མཉམ་འབྲེལ་རྒྱལ་ཚོགས་ལས་འཛིན་ལྷན་ཚོགས་ནས་བྱང་ཀོ་རི་ཡའི་ཕྱིར་ཚོང་དངོས་ཟོག་ལ་ཚོད་འཛིན་བྱས་ཏེ་དཔལ་འབྱོར་གྱི་ཉེས་ཆད་གཅོད་རྒྱུ་ཡིན་འདུག
བྷི་བྷི་སི་ཡིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༣༠ ཉིན། མཉམ་འབྲེལ་རྒྱལ་ཚོགས་ལས་འཛིན་ལྷན་ཚོགས་ནས་བྱང་ཀོ་རི་ཡའི་དཔལ་འབྱོར་གྱི་ཐོན་ཁུངས་ཆེ་ཤོས་རྡོ་སོལ་དང་ལྕགས་སོགས་ཕྱིར་ཚོང་དངོས་ཟོག་ལ་ཚོད་འཛིན་བྱས་ཏེ། རྡུལ་ཕྲན་མཚོན་ཆ་དང་མེ་ཤུགས་འཕུར་མདའ་བཟོ་སྐྲུན་ལ་བཀག་འགོག་དང་ཉེས་ཆད་གཅོད་པའི་གྲོས་ཆོད་གསར་པ་ཞིག་སྤྱི་མོས་གཏན་འབེབས་བྱུང་ཡོད་པ་དང་། ལོ་ ༢༠༡༧ ཟླ་ ༧ ཚེས་ ༧ ཉིན་ནས་བཟུང་ལག་བསྟར་གནང་རྒྱུ་ཡིན་འདུག
ཐེངས་འདིའི་གྲོས་ཆོད་གསར་པ་དེའི་ནང་། ལོ་རེར་བྱང་ཀོ་རི་ཡའི་རྡོ་སོལ་ཏུན་ཁྲི་ ༧༥༠ ལས་བརྒལ་བ་ཉོ་མི་ཆོག་པ་དང་། དེ་བཞིན། བྱང་ཀོ་རི་ཡའི་ཟངས་དང་གཤའ་དཀར། དངུལ། ཏི་ཚ་ཕྱིར་ཚོང་ལ་བཀག་སྡོམ་བྱ་རྒྱུ་ཡིན་པ་མ་ཟད། ཨ་ཧྥེ་རི་ཁའི་རྒྱལ་ཁབ་ཁག་ཅིག་ཏུ་བྱང་ཀོ་རི་ཡའི་ཐད་འཕུར་གནམ་གྲུ་དང་གྲུ་གཟིངས། འདྲ་སྐུ་ཕྱིར་ཚོང་བྱེད་བཞིན་པ་འགོག་རྒྱུ་ཡིན་སྐོར་དང་། ཁྲིམས་འགལ་གྱི་ཅ་དངོས་རིགས་དབོར་འདྲེན་བྱེད་པ་འགོག་ཆེད། འབྲེལ་ཡོད་རྒྱལ་ཁབ་རྣམས་ཀྱིས་བྱང་ཀོ་རི་ཡར་འགྲོ་མཁན་འགྲུལ་བ་སྒེར་གྱི་འདྲུད་སྒམ་ལ་ཞིབ་བཤེར་བྱེད་ཆོག་སྐོར་བརྗོད་འདུག
ཡང་མཉམ་འབྲེལ་རྒྱལ་ཚོགས་ཀྱི་གྲོས་ཆོད་གསར་པ་དེའི་ནང་། བྱང་ཀོ་རི་ཡའི་རྡུལ་ཕྲན་མཚོན་ཆ་དང་མེ་ཤུགས་འཕུར་མདའི་ལས་གཞིའི་ནང་མཉམ་ཞུགས་བྱས་པའི་ནག་ཉེས་འོག འཛམ་གླིང་སྤྱི་ཡོངས་སུ་ཡུལ་སྐོར་ལྗོངས་རྒྱུའི་ཐོབ་ཐང་མེད་པ་དང་ཤུལ་བཞག་རྒྱུ་ནོར་བེད་མེད་ཁྲིམས་ཆད་ཕོག་པའི་མིང་གཞུང་ནག་པོ་རྒྱ་སྐྱེད་དེ། མི་སྒེར་བ་ ༡༡ གསར་འཇུག་དང་ནང་གསེས་དབྱེ་བ་ ༡༠ བཟོས་ཡོད་པ་དང་། མི་སྒེར་གྱི་མིང་གཞུང་ནག་པོའི་ནང་ཨེ་ཇིབ་དང་འབར་མའི་ནང་གི་བྱང་ཀོ་རི་ཡའི་གཞུང་ཚབ་ཆེན་མོ་ཡང་ཚུད་ཡོད་འདུག
ཐེངས་འདིའི་གྲོས་ཆོད་བརྒྱུད་རྒྱལ་ཚོགས་ལས་འཛིན་ལྷན་ཚོགས་ཀྱིས། བྱང་ཀོ་རི་ཡ་གཞུང་ནས་རྒྱལ་ཁབ་གཞན་གྱི་ཕྱི་འབྲེལ་མི་སྣ་དང་ཕྱི་འབྲེལ་ལས་ཁུངས་བེད་སྤྱོད་བཏང་སྟེ་ཁྲིམས་འགལ་གྱི་བྱ་སྤྱོད་རིགས་མི་འབྱུང་ཆེད། བྱང་ཀོ་རི་ཡའི་ནང་དུ་ཡོད་པའི་མཉམ་འབྲེལ་རྒྱལ་ཚོགས་ཀྱི་ཚོགས་ཞུགས་རྒྱལ་ཁབ་ཁག་གི་ཕྱི་འབྲེལ་ལས་ཁུངས་ཀྱི་ལས་བྱེད་གྲངས་འབོར་ལ་ཚོད་འཛིན་དགོས་པ་མ་ཟད། ལས་བྱེད་རེ་རེས་དངུལ་ཁང་ནང་དངུལ་བཅོལ་འཇོག་བྱེད་ས་གཅིག་མ་གཏོགས་སྒོ་ཕྱེ་མི་ཆོག་པ་བཟོ་དགོས་པའི་རེ་སྐུལ་བྱས་ཡོད་འདུག
བྱང་ཀོ་རི་ཡ་གཞུང་ནས་རྡུལ་ཕྲན་མཚོན་ཆའི་ཚོད་ལྟ་རིམ་པ་བྱས་ཡོད་པར་བརྟེན། ཕྱི་ལོ་ ༢༠༠༦ ལོ་ནས་བཟུང་མཉམ་འབྲེལ་རྒྱལ་ཚོགས་ཀྱི་ཚོགས་ཞུགས་རྒྱལ་ཁབ་ ༡༩༣ ཡིས། བྱང་ཀོ་རི་ཡའི་རྡོ་སོལ་དང་ལྕགས་སོགས་ཉོ་བར་བཀག་སྡོམ་གྱི་གྲོས་ཆོད་བཞག་སྟེ་དཔལ་འབྱོར་གྱི་ཉེས་ཆད་བཏང་ཡོད་ཀྱང་། འདི་ལོའི་ཕྱི་ཟླ་ ༩ པའི་ནང་བྱང་ཀོ་རི་ཡ་གཞུང་གིས་རྡུལ་ཕྲན་མཚོན་ཆའི་ཚོད་ལྟ་ཐེངས་ལྔ་པ་བྱས་ཡོད་པ་མ་ཟད། ད་ལྟའི་བར་གྱི་ཚོད་ལྟ་གཞི་རྒྱ་ཆེ་ཤོས་དེ་ཆགས་ཡོད་སྟབས། མཉམ་འབྲེལ་རྒྱལ་ཚོགས་ཀྱི་གཙོས་ཁྱིམ་མཚེས་རྒྱལ་ཁབ་ཁག་གིས་འཇིགས་སྐུལ་གཏོང་བའི་བྱ་སྤྱོད་ཅིག་ཡིན་སྐོར་བརྗོད་དེ་སྐྱོན་བརྗོད་ཤུགས་ཆེན་བྱས་ཡོད་པས་མི་ཚད། སྔར་ལས་ཉེས་ཆད་ལྕི་མོ་གཅོད་དགོས་པའི་བསྒྲགས་གཏམ་སྤེལ་ཡོད་པ་ལྟར། འདས་པའི་ཟླ་ ༢ ལྷག་རིང་ཨ་རི་དང་རྒྱ་ནག་གཉིས་ཀྱིས་གོ་བསྡུར་བྱས་པ་བརྒྱུད། ཉེ་སྔོན་མཉམ་འབྲེལ་རྒྱལ་ཚོགས་ལས་འཛིན་ལྷན་ཚོགས་ཀྱི་ཚོགས་ཞུགས་རྒྱལ་ཁབ་ ༡༥ ལ་འཆར་ཟིན་ཕུལ་ཏེ་སྤྱི་མོས་གཏན་འབེབས་བྱུང་བ་ཞིག་ཡིན་འདུག
གསར་འགོད་པ། པདྨ་མཚོ།
