དྲག་སྤྱོད་པ་ཞིག་གིས་ཡེ་ཤུ་ལོ་གསར་སྤྲོ་ཚོགས་སྟེང་མི་མང་ནང་གང་བྱུང་མེ་མདའ་བརྒྱབ་སྟེ་འཛམ་གླིང་ཤར་ནུབ་རྒྱལ་ཁབ་ ༢༥ ནས་ཡོང་བའི་མི་ ༣༩ བསད་པ་དང་མི་ ༧༠ རྨས་སྐྱོན་བཟོས་རྗེས་བྲོས་ཡོད་འདུག
ཁ་སང་དགོང་མོའི་ཐོ་རངས་ཆུ་ཚོད་ ༡།༡༥ ཙམ་ལ་ཊུར་ཀི་སྤྱི་མཐུན་རྒྱལ་ཁབ་ཀྱི་ཨ་སི་ཊན་བྷུལ་ (Istanbul) གྲོང་ཁྱེར་ནང་ཡོད་པའི་རེ་ན་ (Reina) དགོང་ཚོགས་ཁང་དུ། ལག་ཏུ་མེ་མདའ་ཐོགས་པའི་སྐྱེས་པ་ཞིག་གིས་ཚོགས་ཁང་དེའི་སྒོ་སྲུང་བ་དང་ཡུལ་མི་གཅིག་བསད་རྗེས། སྤྲོ་ཚོགས་ཁང་ནང་དུ་ཡོང་ནས་མི་ཚོགས་ནང་གང་བྱུང་མེ་མདའ་བརྒྱབ་ནས་མི་ ༣༩ བསད་པ་དང་མི་ ༧༠ ལྷག་ལ་རྨས་སྐྱོན་བཟོས་ཡོད་འདུག ཚོགས་ཁང་དེའི་ནང་འཛམ་གླིང་ཤར་ནུབ་རྒྱབ་ཁབ་ ༢༥ ནས་ཡིན་པའི་རྩེད་འགྲན་པ་དང་གློག་བརྙན་འཁྲབ་སྟོན་པ། གསར་འགོད་པ་དང་གཞས་པ་སོགས་ཁྱོན་ལྟད་མོ་བ་ ༦༠༠ ལྷག་འཛོམས་ཏེ་ཡེ་ཤུ་ལོ་གསར་ལ་རོལ་བཞིན་ཡོད་འདུག
ཚོགས་ཁང་དེའི་པར་ལེན་འཕྲུལ་ཆས་ནང་ཤར་བ་ལྟར་ན། དྲག་སྤྱོད་པ་དེས་ལྭ་ནག་པོ་དང་རྒྱབ་ཏུ་ཁུག་མ་ནག་པོ་ཞིག་འཁུར་ཏེ་ལག་ཏུ་མེ་མདའ་རིང་པོ་ཞིག་བཟུང་ཡོད་འདུག ཁོས་མི་ཚོགས་ནང་མེ་མདའ་གང་བྱུང་བརྒྱབ་སྟེ་མི་མང་པོ་བསད་རྗེས་ལག་གི་མེ་མདའ་གཡུགས་ཏེ། ཕྱི་ལོགས་སུ་འབྲོ་བཞིན་པའི་མི་ཚོགས་དང་མཉམ་དུ་ཕྱི་ལ་བྲོས་ཡོད་འདུག ལྟད་མོ་བ་རེ་འགས་མི་གསོད་ལག་དམར་དེས་མི་མང་པོ་བསད་རྗེས། ཉེ་འགྲམ་གྱི་བྷོ་སི་ཕོ་རུ་ (Bosporus) གཙང་བོའི་ནང་མཆོངས་ཏེ་བྲོས་ཡོད་སྐོར་བརྗོད་འདུག
ཊུར་ཀིའི་ནང་སྲིད་བློན་ཆེན་སེ་ལུ་ (Soylu) ལགས་ཀྱིས་ད་སྔ་མི་གསོད་ལག་དམར་དེ་རྒྱལ་ཁབ་གང་ནས་ཡིན་པ་དང་འཇིགས་སྐུལ་ཤོག་ཁག་གང་ལ་འབྲེལ་བ་ཡོད་མེད་ཤེས་རྟོགས་ཐུབ་མེད་ཀྱང་། ཊུར་ཀིའི་རྒྱལ་སྲུང་དྲག་ཆས་དམག་དཔུང་གིས་རྟོགས་ཞིབ་བྱས་ཏེ། ལག་དམར་དེ་མི་འགྱང་བར་འཛིན་བཟུང་བྱ་རྒྱུ་ཡིན། ཞེས་སྐོར་བརྗོད་འདུག
ཊུར་ཀིའི་སྲིད་འཛིན་ཨར་ཌོ་གྷན་ (Erdogan) ལགས་ཀྱིས། ༢༠༡༧ ལོའི་གནམ་ལོ་གསར་ཚེས་ཀྱི་ཆུ་ཚོད་དང་པོའི་ཐོག་དྲག་སྤྱོད་པས། ཨ་སི་ཊན་བྷུལ་གྲོང་ཁྱེར་ནང་མི་གསོད་ཁྲག་སྦྱོར་གྱི་དོན་རྐྱེན་བཟོས་པར་སྐྱོན་བརྗོད་དང་། འདས་གྲོངས་ཕྱིན་པའི་མི་མང་གི་ནང་མི་ཚོར་སེམས་གསོ་དང་དགོངས་སེལ་ཞུས་ཡོད་འདུག
གནས་ཚུལ་ལྟར་ན། འཇིགས་སྐུལ་བ་དེས་བསད་པའི་མི་མང་ཆེ་བ་ཞིག་དཀྱིལ་ཤར་ཡུལ་གྲུ་ཁག་ནས་ཡིན་པ་དང་། རྒྱ་གར་གྱི་མི་ཡང་ཡོད་འདུག གཞན་ཨ་རི་དང་སྦེལ་ཇམ། ཧྥ་རན་སི། ལི་བྷན་ནོན། ཀུ་ཝེ་ཊེ། ཁེ་ན་ཌ་སོགས་ནས་ཡིན་འདུག
གསར་འགོད་པ། པདྨ་རྒྱལ།
