རྒྱ་ནག་གི་ཞིང་ཆེན་ཁག་ ༢༩ ནས་ཡོང་བའི་སྒེར་གཉེར་སློབ་གྲྭའི་དགེ་རྒན་དང་ཚབ་འཁྲིད་དགེ་རྒན་སོགས་དགེ་རྒན་ཆིག་ཁྲི་ལྷག་གིས་པེ་ཅིན་གྱི་འབྲེལ་ཡོད་ལས་ཁུངས་མདུན་དུ་རྒྱལ་ཡོངས་རང་བཞིན་གྱི་ཞུ་འབོད་ལས་འགུལ་ཐེངས་དྲུག་པ་སྤེལ་ཡོད་འདུག
ཁ་སང་སྔ་དྲོར་རྒྱ་ནག་གི་ཧེ་ལུང་ཅང་དང་ཧུའུ་པེ། ཧུའུ་ནན། ཨན་ཝེ་སོགས་ཞིང་ཆེན་ ༢༩ ནས་ཡོང་བའི་ལས་ཤོར་སྒེར་གཉེར་སློབ་གྲྭའི་དགེ་རྒན་དང་། ལས་ཐོག་ཚབ་འཁྲིད་དགེ་རྒན་སོགས་དགེ་རྒན་ཆིག་ཁྲི་ལྷག་པེ་ཅིན་གྲོང་ཁྱེར་གྱི་རྒྱལ་ཁབ་ཡིག་འགྲུལ་འབྲེལ་གཏུག་ཁང་(信访局)གི་མདུན་དུ་འཛོམས་ཏེ། ཁོང་ཚོར་རྒན་གསོ་འགན་སྲུང་དང་སྨན་བཅོས་འགན་སྲུང་དགོས་པ་མ་ཟད། ལས་ཤོར་གུན་གསབ་སྤྲོད་དགོས་པའི་ཞུ་འབོད་ལས་འགུལ་སྤེལ་ཡོད་པ་དང་། དེ་ནི་འདི་ལོའི་རྒྱལ་ཡོངས་རང་བཞིན་གྱི་ལས་ཤོར་དང་ལས་ཐོག་དགེ་རྒན་རྣམ་པའི་འབོད་སྐུལ་ལས་འགུལ་ཐེངས་དྲུག་པ་དེ་ཆགས་ཡོད་འདུག
ཧེ་ལུང་ཅང་ནས་ཡིན་པའི་ལས་འགུལ་བ་ཞིག་གིས། དེ་སྔོན་ཧེ་ལུང་ཅང་ཞིང་ཆེན་གྱི་སྒེར་གཉེར་དགེ་རྒན་ ༧༠༠༠ གཞུང་གཉེར་སློབ་གྲྭའི་ནང་གནས་སྤོར་བྱེད་འཆར་ཡོད་ཀྱང་། ལས་གཞི་དངོས་སུ་ལག་བསྟར་བྱེད་སྐབས་དགེ་རྒན་ ༥༠༠ ལྷག་མ་གཏོགས་གནས་སྤོར་བྱས་མེད་པ་མ་ཟད། ཕྱི་ལོ་ ༢༠༠༠ ནས་ ༢༠༠༤ བར་སྒེར་གཉེར་སློབ་གྲྭའི་དགེ་རྒན་རྣམས་དགེ་རྒན་ཚད་ལྡན་མིན་ལུགས་བརྗོད་དེ་ལས་གནས་ནས་ཕྱིར་ཕུད་བཏང་ཡོད་སྐོར་བརྗོད་འདུག
ཧུའུ་པེ་ཞིང་ཆེན་དུ་དགེ་རྒན་གྱི་ལས་ཀ་ལོ་ ༢༣ རིང་བྱས་པའི་ལས་འགུལ་བ་ཞིག་གིས། ཕྱི་ལོ་ ༡༩༩༨ ལོར་ཁོང་ལས་གནས་ནས་ཕྱིར་ཕུད་བཏང་ཡོད་པ་དང་། འདས་པའི་ལོ་བཅུ་གྲངས་ནང་ཞུ་གཏུག་གྲངས་ཀྱིས་མི་ལོངས་བ་བྱས་ཡོད་ཀྱང་། གནད་དོན་ཐག་གཅོད་ཐུབ་རྒྱུ་ཕར་ཞོག་ཉེན་རྟོག་པས་ཁོང་བཀག་ཉར་བྱས་ཡོད་པ་དང་། རྒྱ་ནག་གཞུང་གིས་མི་མང་ལ་མགོ་སྐོར་དང་དྲག་གནོན། འཛིན་བཟུང་བཀག་ཉར་སོགས་ཀྱི་བྱེད་ཐབས་སྤྱད་དེ་ཞུ་གཏུག་མཚམས་འཇོག་ཡོང་ཐབས་བྱས་ཡོད་ཀྱང་། དགེ་རྒན་རྣམ་པས་མུ་མཐུད་ཞུ་གཏུག་ལས་འགུལ་མཚམས་བཞག་མེད་སྐོར་བརྗོད་འདུག
འདི་ལོའི་ཕྱི་ཟླ་ ༦ པའི་ནང་རྒྱལ་ཡོངས་ཀྱི་སྒེར་གཉེར་སློབ་གྲྭའི་དགེ་རྒན་དང་ཚབ་འཁྲིད་དགེ་རྒན། བྱིས་སྙོར་ཁང་གི་དགེ་རྒན་བཅས་ཀྱི་ཞུ་གཏུག་ཡི་གེ་ཞིག་དྲ་ལམ་དུ་སྤེལ་བའི་ནང་། ལས་ཤོར་སྒེར་གཉེར་དགེ་རྒན་དང་ལས་ཐོག་ཚབ་འཁྲིད་དགེ་རྒན་རྣམ་པས་སློབ་གསོའི་བྱ་བར་བྱས་རྗེས་ཆེན་པོ་བཞག་ཡོད་ལ། དགེ་རྒན་མང་ཆེ་བས་ལོ་ངོ་ ༣༠ ལ་ཉེ་བའི་རིང་སློབ་གསོའི་བྱ་བ་གཉེར་ཡོད་པ་དང་། ཞིང་ཆེན་མང་པོའི་ནང་སྒེར་གཉེར་དགེ་རྒན་གྱི་གཞུང་གཉེར་ས་མིག་མང་པོ་གཞན་གྱིས་བདག་བཟུང་བྱས་ཏེ། སྒེར་གཉེར་དགེ་རྒན་མང་པོས་ལས་ཀ་ཤོར་ཡོད་སྐོར་དང་། ད་ལྟའི་གཞུང་གཉེར་དགེ་རྒན་གྱི་ཆ་སྙོམ་གླ་ཕོགས་གཞིར་བཟུང་སྟེ་ལས་གནས་ནས་ཕུད་པའི་སྒེར་གཉེར་དགེ་རྒན་དང་བྱིས་གཉོར་ཁང་གི་དགེ་རྒན། ཚབ་འཁྲིད་དགེ་རྒན་རྣམས་ལ་དཔལ་འབྱོར་གུན་གསབ་སྤྲོད་དགོས་པ་དང་། གཞུང་གཉེར་ཁོངས་སུ་བཅུག་འོས་པའི་ལས་ཤོར་ཚད་ལྡན་དགེ་རྒན་རྣམས་ཕྱིར་ལས་གནས་སུ་གོ་སྒྲིག་དང་། ལས་འཁྱུར་ངལ་གསོ་རན་པ་ཚོ་གཞུང་གཉེར་དགེ་རྒན་གྱི་ལས་འཁྱུར་ངལ་གསོའི་ཐོབ་ཐང་གཞིར་བཟུང་ཐག་གཅོད་དགོས་པ། དེ་བཞིན་རྒན་གསོ་འགན་སྲུང་དང་སྨན་བཅོས་འགན་སྲུང་སྤྲོད་ལེན་སྐོར་ཡིག་ཆ་གཞིར་བཟུང་ཐག་གཅོད་དགོས་པ་བཅས་ཀྱི་དགོས་འདུན་བཏོན་འདུག
ཕྱི་ལོ་ ༡༩༩༧ ལོའི་ཕྱི་ཟླ་ ༩ པའི་ནང་དུ། རྒྱ་ནག་རྒྱལ་སྲིད་སྤྱི་ཁྱབ་ཁང་གིས་སྒེར་གཉེར་སློབ་གྲྭའི་དགེ་རྒན་གནད་དོན་ཐག་གཅོད་བྱེད་པའི་བརྡ་ཐོ་ཟེར་བ་ཞིག་བཏོན་ཏེ། ཁྱོན་ཡོངས་ནས་སྒེར་གཉེར་སློབ་གྲྭའི་དགེ་རྒན་གྱི་གྲངས་འབོར་འཕར་སྣོན་ལ་དོ་ནན་དང་སྒེར་གཉེར་དགེ་རྒན་ཚད་ལྡན་རྣམས་གཞུང་གཉེར་སློབ་གྲྭའི་ནང་གནས་སྤོར་བྱེད་པ། སྒེར་གཉེར་དགེ་རྒན་ཚད་ལྡན་མིན་པ་རྣམས་ལས་གནས་ནས་ཕྱིར་ཕུད་གཏོང་བ་བཅས་ཀྱི་ལས་གཞི་ལག་བསྟར་བྱས་ཡོད་པ་དང་། བརྡ་ཐོ་དེའི་ནང་ཕྱི་ལོ་ ༡༩༨༦ ཟླ་ ༡༢ ཚེས་ ༣༡ ཉིན་གོང་དུ་ལས་ཞུགས་བྱས་པའི་སྒེར་གཉེར་དགེ་རྒན་རྣམས་ལ་རྒྱལ་ཁབ་ཀྱི་ངོས་ལེན་ཡོད་སྐོར་དང་། ཕྱི་ལོ་ ༡༩༩༧ ལོར་རྒྱལ་ཡོངས་ཀྱི་སློབ་གྲྭ་ཆུང་འབྲིང་ནང་སྒེར་གཉེར་དགེ་རྒན་གྱིས་བརྒྱ་ཆ་ ༡༧ ཟིན་གྱི་ཡོད་པ་ནས་རིམ་བཞིན་ཇེ་ཉུང་དུ་བཏང་སྟེ། ཕྱི་ལོ་ ༢༠༠༠ ལོར་སྒེར་གཉེར་དགེ་རྒན་གྱི་གནད་དོན་གཞི་རྩའི་ཆ་ནས་ཐག་བཅད་ཟིན་པ་དང་། ཕྱི་ལོ་ ༢༠༠༠ ལོའི་བར་དུ་སྒེར་གཉེར་དགེ་རྒན་ཁྲི་ ༡༨༠ ཡིས་ཡིག་རྒྱུགས་བཏང་སྟེ་གཞུང་གཉེར་དགེ་རྒན་དུ་གྱུར་ཡོད་སྐོར་བསྒྲགས་ཡོད་པ་དང་། གཞུང་གཉེར་དགེ་རྒན་དུ་བསྒྱུར་བའི་ལས་གཞིའི་ཁྲོད་གཞུང་གཉེར་དགེ་རྒན་གྱི་ས་མིག་ཉོ་ཚོང་བྱས་པ་དང་སྒེར་གྱི་འབྲེལ་བའི་ཐོག་ནས་ས་མིག་བདག་བཟུང་བྱས་པ་སོགས་ཀྱི་གནད་དོན་མང་པོ་བྱུང་ཡོད་པ་ལྟར། ཕྱི་ལོ་ ༢༠༠༡ ལོར་ཝུའུ་ཧན་གྱི་གཞུང་གཉེར་དགེ་རྒན་གྱི་ས་མིག་ ༥༣༩ ཉོ་ཚོང་བྱས་ཏེ། འབྲེལ་ཡོད་ནས་རྒྱ་སྒོར་ས་ཡ་ ༡༢ ལྷག་གི་ཁེ་བཟང་བླངས་ཡོད་འདུག
གསར་འགོད་པ། པདྨ་མཚོ།
རྒྱ་ནག་ནང་དམར་ཤོག་སྲིད་གཞུང་མགོ་རྟིང་སློག་པའི་ནད་རྟགས་ཇེམང་རེད།