ཕྱི་ལོ་ ༢༠༡༧ ཟླ་ ༣ ཚེས་ ༢༤ ཉིན་སི་ཨིན་ཨིན་གསར་ཁང་གིས་སྤེལ་བའི་དཔྱད་བརྗོད།
རང་ལོ་ ༡༥ ཡིན་ཞིང་། གདོང་གི་མིག་ཤེལ་ཕྱེད་ཀ་སྐྲས་འཁེབ་ཡོད་པའི་ན་གཞོན་ཞིག་གིས་སྒྲ་སྐྱེད་ཁ་པར་མང་པོ་ཡོད་པའི་མདུན་སར་ཁ་མགྱོགས་པོས་སྐད་ཆ་མང་པོ་ཞིག་ཤོད་ཀྱིན་འདུག ཁོ་བོའི་གམ་དུ་དམངས་གཙོའི་ལས་འགུལ་ཁྲོད་ཀྱི་འཐབ་གྲོགས་དང་གསར་འགོད་པ་སོགས་ཀྱིས་སྐོར་འདུག
ཧོང་ཀོང་གི་དམངས་གཙོ་འཐབ་རྩོད་པ་ཆུང་ཆུང་ཇཱོ་ཧྲ་ཝཱང་(Joshua Wong)ལགས་ཀྱིས་ “ང་ཚོའི་རེ་བ་ནི། གཞུང་གིས་འཆར་གཞི་དེ་གང་མགྱོགས་ཕྱིར་འཐེན་བྱས་ཏེ། རྩ་ཁྲིམས་ལ་བཅོས་བསྒྱུར་ཤུགས་ཆེ་ཙམ་གཏོང་དགོས་པ་དེ་ཡིན།” ཞེས་རྗོད་བཞིན་འདུག དེ་ནི་ཕྱི་ལོ་ ༢༠༡༢ ལོ་རེད། སྐབས་དེར་ཁོས་ཧོང་ཀོང་གཞུང་དང་པེ་ཅིན་གཞུང་གིས་ཧོང་ཀོང་གི་ཤེས་ཡོན་ལས་དོན་རྡོག་རོལ་བཏང་སྟེ། ཤེས་ཡོན་སྡེ་ཚན་ཁག་ཏུ་རྒྱ་ནག་ལ་ཞེན་ཁོག་དགོས་པའི་སློབ་གསོ་སྤྲོད་ཀྱིན་འདུག་ཅེས་སྐྱོན་བརྗོད་བྱས་ཡོད། སྐབས་དེར་ཁོ་ལ་རྒྱལ་ཁ་ཐོབ་ཡོད། འཐབ་རྩོད་དེའི་སྐོར་ལ་ “བྱིས་པ་ལོ་ཆུང་དང་རྒན་པ་སྟོབས་ལྡན་བར་གྱི་འཐབ་རྩོད།”(Teenager VS. Superpower) ཅེས་པའི་གློག་བརྙན་ཐུང་ངུ་ཞིག་ཀྱང་བཟོས་ཡོད་ལ། གློག་བརྙན་དེ་ད་ཆར་ནཱེ་ཊི་ཕི་ལིཀ་དངོས་བྱུང་གློག་བརྙན་ (Netflix Documentary) ཚོགས་པའི་གཟེངས་རྟགས་འོས་ཁོངས་སུ་བདམས་ཡོད།
ཁྲིམས་རྩོད་པ་ཁ་ལའེ་ཌ་ཡཱ་མཱོས་(Claudia Mo)བརྗོད་དོན། “སྐབས་དེར་ཇཱོ་ཧྲ་ཝཱང་དངོས་སུ་ཕྱིར་ཐོན་ཏེ་ངོ་རྒོལ་བྱས་སྐབས་ཧོང་ཀོང་བ་རྣམས་ཡིད་འགུལ་ཐེབས་ཡོད།” ཅེས་དང་། “ ཁྲིམས་ལུགས་ལྟར་ན་རང་ལོ་ ༡༨ མ་ཟིན་སྔོན་ལ་བསམ་བློའི་ནུས་སྟོབས་ཡོངས་སུ་འཚར་ལོངས་བྱུང་མེད་སྟབས། བྱིས་པའི་གྲས་སུ་བཞག་ཏེ་ཆབ་སྲིད་ལ་ཐེ་གཏོགས་བྱེད་མི་ཆོག་ཀྱང་། ཇཱོ་ཧྲ་ཝཱང་ར་བ་དེ་ལས་རྦད་དེ་བརྒལ་ཡོད།” ཅེས་བརྗོད་འདུག
༢༠༡༤ ལོར་ཁོ་བོ་ཆབ་སྲིད་ལས་འགུལ་སྤེལ་ཆོག་པའི་ལོ་ཚད་ལོན་མེད་ཀྱང་ “ཉི་གདུགས་གསར་བརྗེ་” ཞེས་པའི་དམངས་གཙོའི་ལས་འགུལ་སྐབས། ཁོ་ནི་ལས་འགུལ་དེའི་མགོ་ཁྲིད་མཁན་གཙོ་བོ་ཡིན་ཞིང་། སྐབས་དེའི་ལས་འགུལ་ནི་ཧོང་ཀོང་ལོ་རྒྱུས་ནང་གི་གཞི་རྒྱ་ཆེ་ཤོས་དེ་ཆགས་ཡོད། ལས་འགུལ་སྤེལ་ཡུལ་གྲོང་འཁྱེར་ཧྲིལ་བོ་ཟླ་བ་གཅིག་རིང་སྒོ་རྒྱག་དགོས་བྱུང་ཡོད། ཁོ་བོ་སྐབས་དེར་དུས་དེབ་གྲགས་ཆེན་དུས་ཚོད་(Time)ཅེས་པའི་མདུན་ངོས་སུ་ཐོན་ཡོད།
ཁོ་ནི་ཕྱི་ལོ་ ༡༩༩༦ ལོར་ཧོང་ཀོང་དུ་སྐྱེས་ཤིང་། ལོ་དེ་ནི་དབྱིན་ཇུ་གཞུང་གིས་ཧོང་ཀོང་རྒྱ་ནག་ལ་རྩིས་སྤྲོད་མ་བྱས་པའི་ཟླ་བ་ ༨ ཀྱི་སྔོན་ཏག་ཏག་རེད། ཝཱང་གིས་ཁོ་བོའི་བྱིས་པའི་དུས་ཚོད་དང་དར་མའི་ལོ་མགོ་ཡོངས་རྫོགས་རོགས་པ་ཁ་ཤས་དང་ལྷན་དུ་རྒྱ་ནག་གཞུང་གིས་ཧོང་ཀོང་ལ་ཧམ་ཤེད་བཙན་གནོན་བྱེད་བཞིན་པའི་སྐོར་ལ་རྩོད་གླེང་བྱས་ཏེ་རྫོགས་ཟིན་ཟེར།
རྒྱ་ནག་གཞུང་གིས་བསྐོ་བཞག་བྱས་པའི་ཧོང་ཀོང་གི་རྫོང་དཔོན་སྐུ་ཞབས་མཱ་བི་ཝི་ལཱན་(Maeve Whelan Wuest)ལགས་ཀྱིས། ཝཱང་གི་མི་རབས་དེ་ཁོ་བོའི་ཕ་མའི་མི་རབས་དང་མི་འདྲ་བར་ཧོང་ཀོང་གི་མི་ནི་རྒྱ་ནག་གི་མི་རིགས་མིན་སྐོར་རྗོད་མཁན་མང་དུ་འགྲོ་བཞིན་འདུག་ཟེར།
ལོ་སྔོན་མར་ཧོང་ཀོང་དུ་ཡོད་པའི་རྒྱ་ནག་གི་གཙུག་ལག་སློབ་ཁང་ཞིག་གིས་རང་ལོ་ ༡༥ ནས་ ༢༤ ཟིན་པའི་སློབ་མ་རྣམས་ལ། ཧོང་ཀོང་རྒྱ་ནག་ལས་ལོགས་སུ་རང་བཙན་བྱེད་འདོད་ཡོད་མེད་བསམ་ཤོག་བསྡུས་སྐབས། སློབ་མ་བརྒྱ་ཆ་ ༤༠ ལྷག་གིས་རང་བཙན་བྱེད་འདོད་ཡོད་སྐོར་བྲིས་ཡོད་འདུག
རྫོང་དཔོན་མཱ་བི་ཝི་ལཱན་ཀྱིས་ “ཨ་རིའི་མི་མང་རྣམས་ཨ་རིའི་གཞུང་ལ་འདོད་བློ་མ་ཁེངས་པ་ཡོང་གི་ཡོད་ཀྱང་། ཁོང་ཚོས་རང་ཉིད་ཨ་རི་བ་མ་ཡིན་པར་མི་རིགས་གཞན་ཞིག་ཏུ་ངོས་འཛིན་བྱེད་མཁན་མེད།” ཅེས་དང་། “ ཧོང་ཀོང་གི་མི་རབས་གསར་བ་ཚོའི་སེམས་ནང་ཚོར་བ་ག་འདྲ་ཞིག་ཡོད་མེད་བསམ་བློ་ཐོངས་དང་། ཁོང་ཚོ་རྒྱ་ནག་གི་དབང་སྒྱུར་འོག་འདུག་འདོད་མེད་པ་མ་ཟད། ཧོང་ཀོང་ནི་མི་རིགས་དང་རིག་གཞུང་གང་ཐད་ནས་རྒྱ་ནག་དང་ཁ་ཁ་ཡིན་པར་ངོས་འཛིན་བྱེད་ཀྱིན་འདུག རྒྱུ་མཚན་དེ་དག་ལ་བརྟེན་ཏེ་ཁོང་ཚོ་ནང་ཁུལ་འཆམ་མཐུན་ཡོང་གི་མེད་པར། རང་དབང་དང་ཐོབ་ཐང་གི་ཆེད་དུ་འཐབ་རྩོད་ཀྱི་བསམ་བློ་ཤུགས་ཆེ་རུ་འགྲོ་བཞིན་ཡོད་པ་རེད།” ཅེས་བརྗོད་འདུག
ཞིབ་འཇུག་པ་ཁ་ཤས་ཀྱིས་བརྗོད་པ་ལྟར་ན། ༢༠༡༤ ལོའི་ངོ་རྒོལ་དེས་མི་མང་ལ་ཕན་ཐོགས་ཆེན་པོ་ཡོད་པའི་མགོ་ཁྲིད་ལཱིན་ཊེན་ཡཱེན་(Leung CY)ལ་ལས་ཀ་བྱེད་པར་དཀའ་ཁག་བཟོས་ཡོད་པ་མ་ཟད། ཁོ་བོ་ད་ཆར་བསྐྱར་དུ་ཐེངས་གཉིས་པར་མགོ་ཁྲིད་དུ་ལངས་འདོད་མེད་པ་ཆགས་པ་རེད་ཟེར། ཝཱང་གིས་སི་ཨིན་ཨིན་གསར་ཁང་ལ་བརྗོད་པ་ལྟར་ན། ཟླ་བ་འདིའི་ནང་ལཱིན་ཊེན་ཡཱེན་གྱི་ཚབ་ཏུ་གཞན་ཞིག་བསྐོ་རྒྱུ་ཡིན་པ་དང་། ལོ་གསུམ་གོང་གི་ཁོང་ཚོའི་ལས་འགུལ་དེར་ད་དུང་གྲུབ་འབྲས་ཐོན་མེད་སྟབས། གཞུང་གིས་ཁོང་ཚོའི་འདོད་པ་ལྟར་ཆབ་སྲིད་བཅོས་བསྒྱུར་མ་བཏང་ཚེ། མ་འོངས་པར་མགོ་ཁྲིད་སུ་ཞིག་བསླེབ་ཀྱང་ཁོང་ལའང་སྔར་བཞིན་ངོ་རྒོལ་བྱ་རྒྱུ་ཡིན་ཟེར།
ཝཱང་ད་ལྟ་རང་ལོ་ ༢༠ ལ་བསླེབས་ཡོད་པ་དང་། ལས་བྲེལ་ཧ་ཅང་ཆེ་བའི་མི་ཞིག་ཆགས་ཡོད། ༢༠༡༤ ལོར་ཝཱང་གིས་རྒྱ་ནག་གཞུང་ལ་ངོ་རྒོལ་བྱས་སྟབས། ཁོ་རང་ཐཱའེ་ལན་ཌི་(Thailand) རྒྱལ་ཁབ་ནས་འཛིན་བཟུང་གིས་བཙོན་འཇུག་བྱས་ཤིང་། རྗེས་སུ་ཀློད་གྲོལ་ཐོབ་མ་ཐག་ཁོས་ཆབ་སྲིད་ཚོགས་པ་གསར་པ་བཙུགས་ཡོད། ལོ་སྔོན་མའི་ཕྱི་ཟླ་ ༡༡ པའི་ནང་ཁོས་ཝ་ཤིན་ཊོན་དུ་ཨ་རིའི་གྲོས་ཚོགས་ཀྱི་སྐུ་ཚབ་མཱར་ཁཱོ་རུ་བྷོ་(Marco Rubio)ལ་ཐུག་ཕྲད་བྱས་ཡོད། གནས་ཚུལ་དེ་ལ་བརྟེན་ཏེ་ཨ་རིའི་གྲོས་ཚོགས་ནང་ཨ་རིའི་གཞུང་གིས་ཧོང་ཀོང་གི་འགྲོ་བ་མིའི་ཐོབ་ཐང་དང་དམངས་གཙོའི་ཐོག་འཛིན་པའི་སྲིད་བྱུས་ལ་བསྐྱར་ཞིབ་བྱ་དགོས་བྱུང་ཡོད།
སྐུ་ཞབས་རུ་བྷོ་ལགས་ཀྱིས་སི་ཨིན་ཨིན་གསར་ཁང་དུ་ “རྒྱ་ནག་གཞུང་གིས་ཧོང་ཀོང་གི་དམིགས་བསལ་ཐོབ་ཐང་ཁག་དང་དམངས་གཙོར་རྡོག་རོལ་གཏོང་གི་འདུག གང་ཡིན་ཟེར་ན། ཧོང་ཀོང་གི་དམིགས་བསལ་ཐོབ་ཐང་དེ་དག་གིས་ཧོང་ཀོང་རྒྱ་ནག་སྐམ་ས་ཆེན་པོ་ལས་ཁ་བྲལ་གཏོང་གི་ཡོད།” ཅེས་དང་། “ཝཱང་ནི་མི་རབས་རྗེས་མའི་དམངས་གཙོའི་འཐབ་རྩོད་པ་རྣམས་ཀྱི་སྙིང་སྟོབས་ཤིག་ཆགས་ཀྱི་རེད།” ཅེས་བརྗོད་སོང་།
ད་ལོའི་ཕྱི་ཟླ་ ༡ པོའི་ནང་ཁོའི་སྐོར་གྱི་དངོས་བྱུང་གློག་བརྙན་ “བྱིས་པ་ལོ་ཆུང་དང་རྒན་པ་སྟོབས་ལྡན་བར་གྱི་འཐབ་རྩོད།”ཅེས་པ་སཱན་ཌེན་གློག་བརྙན་དུས་ཆེན་(Sundance Film Festival)ཐོག་གཟིགས་འབུལ་ཞུས་ཏེ་མི་མང་གིས་དགའ་བསུ་ཆེན་པོ་ཐོབ་ཡོད་པ་མ་ཟད། སྐབས་དེར་ལྟད་མོ་བའི་བྱ་དགའ་(Audience Award)ཡང་ཐོབ་ཡོད། ད་ལོའི་ལོ་མཇུག་ཏུ་གློག་བརྙན་དེ་འཛམ་གླིང་ཡོངས་སུ་སྟོན་འཆར་ཡོད།
ཝཱང་གིས་རང་གི་དངོས་བྱུང་གློག་བརྙན་དེར་ཧཱོ་ལཱེ་ཝུ་ཌི་(Hollywood Style)ལྟར་མིང་བཏགས་ཡོད་པ་དེར་ཅུང་འཚར་སྣང་སྐྱེ་བཞིན་འདུག་ཟེར། འོན་ཀྱང་། གློག་བརྙན་དེ་འགྲེམ་སྟོན་བྱེད་མཁན་སྐད་གྲགས་ཆེན་པོ་ཡིན་སྟབས་གློག་བརྙན་དེ་སྤྱི་ཚོགས་ནང་ཁྱབ་སྤེལ་འགྲོ་བར་ཁེ་ཕན་ཆེན་པོ་ཡོད།
ཝཱང་གིས་ཧོང་ཀོང་གྲོང་ཁྱེར་གྱི་གཞུང་ལམ་དཀྱིལ་དུ་ང་ཚོ་སི་ཨིན་ཨིན་གསར་ཁང་གི་བཅར་འདྲི་དང་ལེན་བྱས་བྱུང་། ཝཱང་ལགས་བརྙན་ལེན་འཕྲུལ་ཆས་མདུན་དུ་ལངས་ཏེ། ཁོ་བོའི་གམ་དུ་མི་སུ་གང་མེད་པ་ལྟར་དོགས་སྣང་དང་འཚེར་སྣང་གང་ཡང་མེད་པའི་ངང་སྐད་ཆ་བཤད་སོང་། སྐབས་དེར་ཁོས་ ༢༠༡༤ ལོར་དམངས་གཙོ་དོན་གཉེར་བ་རྣམས་དང་མཉམ་དུ་ལས་འགུལ་སྤེལ་བའི་གནས་ཚུལ་ཕྱིར་འདྲན་བྱས་དོན་ “ངས་ཉི་གདུགས་ལས་འགུལ་སྐབས་ཀྱི་ཉམས་མྱོང་མང་པོ་ཞིག་བསྡུ་གསོག་བྱས་ཡོད། དེ་དག་དུས་ནམ་ཡང་འཕྲོ་བརླག་ཏུ་གཏོང་རྒྱུ་མིན།” ཞེས་དང་། “ངའི་མི་ཚེའི་དངོས་བྱུང་གློག་བརྙན་དེ་ནེཊ་ཕི་ལིཀ་ཚོགས་པས་ཉོས་ཡོད་པས་ཁོང་ཚོས་མི་འགྱངས་བར་འགྲེམ་སྤེལ་བྱ་རྒྱུ་རེད། གློག་བརྙན་དེ་བརྒྱུད་དེ་མི་མང་གིས་ཧོང་ཀོང་དམངས་གཙོའི་ལས་འགུལ་སྐོར་སྔར་ལས་ཁ་གསལ་དང་གཏིང་ཟབ་པ་མཁྱེན་རྟོགས་ཡོང་བའི་རེ་བ་ཡོད།” ཅེས་བརྗོད་སོང་།
ཨ་རིར་ཡོད་པའི་གྲོགས་པོ།
ཝཱང་གིས་རང་གི་ལས་འགུལ་གྱིས་ཧོང་ཀོང་ནས་བར་ཐག་ལེ་བར་ ༨༠༠༠ ལྷག་གི་ཕ་རོལ་དུ་ཡོད་པའི་མི་ཞིག་ལ་ཤུགས་རྐྱེན་ཐེབས་ན་འདོད་ཡོད། དེ་ནི་ཨ་རིའི་སྲིད་འཛིན་ཌོ་ནལ་ཊི་རུམ་ཕི་རེད། ཝཱང་གིས་ཧོང་ཀོང་གི་དམངས་གཙོའི་ལས་འགུལ་ལ་ཨ་རིའི་གྲོས་ཚོགས་ཀྱིས་རྒྱབ་སྐྱོར་འཐོབ་པར་འབད་བརྩོན་བྱེད་བཞིན་ཡོད། ཁོས་སྐུ་ཞབས་རུ་བྷོ་ལགས་དང་ཐུག་འཕྲད་སྐབས། ཌོ་ནལ་ཊི་རུམ་ཕི་(སྐབས་དེར་ཁོང་སྲིད་འཛིན་ཆགས་མ་ཐག་ཡིན།)ལ་“ཧོང་ཀོང་གི་འགྲོ་བ་མིའི་ཐོབ་ཐང་ལ་ངེས་པར་དུ་རྒྱབ་སྐྱོར་གནང་རོགས།”ཞེས་སྙིང་གཏམ་བསྐུར་ཡོད།
ཝཱང་གིས་སི་ཨིན་ཨིན་གསར་ཁང་ལ་ “ཨ་རིའི་ཆབ་སྲིད་པ་རྣམས་ཀྱིས་ཧོང་ཀོང་གི་འགྲོ་བ་མིའི་ཐོབ་ཐང་ཙམ་མིན་པར། དེའི་ཁྲིམས་ལུགས་དང་ཚོང་འབྲེལ་རང་དབང་སོགས་རྩ་བར་བཟུང་སྟེ། སྔོན་ཆད་ཧོང་ཀོང་དེ་རྒྱལ་སྤྱིའི་ཚོང་འབྲེལ་ལྟེ་གནས་ཤིག་ཡིན་པའི་གནས་སྟངས་དེ་བསྐྱར་གསོ་ཡོང་ཐབས་སུ་རོགས་རམ་གནང་དགོས།” ཞེས་དང་། “ཊི་རུམ་ཕི་ནི་ཚོང་པ་ཞིག་ཡིན་སྟབས། ཁོང་གིས་ཧོང་ཀོང་གི་ཐུན་མོང་མ་ཡིན་པའི་ཁྱད་ཆོས་དེ་འགྱུར་བ་མེད་པར་གནས་དགོས་པར་མཐོང་གི་ཡོད་པར་ངས་ཡིད་ཆེས་བྱེད་ཀྱིན་ཡོད།” ཅེས་སོགས་བརྗོད་སོང་།
ཉེ་ལམ་སྲིད་འཛིན་ཊོ་རུམ་ཕིས་ “རྒྱ་ནག་གཅིག་” སྐོར་ལ་བསམ་ཚུལ་བརྗོད་ཡོད། སྲིད་ཇུས་དེས་ཐའེ་ཝན་ནི་རྒྱ་ནག་གི་ཁ་འབྲལ་ཐབས་མེད་པའི་ཆ་ཤས་སུ་རྩི་བཞིན་ཡོད་ཀྱང་། ཝཱང་གིས་ཐའེ་ཝན་རྒྱ་ནག་གི་ཁོངས་གཏོགས་མིན་སྟབས་རྒྱ་ནག་གཅིག་གི་སྲིད་ཇུས་ཐད་ཕྱོགས་གཉིས་ཀྱིས་གྲོས་མོལ་བྱེད་དགོས་ཟེར། ཊི་རུམ་ཕིས་ཐའེ་ཝན་ལ་ཐོག་མར་འབྲེལ་བ་བྱས་སྐབས། ཐའེ་ཝན་རང་བཙན་ལ་རྒྱབ་སྐྱོར་བྱེད་མཁན་ཚོར་དགའ་ཚོར་བྱུང་ཡོད་ཀྱང་། རྗེས་སུ་ཊི་རུམ་ཕི་དང་ཞི་ཅིན་ཕིན་བར་ཁ་པར་ལས་འབྲེལ་བ་བྱུང་སྐབས། རྒྱ་ནག་གཅིག་གི་སྲིད་ཇུས་ལ་རྒྱབ་སྐྱོར་ཡོད་ཅེས་བརྗོད་ཡོད།
ཝཱང་གིས་ “རྒྱ་ནག་གིས་ཧོང་ཀོང་དང་ཨེ་ཤ་ཡའི་ནང་ཐེ་གཏོགས་བྱེད་བཞིན་པ་ནི་ཉེན་ཁ་ཅན་ཞིག་ཡིན་སྟབས། སྐུ་ཞབས་ཊི་རུམ་ཕིས་ངེས་པར་དུ་དཀའ་ངལ་དེ་འགོག་ཐབས་བྱེད་དགོས་པའི་ལས་འགན་ངོ་ཤེས་པའི་རེ་བ་ཡོད།” ཅེས་བརྗོད་ཡོད། འོན་ཀྱང་། ཝང་ནི་མི་ཚང་མས་ངོ་ཤེས་ཤིང་སྙན་གྲགས་ཅན་ཞིག་མིན། རྒྱ་ནག་གཞུང་འབྲེལ་གསར་ལམ་དང་རྒྱ་ཞེན་རིང་ལུགས་ཀྱི་གསར་ལམ་ཁག་ཏུ་ཁོ་ལ་ “དྲག་སྤྱོད་པ་”(extremist) ཅེས་འབོད་ཀྱིན་ཡོད་པ་མ་ཟད། ཧོང་ཀོང་དུ་ཡོད་པའི་རྒྱ་ནག་གཞུང་གི་གསར་ཤོག་དག་གིས་ཀྱང་། ཁོ་ལ་ཨ་རིའི་གཞུང་གིས་ལྐོག་དངུལ་སྤྲོད་ཀྱི་ཡོད་པའི་སྐྱོན་བརྗོད་བྱེད་བཞིན་ཡོད།
༼ཞལ་ཁ་བཞད་པའི་ཉི་གདུགས། Umbrellas in Bloom༽ཞེས་པའི་དེབ་ཀྱི་རྩོམ་པ་པོ་སྐུ་ཞབས་ཇ་སིན་(Jason)ལགས་ཀྱིས། “ཁྱོད་རང་ཝཱང་ལ་དགའ་ཡང་རུང་ལ་མ་དགའ་ནའང་རུང་། ཁོ་ནི་མིའི་མགོ་སྐོར་འོག་ཚུད་མཁན་ཞིག་མིན་སྟབས། ཕྱི་རྒྱལ་གཞུང་གིས་ཁོ་བོར་མགོ་སྐོར་མ་གཏང་གོང་ལ་ཁོ་བོས་ཕྱི་རྒྱལ་གཞུང་རྣམས་ཡིད་དབང་འགུག་ངེས་རེད།” ཅེས་བརྗོད་ཡོད། ཡང་ཁ་ཤས་ཀྱིས་ཝཱང་ལ་དོ་སྣང་བྱེད་མཁན་ཚོར་ཁོ་ནི་ཨ་རིའི་གཞུང་གི་མགོ་སྐོར་འོག་ཚུད་པ་ཞིག་རེད་ཅེས་བརྗོད་ཡོད།
༢༠༡༧ ལོ་ནི་ཧོང་ཀོང་ལ་གནད་འགག་ཆེ་བའི་ལོ་ཞིག་རེད། ལོ་འདིའི་ཕྱི་ཟླ་ ༧ པར་རྒྱ་ནག་གིས་ཧོང་ཀོང་གི་སྲིད་དབང་བཟུང་ཏེ་ལོ་ངོ་ ༢༠ འཁོར་བའི་དུས་ཆེན་སྲུང་གཙི་ཞུ་རྒྱུ་རེད། སྐབས་དེར་ཝང་གིས་རང་གི་དངོས་བྱུང་གློག་བརྙན་ཁ་བྱང་ལ་(བྱིས་པ་ལོ་ཆུང་དང་རྒན་པ་སྟོབས་ཆེན་གཉིས་བར་གྱི་འཐབ་རྒོལ།)ཞེས་པ་ལྟར་དངོས་སུ་འཐབ་རྩོད་བྱེད་དགོས་ལ། ཁོས་ད་དུང་སྲིད་འཛིན་ཞི་ཅིན་ཕིན་ནི་དུས་ཆེན་དེའི་སྟེང་ཧོང་ཀོང་གི་གནས་སྟངས་ལ་དངོས་སུ་ལྟ་རྟོགས་བྱེད་མཁན་རྒྱ་ནག་གི་སྲིད་འཛིན་ཐོག་མ་དེ་ཆགས་རྒྱུའི་རེ་བ་བྱེད་ཀྱིན་འདུག
ཝཱང་གིས་ “དུས་ཚོད་དེ་ནི་ད་བར་མི་མང་ལ་རྡོག་རོལ་བཏང་བའི་ནག་ཉེས་རྣམས་ཕྱོགས་གཅིག་ཏུ་སྤུངས་བའི་གནད་འགག་གི་དུས་ཚོད་ཅིག་ཡིན་ལ། སྐབས་དེར་ང་ཚོས་ཧོང་ཀོང་མི་མང་ལ་འགྲོ་བ་མིའི་ཐོབ་ཐང་དང་དམངས་གཙོ་དགོས་པའི་སྐད་འབོད་བྱེད་རྒྱུ་ཡིན།”ཅེས་བརྗོད།
འོན་ཀྱང་། སྲིད་འཛིན་ཞི་ཅིན་ཕིན་ལ་གནས་ཚུལ་དེ་དག་འབྱོར་རྒྱུ་ཁག་པོ་རེད། ལོ་སྔོན་མར་རྒྱ་ནག་གི་མགོ་ཁྲིད་གོ་གནས་མཐོ་ཤོས་ཨང་གསུམ་པ་ཀྲང་ཏཱེ་ཅིང་(Zhang Dejiang)ཧོང་ཀོང་ལ་ལྟ་སྐོར་དུ་འབྱོར་སྐབས། ཧོང་ཀོང་ནང་ངོ་རྒོལ་དོན་རྐྱེན་མི་འབྱུང་བའི་ཆེད་དུ་ཁོ་རང་སྐྱོད་སའི་ཧོང་ཀོང་གྲོང་ཁྱེར་གྱི་གཞུང་ལམ་དང་རྐང་ལམ་ཡོད་ཚད་བཀག་སྡོམ་བྱས་པ་མ་ཟད། ཧོང་ཀོང་གྲོང་ཁྱེར་ཡོངས་སུ་མཚོན་ཆ་ཐོགས་པའི་དམག་མི་འགྲེམས་འཇོག་བྱས་པ་རེད།
རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་ལྟར་ན། ད་ལྟ་ནས་སྲིད་འཛིན་ཞི་ཅིན་ཕིན་ཕེབས་རྒྱུའི་གྲ་སྒྲིག་བྱེད་བཞིན་ཡོད་པ་དང་། ཧོང་ཀོང་དང་ཨོ་མཱིན། ཀོང་ཏུང་སོགས་སུ་སྲིད་འཛིན་ཞི་ཅིན་ཕིན་ཕེབས་སྐབས། ངོ་རྒོལ་མི་འབྱུང་བའི་ཆེད་དུ་ད་ལྟ་ནས་དམག་མི་སྟོང་ཕྲག་མང་པོ་འགྲེམས་འཇོག་བྱས་འདུག་ཟེར།
