རྒྱ་ནག་མི་མང་གི་སེམས་ཁྲལ་ཆེ་ཤོས།

རྒྱ་ནག་མི་མང་གི་ལྟ་ཚུལ་དངོས་ལ་ཞིབ་འཇུག་རྒྱུས་ལོན་བྱུང་བ་ལྟར་ན། རྒྱ་ནག་མི་མང་གི་སེམས་ཁྲལ་ཆེ་ཤོས་དེ་སྲ་བརྟན་མེད་པའི་རྒྱལ་སྤྱིའི་དཔལ་འབྱོར་ཁྲོམ་ར་དང་ཁ་ཆེ་འཇིགས་སྐུལ་དྲག་སྤྱོད། དེ་བཞིན་གོ་ལའི་གནམ་གཤིས་འགྱུར་ལྡོག་སོགས་མིན་པར་ཨ་རིའི་སྟོབས་འབྱོར་དང་དེའི་ཤན་ཤུགས་ཡིན་འདུག

ཁ་སང་ཨ་རིའི་ཕེ་ཝོ་ཞིབ་འཇུག་ལྟེ་གནས་ (Pew Research Center) གིས། རྒྱ་ནག་མི་མང་གི་ལྟ་ཚུལ་ལ་ཞིབ་འཇུག་རྒྱུས་ལོན་བྱས་དོན་ལྟར་ན། དེང་གི་རྒྱ་ནག་མི་མང་གི་སེམས་ཁྲལ་ཆེ་ཤོས་དེ་རྒྱ་ནག་གཞུང་གིས་གླེང་བཞིན་པའི་རྒྱལ་སྤྱིའི་དཔལ་འབྱོར་ཁྲོམ་ར་དང་གནམ་གཤིས་འགྱུར་ལྡོག དེ་བཞིན་ཁ་ཆེ་འཇིགས་སྐུལ་དྲག་སྤྱོད་པ་གང་ཡང་མིན་པར་ཨ་རིའི་སྟོབས་འབྱོར་དང་དེའི་ཤན་ཤུགས་ཡིན་སྐོར་བརྗོད་འདུག

ཕེ་ཝོ་ཞིབ་འཇུག་ལྟེ་གནས་ཁང་གི་ཞིབ་འཇུག་གི་གྲུབ་འབྲས་ལྟར་ན། རྒྱ་ནག་མི་མང་བརྒྱ་ཆ་ ༤༥ ཡིས་དེང་གི་ཨ་རིའི་སྟོབས་འབྱོར་དང་དེའི་ཤན་ཤུགས་ནི་རྒྱ་ནག་གི་འཇིག་ཉེན་ཆེ་ཤོས་སུ་མཐོང་གི་ཡོད་པ་དང་། གནས་བབ་དེ་ཡུ་རོབ་དང་ཉི་ཧོང་མི་མང་གི་ལྟ་ཚུལ་དང་བསྡུར་ན། རྒྱ་ནག་མི་མང་ནི་ཨ་རིའི་སྟོབས་འབྱོར་ལ་སེམས་ཁྲལ་བྱེད་མཁན་ཨང་གཉིས་པ་ཆགས་ཀྱི་ཡོད་པ་དང་། རྒྱ་ནག་མི་མང་བརྒྱ་ཆ་ ༣༥ ཡིས་སྲ་བརྟན་མེད་པའི་རྒྱལ་སྤྱིའི་དཔལ་འབྱོར་ཁྲོམ་རའི་གནས་བབ་དེ་རྒྱ་ནག་གི་འཇིག་ཉེན་ཞིག་ཏུ་མཐོང་གི་ཡོད་པ་དང་། མི་མང་བརྒྱ་ཆ་ ༣༤ ཡིས་དེང་གི་གནམ་གཤིས་འགྱུར་ལྡོག་རྒྱ་ནག་གི་འཇིག་ཉེན་དང་། མི་མང་བརྒྱ་ཆ་ ༡༥ མ་ཟིན་ཙམ་གྱིས་ཁ་ཆེ་འཇིགས་སྐུལ་དྲག་སྤྱོད་པར་སེམས་ཁྲལ་བྱེད་བཞིན་ཡོད་སྐོར་འཁོད་འདུག

གནས་ཚུལ་འདིའི་ནང་། རྒྱ་རིགས་མི་མང་བརྒྱ་ཆ་ ༧༧ ཙམ་གྱིས་ཕྱིའི་རྒྱལ་ཁབ་ཁག་གི་སྟོབས་འབྱོར་དང་དེའི་ཤན་ཤུགས་འོག སོ་སོའི་འཚོ་བར་འགན་སྲུང་བྱེད་དགོས་ཚུལ་བཤད་ཀྱི་ཡོད་པ་དང་། བསམ་ཚུལ་དེ་ཕྱི་ལོ་ ༢༠༠༢ ལོར་རྒྱ་ནག་མི་མང་ལྟ་ཚུལ་ལ་ཞིབ་འཇུག་བྱས་པ་དང་བསྡུར་ན་བརྒྱ་ཆ་ ༡༣ ཙམ་འཕར་ཡོད་པ་དང་། རྒྱ་མི་བཅུ་ཆའི་དགུ་ཡིས་རྒྱ་ནག་གི་དཔལ་འབྱོར་སྲིད་ཇུས་ཡག་པོར་མཐོང་གི་ཡོད་པ་དང་། རྒྱ་མི་བཞི་ཆའི་གསུམ་གྱིས་ལོ་རྗེས་མར་རྒྱ་ནག་གི་དཔལ་འབྱོར་ཡར་རྒྱས་འགྲོ་བར་རེ་བ་བྱེད་ཀྱིན་ཡོད་འདུག

རྒྱ་རིགས་མི་མང་བརྒྱ་ཆ་ ༤༠ ཡིས་རྒྱ་ནག་ནས་ཐོན་སྐྱེད་བྱས་པའི་སྨན་རིགས་དང་ཟས་རིགས་ཀྱིས་འཕྲོད་བསྟེན་ལ་གནོད་འཚེ་ཡོང་གི་ཡོད་པ་དེ་རྒྱ་ནག་གི་དཀའ་རྙོག་ཆེ་ཤོས་སུ་ངོས་འཛིན་བྱེད་ཀྱི་ཡོད་པ་དང་། བསམ་ཚུལ་དེ་ཕྱི་ལོ་ ༢༠༠༨ ལོར་བསམ་ཚུལ་བསྡུས་པ་དང་བསྡུར་ན་བརྒྱ་ཆ་ ༩ ཡིས་མང་དུ་ཕྱིན་ཡོད་འདུག ཡང་རྒྱ་རིགས་མི་མང་བརྒྱ་ཆ་ ༥༩ ཡིས་རྒྱ་ནག་དང་ཁྱིམ་མཚེས་རྒྱལ་ཁབ་ཁག་བར་གྱི་མངའ་ཁོངས་བདག་དབང་རྩོད་གླེང་ལ་བརྟེན་ནས་རྒྱལ་ཁབ་ཕན་ཚུན་བར་དྲག་པོའི་ཟིང་འཁྲུག་ལང་སྲིད་པར་སེམས་ཁྲལ་བྱེད་ཀྱི་ཡོད་འདུག

ད་ལོའི་ཨ་རིའི་སྲིད་འཛིན་འོས་བསྡུའི་ཐད་ནས་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧ་ལེ་རེ་ལ་རྒྱབ་སྐྱོར་བྱེད་མཁན་བརྒྱ་ཆ་ ༣༧ དང་དགག་པ་རྒྱག་མཁན་བརྒྱ་ཆ་ ༣༥། དེ་བཞིན། སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་ལ་རྒྱབ་སྐྱོར་བྱེད་མཁན་བརྒྱ་ཆ་ ༢༢ དང་སྡིགས་ར་གཏོང་མཁན་བརྒྱ་ཆ་ ༤༠ ཡོད་སྐོར་སོགས་འཁོད་འདུག

སེ་ཨན་ཨན་གསར་ཁང་གིས་གནས་ཚུལ་སྤེལ་བའི་ནང་། ན་ནིང་རྒྱ་ནག་གིས་ཨ་རིའི་རང་དབང་ཚོང་དོན་སྒྲུག་འཛུགས་ཀྱི་དྲ་ལམ་ནང་ལྐོག་འཛུལ་བྱས་ཏེ་ཨ་རིའི་མི་མང་ས་ཡ་ ༢༡ གི་ཚོང་དོན་ཡིག་ཆ་རྐུ་འཁྱེར་བྱས་ཡོད་པ་དང་། འདས་པའི་ལོ་ངོ་བཅུ་ཕྲག་གཅིག་ནང་རྒྱ་ནག་གཞུང་གིས་རྒྱ་ནག་མི་མང་བཅིངས་འགྲོལ་དམིག་གི་སྟོབས་ཤུགས་ཡར་རྒྱས་བཏང་ཡོད་པ་མ་ཟད། དྲག་ཆས་དམག་དཔུང་གི་སྟོབས་ཤུགས་གཅིག་ཏུ་བསྒྲིལ་ཏེ་དམག་དོན་རྩ་འཛུགས་བཙུགས་པ་དེ་རྒྱ་ནག་གི་དྲག་ཆས་དམག་དཔུང་གི་ཡན་ལག་གསར་བ་ཞིག་ཡིན་སྐོར་སོགས་འཁོད་འདུག

དེ་བཞིན། ཐའེ་ཝན་དམངས་གཙོ་ཡར་ཐོན་ཚོགས་པའི་ཚོགས་གཙོ་ལྕམ་ཚའེ་ཡེན་ཝན་ཐའེ་ཝན་མཚོ་འགག་གི་སྲིད་འཛིན་དུ་བདམས་ཐོན་བྱུང་བ་ནས། རྒྱ་ནག་གཞུང་གིས་ཐའེ་རྒྱ་གཉིས་ཀྱི་འབྲེལ་ལམ་ཇེ་སྡུག་ཏུ་གཏོང་གི་ཡོད་པ་དང་། ད་ལོའི་ཧོང་ཀོང་གྲོང་སྡེ་ལྷན་ཚོགས་ཀྱི་འོས་བསྡུའི་སྐབས་སུ། དེ་སྔོན་ཧོང་ཀོང་སློབ་ཕྲུག་ཚོས་དམངས་གཙོའི་ལས་འགུལ་སྤེལ་བ་དེས་ཧོང་ཀོང་མི་མང་གི་རང་དབང་འབོད་སྒྲ་ཆེ་རུ་གཏོང་ཐུབ་ཡོད་ནའང་། པེ་ཅིན་གཞུང་གིས་ཧོང་ཀོང་མི་མང་གི་རང་དབང་དམངས་གཙོའི་མངོན་འདོད་ལ་སུན་གཙེར་གཏོང་གི་སྐོར་སོགས་བརྗོད་འདུག

གསར་འགོད་པ། པདྨ་རྒྱལ།