གཞི་རིམ་སློབ་གྲྭའི་སློབ་དེབ་ཁག་གི་དམིགས་བསལ་ཁྱད་ཆོས་དེ་སྐད་ཡིག་གི་སྟེང་ལ་འབད་བརྩོན་བྱས་ཡོད།

ཕྱི་ལོ་༢༠༡༠ ལོ་ནས་མགོ་ཚུགས་ཏེ་ཕྱི་ལོ་༢༠༡༧ བར་བཙན་བྱོལ་བོད་མིའི་སློབ་གྲྭ་ཁག་གི་གཞི་རིམ་འོག་མ་ནས་གཞི་རིམ་གོང་མ་བར་གྱི་བོད་སྐད་ཡིག་སློབ་དེབ་ཆ་ཚང་རྩོམ་སྒྲིག་དང་གཏན་འབེབས་གྲུབ་ནས་ད་ལྟ་སློབ་གྲྭ་ཁག་ཏུ་དངོས་སུ་སློབ་འཁྲིད་ལག་ལེན་འགྲོ་བཞིན་ཡོད་པ་ལྟར། འདི་གའི་གསར་འགོད་པས་བོད་མིའི་སྒྲིག་འཛུགས་ཤེས་རིག་ཤེས་ཡོན་ལྷན་ཚོགས་ཀྱི་བོད་ཡིག་སློབ་དེབ་རྩོམ་སྒྲིག་པ་དགེ་འདུན་དོན་ཡོད་ལགས་སུ་གཞི་རིམ་བར་མ་དང་གོང་མའི་སློབ་དེབ་གསར་བའི་སྐོར་ལ་བཅར་འདྲི་དང་རྒྱུས་ལོན་བྱས་ཡོད།
གཞི་རིམ་འཛིན་གྲྭ་བར་མ་དང་གོང་མའི་སློབ་དེབ་བསྐྱར་ཞིབ་དང་གསར་བཟོ་བྱེད་སྟངས་སོགས་སྤྱི་ཡོངས་ཀྱི་ངོ་སྤྲོད་སྐོར་ལ་ཁོང་གིས་འདི་ལྟར་བརྗོད་བྱུང་། ཕྱི་ལོ་ ༢༠༠༨ ལོར་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཀྱི་དགོངས་དོན་འོག་ནས་གཞི་རིམ་འོག་མའི་བསླབ་གཞིའི་རྩ་འཛིན་དང་། ཕྱི་ལོ་༢༠༡༠ ལོར་གཞི་རིམ་བར་མའི་བསླབ་གཞིའི་རྩ་འཛིན་གཏན་འབེབས་གནང་ཡོད་པ་རེད། གཞི་རིམ་གོང་མར་མཚོན་ན་རྒྱ་གར་རྒྱལ་ཡོངས་དབུས་འབྲིང་རིམ་ཤེས་ཡོན་ལྷན་ཚོགས་ཀྱི་བསླབ་གཞིའི་རྩ་འཛིན་གཏན་འབེབས་གཞིར་བཟུང་འགྲོ་དགོས་པ་མ་གཏོགས་ཤེས་རིག་ལས་ཁུངས་ངོས་ནས་གཏན་འབེབས་བྱེད་རྒྱུའི་རང་དབང་ཡོད་པ་མ་རེད། ཡིན་ན་ཡང་། ཕྱི་ལོ་༢༠༡༠ ལོ་ནས་༢༠༡༧ ལོ་བར་བཙན་བྱོལ་བོད་མིའི་སློབ་གྲྭ་ཁག་གི་སྔོན་འགྲོ་ནས་འཛིན་གྲྭ་བཅུ་གཉིས་བར་བོད་ཀྱི་སྐད་ཡིག་སློབ་དེབ་ཚང་མ་བསྐྱར་ཞིབ་དང་གཏན་འབེབས་གནང་ཚར་ནས་ལག་ལེན་བསྟར་བཞིན་ཡོད་པ་རེད། གཞི་རིམ་བར་མ་ལ་མཚོན་ན་ཕྱི་ལོ ༢༠༡༠ ནས་བསྐྱར་ཞིབ་མགོ་ཚུགས་ཏེ་ཕྱི་ལོ་༢༠༡༢ ལོའི་སློབ་སྐབས་ལ་དངོས་སུ་ལག་བསྟར་བྱས་ཡོད་པ་རེད་ལ། སློབ་དེབ་དེའི་ནང་བསླབ་བྱའི་སྡེ་ཚན་དང་། བརྡ་སྤྲོད་ཀྱི་སྡེ་ཚན། རྩོམ་རིག་གི་སྡེ་ཚན། ལག་ལེན་གྱི་སྡེ་ཚན། གོ་རྟོགས་སྡེ་ཚན། གཞོགས་འདེགས་ཀྱི་སྡེ་ཚན་བཅས་སྡེ་ཚན་དྲུག་དང་། ཟུར་བཀོད་དག་ཡིག་དང་། སུམ་ཅུ་པའི་རྩ་ཚིག་དེ་འདྲ་བཞག་ཡོད་པ་རེད། གཞི་རིམ་གོང་མ་ལ་མཚོན་ན་ཕྱི་ལོ་༢༠༡༢ ལོ་ནས་བསྐྱར་ཞིབ་གྲ་སྒྲིག་བྱས་ན་ཡང་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་(CBSE)ངོས་ནས་བསླབ་གཞིའི་རྩ་འཛིན་གཏན་འབེབས་མ་བྱས་པ་ཡིན་ན་ཐབས་ཤེས་གང་ཡང་མེད་པ་ཡིན་པས། ཕྱི་ལོ་༢༠༡༦ ལོར་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱིས་བསླབ་གཞི་གཏན་འབེབས་གནང་ནས་དྲ་རྒྱའི་སྟེང་བཞག་པ་དང་ང་ཚོས་ངོས་ནས་སྔོན་ནས་གྲ་སྒྲིག་ཡོད་པ་ལྟར། ཕྱི་ལོ་ ༢༠༡༧ ལོ་ནས་གཞི་རིམ་གོང་མའི་སློབ་དེབ་གསར་པ་དེ་མགོ་འཛུགས་ཐུབ་ཡོད་པ་རེད། རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱི་བསླབ་གཞིའི་རྩ་འཛིན་ལ་མཚོན་ན་སྡེ་ཚན་བཞི་ཡོད་པ་དང་། ཁོ་ཚོའི་སྡེ་ཚན་དང་པོའི་ནང་དུ་བརྡ་སྤྲོད། སྡེ་ཚན་གཉིས་པ་གོ་རྟོགས་ནུས་རྩལ། སྡེ་ཚན་གསུམ་པ་རྒྱུན་སྤྱོད་ཡིག་རིགས་དང་། རྩོམ་རིག སྡེ་ཚན་བཞི་པར་ལྷུག་རྩོམ་དང་། ཟློས་གར། སྙན་ངག དེ་བཞིན་མྱུར་ཀློག་རྩལ་སྦྱོང་བཅས་རེད་འདུག གཞི་རིམ་གོང་མའི་སློབ་དེབ་ལག་བསྟར་བྱས་ནས་ད་ལྟ་ལོ་གཅིག་ཙམ་འགྲོ་བཞིན་ཡོད་པ་རེད། དང་ཐོག་ཤེས་ཡོན་ལྷན་ཚོགས་ཀྱི་ངོས་ནས་སློབ་དེབ་ཚང་མ་ལོ་གསུམ་རེའི་མཚམས་སུ་བསྐྱར་ཞིབ་བྱེད་ཐུབ་པའི་དམིགས་ཡུལ་བཟུང་བ་རེད། ཡིན་ན་ཡང་། སློབ་དེབ་ཆ་ཚང་ལ་བསྐྱར་ཞིབ་བྱས་ཡོང་དུས་ལོ་གསུམ་རེའི་ནང་ལ་བསྐྱར་ཞིབ་བྱེད་རྒྱུ་དེ་དཀའ་ལས་ཁག་པོ་ཡིན་དུས་ལོ་ལྔ་རེའི་ནང་བསྐྱར་ཞིབ་བྱེད་རྒྱུའི་འབད་བརྩོན་བྱས་པ་རེད། གཞི་རིམ་བར་མ་ལྟ་བུར་མཚོན་ན་ཕྱི་ལོ་༢༠༡༢ ལོ་ནས་སློབ་དེབ་འགྲེམས་སྤེལ་དང་ལག་བསྟར་བྱས་ཏེ་ད་ལྟ་བར་དུ་ལོ་ལྔ་འགྲོ་བཞིན་ཡོད་སྟབས། ན་ནིང་ནས་གཞི་རིམ་བར་མའི་སློབ་དེབ་བསྐྱར་ཞིབ་བྱེད་མགོ་ཚུགས་ཡོད་པ་རེད། སྔོན་ཆད་ཡིན་ན་ཅུང་ཙམ་ཛ་དྲག་གི་རྣམ་པའི་སྟེང་ནས་བྱེད་ཀྱི་ཡོད་ན་ཡང་ད་ལོ་ནས་རིམ་པ་བཞིན་འཛིན་རིམ་དྲུག་པའི་སློབ་དེབ་བསྐྱར་ཞིབ་བྱས་ཚར་བ་དང་ཕྱི་ལོ་༢༠༡༩ ལོར་ལག་བསྟར་བྱ་རྒྱུ་དང་། ཕྱི་ལོ་༢༠༡༩ ལོར་འཛིན་རིམ་བདུན་པའི་སློབ་དེབ་གཏན་འབེབས་ཀྱིས་ཕྱི་ལོ་༢༠༢༠ ལོ་ལག་བསྟར་བྱ་རྒྱུ། ཕྱི་ལོ་༢༠༢༠ ལོར་འཛིན་བརྒྱད་པ་གཏན་འབེབས་ཀྱིས་ཕྱི་ལོ་༢༠༢༡ ལ་ལག་ལེན་བསྟར་ཐུབ་པའི་ལས་རིམ་འགྲོ་བཞིན་ཡོད་པ་རེད།

ཡང་ཁོང་ལ་སློབ་དེབ་གསར་པ་བཟོ་སྐབས་གཞི་གང་ལ་བཞག་ནས་བཟོ་བཞིན་ཡོད་པ་དང་དེ་དག་འགྲིག་མིན་གྱི་བགྲོ་གླེང་གྲོས་སྡུར་སོགས་སུ་དང་སུ་ཡི་མཉམ་དུ་གནང་གི་ཡོད་པ་དང་། མཐའ་མའི་ཐག་གཅོད་དེ་ག་འདྲ་གནང་གི་ཡོད་མེད་སྐོར་དྲིས་པར། སློབ་དེབ་ཁག་བསྐྱར་ཞིབ་དང་གསར་བཟོ་བྱེད་སྐབས་གཞི་འཛིན་ས་གཙོ་བོ་ཤེས་ཡོན་སྲིད་བྱུས་ཀྱི་དགོངས་དོན་འོག་ནས་གཏན་ལ་ཕབ་པའི་བསླབ་གཞིའི་རྩ་འཛིན་ལ་གཞི་འཇོག་གི་ཡོད་པ་རེད། བསླབ་གཞིའི་རྩ་འཛིན་ནང་དུ་གཞི་རིམ་སློབ་གྲྭའི་སྔོན་འགྲོ་འཛིན་གྲྭ་ནས་གཞི་རིམ་གོང་མའི་འཛིན་གྲྭ་བར་སློབ་ཚན་འདི་འདྲ་ཞིག་བསླབས་ཏེ་སློབ་མའི་ཤེས་ཚད་འདི་འདྲ་ཞིག་ཡོང་དགོས་ཞེས་ཚད་གཞི་ཞིག་གཏན་འབེབས་བྱས་ཡོད་སྟབས། བསླབ་གཞིའི་རྩ་འཛིན་དེའི་འོག་ནས་སློབ་དེབ་ག་རེ་ཡིན་ན་བཟོ་ཆོག་གི་ཡོད་པ་རེད། དཔེར་ན། ས་གནས་མ་འདྲ་ཡིན་དུས་ཁོར་ཡུག་གི་གནས་སྟངས་མ་འདྲ་བ་དང་། སློབ་མའི་ཤེས་ཚད་མི་འདྲ་བ་ཡོང་གི་ཡོད་པ་ལྟར། ས་གནས་སོ་སོ་ནས་བསླབ་གཞིའི་རྩ་འཛིན་དེར་གཞི་བཞག་ནས་སློབ་དེབ་སྒྲིག་ན་འགྲིག་གི་ཡོད་པ་རེད། ད་ལྟའི་གཞི་རིམ་བར་མའི་བསླབ་གཞིའི་རྩ་འཛིན་དེ་ཤེས་ཡོན་ལྷན་ཚོགས་ཀྱིས་བསྒྲིགས་ནས་ཕྱི་ལོ་༢༠༡༠ ལོར་བཀའ་ཤག་གི་མཐའ་མའི་གཏན་འབེབས་གནང་བ་དེ་དང་། འཛིན་རིམ་དགུ་པ་ནས་བཅུ་གཉིས་བར་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱིས་གཏན་འབེབས་གནང་བའི་གཞི་རིམ་གོང་མའི་བསླབ་གཞིའི་རྩ་འཛིན་གཉིས་ལ་གཞིར་བཟུང་ནས། འཁྲིད་བཞིན་པའི་སློབ་དེབ་ལ་སློབ་གྲྭ་ཁག་གི་གཞི་རིམ་བར་མ་དང་གོང་མའི་དགེ་རྒན་ཚོའི་བསམ་ཚུལ་སྡུད་ལེན་བྱས་ཏེ། གཞི་རིམ་གོང་མ་དང་བར་མའི་དགེ་རྒན་ལས་གྲུབ་པའི་སློབ་དེབ་བསྐྱར་ཞིབ་ཚོགས་ཆུང་འཛུགས་ཀྱི་ཡོད་པ་དང་། ཚོགས་ཆུང་དེའི་སློབ་དེབ་ལ་བསྐྱར་ཞིབ་དང་། སློབ་གྲྭ་ཁག་གི་དགེ་རྒན་ཚོའི་བསམ་ཚུལ་གཞི་ལ་བཞག་ནས་གོ་བསྡུར་སྦྱངས་བཤད་ཀྱིས་སློབ་དེབ་ཀྱི་དཀར་ཆག་སྒྲིག་གི་ཡོད་པ་རེད། དཀར་ཆག་བསྒྲིགས་རྗེས་སློབ་དེབ་རྩོམ་སྒྲིག་པའི་སྔོན་མའི་སློབ་དེབ་རྙིང་པ་དང་བོད་ནང་གི་སློབ་དེབ་སོགས་མང་པོ་ཞིག་དཔྱད་གཞིར་བཟུང་ནས་སློབ་དེབ་རགས་ཟིན་ཞིག་སྒྲིག་གི་ཡོད་པ་རེད། རགས་ཟིན་དེ་ཚར་བ་དང་སློབ་དེབ་བསྐྱར་ཞིབ་ཚོགས་ཆུང་གི་ཚོགས་མི་ཚོར་བཏང་སྟེ་ཚོགས་མི་ཚོས་སོ་སོའི་ས་གནས་ཀྱི་འབྲེལ་ཡོད་དགེ་རྒན་དང་གོ་བསྡུར་བྱེད་ཀྱི་ཡོད་པ་རེད་ལ། ཚོགས་མི་ཁ་ཤས་ཀྱིས་སློབ་ཕྲུག་ཚོར་འཚམས་མིན་གྱི་ཚོད་ལྟ་བྱས་ནས་ནོར་འཁྲུལ་དང་བཅོས་དགོས་པ་ག་རེ་ཡོད་པ་སོགས་ཞུ་དག་དང་། བསམ་ཚུལ་ཡར་བཏང་བ་དེ་སློབ་དེབ་རྩོམ་སྒྲིག་པས་བསྐྱར་དུ་འཇུག་སྒྲིག་ཟིན་རྗེས། སློབ་དེབ་བསྐྱར་ཞིབ་ཚོགས་ཆུང་ཚོགས་འདུ་སྐོང་ནས་སློབ་ཚན་རེ་རེ་དང་སྦྱོང་ཚན་རེ་རེའི་སྟེང་གོ་བསྡུར་སྦྱང་བཤད་ཀྱིས་སྣོན་འཕྲི་ཅི་དགོས་བྱས་ཏེ་མཐའ་མའི་གཏན་འབེབས་བྱེད་ཀྱི་ཡོད་པ་རེད། གློ་འདྲི་ས་གཙོ་བོ་དེ་ཤེས་ཡོན་ལྷན་ཚོགས་ཀྱི་འགན་འཛིན་དང་སློབ་དེབ་བསྐྱར་ཞིབ་ཚོགས་མི་རྣམས་ལ་ལམ་སྟོན་ཞུ་བཞིན་ཡོད་པ་རེད། བོད་ཡིག་སློབ་དེབ་བསྐྱར་ཞིབ་ཚོགས་ཆུང་གི་ཚོགས་མིའི་ནང་དུ་བཙན་བྱོལ་ནང་གི་སམ་བྷོ་ཊ་བོད་སློབ་དང་། བོད་ཁྱིམ་གཉིས། དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་ནས་ཡོང་གི་ཡོད་ན་ཡང་། བལ་ཡུལ་གངས་ཅན་བདེ་རྩའི་ཁྱབ་ཁོངས་སློབ་གྲྭ་ནས་ཡོང་ཐུབ་ཀྱི་མེད། བསྐྱར་ཞིབ་ཚོགས་མི་ནང་ལ་སློབ་གྲྭ་ཁག་གི་དགེ་རྒན་ལས་སྤྱི་ཚོགས་ཐོག་གི་ཤེས་ཡོན་པ་དེ་འདྲ་ད་ལྟ་བར་དུ་ཚོགས་མི་ནང་བསྐོ་མྱོང་མེད། གཞི་རིམ་འོག་མའི་སློབ་དེབ་བསྐྱར་ཞིབ་ཚོགས་ཆུང་ལ་མཚོན་ན་སྣ་འཛོམས་ཤིག་བྱུང་ཡོད། དཔེར་ན། དེའི་ནང་ལ་སློབ་གྲྭ་ཁག་གི་དགེ་རྒན་སྟེང་གྲྭ་སའི་སློབ་གྲྭའི་དགེ་རྒན་གཅིག་དང་། བཙུན་མའི་སློབ་གྲྭའི་དགེ་རྒན་གཅིག་བསྐོ་བཞག་བྱས་ཡོད། སྤྱིའི་ཆ་ནས་སློབ་དེབ་གཏན་འབེབས་བྱེད་སྟངས་ཀྱི་རིམ་པ་དེ་འདྲ་ཞིག་རེད། ཅེས་དང་།

གཞན་ཡང་གཞི་རིམ་བར་མ་དང་གོང་མའི་སློབ་དེབ་ཁྲོད་སློབ་ཚན་གཙོ་བོ་ག་རེ་བཞག་ཡོད་མེད་དང་ཐེངས་འདིའི་སློབ་དེབ་གསར་པ་དེར་དམིགས་བསལ་ཁྱད་ཆོས་ག་རེ་ཡོད་མེད་སྐོར་ལ་ཁོང་གིས། ཐེངས་འདིའི་སློབ་དེབ་གསར་པར་མཚོན་ན་དམིགས་བསལ་ཁྱད་ཆོས་དེ་སྐད་ཡིག་རང་གི་སྟེང་ལ་འབད་བརྩོན་བྱས་ཡོད་པ་རེད། སྔོན་ཆད་ཡིན་ན་གཞི་རིམ་བར་མའི་སློབ་དེབ་ལ་རིགས་ལམ་དང་ནང་ཆོས། རྒྱལ་རབས་དང་ཆོས་འབྱུང་། སྐད་ཡིག་བཅས་སློབ་དེབ་གསུམ་ཡོད་པ་རེད། དེའི་རྗེས་ཕྱི་ལོ་༢༠༠༠ ལོ་བསྐྱར་ཞིབ་བྱས་ཏེ་སློབ་དེབ་གཉིས་བཟོས་པ་རེད། རིགས་ལམ་ནང་ཆོས་དང་རྒྱལ་རབས་ཆོས་འབྱུང་ལ་སློབ་དེབ་གཅིག་དང་། སྐད་ཡིག་ལ་སློབ་དེབ་གཅིག་བཅས་བཟོས་ཡོད་པ་རེད། ཕྱི་ལོ་༢༠༡༠ ལོར་བསླབ་གཞིའི་རྩ་འཛིན་གཏན་འབེབས་བྱས་རྗེས་སྐད་ཡིག་སྐད་ཡིག་རང་གི་ངོ་བོར་འཇོག་རྒྱུའི་འབད་བརྩོན་བྱས་པ་རེད། སྐད་ཡིག་སློབ་དེབ་ནང་བརྡ་སྤྲོད་དང་རྩོམ་རིག་གི་སྐོར་མང་དུ་བཏང་ཡོད་པ་རེད། དེ་བཞིན་གཞི་རིམ་གོང་མ་ལ་མཚོན་ན་དེ་བཞིན་རེད་ལ་འཛིན་གྲྭ་བཅུ་པ་དང་བཅུ་གཉིས་ཀྱི་སློབ་དེབ་ནང་དགོས་མཁོ་ཞིག་གིས་ནང་ཆོས་ཀྱི་སློབ་ཚན་རེ་ཟུང་བཅུག་ཡོད་པ་རེད། དེ་མ་གཏོགས་བསླབ་བྱའི་སྡེ་ཚན་དེ་མ་གཏོགས་སྐད་ཡིག་རང་གི་ཆ་དེ་ཤུགས་ཆེན་པོ་བཞག་ཡོད་པ་རེད། དམིགས་བསལ་ཁྱད་ཆོས་ཟེར་ན་རེད་སྐད་ཡིག་ཅིག་སྦྱང་དགོས་ན་འབྲི་ཀློག་ཉན་གསུམ་དེ་གཙོ་བོ་རེད། ང་ཚོས་སློབ་དེབ་ནང་དུ་འབྲི་ཀློག་གི་སྐོར་ལ་གཙོ་བོ་ཤུགས་སྣོན་བརྒྱབ་ཡོད་པ་རེད། སྦྱོང་བརྡར་གྱི་ཆ་དེ་ཡང་རྩོམ་འབྲི་རྒྱུ་དང་ཀློག་རྩལ་ཡར་རྒྱས་གཏོང་ཐབས་སུ་དམིགས་ནས་བཞག་ཡོད་པ་རེད། ཅེས་བརྗོད་བྱུང་།

སློབ་དེབ་གསར་བ་དེ་གཏན་འབེབས་གནང་རྗེས་དངོས་སུ་ལག་བསྟར་བྱེད་མཁན་དེ་དགེ་རྒན་ཚོ་ཆགས་ཡོད་དུས། དགེ་རྒན་ཚོས་ངོས་ནས་སློབ་དེབ་གསར་བ་དེར་དགོངས་ཚུལ་ག་རེ་ཡོང་གི་ཡོད་མེད་སྐོར་ལ་ཁོང་གིས། དགེ་རྒན་ཚོར་མཚོན་ན་སློབ་དེབ་གསར་པ་དེར་དགའ་སྣང་དང་ཆ་འཇོག་བྱེད་ཀྱི་འདུག དགེ་རྒན་ཚོས་ངོས་ནས་སྔོན་མའི་སློབ་དེབ་དང་མི་འདྲ་བར་སྡེ་ཚན་ལོགས་སུ་དབྱེ་ཡོད་པ་དང་། སྡེ་ཚན་རེ་རེའི་གོང་ལ་སློབ་ཚན་དེ་འཁྲིད་ན་ག་འདྲ་འཁྲིད་དགོས་པའི་ཁ་ཕྱོགས་དང་ལམ་སྟོན་ཞིག་བཞག་ཡོད་པ་རེད། དེ་ཡིས་དགེ་རྒན་ཚོས་སློབ་འཁྲིད་སྐབས་ཁ་ཕྱོགས་དང་དམིགས་ཡུལ་ཤེས་ཐུབ་པའི་ཕན་ཐོགས་ཡོད་སྐོར་བརྗོད་ཀྱི་འདུག དེ་བཞིན་ཁོ་ཚོས་ངོས་ནས་བསམ་ཚུལ་གཙོ་བོ་ཞིག་སློབ་དེབ་ནང་གི་སློབ་ཚན་མང་དྲགས་འདུག་ཅེས་ཡོང་གི་འདུག སློབ་ཚན་མང་དྲགས་པ་དེ་ཡང་གནས་སྟངས་ཤིག་གི་འོག་ནས་ཡོང་གི་ཡོད་པ་རེད། ཡིན་ན་ཡང་། སློབ་དེབ་དེ་སྐད་ཡིག་རྐྱང་པ་རང་གི་ངོས་ནས་འཁྲིད་པ་ཡིན་ན་རྐྱང་སྐུམ་བྱས་ཆོག་པ་དང་། ཚད་དང་ལྡན་པ་ཞིག་ཡོད་པ་རེད། ང་ཚོར་དཀའ་ངལ་ཞིག་ཡོད་པ་དེ། དཔེར་ན། དབུས་བོད་སློབ་འཛིན་ཚོགས་ལྟ་བུ་ཡིན་ན་སྤྱི་ཚོགས་རིག་གནས་འཁྲིད་སྐབས་བོད་པའི་ལོ་རྒྱུས་དེ་འཁྲིད་ཐུབ་ཀྱི་མེད་པས། སྐད་ཡིག་སློབ་དེབ་གསར་པ་དེའི་སྟེང་ལ་སྔོན་མའི་རྒྱལ་རབས་ཆོས་འབྱུང་གི་སློབ་དེབ་རྙིང་པ་དེ་བསྣན་ནས་སློབ་དེབ་གཉིས་ཀ་སྐད་ཡིག་དགེ་རྒན་གཅིག་གིས་འཁྲིད་དགོས་བྱུང་གི་ཡོད་པ་རེད། དེ་ཡིན་དུས་དགེ་རྒན་ཚོས་སློབ་ཚན་མ་ཚར་བའི་དཀའ་ངལ་སོགས་ཀྱི་བསམ་ཚུལ་རེ་སླེབས་སོང་། ང་ཚོས་ད་ལོ་བསྐྱར་ཞིབ་སྐབས་གཞི་རིམ་བར་མ་དང་གཞི་རིམ་གོང་མ་གཉིས་ཀྱི་སློབ་དེབ་ནང་གི་རྩོམ་རིག་སློབ་ཚན་ལ་གཞི་རིམ་བར་མའི་སློབ་དེབ་ནང་སློབ་ཚན་མང་བ་ཞིག་ཆགས་འདུག་པས། ད་ལོ་ནས་ང་ཚོས་བསྐྱར་ཞིབ་བྱས་ཏེ་གཞི་རིམ་བར་མའི་འཛིན་རིམ་དྲུག་པའི་སློབ་དེབ་ནང་རྩོམ་རིག་ལ་ཇི་བཞིན་བརྗོད་པའི་རྩོམ་ཡིག་དང་། འཛིན་རིམ་བདུན་པ་ལ་གསལ་བཤད་རྩོམ་ཡིག འཛིན་རིམ་བརྒྱད་པ་བསྡུས་བརྗོད་བཅས་གོ་རིམ་སྒྲིག་རྒྱུ་བྱས་ཡོད། མ་གཞི་སློབ་དེབ་རྩོམ་སྒྲིག་པས་དགེ་རྒན་ཚོར་སློབ་ཚན་དགོས་དམིགས་དང་སློབ་འཁྲིད་བྱེད་སྟངས་ངོ་སྤྲོད་བྱེད་ཀྱི་ཡོད་པ་རེད་ལ། གཞི་རིམ་འོག་མའི་སློབ་དེབ་ལ་མཚོན་ན་དགེ་རྒན་ཚང་མར་རྩོམ་སྒྲིག་བྱེད་སྟངས་དང་སློབ་ཚན་གྱི་དགོས་དམིགས་རྣམས་ངོ་སྤྲོད་ཀྱི་རྒྱུས་སྟོན་ཟབ་སྦྱོང་ཕུལ་ཡོད་པ་རེད། ཅེས་བརྗོད་བྱུང་།

དེ་བཞིན་སློབ་དེབ་གསར་བའི་ནང་གི་སློབ་ཚན་ལ་སློབ་ཕྲུག་ཚོས་དགའ་མོས་དང་སློབ་ཕྲུག་གི་ཕ་མ་ཚོའི་ངོས་ནས་སློབ་དེབ་གསར་བའི་ཐད་བསམ་ཚུལ་ག་རེ་འདོན་གྱི་ཡོད་མེད་སྐོར་ལ། གཞི་རིམ་འོག་མའི་སློབ་དེབ་ལ་མཚོན་ན་སློབ་དེབ་ནང་དུ་རི་མོ་སོགས་མང་པོ་ཡོད་དུས་སློབ་ཕྲུག་ཚོས་དགའ་སྣང་བྱེད་ཀྱི་འདུག ཡིན་ན་ཡང་། འཛིན་གྲྭ་དྲུག་པ་བདུན་པ་རིམ་པ་བྱས་ཏེ་འགྲོ་སྐབས་སློབ་ཕྲུག་ཚོས་བོད་ཡིག་ལ་དོ་སྣང་ཆུང་དུ་འགྲོ་བཞིན་པ་དེ་དངོས་ཡོད་གནས་སྟངས་ཤིག་ཆགས་བསྡད་ཡོད་པ་རེད། གཅིག་ནས་སློབ་ཕྲུག་ཚོ་འཛིན་རིམ་ཡར་སླེབས་པ་དང་ཁོ་རང་གི་ཆེད་སྦྱོང་སློབ་ཚན་ལ་ཤུགས་སྣོན་རྒྱག་དགོས་པས་རེད་འདུག སྤྱིར་བཏང་སློབ་ཕྲུག་ཚོ་སློབ་ཚན་དེར་དགའ་མོས་བྱུང་མིན་གཙོ་བོ་དེ་དགེ་རྒན་ལ་རག་ལས་འདུག་བསམ་ཡོད། དགེ་རྒན་ཚོས་སློབ་འཁྲིད་སྐབས་སློབ་ཕྲུག་ཚོའི་གོ་བདེ་བོ་དང་སེམས་ལ་འཇུག་པོ་བྱུང་བ་ཡིན་ན། རང་བཞིན་གྱིས་སློབ་ཚན་དེ་ལ་དགའ་སྣང་ཡོང་བ་ཞིག་རེད། གལ་ཏེ་དགེ་རྒན་དེའི་སློབ་འཁྲིད་སྐབས་སློབ་ཕྲུག་གི་སེམས་ལ་བབ་པོ་དང་གོ་བ་ཏག་ཏག་ལེན་མ་ཐུབ་པ་སོགས་བྱུང་བ་ཡིན་ན་སློབ་ཕྲུག་དེ་རང་བཞིན་གྱིས་སློབ་ཚན་དེར་ཉོབ་སྣང་སྐྱེས་པ་ཞིག་ཆགས་ཀྱི་ཡོད་པ་རེད། དགེ་རྒན་ཁ་ཤས་ཀྱིས་བཤད་པ་ལྟར་ན་སློབ་དེབ་གསར་བ་དེར་སློབ་ཕྲུག་ཚོས་དགའ་སྣང་བྱེད་ཀྱི་འདུག་ཟེར་བ་མ་གཏོགས་ང་ཚོས་ངོས་ནས་དམིགས་བསལ་སློབ་ཕྲུག་ཚོར་བསམ་ཚུལ་བསྡུ་ལེན་སོགས་བྱས་མེད། དེ་མིན་ཕ་མ་ཚོས་ངོས་ནས་ད་སྔ་བསམ་ཚུལ་སོགས་འདོན་མཁན་བྱུང་མ་སོང་ལ་། སྤྱིར་བོད་པའི་སྤྱི་ཚོགས་ནང་ཕ་མ་ཚོས་རང་ཉིད་ཀྱི་ལྟོ་གོས་འགྲིག་ཙམ་བྱུང་དུས་བུ་ཕྲུག་གི་སློབ་གསོའི་ཕྱོགས་ལ་དོ་སྣང་མི་བྱེད་པ་དང་། བུ་ཕྲུག་སློབ་གྲྭར་བསྐྱལ་བ་ཙམ་ལས་བུ་ཕྲུག་གི་ཤེས་ཡོན་སློབ་གསོའི་སྒང་ལ་འགན་འཁུར་མེད་པའི་སྣང་ཚུལ་ཤུགས་ཆེན་ཡོད་པ་རེད། ཅེས་དང་།

ཡང་ཁོང་གིས་བོད་མིའི་སྒྲིག་འཛུགས་ཀྱི་ཤེས་ཡོན་སྲིད་བྱུས་དང་དེང་དུས་ཀྱི་སྤྱི་ཚོགས་དགོས་མཁོར་གཟིགས་ཏེ། སློབ་དེབ་གསར་པའི་ནང་དུ་སློབ་མའི་ཀུན་སྤྱོད་སློབ་གསོ་ཡར་སྤེལ་ཐད་དམིགས་བསལ་བཀོད་སྒྲིག་ག་རེ་གནང་ཡོད་མེད་སྐོར་ལ། སྤྱིར་བཏང་སྐད་ཡིག་སློབ་དེབ་ཅིག་ཡིན་ན་དམིགས་ཡུལ་གཙོ་བོ་དེ་སློབ་མའི་སྐད་ཡིག་གི་ནུས་རྩལ་ཡར་རྒྱས་ཆེད་དམིགས་ཀྱི་ཡོད་པ་རེད། དེ་བཞིན་ཀུན་སྤྱོད་ཐད་ལ་གཞི་རིམ་བར་མ་ལ་མཚོན་ན་བསླབ་བྱའི་སྡེ་ཚན་ཞེས་དམིགས་བསལ་སློབ་ཚན་བཞག་ཡོད་པ་རེད། གཞི་རིམ་གོང་མར་མཚོན་ན་བསླབ་བྱའི་ངོ་བོ་མཚོན་པའི་སློབ་ཚན་ལ་བསླབ་བྱ་མུ་ཐི་ལའི་ཕྲེང་བ་དང་། གཏམ་པདྨའི་ཚལ་གྱི་ཟློས་གར། རི་དྭགས་ཀྱི་གཏམ་ངེས་འབྱུང་གི་ཕོ་ཉ་སོགས་བཞག་ཡོད་པ་རེད། སྤྱི་ཡོངས་ནས་སློབ་ཚན་གྱི་བརྗོད་བྱ་ནང་དུ་གོ་བ་ལེན་སྟངས་དང་ལྟ་སྟངས་མ་འདྲ་བའི་སྟེང་ནས་བསླབ་བྱ་ལོག་པ་དེ་འདྲ་ཤོར་ཡོད་ན་ལས་སློབ་ཕྲུག་གི་རྒྱུད་ལ་ཤུགས་རྐྱེན་ངན་པ་མི་ཐེབས་པ་དང། ཤེས་ཡོན་སྲིད་བྱུས་ཀྱི་དགོངས་དོན་གཞིར་བཟུང་སློབ་མའི་ཀུན་སྤྱོད་དང་སེམས་ཁམས་ལ་མི་གནོད་པའི་ཐབས་ཤེས་གང་ཐུབ་ཐུབ་འབད་བརྩོན་བྱས་ཡོད་པ་རེད། ཅེས་བརྗོད་བྱུང་།

མཐའ་མ་དེར་སྤྱི་ཚོགས་ནང་གཞི་རིམ་སློབ་གྲྭ་ཁག་གི་སློབ་མའི་སྐད་ཡིག་ནུས་རྩལ་ཞན་པོ་ཡོད་པའི་དཀའ་ངལ་ཞིག་ཡོད་པ་ལྟར། གནད་དོན་དེའི་རྒྱུ་རྐྱེན་གཙོ་བོ་གང་ལ་ཐུག་པ་རེད་དགོངས་ཀྱི་ཡོད་མེད་དང་མ་འོངས་པར་ཡར་རྒྱས་གཏོང་ཐབས་སུ་འཆར་གཞི་ག་རེ་ཡོད་མེད་སྐོར་ལ་ཁོང་གིས། གཙོ་བོ་སློབ་མའི་གྲུབ་འབྲས་ག་འདྲ་བྱུང་གི་ཡོད་མེད་ལོ་རེའི་གྲུབ་འབྲས་རེའུ་མིག་ལ་ལྟ་བཞིན་ཡོད་པ་རེད། སྤྱིར་བཏང་སློབ་མའི་སྐད་ཡིག་ཡར་རྒྱས་མི་འགྲོ་བའི་སྐོར་ལ་རྒྱུ་རྐྱེན་མང་པོ་ཞིག་ཡོད་ན་ཡང་། གཙོ་བོ་སྤྱི་ཚོགས་དང་། དགེ་རྒན། ཕ་མ་བཅས་ཕྱོགས་གསུམ་ནས་ཡོང་གི་ཡོད་པ་རེད་བསམ་གྱི་ཡོད། སྤྱི་ཚོགས་ལ་མཚོན་ན་བོད་ཡིག་རྐྱང་པ་ཞིག་སྦྱངས་ནས་ཡོང་ན་དེ་ལ་ལམ་ཁ་དང་མཐོང་དེ་ཙམ་མེད་པ་རེད། གཉིས་པ་དེ་དགེ་རྒན་ཚོས་སློབ་འཁྲིད་བྱེད་སྟངས་ལ་ཐུག་ཡོད་པ་རེད་བསམ་ཡོད། དེང་སང་དེ་འདྲ་ཡོད་མེད་མི་ཤེས་མོད། སྔོན་མ་ཡིན་ན་དགེ་རྒན་ཚོས་ཡིག་ཚད་གཏོང་ལ་ཉེ་སྐབས་དྲི་བ་ཁག་ཅིག་བཟོས་ནས་དེ་སྦྱོང་བཅུག་སྟེ་ཡིག་ཚད་འཕྲོད་ཐབས་བྱེད་བཞིན་པ་ལས་སློབ་མའི་སྐད་ཡིག་གི་ཤེས་ཚད་ཡར་རྒྱས་འགྲོ་ཐབས་ལ་བསམ་བློ་གཏོང་གི་མེད་པ་དེ་འདྲ་ཡོད་པ་རེད། གསུམ་པ་དེ་ཕ་མ་ཚོས་སློབ་གསོ་ལ་ཁྱད་པར་འགྲོ་ཡི་ཡོད་པ་རེད་བསམ་ཡོད། སྤྱིར་ང་ཚོ་བཙན་བྱོལ་ནང་སྐད་ཡིག་གཞན་པ་དེ་ཤུགས་ཆེན་པོ་སྦྱོང་དགོས་པའི་བག་ཆགས་ཤིག་ཡོད་པ་ལྟར་དེ་འདྲ་ཞིག་གིས་མིན་ནམ་བསམ་ཡོད། དེ་བཞིན་མ་འོངས་པར་ཡར་རྒྱས་གཏོང་ཕྱོགས་སྐོར་ལ་ཤེས་རིག་ལས་ཁུངས་ངོས་ནས་གཞི་རིམ་འོག་མ་ནས་རྨང་གཞི་ཡག་པོ་ཞིག་འདིང་ཐུབ་པ་ལ་ཤུགས་སྣོན་བརྒྱག་གི་ཡོད་པ་རེད། ལས་རིམ་དེ་ལོ་ཁ་ཤས་སྔོན་ནས་མགོ་བརྩམས་པ་རེད། སློབ་ཕྲུག་གི་མཐོང་སར་དེབ་ཡོད་ན་ཀློག་རྒྱུར་ཕན་ཐོགས་ཡོད་སྟབས། འཛིན་གྲྭའི་དཔེ་མཛོད་བཙུགས་ནས་དཔེ་མཛོད་ནང་དུ་སོན་རྩ་བྱིས་པའི་དེབ་ཕྲེང་དང་། བོད་སྒྱུར་བྱས་པའི་བྱིས་སྒྲུང་དེབ་མང་པོ་ཞིག། ཤེས་རིག་རྩོམ་སྒྲིག་ཚན་པ་ནས་འདོན་སྤེལ་བྱས་པའི་གངས་ལྗོངས་དང་། གླིང་སྒྲུང་། ཕ་ཡུལ་ཕྱོགས་བསྒྲིགས་དེབ་ཕྲེང་། ཕ་ཡུལ་ཤེས་བྱའི་བང་མཛོད་སོགས་སློབ་ཕྲུག་གི་ཀློག་རྒྱུའི་ཆེད་བཞག་ཡོད་པ་རེད། དེ་བཞིན་སློབ་ཕྲུག་གི་ཀློག་རྩལ་ཡར་རྒྱས་གཏོང་ཐབས་ཆེད་དགེ་རྒན་ཕལ་ཆེ་བར་ཟབ་སྦྱོང་དང་ལམ་སྟོན་གནང་ཡོད་པ་རེད་ལ། ཕ་མ་ཚོར་བུ་ཕྲུག་གི་ཤེས་ཡོན་སྐོར་ལ་དོ་སྣང་སྤྲད་དགོས་པའི་དེའི་ཐད་ལ་ཆེད་མཁས་པ་སོགས་སྐད་བཏང་ནས་ཟབ་སྦྱོང་རིམ་པ་མང་པོ་ཞིག་གནང་ཡོད་པ་རེད། གཙོ་བོ་སློབ་མའི་ཤེས་ཚད་ཡར་རྒྱས་གཏོང་མིན་དེ་དགེ་རྒན་ཚོར་ཐུག་ཡོད་དུས་དགེ་རྒན་ཚོའི་ཆེད་ལས་ཡར་རྒྱས་གཏོང་ཐབས་སུ་ཡིག་འབྲེལ་ལམ་ནས་རྒྱ་གར་མཐོ་སློབ་སོགས་སུ་སློབ་སྦྱོང་བྱེད་པར་སློབ་ཡོན་སྤྲོད་རྒྱུ་དང་། སློབ་གྲྭ་སོ་སོ་ནས་དགེ་རྒན་གྱི་སྐད་ཡིག་ཡར་རྒྱས་གཏོང་སླད་བདུན་ཕྲག་རེར་འཛིན་གྲྭ་ཆུ་ཚོད་ངེས་ཅན་ཞིག་ལ་འཚོགས་ཀྱི་ཡོད་པ་རེད། དེང་སང་བརྡ་འཕྲིན་གྱི་དུས་རབས་ཡིན་སྟབས་ཤེས་རིག་ལས་ཁུངས་ནས་འདོན་སྤེལ་ཞུས་པའི་དེབ་ཕལ་ཆེ་བ་ཤེས་རིག་ལས་ཁུངས་ཀྱི་དྲ་ཚིགས་ (www.sherig.org/tb) དང་། གཞི་རིམ་སློབ་མའི་བོད་ཡིག་སློབ་སྦྱོང་དྲ་ཚིགས་ (www.bodyiglobjong.com) གཉིས་སྟེང་བཞག་ཡོད་པ་དང། དམིགས་བསལ་བོད་ཡིག་སློབ་སྦྱོང་དྲ་ཚིགས་སྟེང་དུ་གཞི་རིམ་འོག་མའི་བོད་ཀྱི་སྐད་ཡིག་དང་། ཚན་རིག།ཨང་རྩིས་བཅས་སློབ་ཁྲིད་བྱས་པའི་བརྙན་འཕྲིན་བཞག་ཡོད་པ་མ་ཟད། ཤེས་རིག་ལས་ཁུངས་དང་། དྷ་སྟེང་བོད་ཁྱིམ། སཾབྷོཊ་བོད་སློབ་ཚོགས་པའི་ཡིག་ཚང་ནས་འདོན་སྤེལ་ཞུས་པའི་བྱིས་སྒྲུང་ཆ་ཚང་བཞག་ཡོད་པ་བཅས་ཕྱོགས་གང་ཐད་ནས་ཤུགས་རྒྱག་གི་ཡོད་པ་རེད། ཅེས་བརྗོད་བྱུང་།

གསར་འགོད་པ། སངས་རྒྱས་དཀོན་མཆོག