སི་པིན་གྱི་ཉེན་རྟོག་པ་ ༦༠༠ ཙམ་གྱིས་གློ་བུར་འགུལ་སྐྱོད་བྱས་ཏེ་ཡུལ་དེའི་ནང་གནས་སྡོད་རྒྱ་ནག་གི་མི་སེར་དོགས་ཡོད་མགོ་སྐོར་བ་ ༢༠༠ ལྷག་འཛིན་བཟུང་བྱས་ཡོད་འདུག
ཁ་སང་སི་པིན་ཉེན་རྟོག་ཁང་གིས་གསར་འགོད་ལྷན་ཚོགས་ཤིག་བསྡུས་ཏེ། ཟླ་འདིའི་ཕྱི་ཚེས་ ༡༣ ཉིན་སི་པིན་གྱི་ཉེན་རྟོག་པ་ ༦༠༠ ཙམ་གྱིས་གློ་བུར་འགུལ་སྐྱོད་བྱས་ཏེ། རྒྱ་ནག་གི་མི་སེར་ཡིན་པའི་དོགས་ཡོད་ཉེས་ཅན་ ༢༠༠ ལྷག་འཛིན་བཟུང་བྱས་ཡོད་པ་དང་། དོགས་ཡོད་ཉེས་ཅན་པས་རྒྱ་ནག་ནང་ཡོད་པའི་མི་མང་ལ་མགོ་སྐོར་བཏང་སྟེ་ཡུ་སྒོར་ས་ཡ་ ༡༦ ཧམ་ལེན་བྱས་ཡོད་སྐོར་བསྒྲགས་འདུག
ཉེན་རྟོག་པས་དོགས་ཡོད་ཉེས་ཅན་དེ་ཚོས་སི་པིན་གྱི་རྒྱལ་ས་མུ་ཌིར་(Madrid)དང་བྷར་སི་ལོ་ནཱ་(Barcelona)། ཨ་ལི་ཁན་ཊི་(Alicante)སོགས་སུ་མགོ་སྐོར་གཏོང་བྱེད་ཀྱི་ཁ་པར་ལྟེ་གནས་ ༡༣ ཆེད་འཛུགས་བྱས་ཡོད་པ་དང་། ཁ་པར་ལྟེ་གནས་མང་ཆེ་བ་རྒྱས་སྤྲོས་སྡོད་མང་ཁུལ་དུ་བཙུགས་ཡོད་ལ། ཁ་པར་ལྟེ་གནས་རེ་རེའི་ནང་དུ་ལས་བྱེད་མང་པོ་ཡོད་པ་དང་། ལས་བྱེད་གཅིག་རེས་མི་ ༥༠ ལྷག་རེར་ཁ་པར་བཏང་སྟེ་ཚད་མཐོའི་གསང་རྒྱ་དང་ཚགས་ཚུད་པོས་ལས་ཀ་བྱེད་ཀྱི་ཡོད་ལུགས་དང་། འཛིན་བཟུང་བྱས་པའི་དོགས་ཡོད་ཉེས་ཅན་རྣམས་ཡུལ་སྐོར་ལ་ཁ་གཡར་ཏེ་སི་པིན་ནང་འཛུལ་ཡོད་པ་དང་། ཕྱིས་སུ་ཁྲིམས་འགལ་གྱིས་ཡུལ་དེའི་ནང་གནས་སྡོད་བྱས་ཡོད་སྐོར་བརྗོད་འདུག
གནས་ཚུལ་ནང་བཀོད་པ་ལྟར་ན། དོགས་ཡོད་མགོ་སྐོར་བ་དེ་ཚོས་རྒྱུན་དུ་རྒྱ་ནག་ནང་དུ་ཡོད་པའི་མི་མང་དཀྱུས་མ་ཚོར་ཁ་པར་བཏང་སྟེ། ཁོང་ཚོའི་ཁྱིམ་མཚེས་དང་གྲོགས་པོ། ཐ་ན་ཁྱིམ་མི་གཉེན་ཉེ་སོགས་ཡིན་ཁུལ་བྱས་ཡོད་པ་དང་། ཕྱིས་སུ་ཉེན་རྟོག་པ་ཡིན་ཁུལ་གྱིས་ཁ་པར་བཏང་སྟེ་དོགས་གཞིའི་འོག་ཞིབ་བཤེར་བྱ་རྒྱུ་ཡིན་སྟབས། ཞིབ་བཤེར་བྱ་བར་གཞོགས་འདེགས་དགོས་ཚུལ་བརྗོད་དེ། མགོ་སྐོར་བ་ཁོ་རང་ཚོས་གྲ་སྒྲིག་བྱས་པའི་དངུལ་བྱང་ཐོག་སྒོར་མོ་འཇོག་དགོས་པའི་བཙན་སྐུལ་བརྒྱུད་དངུལ་ཧམ་ལེན་བྱས་ཡོད་པ་དང་། ཐེངས་འདིའི་ཉེས་དོན་ཁྲོད་མགོ་སྐོར་ནང་ཚུད་པའི་མི་མང་སྟོང་ཕྲག་ལས་བརྒལ་ཞིང་། མང་ཆེ་བ་དབུལ་ཕོངས་ཁྱིམ་ཚང་ནས་ཡིན་པ་དང་། མགོ་སྐོར་འོག་ཚུད་རྗེས་ཁ་ཤས་འུ་ཐུག་ཐབས་ཟད་དེ་རང་ཤི་ཡང་བརྒྱབ་ཡོད་པ་རེད།
སི་པིན་ཉེན་རྟོག་ཕྱོགས་ནས་ཐེངས་འདིའི་འགུལ་སྐྱོད་ལ་རྒྱ་ནག་གཞུང་གིས་གཞོགས་འདེགས་བྱས་ཡོད་པ་དང་། འདི་ལོའི་ཕྱི་ཟླ་ ༧ པའི་ནང་རྒྱ་ནག་གཞུང་གིས་སི་པིན་ཉེན་རྟོག་ཁང་ལ་རྒྱ་ནག་གི་མི་མང་པོར་སི་པིན་གྱི་ཁ་པར་ལམ་ནས་མགོ་སྐོར་མང་པོ་གཏོང་བཞིན་ཡོད་པའི་གནས་ཚུལ་ཡར་ཞུ་བྱས་ཡོད་སྐོར་བརྗོད་འདུག
སི་པིན་གཞུང་གི་བསྡོམས་རྩིས་ལྟར་ན། ཕྱི་ལོ་ ༢༠༡༥ ལོར་སི་པིན་ནང་གནས་སྡོད་བྱས་པའི་རྒྱ་ནག་གི་མི་སེར་ཁྲི་ ༡༧ ཟིན་ཡོད་པ་དང་། སི་པིན་ནང་ཕྱི་མི་གནས་སྡོད་ཀྱི་གྲངས་འབོར་མྱུར་ཚད་མཐོན་པོས་འཕར་བཞིན་ཡོད་པའི་ཁྲོད་རྒྱ་ནག་གི་མི་སེར་གྲངས་འབོར་མང་ཤོས་ལྔ་པ་དེ་ཆགས་ཡོད་འདུག
གསར་འགོད་པ། པདྨ་མཚོ།
རྒྱ་མི་རྣམས་སྦྲང་ནག་བཞིན་འཛམ་གླིང་རྒྱལ་ཁབ་གང་སར་ཁྱི་བཏགས་མ་ཤོར་བཞིན་སླེབས་ནས་ཁྲིམས་འགལ་གྱི་ལས་ཀ་མང་དག་བཟོས་ནས་ཉོག་དྲ་མང་པོ་བྱས་ནས་དེང་སང་རྒྱལ་ཁབ་གང་ས་ནས་རྒྱ་མི་རྣམས་ཕྱིར་འབུད་གཏོང་བཞིན་འདུག ལྷག་པར་དེང་སར་ར་ཤི་ཡའི་ནང་རྒྱ་མི་མང་པོར་ཁྲིམས་འགལ་བ་མང་ནས་མང་དུ་འགྲོ་བཞིན་འདུག