དེ་རིང་རྒྱལ་སྤྱིའི་འགྲེམས་སྟོན་ཉིན་མོ་སྲུང་གཙིའི་ཐོག་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ལས་དོན་གང་ཞིག་བྱས་ཀྱང་རྒྱལ་སྤྱིས་ཅིག་བྱེད་ཀྱི་འདུག་ང་ཚོས་བྱེད་ཀྱི་ཡིན་ལྟ་བུའི་ལད་ཟློས་མ་བྱེད་ཅེས་གསུངས་སོང་།
དེ་རིང་རྒྱལ་སྤྱིའི་འགྲེམས་སྟོན་ཉིན་མོ་ཐེངས་ ༤༡ པ་དང་བསྟུན་སྔ་དྲོའི་ཆུ་ཚོད་༡༠ སྟེང་ཕྱི་དྲིལ་བོད་ཀྱི་འགྲེམས་སྟོན་ཚན་པའི་གོ་སྒྲིག་འོག དྷ་ས་བཞུགས་སྒར་ཐེག་ཆེན་གཙུག་ལག་ཁང་གི་ཉེ་འགྲམ་དུ་ཡོད་པའི་བོད་ཀྱི་འགྲེམས་སྟོན་ཁང་དུ། ཉིན་གཉིས་རིང་ཚད་མཐོའི་འབྲེལ་ལམ་གྱི་འགྲེམས་སྟོན་ཁང་དང་ལངས་ཕྱོགས་དང་མི་རབས་གསར་པ་བརྗོད་གཞིར་བཟུང་བའི་འགྲེམས་སྟོན་ཞིག་དབུ་འཛུགས་གནང་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཆོས་རིག་བཀའ་བློན་སྲིད་ཚབ་གཡུ་ཐོག་ཀརྨ་དགེ་ལེགས་མཆོག་དང་། དྲིལ་བསྒྲགས་དྲུང་ཆེ་ཚད་མཉམ་ཤར་གླིང་ཟླ་སྒྲོན་ལགས་གཉིས་ཀྱི་དབུས་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། དེ་བཞིན་སློབ་གྲྭ་ཁག་ཅིག་བཅས་ཁྱོན་མི་གྲངས་༥༠ ལྷག་ཅིག་འཛོམས་འདུག
མཛད་སྒོའི་ཐོག་མར་ཕྱི་དྲིལ་བོད་ཀྱི་འགྲེམས་སྟོན་ཚན་པའི་འགན་འཛིན་ལས་ཚབ་རིན་ཆེན་རྡོ་རྗེ་ལགས་ཀྱིས། རྒྱལ་སྤྱིའི་འགྲེམས་སྟོན་ཉིན་མོ་དེ་རྒྱལ་སྤྱིའི་འགྲེམས་སྟོན་མཐུན་ཚོགས་ནས་ཕྱི་ལོ་༡༩༧༧ ལོ་ནས་སྲུང་གཙི་གནང་ཡོད་པ་དང་། རྒྱལ་སྤྱིའི་འགྲེམས་སྟོན་ཉིན་མོ་ཐེངས་༤༡ པ་འཛམ་གླིང་ཡོངས་སུ་འགྲེམས་སྟོན་ཁང་ཁག་ ༣༦༠ ལྷག་དང་རྒྱལ་ཁབ་༥༧ ལྷག་གི་ནང་སྲུང་གཙི་ཞུ་བཞིན་ཡོད་པ་དང་། བོད་ཀྱི་འགྲེམས་སྟོན་ཚན་པས་ལོ་ལྟར་རྒྱལ་སྤྱིའི་འགྲེམས་སྟོན་ཉིན་མོ་སྲུང་གཙི་ཞུ་བཞིན་ཡོད་པ་རེད་ལ། འགྲེམས་སྟོན་གྱི་ཉིན་མོ་སྲུང་གཙི་ཞུ་དགོས་དོན་ནི་འགྲེམས་སྟོན་གྱི་གལ་ཆེའི་རང་བཞིན་དང་། ཉིན་དེར་རྒྱལ་སྤྱིའི་འགྲེམས་སྟོན་མཐུན་ཚོགས་ནས་གཏན་འབེབས་གནང་བའི་བརྗོད་གཞི་ཚད་མཐོའི་འབྲེལ་ལམ་གྱི་འགྲེམས་སྟོན་ཁང་དང་ལངས་ཕྱོགས་དང་མི་རབས་གསར་པ་ཞེས་པའི་ཐོག་མང་ཚོགས་མཉམ་ཞུགས་དང་ལས་འགུལ་སྣ་མང་ཞིག་གོ་སྒྲིག་ཞུ་བཞིན་ཡོད་པ་ལྟར། བོད་ཀྱི་འགྲེམས་སྟོན་ཚན་པས་ཉིན་མོ་འདི་དང་བསྟུན་ནས་བཞུགས་སྒར་དྷ་ས་ཁུལ་གྱི་མང་ཚོགས་ལ་ལས་འགུལ་དང་འབྲེལ་བའི་ངོ་སྤྲོད་དང་གོ་རྟོག་སྤེལ་གྱི་ཡོད་པ་རེད། ཅེས་བརྗོད་སོང་
མཇུག་ཏུ་ཆོས་རིག་བཀའ་བློན་སྲིད་ཚབ་གཡུ་ཐོག་ཀརྨ་དགེ་ལེགས་མཆོག་ནས་གསུང་བཤད་གནང་དོན། རྒྱལ་སྤྱིའི་འགྲེམས་སྟོན་ཉིན་མོ་ཟེར་བ་དེར་དུས་ཚོད་ངེས་ཅན་ཞིག་གཏན་འཁེལ་བྱས་ཏེ། ལོ་རྟག་པར་སྲུང་གཙི་བྱེད་བཞིན་པ་དེར་དགོས་པ་རྒྱུ་མཚན་ཁྱད་པར་ཅན་ངེས་ཅན་ཞིག་ཡོད་པ་རེད། མཚམས་མཚམས་ང་ཚོས་དགོས་པ་རྒྱུ་མཚན་ཁྱད་པར་ཅན་དེ་དག་དུས་ཚོད་ཡུན་རིང་སོང་བའི་རྗེས། སྔོན་མ་ཡོད་པའི་དགོས་པ་རྒྱུ་མཚན་ཕར་ལ་བཞག་ནས་དེ་མ་ཡིན་པའི་གནད་དོན་གཞན་ཞིག་གི་སྒང་ལ་འགྲོ་བཞིན་འདུག དེ་ང་ཚོ་གཅིག་པུ་ཙམ་མ་ཡིན་པར་མིའི་སྤྱི་ཚོགས་ཀྱི་གཤིས་ཀ་དང་ཞན་ཆ་མ་རེད། གང་ལྟར་རྒྱལ་སྤྱིའི་འགྲེམས་སྟོན་ཉིན་མོ་ཞེས་པ་དེ་དམག་ཆེན་དང་པོ་དང་གཉིས་པ་གཉིས་བརྒྱབ་པ་ནས་འགྲོ་བ་མི་ཚང་མ་གང་ས་ཅི་ཐད་ནས་གཅིག་མཚུངས་ཡིན་པ་དང་། མི་རིགས་ཚང་མ་ལ་རིན་ཐང་ཅན་གྱི་གནས་ཚུལ་མང་པོ་ཡོད་པ་དང་ཕན་ཚུན་གཅིག་གིས་གཅིག་ལ་མཉམ་འབྲེལ་དང་མཉམ་རོལ་སོགས་དང་། དེ་བཞིན་ཕན་ཚུན་ལ་གནས་ཚུལ་བརྒྱུད་སྤེལ་དང་གོ་རྟོགས་སྤེལ་རེས་བྱེད་པ་ལ་འགྲེམས་སྟོན་ཁང་དེ་བརྒྱུད་ལམ་ཡག་ཤོས་ཤིག་ཡིན་པའི་ཆ་ནས་སྲུང་གཙི་བྱེད་བཞིན་ཡོད་པ་རེད། ཅེས་གསུངས་སོང་།
ཡང་འགྲེམས་སྟོན་བྱེད་པའི་སྐབས་སུ་མི་རིགས་རང་གི་ཁྱད་ཆོས་དང་དྲང་བཤད་གནང་དགོས་པའི་སྐོར་ལ་ཁོང་གིས། འཛམ་གླིང་འདིར་མི་རིགས་མང་པོ་ཡོད་པ་རེད་ལ། ང་རང་ཚོར་མཚོན་ན་ཡང་མི་རིགས་ཤིག་ཆགས་བསྡད་ཡོད་དུས། འགྲེམས་སྟོན་སྐབས་མི་རིགས་ཀྱི་ཁྱད་ཆོས་དང་མི་རིགས་ཀྱི་ལོ་རྒྱུས། དེ་བཞིན་རིག་གཞུང་དང་སྒྱུ་རྩལ་རིག་གནས་སོགས་མང་པོ་ཡོད་པ་དེ་དག་གི་སྐོར་ལ་འགྲེམས་སྟོན་གནང་རྒྱུ་གལ་ཆེན་རེད། ད་ལྟའི་ཆར་ང་ཚོའི་རིག་གནས་དེ་དག་དཀའ་ངལ་ཆེན་པོ་ཞིག་གི་འོག་ཏུ་ལྷུང་བསྡད་ཡོད་པ་རེད་ལ། མ་གཞི་དཀའ་ངལ་མེད་པའི་རང་དབང་ཅན་གྱི་རྒྱལ་ཁབ་ཅིག་དང་མི་རིགས་ལ་མཚོན་ནའང་དེ་དག་གནང་དགོས་ཀྱི་ཡོད་པ་རེད། ང་ཚོ་རྒྱལ་ཁབ་གཞན་དང་མི་འདྲ་བར་ཤི་དང་གསོན་གྱི་གནས་སྟངས་ལ་ཐུག་བསྡད་ཡོད་དུས། ང་ཚོས་ཆེ་ཆུང་ལ་མ་ལྟོས་པའི་འགྲེམས་སྟོན་གྱི་བརྒྱུད་ལམ་དེ་བེད་སྤྱད་ནས་འཛམ་གླིང་ཡོངས་ལ་ང་ཚོའི་མི་རིགས་དང་རིག་གཞུང་ལོ་རྒྱུས། མདོར་ན་ཆབ་སྲིད་རྩ་དོན་སོགས་འདི་བརྒྱུད་ནས་ཁྱབ་སྤེལ་གཏོང་དགོས་པ་དེ་ཧ་ཅང་གལ་ཆེན་ཆགས་བསྡད་ཡོད་པ་རེད། ཅེས་གསུངས་སོང་།
གཞན་ཡང་། ལས་དོན་བྱེད་པའི་སྐབས་སུ་དོན་དང་ལྡན་པ་བྱེད་དགོས་པ་དང་གཞན་གྱི་ལད་ཟློས་ཁོ་ན་བྱེད་རྒྱུ་མེད་པའི་སྐོར་ལ་ཁོང་གིས། འགྲེམས་སྟོན་གྱི་ཉིན་མོ་འདི་རྒྱལ་སྤྱིས་གཅིག་བྱེད་ཀྱི་འདུག་པས་ང་ཚོས་ཀྱང་བྱེད་ཀྱི་ཡིན་ཟེར་བ་འདྲ་བོ་མ་ཡིན་པར། རྒྱལ་སྤྱིས་གང་བྱས་པའི་ཐོག་མའི་རྒྱབ་ལྗོངས་དང་དམིགས་ཡུལ་ག་རེ་རེད་འདུག དེ་ད་ལྟ་ཁོ་རང་ཚོས་བརྩི་སྲུང་མ་བྱས་ན་ཡང་ང་ཚོར་ཇུས་གཏོགས་མི་འདུག ང་རང་ཚོས་དེའི་རྒྱུ་མཚན་དེ་བཙལ་ནས་དེ་ང་རང་ཚོ་དང་འབྲེལ་བ་ཡོད་པ་དང་ཕན་ཐོགས་ཡོད་པ་ཞིག་ཡིན་ན་བྱེད་དགོས་པ་ལས། འབྲེལ་བ་དེ་ཙམ་མེད་པ་དང་ཕན་ཐོགས་དེ་ཙམ་མེད་པ་ཞིག་ཡིན་ན་ཕར་བཞག་ནས་སྲུང་གཙི་མ་བྱས་ན་འགྲིག་གི་རེད། ལས་དོན་གང་བྱས་དེ་དོན་སྙིང་ལྡན་པ་བྱེད་དགོས་རེད། གཞན་ཚོས་རྒྱས་སྤྲོས་དང་དགའ་དགའ་སྤྲོ་སྤྲོ་ཟེར་བ་དེ། ང་ཚོ་དྲང་པོར་བཤད་ན་སྐྱབས་བཅོལ་བ་ཡིན་དུས། དེ་འདྲ་བྱེད་རྒྱུའི་གནས་བབ་ཡོད་མ་རེད་ལ་སྣང་བ་འདྲ་དག་ནས་ང་ཚོ་ལོ་༦༠ འཁོར་འགྲོ་ཡི་ཡོད་རེད། གང་ས་ཅི་ཐད་ནས་གཞན་དག་ཚོའི་ལད་ཟློས་འདྲ་བྱེད་མ་ཚར་ནས་བསྡད་ན་སོ་སོའི་གནས་སྟངས་དེ་ཕར་ཙམ་ལ་ལྷག་པའི་ཉེན་ཁ་ཡོད་པ་རེད། དེ་འདྲའི་ཐོག་ལ་ལས་དོན་བྱེད་པའི་སྐབས་སྙིང་པོ་ལྡན་པ་དང་། དོན་དང་ལྡན་པ་བྱ་རྒྱུ་དེ་གལ་ཆེན་པོ་རེད། ཅེས་གསུངས་སོང་།
ཕྱི་དྲིལ་བོད་ཀྱི་འགྲེམས་སྟོན་ཁང་ནི་ཕྱི་ལོ་ ༡༩༩༨ ནས་མགོ་འཛུགས་གནང་ཡོད་པ་དང་། ད་ལྟའི་ཆར་འགྲེམས་སྟོན་ཁང་དེར་འགྲེམས་སྟོན་ཚན་པ་ཁག་གསུམ་ཡོད་པ་ལས། གཏན་འཇགས་འགྲེམས་སྟོན་ཁང་གིས་ཕ་ཡུལ་ལ་རྒྱང་ལྟ་བྱེད་པ་ཞེས་པའི་ཐོག་འགྲེམས་སྟོན་གནང་གི་ཡོད་དང་། སྐོར་སྐྱོད་ཀྱི་འགྲེམས་སྟོན་ཞེས་པས་དུས་དང་བསྟུན་རྒྱལ་སྤྱིའི་ལས་འགུལ་འདྲ་མིན་ནང་བརྗོད་གཞི་འདྲ་མིན་ཐོག་བོད་དོན་དང་འབྲེལ་བའི་འགྲེམས་སྟོན་ལས་འགུལ་སྤེལ་གྱི་ཡོད་འདུག བོད་ཀྱི་ལོ་རྒྱུས་དང་འབྲེལ་བའི་འགྲེམས་སྟོན་ཚན་པའི་ནང་བོད་ཀྱི་ལོ་རྒྱུས་དང་འབྲེལ་བའི་པར་རིས་ཁྲི་༤ ལས་མང་བ་བསགས་ཉར་བྱས་ཡོད་འདུག གཞན་འགྲེམས་སྟོན་ཚན་པས་བོད་དོན་དང་འབྲེལ་བའི་གློག་བརྙན་ཉིན་རེར་ཐེངས་གཉིས་རེ་སྟོན་གྱི་ཡོད་པ་དང་། ཆེད་ལས་མི་སྣ་གདན་ཞུ་བྱས་ཏེ་བོད་དོན་དང་འབྲེལ་བའི་གནད་དོན་ཐོག་ཟླ་རེར་གཏམ་བཤད་ཐེངས་གཉིས་རེ་གོ་སྒྲིག་ཞུ་བཞིན་ཡོད་འདུག་ལ།
ཐེངས་འདིའི་ཕྱི་དྲིལ་ཚན་པའི་ཉིན་གཉིས་རིང་གི་འགྲེམས་སྟོན་ལས་འགུལ་སྐབས་ཀྱི་ཉིན་དང་པོ་རྒྱལ་སྤྱིའི་འགྲེམས་སྟོན་མཐུན་ཚོགས་ནས་གཏན་འབེབ་གནང་བའི་ཚད་མཐོའི་འབྲེལ་ལམ་གྱི་འགྲེམས་སྟོན་ཁང་དང་ལངས་ཕྱོགས་དང་མི་རབས་གསར་པ་ཞེས་པའི་ཐོག་འགྲེམས་སྟོན་གནང་གི་ཡོད་པ་དང་། སང་ཉིན་སམ་བྷོ་ཊ་མེས་དབོན་དཔེ་སྟོན་སློབ་གྲྭའི་འཛིན་གྲྭ་བདུན་པ་དང་བརྒྱད་པའི་སློབ་མ་ཚོར་དྷ་ས་ཁུལ་གྱི་གཞུང་འབྲེལ་དང་གཞུང་འབྲེལ་མ་ཡིན་པའི་འགྲེམས་སྟོན་ཁང་དག་ལ་ཤེས་ཡོན་དང་འབྲེལ་བའི་སྐོར་སྐྱོད་གོ་སྒྲིག་གནང་གི་ཡོད་འདུག
གསར་འགོད་པ། སངས་རྒྱས་དཀོན་མཆོག
