ཨ་ཧྥི་རི་ཁའི་རྒྱལ་ཁབ་སོ་ཊོམ་ཕི་རེན་སེ་ཕི་ཡིས་ཐའེ་ཝན་ལ་འབྲེལ་བ་བཅད་དེ་རྒྱ་ནག་གཅིག་གི་སྲིད་ཇུས་བཟུང་རྗེས་རྒྱ་ནག་གིས་མགྲོན་འབོད་བྱས་ཏེ་ཚོང་འབྲེལ་དང་ཡུལ་སྐོར་སྤྲོ་འཆམ་སོགས་ལ་མཉམ་འབྲེལ་མིང་རྟཊ་བཀོད་ཡོད་འདུག
ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཞོགས་པར་རྒྱ་ནག་གི་ཕྱི་འབྲེལ་བློན་ཆེན་གཞོན་པ་ཝེང་ཡེ་དང་ནུབ་ཨ་ཧྥི་རི་ཁའི་གླིང་ཕྲན་རྒྱལ་ཁབ་སོ་ཊོམ་ཕི་རེན་སེ་ཕི་ (São Tomé and Príncipe) ཡི་ཕྱི་འབྲེལ་བློན་ཆེན་གཞོན་པ་བྷོ་ཊི་ལོ་ (Botelho) ཟེར་བ་གཉིས་ཀྱིས། རྒྱ་ནག་རྒྱལ་ས་པེ་ཅིན་གསོལ་མགྲོན་ཁང་དུ། རྒྱལ་ཁབ་གཉིས་བར་གྱི་འབྲེལ་ལམ་བསྐྱར་གསོ་དང་མ་འོངས་ཚོང་འབྲེལ་ཐད་གྲོས་ཆོད་ཁག་ཅིག་བཞག་ཡོད་པ་དང་། ཐེངས་འདིའི་ཐུག་འཕྲད་དེ་ནི་རྒྱ་ནག་གཞུང་གིས་རྒྱལ་ཁབ་ཁག་གིས་ཐའེ་ཝན་མཚོ་འགག་དང་ཕྱི་འབྲེལ་གཅོད་དགོས་པའི་རྟིང་སྐུལ་ནན་མོ་བྱེད་ཀྱིན་ཡོད་པ་ལྟར། ཟླ་འདིའི་ཕྱི་ཚེས་ ༢༡ ཉིན་ནུབ་ཨ་ཧྥི་རི་ཁའི་གླིང་ཕྲན་རྒྱལ་ཁབ་སོ་ཊོམ་ཕི་རེན་སེ་ཕི་ཕྱོགས་ནས་གློ་བུར་དུ་ཐའེ་ཝན་མཚོ་འགག་དང་འབྲེལ་ལམ་བཅད་རྗེས། རྒྱ་ནག་གཞུང་གིས་དེ་ལ་དགའ་བསུ་ཞུས་པའི་འགྱུར་བསྟན་པ་ཡིན་འདུག
རྒྱ་ནག་དང་སོ་ཊོམ་ཕི་རེན་སེ་ཕི་རྒྱལ་ཁབ་གཉིས་བར་ཚོང་འབྲེལ་གྲོས་ཆོད་བཞག་རྗེས། རྒྱ་ནག་ཕྱི་འབྲེལ་བློན་ཆེན་གཞོན་པ་ཝང་ཡེ་ཡིས། རྒྱལ་ཁབ་གཉིས་བར་གྱི་འབྲལ་ལམ་བསྐྱར་གསོ་བྱུང་བ་དེས་ཕྱོགས་གཉིས་ལ་ཁེ་ཕན་ཆེན་པོ་ཡོད་པ་དང་། མ་འོངས་པར་རྒྱལ་ཁབ་གཉིས་ཀྱིས་ཡུལ་སྐོར་སྤྲོ་འཆམ་དང་གསར་གནས་བརྒྱུད་ལམ་སོགས་ཀྱི་ལས་རིགས་ཐོག་མཉམ་ལས་བྱ་རྒྱུ་ཡིན་ལུགས་བཤད་འདུག
བྷོ་ཊི་ལོ་ཟེར་བ་དེས་གསར་འགོད་པར། སོ་ཊོམ་ཕི་རེན་སེ་ཕི་ཕྱོགས་ནས། སྔོན་ཆད་ཀྱི་ནོར་འཁྲུལ་ལ་ཡོ་བསྲང་བྱས་པ་བརྒྱུད། རྒྱ་ནག་གི་ཚོང་གཉེར་ཁང་ཁག་གིས་སོ་ཊོམ་ཕི་རེན་སེ་ཕི་ནང་མ་རྐང་ཁྲོམ་ར་འཛུགས་རྒྱུ་དང་། སོ་ཊོམ་ཕི་རེན་སེ་ཕི་ཡི་རྒྱ་རིགས་ཡུལ་སྐོར་སྤྲོ་འཆམ་པ་མང་དུ་འགྲོ་ངེས་ཡིན་ཚུལ་བཤད་འདུག
གནས་ཚུལ་འདིའི་ཐད། པེ་ཅིན་གཙུག་ལག་སློབ་ཆེན་གྱི་རྒྱལ་སྤྱིའི་འབྲེལ་ལམ་སྐོར་གྱི་ཆེད་མཁས་པ་ཝང་ཏོང་ (Wang Dong)ཡིས། “ཨ་རིའི་གཞུང་གིས་རྒྱ་ནག་རྒྱལ་ཁབ་གཅིག་གི་སྲིད་ཇུས་ཐད་ཆབ་སྲིད་རྩེད་མོ་རྩེ་བ་དེར། ཨ་རིའི་གཞུང་ལ་རྒྱལ་ཁ་འཐོབ་མི་སྲིད་པ་མ་ཟད། ད་ལན་སོ་ཊོན་དང་པེ་ཅིན་གཉིས་བར་གྱི་འབྲེལ་ལམ་བསྐྱར་གསོ་བྱུང་དེས། ཐའེ་ཝན་རང་བཙན་ལ་རྒྱབ་སྐྱོར་བྱེད་མཁན་ཚོར་ཉེན་བརྡ་ཞིག་སྤྲད་ཡོད།” ཅེས་བཤད་འདུག
གནས་ཚུལ་ལྟར་ན། ཕྱི་ལོ་ ༡༩༩༧ ལོར་ནུབ་ཨ་ཧྥི་རི་ཁའི་གླིང་ཕྲན་རྒྱལ་ཁབ་སོ་ཊོམ་ཕི་རེན་སེ་ཕི་ཡིས་ཐའེ་ཝན་མཚོ་འགག་ནི་རྒྱ་ནག་གི་ཆ་ཤས་མིན་པའི་ལངས་ཕྱོགས་བཟུང་སྟེ། ཐའེ་ཝན་ལ་ཚོང་འབྲེལ་བཙུགས་རྗེས་རྒྱ་ནག་ཕྱོགས་ནས་པེ་ཅིན་དང་སོ་ཊོམ་གཉིས་བར་གྱི་འབྲེལ་ལམ་བཅད་ཡོད་ཅིང་། བདུན་ཕྲག་སྔོན་མར་སོ་ཊོམ་ཕྱོགས་ནས་གློ་བུར་དུ་རྒྱ་ནག་རྒྱལ་ཁབ་གཅིག་གི་སྲིད་ཇུས་ལ་ངོས་ལེན་དང་རྒྱབ་སྐྱོར་ཡོད་ལུགས་བཤད་དེ། ཐའེ་པེ་དང་སོ་ཊོམ་གཉིས་བར་གྱི་འབྲེལ་ལམ་བཅད་པར་བརྟེན་ཏེ། རྒྱ་ནག་གིས་སོ་ཊོམ་ནང་དཔལ་འབྱོར་འཛུགས་སྐྲུན་བྱ་རྒྱུ་ཁག་ཐག་བྱས་ཡོད་འདུག
སོ་ཊོམ་ཕི་རེན་སེ་ཕི་ནི། ཨ་ཧྥི་རི་ཁ་གླིང་གི་མི་འབོར་ཉིས་འབུམ་མ་ཟིན་ཙམ་ལས་གྲུབ་པའི་རྒྱལ་ཁབ་ཆུང་ཆུང་ཞིག་ཡིན་ཞིང་། ༡༩༧༥ ལོར་ཕོར་ཆུ་གྷུལ་འོག་ནས་རང་བཙན་ཐོབ་པའི་ཡེ་ཤུ་དང་ཁ་ཆེ་འདྲེས་པའི་སྤྱི་མཐུན་རྒྱལ་སྲིད་འཛིན་ལམ་ལམ་འཛིན་མཁན་ཞིག་ཡིན།
ད་ཆར་ཐའེ་ཝན་ལ་གཞུང་ཕྱོགས་ཀྱི་འབྲེལ་ལམ་འཛིན་མཁན་འཛམ་གླིང་རྒྱལ་ཁབ་ ༢༡ ཡོད་ནའང་། ཨ་རི་གཙོས་པའི་རྒྱ་ནག་དང་འབྲེལ་ཡོད་རྒྱལ་ཁབ་ཁག་ཅིག་གིས། ཉོ་འཚོང་ཁེ་ལས་ལ་དམིགས་ཏེ་རྒྱ་ནག་རྒྱལ་ཁབ་གཅིག་གི་སྲིད་ཇུས་ལ་མུ་མཐུད་ངོས་བྱེད་བཞིན་ཡོད་འདུག
གསར་འགོད་པ། པདྨ་རྒྱལ།
