རྔ་བ་རྫོང་ཐོག་ནས་དགེ་འདུན་པ་བློ་བཟང་ཚུལ་ཁྲིམས་ཞུ་བ་ཞིག་གིས་བོད་དོན་གོམ་བགྲོད་ཀྱི་ལས་འགུལ་སྤེལ་སྐབས་རྒྱ་ནག་གི་ཉེན་རྟོག་པས་འཛིན་བཟུང་གཅར་རྡུང་བྱས་ཏེ་རྔ་བ་རྫོང་སྨན་དུ་བསྐྱལ་ཡོད་འདུག
དེ་རིང་ཕྱི་སྡོད་བོད་མི་ཞིག་གིས་འདི་ག་གསར་ཁང་ལ་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༡༧ ཉིན་མིང་ལ་བློ་བཟང་ཚུལ་ཁྲིམས་ཞུ་བའི་དགེ་འདུན་པ་ཞིག་གིས། ༧གོང་ས་མཆོག་གི་སྐུ་པར་ཞིག་ལག་ཏུ་བཟུང་སྟེ་རྔ་བ་རྫོང་ཐོག་ཏུ་ཡོད་པའི་རྔ་བ་རྫོང་བོད་ཡིག་སློབ་འབྲིང་གི་མདུན་ལམ་ནས་འོ་སྐྱེས་ཆུ་ཁའི་ཕྱོགས་སུ་བོད་དོན་གོམ་བགྲོད་ཀྱིས་བོད་ལ་རང་དགོས་དགོས། ༧རྒྱལ་བ་ཡིན་བཞིན་ནོར་བུ་མཆོག་ཁྲི་ལོར་བརྟན་པར་ཤོག་ཅེས་སྐད་འབོད་བྱས་ཏེ་བོད་དོན་གོམ་བགྲོད་གནང་ཡོད་པ་དང་། རིང་བོ་མ་ལོན་པར་རྒྱ་ནག་གི་ཉེན་རྟོག་པ་བསླེབས་ནས་ཁོང་འཛིན་བཟུང་བཙན་ཁྲིད་བྱས་ཡོད་འདུག
གནས་ཚུལ་མཁོ་སྤྲོད་པས། ཁ་སང་ཕྱི་ཚེས་ ༡༨ ཉིན་ས་གནས་ཉེན་རྟོག་པས་དགེ་འདུན་པ་ཁོང་ལ་གཅར་རྡུང་བཏང་སྟེ་གསང་བའི་ཐོག་ནས་རྔ་བ་རྫོང་སྨན་ཁང་ཞིག་ཏུ་སྐྱེལ་དགོས་བྱུང་ཡོད་པ་ཡུལ་མི་འགས་ཤེས་རྟོགས་བྱུང་ཡོད་སྐོར་བརྗོད་བྱུང་ཡང་། ད་ལྟའི་ཆར་ཁོང་གི་གནས་སྟངས་གང་འདྲ་ཆགས་ཡོད་མེད་དང་ཁོང་གི་ནང་མིའི་གནས་ཚུལ་སོགས་ཤེས་རྟོགས་ཐུབ་མེད་སྐོར་བརྗོད་བྱུང་།
གསར་འགོད་པ། པདྨ་རྒྱལ།
