དེ་རིང་ཞོགས་པར་པེ་ཅིན་གནམ་སྡེ་སྒོ་མོ་ཆེའི་མདུན་ཐང་དུ་རླངས་འཁོར་དོན་རྐྱེན་ཞིག་བྱུང་སྟེ་མི་ལ་རྨས་སྐྱོན་བཟོས་ཡོད་འདུག
དེ་རིང་ཞོགས་པ་པེ་ཅིན་གྱི་ཆུ་ཚོད་ ༧།༣༠ ཐོག པེ་ཅིན་གནམ་སྡེ་སྒོ་མོ་ཆེའི་མདུན་ཐང་དུ། རླངས་འཁོར་དོན་རྐྱེན་ཞིག་བྱུང་སྟེ་མི་ལ་རྨས་སྐྱོན་བཟོས་ཡོད་པ་དང་། སྐབས་དེར་ཡུལ་དངོས་སུ་ཡོད་པའི་འགྲུལ་བ་ཞིག་གིས། ཞོགས་པའི་རྒྱལ་དར་སྒྲེང་འཛུགས་ཚར་ཏེ་མི་མང་གཏོང་གྲབས་ཡོད་སྐབས། ཏག་ཏག་རླངས་འཁོར་དེ་མདུན་ཐང་དུ་རྒྱུགས་ཡོང་ནས་ཚང་མའི་མཐོང་ས་ནས་ཨ་ལོག་བསྒྱུར་སོང་ཞེས་བརྗོད་འདུག་ལ། དོན་རྐྱེན་དངོས་སུ་མཐོང་མཁན་ཚོས་རླངས་འཁོར་དེས་བསམ་བཞིན་དོན་རྐྱེན་བཟོས་ཡོད་སྐོར་བརྗོད་འདུག
པེ་ཅིན་འགྲིམ་འགྲུལ་ཉེན་རྟོག་ཁང་གིས། དོན་རྐྱེན་དེ་གནམ་སྡེ་སྒོ་མོ་ཆེའི་ཉེ་འགྲམ་གྱི་རྒྱལ་ཁབ་འགྲེམས་སྟོན་ཁང་གི་བྱང་ཕྱོགས་སུ་བྱུང་ཡོད་པ་དང་། རླངས་འཁོར་འགྲོ་བཞིན་པའི་སྐབས་སུ་ཨ་ལོག་བསྒྱུར་ཡོད་པ་དང་། རླངས་འཁོར་ཁ་ལོ་བ་དང་རྐང་འཁོར་གཏོང་མཁན་ཞིག་ལ་རྨས་སྐྱོན་བཟོས་ཡོད་ཀྱང་ཚེ་སྲོག་ལ་ཉེན་ཁ་མེད་པ་དང་། ད་ལྟའི་ཆར་གནད་དོན་གྱི་རྐྱེན་རྩར་ཞིབ་འཇུག་བྱེད་བཞིན་པ་ཡིན་སྐོར་བརྒྱུད་ལམ་དུ་བསྒྲགས་འདུག
འགྲིམ་འགྲུལ་ཉེན་རྟོག་ཁང་གི་སྐད་ཆ་དེར་དྲ་ལམ་ཁག་ནས་དོགས་འདྲི་སྣ་ཚོགས་བྱེད་བཞིན་ཡོད་པའི་ཁྲོད། དོན་རྐྱེན་བྱུང་ས་དེ་གནམ་སྡེ་སྒོ་མོ་ཆེའི་གསེར་ཆུ་ཟམ་པའི་མདུན་ཡིན་པ་པར་རིས་བརྙན་ཐུང་སོགས་ནས་གསལ་པོ་མཐོང་ཐུབ་ལ། སྤྱིར་བཏང་གི་འགྲིམ་འགྲུལ་དོན་རྐྱེན་ཞིག་ཡིན་ན། རླངས་འཁོར་དེའི་ཨང་རྟགས་བྱང་བུ་ག་རེ་བྱས་ནས་དཀར་པོ་ཡིན་སྐོར་དང་། རླངས་འཁོར་དེ་དམག་དོན་ཆེད་བཀོལ་རླངས་འཁོར་ཞིག་ཡིན་སྲིད་སྐོར་ཡང་རྗོད་ཀྱི་འདུག
དྲ་ལམ་དུ་ཁྱབ་པའི་བརྙན་ཐུང་ནང་དུ། གཡས་གཡོན་གྱི་འགྲུལ་བ་ཚོས་གནམ་སྡེ་སྒོ་མོ་ཆེའི་ཐང་ཆེན་དུ་ཡང་བསྐྱར་དོན་རྐྱེན་བྱུང་སོང་། ཞེས་བརྗོད་ཀྱི་ཡོད་པ་དང་། དྲག་ཆས་ཉེན་རྟོག་པ་མང་པོས་མི་རྣམས་ཡུལ་དངོས་ནས་ཕྱིར་ནུར་དགོས་པའི་སྐད་རྒྱག་བཞིན་འདུག་ལ། རླངས་འཁོར་ནག་པོ་ཞིག་ཨ་ལོག་བསྒྱུར་ཏེ་དུ་བ་སྐྱ་ལྷོག་ལྷོག་བྱེད་བཞིན་འདུག
ཉེ་བའི་ལོ་ཤས་ནང་གནམ་སྡེ་སྒོ་མོ་ཆེའི་མདུན་ཐང་རང་ལ་དོན་རྐྱེན་བྱུང་བ་ད་ལན་ཐེངས་དང་པོ་མིན་པར་ཕྱི་ལོ་ ༢༠༡༣ ལོར་རླངས་འཁོར་ཆུང་ཆུང་གིས་ཐང་ཆེན་གྱི་གསེར་ཆུ་ཟམ་པར་བརྡུངས་ཏེ་འབར་སྐྱོན་ཆེན་པོ་བྱུང་ཡོད་པ་མ་ཟད། རླངས་འཁོར་ཁ་ལོ་བ་དང་འགྲུལ་བ་སོགས་མི་གྲངས་ ༤༡ ཙམ་ལ་ཤི་རྨས་བྱུང་ཡོད་པ་དང་། རྒྱ་ནག་གཞུང་གིས་ཡུ་གུར་དྲག་སྤྱོད་པས་བཟོས་པའི་དོན་རྐྱེན་ཞིག་ཡིན་སྐོར་བསྒྲགས་ཡོད་པ་རེད།
གསར་འགོད་པ། པདྨ་མཚོ།
