དེ་རིང་རྒྱ་ནག་ལྷོ་རྒྱུད་ཞོགས་པའི་ཚགས་པར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་ནན་ཅིན་མི་མང་བཅིངས་འགྲོལ་དམག་གི་དམག་སྤྱི་ཟུར་བ་ཝང་ཧོང་གུང་ (Wang Hongguang) ཟེར་བ་ཞིག་གིས། རྒྱ་ནག་མི་དམངས་བཅིངས་འགྲོལ་དམག་གིས་ཐའེ་ཝན་མཚོ་འགག་ཕྱིར་ལེན་ཐབས་སུ་མཁའ་མཚོ་གཉིས་ནས་ཐའེ་ཝན་མཚོ་འགག་ལ་དམག་རྒྱག་རྒྱུར་གྲ་སྒྲིག་བྱེད་དགོས་ཚུལ་བཤད་ཡོད་པ་དང་། ཐའེ་ཝན་གྱི་དམག་དོན་པ་ཚོས་ཝང་ཧོང་གུང་གི་སྐད་ཆ་དེ་ནི་ཐའེ་ཝན་སྲིད་འཛིན་ལྕམ་ཚའེ་ཡེན་ཝན་ལ་གནོན་ཤུགས་སྤྲོད་ཐབས་ཤིག་ཡིན་སྐོར་བརྗོད་འདུག
རྒྱ་ནག་ནན་ཅིན་མི་དམངས་བཅིངས་འགྲོལ་དམག་གི་དམག་སྤྱི་ཟུར་བ་ཝང་ཧོང་གུང་གིས། རྒྱ་ནག་མི་མང་བཅིངས་འགྲོལ་དམག་གི་ཆུ་འཛུལ་དམག་གྲུ་ཐའེ་ཝེན་མཚོ་ཐོག་ཏུ་བསྐྱོད་པའི་ལྟ་གོན་བྱེད་པ་དང་། ཐའེ་ཝན་མཚོ་འགག་དང་སྐམ་ས་ཆེན་མོ་གཉིས་བར་གྱི་མཚོ་ཁུལ་དུ་དྲག་ཆས་དམག་སྦྱོང་བྱེད་པ། དེ་བཞིན། ཆུ་འཛུལ་དམག་གྲུར་བརྟེན་ནས་ཐའེ་ཝན་མཚོ་འགག་ལ་དམག་རྒྱག་གྲ་སྒྲིག་བྱེད་དགོས་ལུགས་སོགས་བཤད་ཡོད་འདུག
ཡང་ཁོས། རྒྱ་ནག་མི་དམངས་བཅིངས་འགྲོལ་མཁའ་དམག་གིས་ཐའེ་ཝན་མཚོ་འགག་གི་མཁའ་ལམ་བརྒྱུད་ནས་དམག་འཐབ་ལ་གྲ་སྒྲིག་བྱེད་དགོས་པ་དང་། ཐའེ་ཝན་གྱི་ཁའུ་མོ་ཡེ་ (Quemoy) ཞེས་པའི་གླིང་ཕྲན་སྟེང་དྲག་ཆས་དམག་དཔུང་གི་ལྟེ་གནས་ ༥ བཙུགས་ཏེ། ཐའེ་ཝན་གྱི་གྲོང་ཁྱེར་ཐའེ་པེ་གཙོས་པའི་སེན་ཀྲུ་ (Hsinchu) དང་ཐའོ་ཡུན་ (Taoyuan) སོགས་སུ་ཁ་གཏོད་དགོས་པ་དང་། ཐའེ་ཝན་སྲིད་འཛིན་ཚའེ་ཡེན་ཝན་གྱིས་ཐའེ་ཝན་རང་བཙན་གྱི་ལངས་ཕྱོགས་འཛིན་པའི་སྐབས་འདིར། རྒྱ་ནག་མི་དམངས་བཅིངས་འགྲོལ་དམག་དཔུང་གིས་ཐའེ་ཝན་ལ་དཔུང་འཇུག་གི་ཐབས་ཇུས་འཐེན་དགོས་སྐོར་སོགས་བཤད་ཡོད་འདུག
ཐའེ་ཝན་རྒྱལ་སྲུང་ལྷན་ཁང་གི་བློན་ཆེན་ཟུར་བ་ལེན་ཁྲུང་ཕེན་ (Lin Chong-pin) ཞུ་བས། རྒྱ་ནག་གི་གླེང་ཕྱོགས་དེ་ནི་ཐའེ་ཝན་གྱི་སེམས་ཤུགས་གཅོག་ཐབས་ཤིག་དང་། ཐའེ་ཝན་ལ་འཇིགས་སྐུལ་བྱས་པ་ཞིག་ཡིན་སྟབས། ཐའེ་ཝན་ཕྱོགས་ནས་རྒྱ་ནག་གི་གླེང་ཕྱོགས་དེ་ལ་བརྡ་ལེན་ཅི་ཡང་སྤྲོད་རྒྱུ་མིན་པ་དང་། ཐའེ་ཝན་མཚོ་འགག་གི་དམག་དཔུང་ལ་ཐའེ་ཝན་རྒྱལ་ཁབ་དང་ཐའེ་ཝན་མི་མང་སྲུང་སྐྱོབ་ཀྱི་གདེང་སྤོབས་ཡོད་སྐོར་བརྗོད་འདུག
གནས་ཚུལ་ལྟར་ན། ཝང་ཧོང་གུང་ཟེར་བ་དེས་ན་ནིང་ཕྱི་ཟླ་ ༤ པ་དང་། ད་ལོའི་ཕྱི་ཟླ་ ༣ པའི་ནང་སྔ་རྗེས་སུ་རྒྱ་ནག་མི་དམངས་བཅིངས་འགྲོལ་དམག་གིས་མེ་ཤུགས་འཕུར་མདེལ་ལ་བརྟེན་ནས་ཐའེ་ཝན་མཚོ་འགག་ལ་དཔུང་འཇུག་བྱས་ཏེ་ཐའེ་ཝན་མཚོ་འགག་ཕམ་ཉེས་བཟོས་དགོས་པ་དང་། ཐའེ་ཝན་ནང་དཔུང་འཇུག་བྱེད་ས་གཙོ་བོ་ཐའེ་ཝན་མཚོ་འགག་གི་ལྷོ་བྱང་གཉིས་བར་གྱི་ཁྲོ་ཧྲུ་གཙང་ཁུལ་ (Choshui River) ཡིན་ལུགས་སོགས་བཤད་ཡོད་འདུག
གསར་འགོད་པ། པདྨ་རྒྱལ།
