ཟླ་འདིའི་ཚེས་ ༡ ཉིན་རྒྱ་གར་ལེག་ནོ་མངའ་སྡེའི་ནང་། སཱ་ཧྥོ་ལཱ་(Saifullah)ཞེས་པའི་མི་ཞིག་གིས་འཇིགས་སྐུལ་དྲག་སྤྱོད་པ་ཞིག་དང་མཉམ་འབྲེལ་གྱིས་རྒྱ་གར་ནང་འབར་རྫས་འགས་གཏོར་བྱས་ཡོད་སྟབས། རྒྱ་གར་གཞུང་གིས་སཱ་ཧྥོ་ལཱ་ནི་རྒྱལ་ཁབ་ཀྱི་བདེ་འཇགས་ལ་གཏོར་བཤིར་གཏོང་མཁན་དང་། འཇིགས་སྐུལ་དྲག་སྤྱོད་པ་བཅས་ཀྱི་ཉེས་མིང་བཏགས་ཏེ་སྲོག་ཐོག་ཏུ་བཏང་ཡོད་དང་། ཁོང་གི་ནང་མིར་ཕུང་བོ་རྩིས་ལེན་དགོས་པའི་བརྡ་བཏང་ཡོད་ཀྱང་། སཱ་ཧྥོ་ལཱའི་ཨ་ཕ་སཱར་ཊི་རྗེ་(Sartaj)ཞུ་བས་ “རྒྱལ་ཚོང་པ” ཞིག་ཁོང་གི་བུ་མིན་ལ་ཁོའི་ཕུང་བོ་ལ་བདག་པོ་རྒྱག་འདོད་མེད་ཅེས་ངོས་ལེན་བྱས་མི་འདུག
ཁོའི་ཨ་ཕ་སཱར་ཊི་རྗེ་ཡིས་གསར་འགོད་པར་བརྗོད་དོན་ “ཁོས་རྒྱལ་ཁབ་ལ་དགའ་མོས་མེད་པའི་ལས་ཀ་བྱས་ཡོད་སྟབས། ང་ཚོས་ཁོའི་བེམ་པོར་བདག་པོ་རྒྱག་རྒྱུ་མིན།” ཞེས་བཤད་འདུག ཁོང་གིས་ད་དུང་ “ང་ཚོ་རྒྱ་གར་བ་ཡིན་ལ། ང་ཚོ་རྒྱ་གར་ནས་སྐྱེས་པ་ཡིན། ང་ཚོའི་ཕ་མེས་ཡང་མེས་ཚང་མ་རྒྱ་གར་བ་དང་། རྒྱ་གར་ནས་སྐྱེས་པ་རེད། རྒྱལ་འཚོང་བ་ཞིག་ངའི་བུ་མིན། རྒྱལ་ཁབ་ལ་ངོ་ལོག་མཁན་ཞིག་ངའི་བུ་མིན།” ཅེས་བརྗོད་འདུག
སཱར་ཊི་རྗེ་ཡིས་ “ངས་ཁོ་ལ་ལས་ཀ་ཞིག་བཙལ་དགོས་པའི་རེ་སྐུལ་ཡང་ཡང་བྱས་ཀྱང་ཁོས་ཉན་མ་སོང་། ང་ཁོའི་སྟེང་ཁོང་ཁྲོ་ལངས་ཏེ་སྡིགས་མོ་ཐེངས་མང་བྱས་པ་ཡིན།” ཅེས་དང་། “ཟླ་གཉིས་དང་ཕྱེད་ཙམ་གྱི་རྗེས་སུ་ཁོ་ཕྱིར་ནང་ལ་འབྱོར་སོང་། ངས་ཁོ་ལ་འགྲམ་ལྕག་ཅིག་བཞུས་པ་ཡིན། ཕྱི་ཉིན་ང་ལས་ཀ་ནས་ནང་དུ་བསླེབས་དུས་ཁོ་ཕྱིན་ཚར་འདུག” ཅེས་བརྗོད་འདུག
གསར་འགོད་པས་སཱ་ཧྥོ་ལཱ་ཡིས་ཁྱིམ་གཡུག་པ་ནས་ནང་ལ་འབྲེལ་བ་བྱས་ཡོད་མེད་དྲིས་པར། ཁོས་ “བདུན་ཕྲག་སྔོན་མའི་གཟའ་ཟླ་བའི་ཉིན་ནང་དུ་འབྲེལ་བ་བྱས་ཏེ། ཁོ་སོ་དྷེ་ཨ་རབ་(SaudiArabia)ནང་དུ་འགྲོ་བའི་ཕྱི་སྐྱོད་ལག་འཁྱེར་རག་ཡོད་ཟེར། ངས་ཁོ་ལ་ཁྱོད་རང་གི་འདོད་པ་བྱོས་ལབ་ཡིན།” ཞེས་བརྗོད་སོང་།
རྒྱ་གར་གཞུང་གིས་སཱ་ཧྥོ་ལཱ་སྲོག་ཐོག་ཏུ་བཏང་རྗེས། ཀོམ་པཱར་གྲོང་ཁྱེར་གྱི་ཉེན་རྟོག་པ་སོ་མཱེན་ཝར་མཱ་(SomenVerma)ཡིས་ནང་མིར་ཕུང་བོ་རྩིས་ལེན་དུ་ཡོང་དགོས་པའི་བརྡ་བཏང་ཡང་། ཁོ་ཚོས་ཕུང་བོར་བདག་པོ་རྒྱག་རྒྱུ་ངོས་ལེན་བྱས་མེད། ཉེན་རྟོག་ཁང་གིས་ཡང་བསྐྱར་ཁོ་རང་གི་ནང་མིར་གོ་བསྐོན་སློབ་གསོ་བྱ་རྒྱུ་ཡིན་ཞེས་བརྗོད་འདུག
དེ་དང་མཉམ་དུ་འཇིགས་སྐུལ་དྲག་སྤྱོད་པ་དང་འབྲེལ་བ་ཡོད་པའི་དོགས་གཞིའི་འོག་མི་གཞན་གཉིས་ཀྱི་ཨ་ཕ་འཛིན་བཟུང་བྱས་ཡོད་པ་དང་། ཁོ་ཚོར་ནག་ཉེས་ཅི་ཡང་མེད་པར་བཤད་པས་ད་ལྟ་ནག་ཉེས་མེད་པའི་བདེན་དཔང་འཚོལ་ཞིབ་བྱེད་བཞིན་ཡོད་འདུག
སངས་རྒྱས་དཀོན་མཆོག
