རྒྱ་གཞུང་གིས་ཡུ་གུར་དུ་ཕྱི་ཕྱོགས་སུ་འགྲོ་འོང་བྱེད་མཁན་ཚོས་ངེས་པར་དུ་ས་ཁུལ་སོ་སོའི་ཉེན་རྟོག་ཁང་དུ་ཐོ་འགོད་བྱེད་པ་དང་ཉེན་རྟོག་ཁང་གི་ཞིབ་བཤེར་བརྒྱུད་དགོས་ལུགས་ཀྱི་བཀའ་ཁྱབ་བསྒྲགས་ཡོད་འདུག
ཧོང་ཀོང་རང་དབང་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཤིན་ཅང་ཡུ་གུར་མི་རིགས་རང་སྐྱོང་ཁུལ་ཨ་ཁི་སུ་ (Akesu) གྲོང་ཁྱེར་ཉེན་རྟོག་ཁང་གིས་གསལ་བསྒྲགས་ཤིག་སྤེལ་ཏེ། ཡུ་གུར་མི་མང་ཚོར་ཕྱི་སྐྱོད་ལག་འཁྱེར་དགོས་ན་ས་གནས་རིམ་པའི་ཉེན་རྟོག་ཁང་ནས་ཐོ་འགོད་བྱེད་པ་དང་། ཉེན་རྟོག་ཁང་གི་ཞིབ་བཤེར་བརྒྱུད་དགོས་པ་དང་། ཕྱི་སྐྱོད་ལག་འཁྱེར་ལ་ཞིབ་བཤེར་བྱེད་པའི་ལས་འགུལ་དེ་ཤིན་ཅང་ཡུ་གུར་མི་རིགས་རང་སྐྱོང་ཁུལ་ཡོངས་སུ་ལག་བསྟར་བྱ་རྒྱུ་ཡིན་ཞིང་། སྲིད་ཇུས་དེ་གོང་རིམ་ནས་བསྒྲགས་པའི་སྤྱི་ཚོགས་བདེ་འཇགས་ཀྱི་བཀའ་ཁྱབ་ཅིག་ཡིན་ལུགས་སོགས་བཤད་འདུག
རང་མིང་བརྗོད་མེད་པའི་ཡུ་གུར་བ་ཞིག་གིས། ང་རང་ཕྱི་ལོགས་སུ་གུང་གསེང་ལ་འགྲོ་ཐེངས་རེ་རེར་ས་གནས་སྲིད་གཞུང་གི་དམ་དྲག་དང་བཀའ་ཁྱབ་འོག་ཕྱི་སྐྱོད་ལག་འཁྱེར་རག་ཐབས་སུ་དངུལ་དང་ཆུ་ཚོད་མང་པོ་གཏོང་དགོས་སྟབས་དཀའ་ངལ་ཆེན་པོ་འདུག གལ་ཏེ་རྒྱ་ནག་གི་མི་སེར་ཚོར་གཞི་རྩའི་ཐོབ་ཐང་འདི་ཙམ་ཡང་མེད་ན། ང་ཚོས་རྗེས་ཕྱོགས་ཀྱི་འཚོ་བ་ཅི་ལྟར་རོལ་དགོས་སམ། དབུས་གཞུང་ནས་གནད་དོན་འདིའི་ཐོག་བསམ་ཤེས་གནང་བའི་རེ་བ་ཡོད། ཅེས་དང་། ཡུལ་མི་གཞན་ཞིག་གིས། དུས་ཀྱི་འགྱུར་འགྲོས་དང་བསྟུན་ནས་ཤིན་ཅང་ཡུ་གུར་མི་མང་གི་གནས་སྟངས་རྒྱུས་ལོན་དཀའ་བ་ཞིག་ཏུ་འགྱུར་འདུག ཅེས་བརྗོད་འདུག
པེ་ཅིན་གཞུང་ཕྱོགས་ནས་ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་ཡུ་གུར་བ་ཚོ་ཕྱི་ཕྱོགས་ཀྱི་ཊུར་ཀི་སི་ཐན་ཁ་ཆེ་ལས་འགུལ་ (ETIM) ཞེས་པའི་ཁ་བྲལ་རིང་ལུགས་པ་ཚོ་དང་འབྲེལ་བ་ཡོད་ལུགས་བཤད་དེ། ཡུ་གུར་བ་ཚོའི་འགྲོ་འདུག་རང་དབང་དང་ཆོས་ལུགས་བྱེད་སྒོ་ཁག་གི་ཐོག་དམ་དྲག་བྱེད་ཀྱིན་ཡོད་ནའང་། ཕྱི་ཕྱོགས་ཀྱི་འགྲོ་བ་མིའི་ཐོབ་ཐང་དང་རང་དབང་ཚོགས་སྡེ་ཁག་གི་ཆེད་ལས་ཞིབ་འཇུག་པ་ཚོས། རྒྱལ་སྤྱིའི་འཇིགས་སྐུལ་དྲག་སྤྱོད་ཤོག་ཁག་དང་ཤིན་ཅང་ས་ཁུལ་གྱི་ཡུ་གུར་མི་མང་བར་འབྲེལ་བ་གང་ཡང་མེད་པ་དང་། རྒྱ་ནག་གཞུང་གིས་ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་རང་བྱུང་ཐོན་ཁུངས་ལ་དམིགས་ཏེ་ས་ཁུལ་དེའི་བདེ་འཇགས་སྲུང་སྐྱོབ་ལ་ཁ་གཡར་ནས་ས་གནས་མི་མང་ཐོག་དམ་དྲག་ཤུགས་ཆེན་བྱེད་བཞིན་ཡོད་སྐོར་བརྗོད་འདུག
ད་ལོའི་ཕྱི་ཟླ་ ༦ པ་ནས་བཟུང་ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་མཐའ་མཚམས་སུ་འཁེལ་བའི་ཀ་ཛ་ཀ་ (Kazakh) ཡུལ་མི་ཚོ་ཕྱི་ཕྱོགས་སུ་འགྲོ་འོང་བྱེད་པར་ངེས་པར་དུ་ས་ཁུལ་དེའི་ཉེན་རྟོག་ཁང་གི་ཞིབ་བཤེར་ཡིག་ཆ་དང་མཛུབ་ཐིལ། སྐད་ཆའི་སྒྲ་ཐག དེ་བཞིན་པར་མགོ་གསུམ་བཅས་སྤྲད་ནས་ཕྱི་སྐྱོད་ཡིག་ཆ་དང་ཕྱི་སྐྱོད་ལག་འཁྱེར་ཞུ་དགོས་ཀྱི་ཡོད་འདུག
ཤིན་ཅང་ཡུ་གུར་མི་རིགས་རང་སྐྱོང་ཁུལ་དུ་ཁ་ཆེ་ཡུ་གུར་བ་ས་ཡ་ ༡༠ ལྷག་ཡོད་པ་ཚང་མས་རྒྱ་ནག་གཞུང་གིས་ཁོ་ཚོའི་ཕྱི་སྐྱོད་ལག་འཁྱེར་ཙམ་མ་ཟད། ཁོ་ཚོའི་ཆོས་ལུགས་རིག་གཞུང་གི་བྱེད་སྒོ་ཁག་གི་ཐོག་དམ་དྲག་བྱས་ཏེ་མི་རིགས་དབྱེ་འབྱེད་བྱེད་བཞིན་པར་སྐྱོན་བརྗོད་བྱེད་ཀྱིན་ཡོད་འདུག གཞན། བོད་ཕྱི་ནང་གི་སྤྱི་ཚོགས་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཉེ་ཆར་རྒྱ་གཞུང་གིས་མཚོ་སྔོན་དང་རེབ་གོང་། བླ་བྲང་ཕྱོགས་ནས་བོད་མི་གནས་མཇལ་དུ་ཡོང་མཁན་ཚོར་ཐོག་མར་ཕྱི་སྐྱོད་ལག་འཁྱེར་སྤྲད་ཡོད་ནའང་། ཕྱིས་སུ་བོད་མི་དེ་ཚོ་རྒྱ་གར་དུ་གནས་མཇལ་ལ་ཡོང་སྐབས། གནམ་ཐང་ཁག་ནས་གློ་བུར་འཛིན་བཟུང་བཙན་ཁྲིད་བྱས་ཡོད་པ་མ་ཟད། ད་དུང་ས་གནས་འགའ་ཞིག་ནང་བོད་མི་གནས་མཇལ་དུཡོང་མཁན་ཚོའི་ཕྱི་སྐྱོད་ལག་འཁྱེར་ཕྱིར་བསྡུ་ཡང་བྱེད་བཞིན་ཡོད་འདུག
གསར་འགོད་པ། པདྨ་རྒྱལ།
