ཝང་ཆི་ཧྲན་གྱིས་དམར་ཤོག་ཚོགས་པའི་ཚོགས་མི་དང་དཔོན་རིགས་ཚོས་ཆོས་ལུགས་ལ་ཡིད་ཆེས་མི་བྱེད་པར་མར་ལེའི་རིང་ལུགས་དང་སྲིད་གཞུང་གི་མགོ་ཁྲིད་ཚོར་ཡིད་ཆེས་བྱེད་དགོས་ལུགས་བཤད་འདུག
རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་དྲུང་ཆེ་ཝང་ཆི་ཧྲན་ (Wang Qishan) གྱིས་ཉེན་བརྡའི་གསལ་བསྒྲགས་ཤིག་སྤེལ་ཏེ་དམར་ཤོག་ཚོགས་པའི་དཔོན་རིགས་ཚོས་གདོན་འདྲེ་ཆོ་འཕྲུལ་ལྟ་བུའི་ཆོས་ལུགས་དབུ་ཁྲིད་ཚོར་ཡིད་ཆེས་མི་བྱེད་པར་མར་ལེའི་རིང་ལུགས་ལ་ཡིད་ཆེས་བྱེད་དགོས་ལུགས་བཤད་ཡོད་པ་དང་། སྐད་ཆ་དེ་ཉེ་ཆར་དམར་ཤོག་དཔོན་རིགས་གཉིས་ཀྱིས་ལས་གནས་ནས་དགོངས་པ་ཞུས་རྗེས། ཁོང་གཉིས་ལ་ལྐོག་ཟ་རུལ་སུངས་ཀྱི་ནག་ཉེས་ཡོད་པའི་གནས་ཚུལ་བྱུང་བ་དང་འབྲེལ་ཏེ་བཤད་པ་ཞིག་ཡིན་འདུག
ཝང་ཆི་ཧྲན་གྱིས། ད་ཆར་ཏང་གི་ཚོགས་མི་རེ་འགའ་དང་དཔོན་རིགས་ལ་ལས་མར་ལེའི་རིང་ལུགས་ལ་ཡིད་ཆེད་མི་བྱེད་པར་གདོན་འདྲེ་ཆོ་འཕྲུལ་ལྟ་བུའི་ཆོས་ལུགས་དབུ་ཁྲིད་ཚོར་ཡིད་ཆེས་བྱེད་པ་དང་། སོ་སོའི་མགོ་ཁྲིད་ལ་ཡིད་ཆེས་མི་བྱེད་པར་ཏང་དང་རྒྱལ་ཁབ་ལ་ངོ་ལོག་པའི་སྒྲིག་འཛུགས་ལ་ཡིད་ཆེས་བྱེད་ཀྱིན་འདུག ཏང་ནང་ཁུལ་གྱི་ལྐོག་ཟ་རུལ་སུངས་ཞིབ་བཤེར་ལས་འགུལ་མགོ་བརྩམ་མ་ཐག་ནས་དམར་ཤོག་ཚོགས་པའི་ཚོགས་མི་དང་། དཔོན་རིགས་འགའ་རེས་སྤྱི་དོན་སྒེར་དོན་ཅན་དུ་བསྒྱུར་བཞིན་པ་དེ་ནི། དམར་ཤོག་ཚོགས་པའི་རྩ་བའི་ལངས་ཕྱོགས་དང་རྦད་དེ་རྒྱབ་འགལ་དུ་གྱུར་ཡོད། ཅེས་སོགས་བརྗོད་འདུག
གནས་ཚུལ་འདིའི་མཇུག་ཏུ། ཞི་ཅིན་ཕིན་གྱིས་དམར་ཤོག་ཚོགས་པའི་གོ་དབང་ལ་དམིགས་ཏེ་དམར་ཤོག་ཚོགས་པ་ནང་ཁུལ་གྱི་ལྐོག་ཟ་རུལ་སུངས་གཙང་བཤེར་ལས་འགུལ་སྤེལ་བ་ནས་བཟུང་། དམར་ཤོག་ཚོགས་པ་ནང་ཁུལ་གྱི་དཀའ་རྙོག་ཡིད་སྐྱོ་བ་ཞིག་ཏུ་གྱུར་ཡོད་སྐོར་བརྗོད་འདུག
གསར་འགོད་པ། པདྨ་རྒྱལ།
