སྐལ་བཟང་སྦྱིན་པ།
ཨ་རིའི་སྲིད་འཛིན་ཊི་རུམ་ཕི་དང་ཁོའི་གཞུང་གི་ལས་དོན་གལ་ཆེན་ཁག་ཐག་གཅོད་བྱེད་སར་ལྕམ་སྐུ་དང་པོ་མཱི་ལ་ནེ་ཡཱ་དང་མཉམ་དུ་ད་དུང་བུ་མོ་ལོ་ཆུང་མཛེས་མ་གཞན་ཞིག་ཀྱང་ཐེངས་མང་པོར་མཐོང་ཐུབ་ཅིང་། ཁོང་མོ་སུ་ཞིག་ཡིན་པ་དང་ཊི་རུམ་ཕི་དང་ཁོ་གཉིས་འབྲེལ་བ་ཅི་ཞིག་ཡིན་པ་སོགས་ལ་ཁྱོད་ཀྱིས་བསམ་བློ་བཏང་མྱོང་ངམ།
ཟླ་འདིའི་ཚེས་ ༡༩ ཉིན་ཨ་རིའི་སྲིད་འཛིན་ཌོ་ནལ་ཊི་རུམ་ཕི་ཡིས་ཕོ་བྲང་དཀར་པོའི་མཐོ་རིམ་ལས་བྱེད་ཁག་ཅིག་ཁྲིད་དེ། སོ་དྷི་ཨ་ར་བྷི་ཡ་གཙོ་བྱས་པའི་དཀྱུལ་ཤར་ཡུལ་གྲུའི་རྒྱལ་ཁབ་ཁག་ཅིག་ནང་སྐོར་སྐྱོད་ཐོག་མ་གནང་ཡོད་པ་དང་། ཐེངས་འདིར་ཁོང་དང་མཉམ་དུ་ཁོ་རང་གི་བུ་མོ་ཆེ་བ་ཕོ་བྲང་དཀར་པོའི་སློབ་སྟོན་པ་ལྕམ་ཨ་བན་ཀ་ཊི་རམ་ཕི་(Ivanka Trump)ལགས་ཀྱང་འཁྲིད་ཡོད། ཨ་བན་ཀ་ཊི་རུམ་ཕི་ཡིས་རྒྱལ་སྤྱིའི་མཐོ་རིམ་བུད་མེད་ཚོགས་ཆེན་སྟེང་། འཛམ་གླིང་དངུལ་ཁང་ཁག་ལ་བུད་མེད་ཁེ་ལས་པའི་ནུས་སྟོབས་གོང་སྤེལ་ཆེད་མ་དངུལ་གཏོང་དགོས་པའི་རེ་སྐུལ་ཞུས་པ་ལྟར། ཚེས་ ༢༡ ཉིན་སོ་དྷི་ཨ་ར་བྷི་ཡ་དང་(United Arab Emirate)གཞུང་གཉིས་ཀྱིས་མཉམ་རུབ་ཐོག རྒྱལ་སྤྱིའི་བུད་མེད་ཁེ་ལས་པ་སྐྱེད་སྲིང་དང་བུད་མེད་ནུས་སྟོབས་གོང་འཕེལ་ཆེད། རྒྱལ་སྤྱིའི་བུད་མེད་ཐེབས་རྩ་ཚོགས་པར་ཨ་སྒོར་ས་ཡ་ ༡༠༠ ཡི་རོགས་དངུལ་སྤྲད།
ཐེངས་འདིའི་ཨ་བན་ཀ་ཡི་ལས་དོན་ལམ་ལྷུངས་དང་བསྟུན་ཏེ་གསར་ལམ་ཁག་ཏུ་ཁོང་མོར་དོ་སྣང་ཆེ་རུ་ཕྱིན་ཡོད་པ་དང་། རྒྱལ་སྤྱིའི་བུད་མེད་ཐེབས་རྩ་ཚོགས་པ་ནི་འཇར་མན་སྲིད་བློན་ལྕམ་ཨན་ཇི་ལཱ་མཱར་ཁེལ་གཙོ་བྱས་བའི་རྒྱལ་སྤྱིའི་བུད་མེད་ཁེ་ལས་པས་གྲུབ་པའི་ཚོགས་པ་ཞིག་ཡིན་པ་དང་། ཨན་ཇི་ལཱ་མཱར་ཁེལ་གྱིས་གདན་ཞུ་ལྟར་ད་ལོའི་ཕྱི་ཟླ་ ༣ ཚེས་ ༢༧ ཉིན་ཨ་བན་ཀ་ཊི་རུམ་ཕི་འཇར་མན་དུ་ཚོགས་པའི་རྒྱལ་ཁབ་ཉི་ཤུའི་མཐོ་རིམ་བུད་མེད་ཚོགས་ཆེན་ཐེངས་གསུམ་པའི་སྟེང་མཉམ་ཞུགས་བྱས་ཡོད།
སྲས་མོ་ཨ་བན་ཀ་ཊི་རུམ་ཕི་ལགས་ནི། ༡༩༨༡ ལོར་ཨ་རིའི་ནེའུ་ཡོག་མན་ཧ་ཊན་དུ་ད་ལྟའི་ཨ་རིའི་སྲིད་འཛིན་ཌོ་ནལ་ཊི་རུམ་ཕི་དང་ཁོང་གི་བཟའ་ཟླ་དང་པོ་ཨི་བཱ་ནཱ་ཊི་རུམ་ཕི་གཉིས་ཀྱི་བུ་མོར་སྐྱེས་ཤིང་། ཁོ་གཉིས་ལ་བྱིས་པ་གསུམ་ཡོད་པ་ལས་ཨ་བན་ཀ་འབྲིང་བ་དང་བུ་མོ་གཅིག་པུ་དེ་ཡིན། ཁོང་མོ་ཨ་རིའི་ཅལ་པིན་སློབ་གྲྭ་ནས་སྔོན་འགྲོའི་སློབ་སྦྱོང་ཐོན་པ་དང་། རང་ལོ་ ༡༥ སྟེང་(Choate Rosemary Hall)མཐོ་སློབ་ཏུ་ཞུགས་པ་དང་། དེའི་རྗེས་ཨ་རིའི་པིན་སེལ་ཝ་ནེ་ཡ་མངའ་སྡེའི་དཔལ་འབྱོར་རིག་པའི་གཙུག་ལག་སློབ་གྲྭར་ཞུགས་ཏེ། ༢༠༠༤ ལོར་དཔལ་འབྱོར་རིག་པའི་ཐོག་འབུམ་རམས་པ་ཐོན་ཡོད།
ཨ་རིའི་སྲིད་འཛིན་ཊི་རུམ་ཕིས་འདི་ལོའི་ཕྱི་ཟླ་ ༣ ཚེས་ ༢༤ ཉིན་རང་ཉིད་ཀྱི་བུ་མོ་ཨ་བན་ཀ་ཨ་རིའི་ཕོ་བྲང་དཀར་པོའི་ལས་བྱེད་དང་སྲིད་འཛིན་གྱི་སློབ་སྟོན་པར་བསྐོ་བཞག་བྱ་རྒྱུ་ཡིན་སྐོར་བསྒྲགས་སྐབས། ཨ་རིའི་ལས་བྱེད་འཛིན་སྐྱོང་ཚན་པས། ཊི་རུམ་ཕིས་རང་གི་ཉེན་ཉེ་གཞུང་གི་ལས་བྱེད་དུ་བསྐོ་བཞག་བྱས་པ་ནི། གཞུང་གི་ལས་བྱེད་བསྐོ་བཞག་གི་ཁྲིམས་ལུགས་ལ་བརྩི་བཀུར་མ་བྱས་པ་ཡིན་སྐོར་སྐྱོན་བརྗོད་བྱས་སྟབས། ཨ་བན་ཀ་ཊི་རུམ་ཕི་ཡིས་གནད་དོན་དེའི་ཐད་ཁྲིམས་གཏུག་བྱས་ཏེ་ཉིན་ལྔའི་ནང་ཁོང་མོར་ཁ་མཆུ་ཐོབ་སྟེ། ཕོ་བྲང་དཀར་པོའི་ལས་བྱེད་གནང་ཆོག་པའི་ཐག་གཅོད་བྱུང་ཡོད་སྟབས། ཟླ་ ༣ ཕྱི་ཚེས་ ༢༩ ཉིན་ནས་བཟུང་ཁོ་མོ་ཨ་རིའི་ཕོ་བྲང་དཀར་པོའི་ནང་ཕྱག་ལས་མགོ་འཛུགས་གནང་ཡོད།
ཨ་བན་ཀ་ཊི་རུམ་ཕི་ནི་ཨ་རིའི་སྐུ་དྲག་གསར་པའི་སྲས་དང་སྲས་མོ་ཚོའི་གྲས་ནས་སློབ་སྦྱོང་དང་ཤེས་འཇོན་གཉིས་ལྡན་གྲས་ཤིག་ཡིན་པ་དང་། ཁོང་མོས་ཕོ་བྲང་དཀར་པོའི་སློབ་སྟོན་པའི་ལས་འགན་འཁུར་སྐབས། མོ་རང་གིས་ཨ་རིའི་མི་མང་ལ་ཞབས་ཞུ་བསྒྲུབ་འདོད་ཆེན་པོ་ཡོད་པ་མ་ཟད། དེ་སྔོན་ནས་བུད་མེད་ཀྱི་རང་དབང་དང་ཐོབ་ཐང་སྐོར་ལ་འགན་འཁུར་ཆེན་པོ་ལེན་གྱི་ཡོད་པ་དང་། ཕོ་བྲང་དཀར་པོའི་ནང་སློབ་སྟོན་པའི་ལས་ཀ་བྱས་པ་དེར་ཡང་གླ་ཆ་ལེན་རྒྱུ་མིན་སྐོར་སོགས་བརྗོད་ཡོད་ལ། ཁོང་མོའི་ཁྱོ་ག་སྐུ་ཞབས་རྗར་ཌི་ཁུ་ཤཱི་ནིར་(Jared Kushner)ལགས་ཀྱང་ཕོ་བྲང་དཀར་པོའི་སྲིད་འཛིན་གྱི་སློབ་སྟོན་པར་བསྐོས་ཡོད་པ་རེད།
བརྒྱུད་ལམ་ཁག་ཅིག་ནང་ཨ་བན་ཀ་ཊི་རུམ་ཕི་ཡིས་དེ་སྔ་དགའ་རོགས་མང་པོ་སྒྲིག་ཡོད་པ་དང་། དགའ་རོགས་ཚང་མ་ཨ་རི་དང་རྒྱལ་སྤྱིའི་སྟེང་མིང་གྲགས་ཡོད་པ་ཤ་སྟག་ཡིན་འདུག ཁོ་མོས་ཐེངས་ཤིག་དགའ་རོགས་ནང་དུ་ཁྲིད་པར་ཨ་ཕར་ཞེད་ཀྱི་འདུག་ཅེས་བརྗོད་ཡོད་སྟབས། ཨ་ཝན་ཀ་ནི་ཕ་མར་བརྩི་བཀུར་ཡོད་མཁན་ཞིག་ཡིན་པར་ངོས་འཛིན་བྱེད། ཨ་བན་ཀ་ཡི་དགའ་རོགས་དག་གི་ཁྲོད། ཨ་རིའི་གློག་བརྙན་(Spiderman)ཞེས་བའི་འཁྲབ་སྟོན་པ་ཊོ་ཧྥར་གྷིར་སི་དང་། ཨ་རིའི་རྐང་འཁོར་ཆེད་མཁས་པ་ལཱན་སེ་ཨམ་སི་ཊི་གྷར། ཨ་རིའི་གློག་བརྙན་འཁྲབ་སྟོན་པ་སི་བཱི་ལམ། ཨ་རིའི་གློག་བརྙན་འཁྲབ་སྟོན་པ་ཇམ་སུ་གྷོ་བྷི་ལི་སོགས་ཡིན་འདུག འོན་ཀྱང་། ཇམ་སུ་གྷོ་བྷི་ལི་ཡིས་ ༢༠༡༦ ལོར་ཐ་མག་ནག་ཚོང་བརྒྱབ་སྟེ་འཛིན་བཟུང་ཐེབས་ཡོད།
༢༠༠༩ ལོར་ཨ་བན་ཀ་ཊི་རུམ་ཕི་དང་ཁོ་མོའི་ད་ལྟའི་ཁྱོ་ག་རྗར་ཌི་ཁུ་ཤཱི་ནཱར་གཉིས་གཉེན་སྒྲིག་བྱས་ཏེ། ད་ཆར་ཕྲུ་གུ་བུ་གཉིས་དང་བུ་མོ་གཅིག་ཡོད། ཨ་བན་ཀས་རྗར་ཌི་ཁུ་ཤཱི་ནཱར་དང་གཉེན་སྒྲིག་བྱས་རྗེས་ཇེའུ་ཆོས་ལུགས་(Judaism)སུ་ཞུགས་ཡོད་པ་དང་། ཇེའུ་ཆོས་ལུགས་ལྟར་ན་གཟའ་མཇུག་ལ་(Shabbat)ཞེས་གུང་སེང་གཏོང་སྲོལ་ཡོད་པ་དང་། གུང་སེང་དེ་གཟའ་པ་སངས་ཀྱི་ཉི་མ་མ་ནུབ་གོང་གི་སྐར་མ་འགའ་ནས་རྩིས་ཏེ་གཟའ་སྤེན་པའི་མཚན་མོར་གནམ་མཁའ་ལ་སྐར་མ་གསུམ་མ་ཤར་བར་སྲུང་གཙི་བྱེད་དགོས་ཤིང་། དུས་ཡུན་དེའི་རིང་ནང་མི་དང་གྲོགས་པོ་ལྷན་དུ་སྤྲོ་འཆམ་སོགས་ཀྱི་རྩེད་འཇོར་རོལ་བ་ལས་འཕྲུལ་ཆས་དང་གློག་རིགས་ལ་ལག་པ་འཆང་མི་ཆོག དཔེར་ན། རླངས་འཁོར་གཏོང་བ་དང་གནམ་གྲུར་སྡོད་པ། ཁ་པར་དང་གློག་ཀླད་སོགས་བེད་སྤྱོད་གཏོང་མི་ཆོག་སྟབས། ཨ་བན་ཀ་དང་ཁུ་ཤཱི་ནར་གཉིས་ཕོ་བྲང་དཀར་པོའི་གནད་ཡོད་མི་སྣ་ཡིན་སྟབས། ཛ་དྲག་གི་ལས་དོན་རིགས་འཐུས་ཤོར་དུ་འགྲོ་སྲིད་པའི་གླེང་སློང་ཡོང་གི་ཡོད་ཀྱང་། གནད་དོན་གལ་ཆེན་ལ་ཐུག་སྐབས་ཇེའུ་ཆོས་དཔོན་ལ་དགོངས་ཁྲོལ་ཞུ་ལམ་སྲོལ་ཞིག་ཡོད་འདུག
ཨ་བན་ཀ་ཊི་རུམ་ཕིས་དེབ་ཅིག་བརྩམས་ཡོད་པ་དེ་ཟླ་འདིའི་ཕྱི་ཚེས་ ༢ ཉིན་སྒོ་འབྱེད་བྱས་ཡོད་པ་དང་། དེའི་ཁ་བྱང་ལ་ལས་ཀ་ཅན་གྱི་བུད་མེད་(Women Who work)ཅེས་བུད་མེད་ཚོས་ཚོང་ལས་ཙག་ཙིག་ནས་མགོ་བཙུགས་ཏེ་བུད་མེད་ཁེ་ལས་པ་ཇི་ལྟར་བྱ་དགོས་མིན་ཐད་སོ་སོའི་ཉམས་མྱོང་དང་བསམ་ཚུལ་གཞི་ལ་བཞག་སྟེ་བྲིས་ཡོད་འདུག དེབ་དེའི་ནང་ཁོ་མོས་ཇེའུ་ཆོས་ལུགས་ཀྱི་གུང་སེང་སྲུང་གཙི་བྱེད་ཕྱོགས་སྐོར་ལ་ “ཉིན་དེར་ང་ཚོས་གློག་རིགས་ལ་ལག་པ་རྩ་བ་ནས་འཆང་གི་མེད། དཔེར་ན། འཕྲིན་ཡིག བརྙན་འཕྲིན། ཁ་པར་གཏོང་བ། དེ་བཞིན། དྲ་རྒྱ་སོགས་ཚང་མ་བཀག་སྟེ། དུས་ཚོད་དེའི་རིང་ང་ཚོས་ཕན་ཚུན་བར་ཡིད་ཆེས་དང་མཛའ་འབྲེལ་ཇེ་ཟབ་དུ་གཏོང་གི་ཡོད་” ཅེས་སོགས་འཁོད་ཡོད་འདུག
ཨ་བན་ཀ་ཊི་རུམ་ཕི་དེ་སྔ་གྱོན་གསར་དང་གཟུགས་བཟང་འགྲེམ་སྟོན་མ་ཞིག་དང་། ༡༩༩༧ ལོར་ཁོ་མོ་རང་ཉིད་ཀྱི་ཨ་ཕས་གཙོ་གཉེར་བྱེད་ཀྱིན་པའི་འཛམ་གླིང་ན་གཞོན་མཛེས་མའི་འགྲན་བསྡུར་སྐབས་བརྙན་འཕྲིན་མདོ་འཛིན་པ་བྱས་པ་དང་། དེ་མིན་གྱི་བརྙན་འཕྲིན་དང་དུས་དེབ་མང་པོའི་མཛེས་མའི་སྡིངས་ཆར་བསླེབས་མྱོང་ཡོད་ཅིང་། ཕྱི་སུ་ཁོ་མོ་རང་ཉིད་ཀྱི་ཨ་ཕའི་བཟོ་གྲྭར་ཞུགས་ཏེ་ཨ་རིའི་ནང་གི་བུད་མེད་ཚོང་བ་ཞིག་ཏུ་གྱུར་ཡོད་པ་མ་ཟད། རང་ཉིད་ལ་ཚོང་རྟགས་དང་། གསེར་དང་རྡོ་རྗེ་ཕ་ལམ་གྱི་ཚོང་ཁང་ཡོད། དེ་དང་མཉམ་དུ་ཁོ་མོས་ཊི་རུམ་ཕི་བཟོ་གྲྭའི་སྤྱི་ཁྱབ་གཞོན་པའི་འགན་ཡང་འཁུར་མྱོང་ཡོད་ཀྱང་། ད་ལྟ་ཁོ་མོས་ལས་གནས་དེ་དག་ཚང་མ་བློས་བཏང་ཡོད་པ་མ་ཟད། དེ་སྔའི་རང་ཉིད་ཀྱི་ཚོང་ཁང་དེའང་མ་རྩ་ཙམ་བླངས་ཏེ་ཨ་རིའི་སྤྱི་ཚོགས་ཐེབས་རྩ་ཚོགས་པ་ཞིག་ལ་སྤྲད་དེ། ཕོ་བྲང་དཀར་པོའི་ནང་གླ་མེད་ལས་ཀ་བྱེད་བཞིན་ཡོད་པ་རེད།
སྔར་ལོའི་ཨ་རིའི་སྲིད་འཛིན་འོས་བསྡུའི་སྐབས། ཨ་བན་ཀ་དང་ཁོ་མོའི་ཁྱོ་ཀ་གཉིས་ཀྱིས་ཌོ་ནིལ་ཊི་རུམ་ཕི་ལ་རྒྱབ་སྐྱོར་ཤུགས་ཆེན་བྱས་ཏེ་ལས་འགུལ་སྣ་ཚོགས་སྤེལ་ཡོད་པ་དང་། ཊི་རུམ་ཕི་ལ་སྲིད་འཛིན་རྒྱལ་ཁ་ཐོབ་མ་ཐག་ཁོ་གཉིས་རང་གི་སློབ་སྟོན་པར་བསྐོས་ཏེ་ཕོ་བྲང་དཀར་པོའི་ནང་བླངས་པ་དེ་ནི། མ་འོངས་པར་སྲིད་འཛིན་ཊི་རུམ་ཕིས་ཡིད་ཆེས་བློས་གཏད་བྱེད་ཡུལ་གཙོ་བོ་ཞིག་ཆགས་རྒྱུ་ཡིན་པ་མ་ཟད། སྲས་མོ་ཨ་བན་ཀ་ནི་འབྱུང་འགྱུར་གྱི་ཨ་རིའི་སྲིད་འཛིན་རིམ་པའི་སྐབས་སུའང་ཆབ་སྲིད་མི་སྣ་གཙོ་གྲས་ཤིག་ཆགས་རྒྱུར་ཚོད་དཔག་བྱེད་ཀྱི་ཡོད་པ་རེད།
ཊི་རུམ་ཕི་ཨ་རིའི་སྲིད་འཛིན་གྱི་ངེས་སྟོན་པར་གྱུར་བ་ནས་བཟུང་། ཁོ་མོས་ཨ་རིའི་བུད་མེད་ཀྱི་ནུས་སྟོབས་གོང་འཕེལ་དང་ཁྱིམ་ཚང་། བྱིས་པའི་མདུན་ལམ་སོགས་ཀྱི་ཐད་ཕྱག་ལས་གནང་མགོ་བརྩམས་ཡོད་པ་དང་། ཊི་རུམ་ཕིའི་འཛིན་སྐྱོང་འོག་ཨ་རིའི་གཞུང་གིས་ལོ་རེར་ཨ་སྒོར་དུང་ཕྱུར་ ༢༥ ཙམ་གྱི་འགྲོ་སོང་བཏང་སྟེ། བྱིས་པ་སྐྱེ་རྒྱུ་ཡོད་པའི་ཕ་མ་ཚོར་ལོ་གཅིག་གི་ཐོབ་གསེང་སྟེང་། གླ་ཡོད་གུང་གསེང་བདུན་ཕྲག་ ༦ ཁ་སྣོད་བྱས་ཏེ་དཔལ་འབྱོར་དང་ངལ་གསོའི་ཁེ་ཕན་སྐྲུན་ཡོད་ཅིང་། ཨ་རིའི་ཕོ་བྲང་དཀར་པོའི་ལས་བྱེད་ཅིག་གིས་སྲིད་ཇུས་དེའི་གྲོས་སྟོན་པ་ཨ་བན་ཀ་ཊི་རུམ་ཕི་ཡིན་སྐོར་བརྗོད་ཡོད།
ཨ་བན་ཀ་ཊི་རུམ་ཕི་ཡིས་འཇར་མན་དུ་ཚོགས་པའི་རྒྱལ་སྤྱིའི་བུད་མེད་ཚོགས་ཆེན་སྟེང་། རང་ཉིད་ཕྲུ་གུ་གསུམ་གྱི་ཨ་མ་ཞིག་ཡིན་པའི་ཉམས་མྱོང་གཞིར་བཞག་སྟེ། ཨ་རིའི་ནང་གི་བྱིས་པའི་ཕ་མ་ཚོར་ཁེ་ཕན་དང་བུད་མེད་ཁེ་ལས་པ་སྐྱེད་སྲིང་ཆེད་འཆར་གཞི་མང་པོ་སྒྲིག་ཡོད་སྐོར་བརྗོད་ཡོད། ཨ་བན་ཀ་ཊི་རུམ་ཕི་ཡིས་ད་བར་འཇར་མན་སྲིད་བློན་ཨན་ཇི་ལཱ་མཱ་ཁེལ་དང་ཁེ་ན་ཌིའི་སྲིད་བློན་རྗ་སི་ཊིན་སོགས་གཙོས་འཛམ་གླིང་གི་དབུ་ཁྲིད་ཁག་དང་ལྷན་དུ་མཇལ་འཕྲད་གྲོས་མོལ་གནང་ཡོད་པ་མ་ཟད། ཟླ་འདིའི་ཚེས་ ༡༧ ཉིན་ཨ་བན་ཀས་རང་ཉིད་ཀྱི་ཨ་ཕ་མེད་ཤུལ་དུ་ཕོ་བྲང་དཀར་པོའི་ནང་ཚོགས་འདུ་བསྐོངས་ཏེ། ཨ་རིའི་མཐོ་རིམ་ལས་བྱེད་ཁག་དང་ལྷན་དུ་རང་ཉིད་ཀྱི་ཨ་ཕའི་སྲིད་ཇུས་ཏེ། ཕྱི་མི་གནས་སྤོ་བཀག་སྡོམ་སྐོར་ལ་གྲོས་བསྡུར་བྱས་ཡོད་པ་རེད།
གསར་འགྱུར་ཀློག་སྤྲོ་བོ་བྲིས་འདུག ཐུགས་རྗེ་ཆེ། ཁྲོམ་རྒན་འདིས་རང་གི་བུ་མོ་སྣང་བར་འགྲོ་གི་ཡོད་པ་མིན་པའི་སྨོན་ལམ།