རྒྱ་ནག་གི་ཨར་ལས་འཛུགས་སྐྲུན་སྲ་བརྟན་མེད་པའི་རྐྱེན་གྱིས་ཁ་སང་ཝིན་ཀྲོ་གྲོང་ཁྱེར་དུ་ཁང་རྩེག་བཞི་སྔ་རྗེས་སུ་རྡིབ་སྐྱོན་བྱུང་བའི་ཁྲོད་མི་ ༢༤ ཚེ་སྲོག་ཤོར་ཡོད་འདུག
དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་ཊེ་ཅང་ཞིང་ཆེན་གྱི་ཝིན་ཀྲོ་ (Wenzhou) གྲོང་མཐའ་རུ་ཨར་ལས་འཛུགས་སྐྲུན་སྲ་བརྟན་མེད་པར་བརྟེན་ནས་ཁང་རྩེག་བཞི་བསྟུད་མར་རྡིབ་སྐྱོན་བྱུང་བའི་ཁྲོད་དུ་ད་སྔ་མི་ ༢༢ རྐྱེན་ལམ་དུ་ཤོར་ཡོད་པ་དང་། རྒྱ་ནག་ཉེན་སྲུང་རུ་ཁག་གིས་མུ་མཐུད་ཁང་རྩེག་རྡིབ་སྐྱོན་འོག་ཤོར་བའི་ཡུལ་མི་འཚོལ་ཞིབ་བྱེད་བཞིན་ཡོད་འདུག
ཝིན་ཀྲོ་གྲོང་ཁྱེར་གྱི་མེ་སྐྱོན་སྔོན་འགོག་ཚན་པའི་དཔོན་རིགས་སུན་ཅིན་ (Sun Jing) ཟེར་བ་ཞིག་གིས། ས་དང་སོ་ཕག་ཚང་མ་ལག་པས་སློག་ནས་རྨས་མ་སྐྱོབ་དགོས་སྟབས། ལས་ཀ་ཤིན་ཏུ་དལ་བས་རྨས་མ་མང་པོ་སྐྱོབ་ཐུབ་ཀྱི་མེད་ཚུལ་བཤད་འདུག
གནས་ཚུལ་ལྟར་ན། སྡོད་ཁང་དེ་དག་ཕྱི་ལོ་ ༡༩༧༠ ནང་འཛུགས་སྐྲུན་བྱས་ཏེ་ཕྱིས་སུ་སྡོད་ཁང་དེ་དག་གི་རྨང་གཞིའི་སྟེང་ཐོག་ཁང་གསུམ་ནས་བཞི་བར་འཛུགས་སྐྲུན་བྱས་སྟབས། རྨང་གཞི་སྲ་བརྟན་མེད་པར་བརྟེན་ནས་རྡིབ་སྐྱོན་བྱུང་ཡོད་འདུག
རྒྱ་ནག་གཞུང་གིས་ཨར་ལས་འཛུགས་སྐྲུན་གྱི་སྲ་བརྟན་དང་མི་མང་གི་བདེ་འཇགས་ལ་མ་བལྟས་པར་དཔལ་འབྱོར་གྱི་ཁེ་ཕན་ཁོ་ནར་དམིགས་ཏེ་གྲོང་དང་གྲོང་ཁྱེར་ཁག་ཏུ་སྲ་བརྟན་མེད་པའི་ཁང་རྩེག་མང་པོ་འཛུགས་སྐྲུན་བྱེད་བཞིན་ཡོད་སྟབས། ད་ལོའི་ཕྱི་ཟླ་ ༥ བའི་ནང་གེ་ཀྲོ་ (Guizhou) ཞིང་ཆེན་དུ་ཁང་རྩེག་ཅིག་རྡིབ་སྐྱོན་བྱུང་བའི་ཁྲོད་མི་ ༡༦ རྐྱེན་ལམ་དུ་ཤོར་ཡོད་པ་དང་། ཕྱི་ཟླ་ ༤ བའི་ནང་ཀོང་ཏུང་ (Guangdong) ཞིང་ཆེད་གྱི་ཁྲོམ་རྭའི་ཁང་རྩེག་ཅིག་རྡིབ་སྐྱོན་བྱུང་བའི་ཁྲོད་མི་ ༢༦ ལ་ཤི་རྨས་བྱུང་ཡོད་འདུག
གསར་འགོད་པ། པདྨ་རྒྱལ།
