རྒྱ་ནག་གི་རིག་གསར་རྗེས་ལ་བོད་པའི་ཆོས་དང་རིག་གཞུང་བསྐྱར་གསོའི་ལས་དོན་ཐོག་ཕྱག་རྗེས་འཇོག་མཁན་མཁས་པ་ཚེ་བརྟན་ཞབས་དྲུང་མཆོག་དང་རྩིས་རམས་པ་བསམ་འགྲུབ་རྒྱ་མཚོ་རྣམ་གཉིས་ལ་རྗེས་དྲན་ཞུས།
ཕྱི་ཟླ་ ༡༡ ཚེས་ ༡༩ ཉིན། ནུབ་བྱང་མི་རིགས་སློབ་གྲྭ་ཆེན་མོའི་ནང་། “མཁས་དབང་ཚེ་ཏན་ཞབས་དྲུང་དང་བསམ་གྲུབ་རྒྱ་མཚོ་མཆོག་གཉིས་ཀྱི་རིག་གཞུང་བསམ་བློའི་བགྲོ་གླེང་ཚོགས་འདུ་” ཞེས་པ་ཚོགས་ཡོད་པ་དང་། ཚོགས་འདུ་དེའི་སྟེང་། སྦྲང་ཆར་རྩོམ་སྒྲིག་ཁང་གི་མཁས་དབང་ཟླ་བ་བློ་གྲོས་དང་། ཀྲུང་གོའི་བོད་རིག་པའི་དཔེ་སྐྲུན་ཁང་གི་ལོ་རྒྱུས་མཁས་པ་རྒྱལ་མོའི་འབྲུག་པ། ནུབ་བྱང་མི་རིགས་སློབ་ཆེན་གྱི་སློབ་གཙོ་ཟུར་བ་གཉའ་ཀོང་དཀོན་མཆོག་ཚེ་བརྟན་དང་སློབ་གཙོ་གཞོན་པ་ཟུར་བ་སྙིང་བོ་རྒྱལ། སྐད་བརྡ་རིག་པའི་ཆེད་མཁས་པ་དཔའ་མཁར། མཚོ་སྔོན་དགེ་འོས་སློབ་ཆེན་གྱི་སློབ་དཔོན་ཆེན་མོ་རྒྱ་ཡེ་བཀྲ་བྷོ། ཀན་ལྷོ་དགེ་འོས་སློབ་གླིང་གི་དགེ་རྒན་ཆེན་མོ་རྡོ་ཕྲུག ལྷ་མཆོག་རྒྱལ། ཁ་སྒང་བཀྲ་ཤིས་ཚེ་རིང་། དེ་བཞིན་རྒྱ་རིགས་བོད་རིག་པའི་མཁས་པ་སོགས་མཁས་པ་དང་ཞིབ་འཇུག་པ་ ༦༠༠ ལྷག་འཛོམས་ཡོད་འདུག
ཚོགས་འདུའི་སྟེང་མཁས་དབང་ཚེ་ཏན་ཞབས་དྲུང་དང་བསམ་གྲུབ་རྒྱ་མཚོ་མཆོག་གཉིས་ཀྱི་རིག་གཞུང་གི་མི་ཚེའི་ལོ་རྒྱུས་དང་རིག་གཞུང་ཞིབ་འཇུག་གི་འབྲས་བུ། བོད་སྐད་ཡིག་རྩོམ་རིག་ཆེད་ལས་འཛུགས་སྐྲུན་ཐད་ཕྱག་རྗེས་སོགས་ལ་བགྲོ་གླེང་དཔྱད་བསྡུར་གནང་ཡོད་པ་རེད། སྔ་དྲོའི་བགྲོ་གླེང་དབུ་འཛུགས་མཛད་སྒོའི་སྟེང་། ལོ་རྒྱུས་ཞིབ་འཇུག་པ་རྒྱལ་མོ་འབྲུག་པ་དང་ཆེན་རྡོ་རྗེ། རྡོ་ཕྲུག ཁ་སྒང་བཀྲ་ཤིས་ཚེ་རིང་། དགེ་འདུན་བསམ་གཏན། རྡོ་རྗེ་རིན་ཆེན། སྒོམ་པ་བཀྲ་ཤིས་བཅས་ཀྱིས་སྔ་རྗེས་སུ་གཏམ་བཤད་གནང་སྟེ་སློབ་དཔོན་ཆེན་པོ་གཉིས་ལ་དྲན་གསོ་ཞུས་པ་དང་། དགེ་རྒན་ཆེན་མོ་མཱ་ཅིན་ཝུའུ་ཡིས་《སློབ་དཔོན་གཉིས་ནི་ང་ཚོས་སློབ་སྦྱོང་བྱེད་པའི་མིག་དཔེ་ཡག་ཤོས་ཡིན་》ཅེས་པའི་གསུང་བཤད་གནང་སྟེ། མཁས་དབང་ཚེ་ཏན་ཞབས་དྲུང་མཆོག་གི་རིག་གཞུང་ཞིབ་འཇུག་གི་ཉམས་མྱོང་དང་ཐབས་ཤེས། སློབ་ཁྲིད་གནང་ཐབས། ཐུན་མོང་མ་ཡིན་པའི་དཔེ་ཀློག་གནང་ཐབས་སོགས་ལ་དྲན་གསོ་བྱས་ཡོད་པ་དང་། སློབ་དཔོན་ཆེན་མོ་བསམ་གྲུབ་རྒྱ་མཚོ་མཆོག་ནི་གནམ་རིག་སྐར་རྩིས་རིག་པའི་མཁས་དབང་ཆེན་མོ་ཡིན་པ་དང་། སྔ་རྗེས་སུ་ནུབ་བྱང་མི་རིགས་སློབ་ཆེན་དང་མཚོ་སྔོན་དགེ་འོས་སློབ་ཆེན་སོགས་མཐོ་སློབ་ཁག་ཏུ་བོད་ཀྱི་གནམ་རིག་སྐར་རྩིས་ཐོག་ཤེས་ལྡན་མི་སྣ་མང་པོ་གསོ་སྐྱོང་གནང་བ་དང་། <<བོད་ཀྱི་གནམ་རིག་སྐར་རྩིས་རིག་པའི་ཚིག་མཛོད་>>དང་། <<སྐར་རྩིས་ཀུན་འདུས་ནོར་བུ།>>སོགས་གཙོ་བྱས་པའི་རྩིས་དཀར་ནག་སྐོར་གྱི་ཕྱག་རྩོམ་མང་པོ་མཛད་ཡོད་པ་དང་། བོད་ཀྱི་སྲོལ་རྒྱུན་གནམ་རིག་སྐར་རྩིས་རིག་པ་དེང་རབས་ཅན་དུ་བསྒྱུར་པར་བྱས་རྗེས་ཆེན་པོ་བཞག་གནང་མཛད་ཡོད་པ་སོགས་ངོ་སྤྲོད་གནང་ཡོད་པ་རེད།
ཕྱི་དྲོ་ཚོགས་འདུ་ཚོགས་ཆུང་གཉིས་སུ་བགོས་ནས་བགྲོ་གླེང་བྱས་ཡོད་ཅིང་། མཚོ་སྔོན་མི་རིགས་དཔེ་སྐྲུན་ཁང་གི་རྩོམ་སྒྲིག་ཞུ་ཆེན་པ་ཟླ་བ་བློ་གྲོས་དང་ལྷོ་ནུབ་མི་རིགས་སློབ་ཆེན་གྱི་དགེ་རྒན་ཆེན་མོ་འབུམ་སྐྱབས། མཚོ་སྔོན་དགེ་འོས་སློབ་ཆེན་གྱི་དགེ་རྒན་ཆེན་མོ་གཟུངས་འབུམ་ཐར་སོགས་ཆེད་མཁས་པ་ ༢༠ ཙམ་གྱིས་གཏམ་བཤད་གནང་སྟེ། གས་མི་འདྲ་བའི་ཐོག་ནས་རང་རང་སོ་སོའི་ཀྱི་རིག་གཞུང་ཉམས་མྱོང་དང་སྦྲགས་ཏེ། མཁས་མཆོག་རྣམ་པ་གཉིས་ཀྱི་རིག་གཞུང་བསམ་བློ་ལ་ངོས་ཟིན་དང་། མི་རིགས་སློབ་གསོའི་བྱ་གཞག་ཐད་བཞག་པའི་བླ་མེད་ཀྱི་བྱས་རྗེས་ལ་རྗེས་དྲན། གཟབ་ནན་གྱི་རིག་གཞུང་ཞིབ་འཇུག་གི་ཤེས་རབ་དང་ཞིབ་འཇུག་གི་སྤྱོད་པ། གསར་གཏོད་ཞིབ་འཇུག་གི་ཐབས་ལམ་སོགས་རྒྱུན་འཛིན་དང་དར་སྤེལ་བཏང་སྟེ། རིག་གཞུང་ལས་རིགས་ཐུན་མོང་གི་བསམ་པའི་རྒྱུ་ནོར་དུ་འཛིན་དགོས་པ་སོགས་བརྗོད་ཡོད་འདུག
