ཨི་ཊ་ལིའི་རྒྱ་ནག་གཞུང་ཚབ་ཁང་གིས་ཨི་ཊ་ལི་གྲོང་སྡེ་ལྷན་ཚོགས་ནས་༧གོང་ས་མཆོག་ལ་ཆེ་བསྟོད་དུ་མི་སེར་ཕྱག་འཁྱེར་འབུལ་འཆར་ཡོད་པ་དེར་ཡུལ་དེའི་རྒྱ་ནག་གཞུང་ཚབ་ཀྱིས་འདོད་པ་མེད་པའི་རྣམ་འགྱུར་བསྟན་ཡོད་འདུག
ཨ་རིའི་ཧྥོ་ཁི་སི་ནེ་བོ་སི་ (foxnews) ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཨི་ཊ་ལིའི་མཡེ་ལན་གྲོང་སྡེ་ལྷན་ཚོགས་ནས་བོད་མིའི་སྐྱབས་མགོན་༧གོང་ས་མཆོག་ལ་མི་སེར་ཕྱག་འཁྱེར་ཕུལ་ཏེ་ཆེས་བསྟོད་ཞུ་འཆར་ཡོད་སྟབས། ཨི་ཊ་ལིའི་རྒྱ་ནག་གཞུང་ཚབ་ཁང་གིས་ངོ་རྒོལ་གྱི་བསྒྲགས་གཏམ་ཞིག་སྤེལ་ཡོད་འདུག
རྒྱ་ནག་གཞུང་ཚབ་ཀྱི་བསྒྲགས་གཏམ་དེའི་ནང་། ཏཱ་ལའི་བླ་མར་ཆེ་མཐོང་གི་མི་སེར་ཕྱག་འཁྱེར་འབུལ་འཆར་དེས་རྒྱ་ནག་མི་མང་གི་སེམས་ལ་རྨ་ཁ་ཆེན་པོ་བཟོས་ཡོད་པ་མ་ཟད། ལས་འཆར་དེས་ཨི་ཊ་ལི་དང་རྒྱ་ནག་གཉིས་བར་གྱི་འབྲེལ་ལམ་དང་མཉམ་འབྲེལ་ལས་དོན་ལའང་ལྡོག་ཕྱོགས་ཀྱི་ཤུགས་རྐྱེན་ཐེབས་རྒྱུ་ཡིན་ལུགས་བཤད་ཡོད་འདུག
གནས་ཚུལ་འདིའི་མཇུག་ཏུ། ཟླ་འདིའི་ཕྱི་ཚེས་ ༢༠ཉིན་༧གོང་ས་ཏཱ་ལའི་བླ་མ་མཆོག་གིས་མཡེ་ལན་བྷེ་ཁོ་ཁ་གཙུག་ལག་སློབ་ཆེན་གྱི་སློབ་ཕྲུག་ཚོར་གསུང་བཤད་ཀྱི་མཛད་འཆར་མ་བསྐྱངས་སྔོན་ལ། ཨི་ཊ་ལི་མའེ་ལན་གྲོང་ཁྱེར་སྤྱི་ཁྱབ་པ་སྐུ་ཞབས་ཨན་གྷི་ལོ་སི་ཁོ་ལ་ (Angelo Scola) མཆོག་ལ་མཇལ་འཕྲད་གནང་ཡོད་པ་དང་། དེའི་རྗེས་མེ་ལན་བྷེ་ཁོ་ཁ་གཙུག་ལག་སློབ་ཆེན་ནང་མེ་ལན་གྲོང་ཁྱེར་དཔོན་རིགས་ཚོས་༧གོང་མཆོག་ལ་མེ་ལན་གྲོང་ཁྱེར་མི་སེར་གྱི་ཕྱག་འཁྱེར་འབུལ་འཆར་ཡོད་བརྗོད་འདུག
གསར་འགོད་པ། པདྨ་རྒྱལ།
