཨ་རིའི་གཞུང་འབྲེལ་ལས་དོན་སྐོར་གྱི་གློག་འཕྲིན་སྟོང་ཕྲག་ ༡༥ ཁོང་མོ་སྒེར་གྱི་གློག་འཕྲིན་བརྒྱུད་ནས་བཏང་ཡོད་པ་དང་། དེའི་གྲས་ཀྱི་གློག་འཕྲིན་ ༥༦༠༠ ཨ་རིའི་གཞུང་འབྲེལ་ལས་དོན་དང་འབྲེལ་བ་ཡོད་སྐོར་བརྗོད་འདུག་ནའང་། གནད་དོན་དེ་ད་ལོའི་ཕྱི་ཟླ་ ༡༡ ཚེས་ ༨ ཉིན་གྱི་རྒྱལ་ཡོངས་འོས་བསྡུའི་རྗེས་སུ་ཐག་གཅོད་བྱ་རྒྱུ་ཡིན་སྐོར་བརྗོད་འདུག་ལ། ཕྱི་ཟླ་ ༩ ཚེས་ ༢༤ ཉིན་གྱི་བཅར་འདྲི་ཞིག་གི་ཐོག་ལྕམ་ཧེ་ལ་རེ་མཆོག་གིས་གཞུང་འབྲེལ་ལས་དོན་མང་པོ་ཞིག་ཁོང་མོ་སྒེར་གྱི་གློག་འཕྲིན་བརྒྱུད་ནས་བཏང་བ་དེར་ངོས་ལེན་གནང་མི་འདུག
གསར་འགོད་པ། པདྨ་རྒྱལ།
༅༅། གསར་འགོད་པ་པད་མ་རྒྱལ་ནས་གསར་འགྱུར་ཡག་ཐག་ཆོད་བྲིས་གནང་འདུག་པ་ཐུགས་རྗེ།