དོལ་པོའི་ཁ་བརྡ། (ཚན་པ་དང་པོ།)

                                                                                                                                 མང་རའི་ཁེར་བུད།༄༅། །བྱུང་ནས་ཡལ་བའི་སྔོན་གྱི་གཟུགས་བརྙན་རྣམས།།

སྟོང་བའི་མཁའ་ལ་སེམས་ཀྱིས་བྲིས་པ་འདི།།

ཤིན་ཏུ་ངོ་མཚར་སྒྱུ་མའི་རྒྱལ་རབས་ཞེས།།

མཁས་རྣམས་འཁང་རའི་སྐད་ཡན་ཤོར་ལ་ལྟོས།།

དེས་ན་དེང་འདིའི་མཐོང་ཐོས་མངོན་སུམ་དག།།

ཡུན་དུ་འགྱངས་ན་ཡིད་ཆེས་རྗེས་དཔག་གི།།

གཞལ་བྱ་ཤིན་ལྐོག་ཉིད་དུ་འགྱུར་སྲིད་པས།།

གཏན་ཆགས་ནག་པོའི་འགྲོས་སུ་དགོད་པར་བྱ།།

དེ་ཡང་གུས་པ་ནི་དོལ་པོར་དངོས་སུ་འགྲུལ་བཞུད་དང་འཚོ་སྡོད་ཡུན་དུ་བྱས་མྱོང་མཁན་ཞིག་ཡིན་པའི་ཆ་ནས། དོན་གཉེར་ཅན་ཚོར་དམིགས་ཏེ་དོལ་ཡུལ་གྱི་མཐོང་ཐོས་དག་ཁ་ཟིན་སྣ་ཟིན་ཞིག་གཏམ་དུ་བྱ་བ་ལ་འདི་ལྟ་སྟེ། དེང་གི་དུས་སུ། བོད་ཅེ་ན། ཡན་ལག་ལྔ་པོ་གཏུབ་རྗེས་ཀྱི་ཁོག་གཞུང་ཙམ་ལའང་ལུས་པོའི་མིང་གིས་མི་འདོར་བ་ལྟར། ཀྲུང་གོའི་མངའ་ཁོངས་སུ་ཚུད་པའི་མདོ་དབུས་ཁམས་གསུམ་ཙམ་ལ་གོའོ། ། འོན་ཀྱང་། སྔ་མོའི་དུས་སུ་དེ་ཙམ་རེད་དམ་ཞེ་ན། མ་ཡིན་ཏེ། དེང་གི་པཱ་ཀི་སི་ཐཱན་གྱི་སྦལ་ཏི་དང་། རྒྱ་གར་གྱི་ལ་དྭགས།  སྤི་ཏི། ཁུ་ནུ། འབྲས་ལྗོངས། འབུམ་སྡེ་ལ་སོགས་དང་། བལ་ཡུལ་གྱི་བྱང་པ། གླེ་མི།  མུ་ཁུམ།(ལྷོ་མ་ཡང་ཟེར) དོལ་པོ། གློ་བོ། ཀརྨ་རོང་(ཡུལ་ཚོ་བཅུ་གསུམ)། གླིང་པ། འུམ་ལ།  གཉེ་ཤངས། ནུབ་རི། ཙུམ། གླང་ཐང་།  ཤར་པ་ (འདི་མི་རིགས་ཚུར་མཆེད་པ་ལས་ས་ཁོངས་བོད་དུ་གཏོགས་མིན་མ་ངེས) སོགས་ཀྱང་བོད་རེད་ལ། དེའི་ཡུལ་མི་རྣམས་ནི་བོད་རིགས་གཤའ་མ་རེད། དེར་མ་ཟད་ཆོས་ལྡན་གྱི་རྒྱལ་ཁམས་འབྲུག་རྒྱལ་ཁབ་ཧྲིལ་པོ་ཡང་བོད་ཁོངས་སོ། །མདོར་ན། མཁས་དབང་དགེ་ཆོས་ཀྱིས། སྲིན་པོ་གདོང་དམར་བོད་ཀྱི་དམག་དཔུང་གིས། །སུམ་གཉིས་ས་ཡི་དཀྱིལ་འཁོར་བཟུང་ཞེས་གྲགས། །ཞེས་གསུངས་པ་ལྟར། སྔ་སོར་ཡིན་ན། བོད་སྐད་ཀྱིས་ཁྱབ་ཚད་དམ་འཛམ་གླིང་ཡང་ཐོག་གི་སྒྲས་འབོད་རུང་ཚད་བོད་སས་ཁྱབ་པའི་དུས་ཤིག་བྱུང་ཡོད་པ་ངེས་གཏན་རེད། དེ་ལྟར་ཡང་། ཆགས་འཇིག་གི་ཆོས་ཉིད་ལས། ད་ལྟའི་དུས་ན། གོང་སྨྲས་ཡུལ་ལུང་རྣམས་བདག་དབང་ངམ་རྒྱལ་མཚམས་ཀྱིས་ཕྱེས་ཏེ་ང་ཚོ་དང་ཁ་ཁར་གྱེས་ཟིན། དེ་ལྟ་མོད་ཀྱི། དེ་དག་གི་ཡུལ་མི་རྣམས་ནི། རིགས་རྒྱུད་ཀྱི་ཆ་ནས་དང་། ཡུལ་སྲོལ་གྱི། ཆས་གོས་ཀྱི། སྐད་རིགས་ཀྱི།  ཁོར་ཡུག་གི བསམ་བློའི་འདུ་ཤེས་སོགས་གང་གི་ཐད་ནས་ཀྱང་བོད་པ་དང་ཁྱད་པར་འཇོག་ཆོས་ཅུང་ཟད་ཙམ་ཡང་མི་རྙེད། ལྷག་པར་དུ། ཡུལ་གྲུ་ལ་ལ་ནི་སྔ་མོའི་བོད་རང་གི་དྲན་རྟེན་ལྟ་བུ་རེད།

འདི་ལྟར་གླེང་ན་ཁྱེད་རང་ཡིད་མི་ཆེས་ནའང་ཐང་། ཡིད་མི་ཆེས་ན། གུས་པས་ཁྱེད་ཅག་དོལ་ཡུལ་དུ་བལྟ་བསྐོར་ལ་ཐེངས་གཅིག་འཁྲིད་པར་བྱ།  གང་དེར་འཁོར་ལོའི་ལམ་མེད་བརྟེན། གནམ་གྲུ་འམ་ཡང་ན་རྐང་འགྲུལ་བྱ། གནམ་གྲུར་ཞོན་ཏེ་བལ་ཡུལ་རྒྱ་ཐང་ནས་(ཁད་ཆེས་ཉེ་བའི་གནམ་ཐང་ནས་)སྐར་མ་༤༥ཙམ་འཕུར་ན་དོལ་པོར་སྟོད་སྨད་གཉིས་ཕྱེས་པའི་སྨད་དུ་འབྱོར། སྟོད་དུ་གནམ་ཐང་ཡང་མེད་པས། དེ་ནས་རྐང་འགྲུལ་ལས་གདམ་ག་མེད། དེ་ལྟར་ཡང་། སྐབས་འགར་རྒྱུ་འབྱོར་ཅན་རེ་ཤས་ཐད་འཕུར་གནམ་གྲུ་གླས་ཏེ་མཁའ་འགྲུལ་བྱེད། རྐང་འགྲོས་ཀྱིས་གྱེན་ནས་གྱེན་དུ་ཉིན་གྲངས་གསུམ་མམ་བཞིའམ། གངས་འཐུག་གིས་མྱུར་ལམ་ཁེགས་ཚེ་རིང་ལམ་བསྐོར་དགོས་པས་ཡུལ་ཁད་རིང་པ་རྣམས་སུ་སླེབས་པར་བདུན་གཅིག་ལྷག་འགོར། ཁ་རྒྱུན་དུ། བོད་ཡུལ་ལ་གངས་རི་ར་བས་བསྐོར་པའི་ཞིང་ཞེས་འབོད་སྲོལ་ཡོད་པ་ལྟར། དོལ་པོ་སྟོད་ལ་འབྱོར་ན། ཕྱིར་མིག་ཅི་ཙམ་འཕངས་པ་དེ་ཙམ་གྱིས་རང་ཉིད་བོད་སའམ་གངས་རིའི་ནང་རོལ་ཏུ་བསླེབས་ཟིན་པའི་དྲན་གསོ་ཡང་ཡང་གཏོང་། རྒྱུ་མཚན་ནི། རྒྱབ་མཐའ་ཀུན་ན་ཁ་བ་གངས་དཀར་གྱི་པྲོག་ཞུ་བཞེས་པའི་རི་བོ་རྣམས་རྩེ་མོ་དགོང་དུ་བསྙེགས་ཤིང་དཔུང་པ་ཁྱུད་མོར་སྦྲེལ་པས་སོ། །

ཡུལ་འདིར་འཚོ་བའི་མི་རྣམས་ནི་བོད་པ་ལས་ཀྱང་གནའ་བོའི་ཐུ་བྷོད་པ་རེད། གོས་སུ་ཕྱུ་པ་དང་པགས་ཚག་གྱོན་ཞིང་ཟས་སུ་རྩམ་པ་དང་མར་ཕྱུར་ཟ། ངག་ན་བོད་སྐད་གཤའ་མ་རྗོད་ཐོག་ཉིན་རེའི་རྒྱུན་སྤྱོད་ཀྱི་སྐད་ན། བརྡ་རྙིང་ཡང་མ་ཉམས་པར་ཡོད། དཔེར་ན། ཟ་མ་ལ་ཉོད་པ་དང་།  རྔན་པའམ་སྐྱེས་ལ་འཕྱོས་མ། ཅི་ཤེས་ལ་ཅི་ཆ། རྒྱུས་མེད་ལ་ཆ་མེད། རྟ་ཕོ་ལ་ཕོ་ཆེན། ཐུགས་རྗེ་ཆེ་ལ་འོར་ཆེ་ (བློ་སྦྱོང་དོན་བདུན་མར་   “འོར་ཆེ་མ་འདོད་” ཅེས་དོན་མི་གོ་བ་གཅིག་འདུག་པ་དེ་འདིར་བྱིས་པ་ཚོས་ཀྱང་བསླབ་འོང་སྟེ། ཉིན་རེའི་རྒྱུན་སྤྱོད་ཀྱི་སྐད་དོ།) ཟེར། སྐད་ཀྱི་གདངས་དང་ང་རོ་འབྱིན་སྟངས་དབུས་ཁུལ་དང་མཚུངས་མོད།  རྗོད་པ་ལ་ལ་ཞིག་ཨ་མདོའི་སྐད་དང་ཡང་མཐུན་ཏེ། དཔེར་ན། མཆོད་རྟེན་ལ་ “མཆོར་རྟེན”དང་། དགེ་རྒན་ལ་ “དགེར་རྒན”། གསར་པ་ལ་ “སོ་མ”།  མགར་བ་ལ་ “མགའ་ར”། བུ་ལ་ “བུ་ཚ”། ལྕི་བ་ལ་ “ལྕི་ཡ”། ཁྱོད་ཀྱི་ལ་ “ཁྱོའི”། ཆར་བབས་ལ་ “གནམ་བབས”།  སྲིད་ལ་ “ཧྲིད་” སོགས་ཟེར།   དེར་འབྱོར་ན། དོལ་པོ་བ་ལ་ལས་ཇ་འདྲེན་ཆང་འདྲེན་གྱི་སྐབས་སུ་ང་ཚོ་བོད་རིགས་གཅིག་པ་ལ་ཁྱད་ཅི་ཡོད་ཟེར་བ་སོགས། སེམས་དྲོ་ཞིང་ལྗགས་འཇམ་པའི་སྣེ་ལེན་བྱས་ན། ང་ཚོ་བོད་པ་སྡོམ་པོ་ཚོར་ཡང་། རང་ས་རང་ཡུལ་དུ་སླེབས་པ་ལྟ་བུའི་དགའ་སྣང་དང་ཞེན་ཁོག་ངང་གིས་འཕེལ་ལོ། །

ཡུལ་འདིར་སྔ་དུས་སུ་ཆོས་བརྒྱུད་ས་སྐྱའང་དར་སྣང་མོད། དེང་སང་ཕལ་མོ་ཆེས་རྙིང་མ་བྱེད། རྙིང་མའི་བྱིན་རླབས་ཀྱི་ཚན་ཁས། མི་སྐྱའི་ཁྲོད་ནའང་སྒྲུབ་པ་ཉམས་ལེན་པ་མང་ཞིང་ལོ་གསུམ་ཕྱོགས་གསུམ་བཏང་དང་གཏོང་བཞིན་པ་རྒྱུན་མི་ཆད། བཟའ་ཉོག་གི་ཕ་རྒན་ལ་ལ་འཆི་ཁར་ཐུགས་དམ་ངང་གྲོལ་འགྲོ་བའང་ཁ་ཡར་འབྱུང་། ཆོས་ཟབ་ས་ན་བདུད་ཟབ་ཟེར་བ་ལྟར། མི་སྐྱ་ལ་ལ་གྲོང་ནག་ཡིན་བཞིན་དུ་རབ་བྱུང་གི་ཆ་ལུགས་གཟུང་རྒྱུར་ཅི་མི་སྙམ། ཡོན་ཁོ་ནའི་ཆེད་དུ་ག་ལ་ཡིན་མོད། ལ་ལ་ཞིག་དགེ་སློང་གི་ཆས་སུ་རྒྱ་བལ་གྱི་ཆོས་ཚོགས་སྨོན་ལམ་སོགས་སུ་ཉ་མོ་ཆུར་ཞུགས་ལྟར་འཇུག་དུས། བདག་དང་བདག་ལྟ་བུའི་སྐྱོན་རྟོག་ཅན་ཚོ་ལོག་ལྟའི་རླུང་གིས་འཁུར་ཉེན་ཅི་བས་ཆེ། འོན་ཀྱང་ཡུལ་མི་བྱིངས་ལ་མཚོན་ན། དག་སྣང་འོད་དཀར་གྱིས་ཁྱབ་པའམ་ཆོལ་ཉོག་འདམ་བག་ལ་གོམས་པ་གང་ཡིན་བཤད་ཚོད་མི་ཐིག་སྟེ། དེ་ལ་དེ་ཙམ་གྱིས་ངན་པར་མི་རྩི། ཆོས་པ་ལ་ལ་ནི་ས་མཚམས་བརྒལ་ཏེ་བོད་སར་ཡང་འགྲོ། བོད་ས་བྱང་འབྲོག་ཏུ་དགུན་ཟླ་གསུམ་མམ་བཞིའམ། ལོ་འཁོར་མོ་ཡུག་ཏུ་གྲོང་ཆོག་བྱེད་ལ། ལ་ལས་རྡོ་ལ་སྐུ་གསུང་ཐུགས་རྟེན་བརྐོས་ཏེ་གྲོང་ཆོག་བྱེད། ཕྱིར་བསླེབས་པའི་གཏམ་ལ། དེར་སྐུ་འགྱེད་ལ་ཡོན་སྨར་རབ་དང་ཁ་ཟས་ལ་ཤ་སྣུམ་རབ་གླེང་།   འོན་ཀྱང་ད་དུས་ས་མཚམས་ཀྱི་དམ་དྲག་ཚ་རུ་ཕྱིན་པས་ཐར་གྱི་མེད་ཚོད། ལོ་ཤས་གོང་ཀྲུང་གོའི་ཉེན་རྟོག་པས་དོལ་པོའི་གྲོང་ཆོག་པ་དྲུག་བདུན་ཙམ་བོད་ཀྱི་མཐའ་མཚམས་ཡུལ་གྲུ་ཁག་ནས་འཛིན་བཟུང་གིས། ཉིན་ཤས་རིང་བཀག་ཉར་དང་འདྲི་བརྩད་བྱས་རྗེས། བལ་སྒོར་ ༢༠༠༠ རེའི་ལམ་གྲོན་སྤྲད་དེ་འགྲམ་གྱི་འགག་སྒོ་ནས་ཕྱིར་ཕུད་བཏང་འདུགདེ་གའི་སྐྱེས་ཕོ་མོ་སུ་ཡིན་ཡང་། ཆོས་དད་ནི་དེང་གི་བོད་པ་དང་བསྡུར་ན་ལྷག་ཙམ་འདུག་སྟེ། ཁ་ཏོན་དགེ་སྦྱོར་ནི་ཞལ་ཐོག་ཚད་ཀྱི་ཞལ་ན་ཡོད། བྱིས་པ་སྣབས་ལུག་ཚོའི་ཁྲོད་ནའང་། ཚིག་བདུན་གསོལ་འདེབས་དང་། སྒྲོལ་མ་ཉེར་གཅིག ཤེར་སྙིང་སོགས་ཤ་ར་ར་འགྲོ་མཁན་མང་ལ། གེ་སེར་གྱི་སྒྲུང་ཧ་ཅང་སྙན་པོར་མགུར་མཁས་པའི་བྱིས་པའང་འདུག   རྒན་རབས་ཚོའི་རིང་སློབ་གྲྭ་མེད་ཀྱང་།   དགུན་དུས་བྱིས་པ་ཚོ་ཁད་ཉེའི་དགོན་པ་ཁག་ཏུ་བོད་ཡིག་དང་འདོན་ཆོས་སྦྱང་དུ་རྫོང་སྲོལ་ཡོད་པས་བོད་ཡིག་ཀློག་འཁྱོལ་ཙམ་སྐྱེས་པ་ཕལ་མོ་ཆེས་འཁྱོངས།   རྡོ་འམ་བྲག་ལ་གཟུངས་སྔགས་རྐོ་བའི་དགེ་སྦྱོར་ལ་ཤིན་ཏུ་བརྩོན་པས། འདས་གསོན་གཉིས་ཀྱི་དགེ་རྩ་ལ། སྦྱིན་བདག་གི་འཁོས་ཀ་དང་བསྟུན་ནས། སྐྱེས་པ་གཅིག་རྐྱང་ངམ་དུ་མ་བྱས་ཏེ། རི་སྟོང་ལུང་སྟོང་དུ་སྒར་བརྒྱབས་ཏེ་ཉིན་ནས་ཉིན་དང་། བདུན་ནས་བདུན། ཟླ་ནས་ཟླའི་རིང་བྲག་རི་དང་རྡོ་ངོས་སུ་སྐུ་དང་གཟུངས་སྣ་ཚོགས་རྐོ་ནས་སྡོད་སྲོལ་ཡོད། གཟུངས་བརྐོས་རྡོ་འབུམ་དང་མཆོད་རྟེན་ཆེ་ཆུང་སྣ་ཚོགས་ནི་འགྲུལ་ལམ་གྱི་མགོ་རྔ་བར་གསུམ་དང་གྲོང་ཚོའི་མཐའ་དབུས་ཀུན་ན་ཡང་ཡང་མཇལ་རྒྱུ་ཡོད། ཡུལ་གྲོང་ལ་ལར་བོན་པོའི་རྡོ་འབུམ་དང་མཆོད་རྟེན་ཡང་མཇལ་རྒྱུ་ཡོད་པས་ཐེངས་དང་པོར་སླེབས་པ་ཞིག་ཡིན་ན། འདྲ་མི་འདྲ་ཉིས་ཚོགས་ཡིན་པས་གཡས་བསྐོར་བརྒྱག་རྒྱུ་གང་དང་གཡོན་བསྐོར་བརྒྱག་རྒྱུ་གང་ཡིན་ལ་འཐོམ་པར་འགྱུར། བོན་པོའི་སྔགས་རྣམས་མཐོང་ལམ་དུ་ཡང་ཡང་མངོན་དུས། ཨ་ཙི། བན་བོན་གཉིས་ཀྱི་ཆོས་འདི་བརྗོད་བྱ་རྗོད་བྱེད་གཉི་གའི་ཐད་ནས་འདི་ལྟའི་འདྲ་ས་མང་བའི་རྒྱུ་མཚན་ཅི་ཡིན་ནམ། ནང་པས་ནི། ཆོས་ཁུངས་རྒྱ་གར་དུ་གཏུག་ཕྱིར་དང་། སྐད་ལ་བག་ཆགས་འཇོག་པ་དང་། ལོ་ཙཱ་བ་རྣམས་ཀྱི་བཀའ་དྲིན་དྲན་པ་བཅས་རྒྱུ་མཚན་དུ་མའི་ཕྱིར།  རྒྱ་གར་སྐད་དུ། ཞེས་བསྟན་བཅོས་ཀྱི་མགོར་ལེགས་སྦྱར་སྨྲས་ཤིང་། གཟུངས་སྔགས་རྣམས་ཀྱང་ལེགས་སྦྱར་གྱི་སྒྲ་སོར་བཞག་གིས་བྲིས་པ་ལས་བོད་ཡིག་གཟུགས་ཅན་གྱི་སྔགས་ཡིག་རྣམས་བྱུང་བར་འདོད། འོན་ཀྱང་། བོན་པོ་རྣམས་ལ་དེ་གང་ནས་བྱུང་དང་། ཅིའི་ཕྱིར་བྱུང་གི་རྒྱུ་མཚན་ཅི་འདྲ་ཞིག་ཡོད་དམ། ཞེས་ཀྱང་དོགས་པ་ལ་འཆར་རོ།།

བཀྲིས་སྣ་ནག་མ་དང་ལྷན་ཅིག་ཏུ། །ཞེས་པ་ལྟར། དད་པ་དང་རྨོངས་དད་གཉིས་དཔུང་པ་མཉམ་གཤིབས་རེད། མོ་རྩིས་ལ་མིག་འབྲས་ལྟར་བརྩི་བར་སྣང་། སྐབས་འདིར་དཔེ་མཚོན་སྐྱི་གཡའ་བ་ཞིག་དྲན་འོངས་པ་ནི། ཐེངས་ཤིག ཨ་ཕ་ཞིག་གིས། རང་བུ་སློབ་ཆུང་བ་གཅིག་དགུན་ཁའི་གུང་གསེང་དང་བསྟུན་ཏེ་དགོན་པར་ཆོས་སྐྱོར་སྦྱང་དུ་བསྐྱལ། དེའི་རྗེས་རང་ཉིད་ཡུམ་བུར་ (དོལ་པོ་བས་རྒྱལ་ས་ཀཱ་ཐ་མན་ཌཱུར་འབོད་མིང་) ཐེགས། ཉིན་གཅིག་སྟབས་མ་ལེགས་པར་བུ་ཆུང་གད་གཡང་ལ་འགྲིལ་ཏེ་ལག་པ་ཆག  ཨ་མས་ཛ་དྲག་གིས་ཁ་པར་བཏང་བ་ལྟར། ཡུམ་བུ་ན་ཡོད་པའི་ཨ་ཕ་ལགས་མཆོད་རྟེན་བྱ་རུང་ཁ་ཤོར་གྱི་མོ་ལ་སྐད་གྲགས་ཆོད་པའི་བོད་བླ་ཆེ་གེ་མོའི་སྐུ་མདུན་དུ་བཅར་ནས་ཛ་དྲག་མི་དྲག་དང་སྨན་ཁང་དུ་བླང་འགབ་མི་འགབ་བརྟགས། བླ་མས་མོ་བསྐོར་རྗེས་ཅང་མི་སྐྱོན་པར་གསུངས། དེར་བརྟེན་ཉིན་ཤས་ཨུ་ཚུགས་ངང་བསྡད་པའི་རིང་ཕྲུ་གུའི་ན་ཟུག་མཐུ་རུ་ཕྱིན། མཐའ་མར་བལ་སྒོར་འབུམ་བཅུ་ཕྲག་ལྷག་གིས་ཐད་འཕུར་གནམ་གྲུ་གླས་ཏེ་རྒྱལ་སའི་སྨན་ཁང་དུ་མྱུར་སྐྱོབ་བྱས། འོན་ཀྱང་དེ་དུས་སུ་སྨན་པ་ན་རེ། དུས་ཡུན་ཧ་ཅང་འགྱངས་དྲགས་པས། ལག་ངར་གྱི་རྒྱུས་ཤ་རྣམས་རུལ་བར་གྱུར་ཟིན། ད་ནི་གཅད་རྒྱུ་ལས་བཅོས་ཐབས་མེད་དོ་ཟེར། སློབ་དགེ་ཚོའི་བསྔགས་བརྗོད་ཀྱི་མེ་ཏོག་གཏོར་ཡུལ་བློ་རིག་པ་འགྲན་ཟླ་བྲལ་བའི་བུ་ཆུང་ལྷ་རིགས་འདྲ་བ་དེ་ད་ལྟ་ལག་ལྡུམ་དུ་ཡོད། གེ་སར་གྱི་སྒྲུང་ན། ལྷ་བ་མོ་བ་རྩིས་པ་གསུམ། །འཇིག་རྟེན་ཁམས་ཀྱི་རྫུན་རྐྱལ་ཡིན། ཟེར་པ་ལྟར། རྫུན་རྐྱལ་དང་གཅིག དད་པའི་རྗེས་འབྲང་དང་གཉིས། ལས་ངན་དང་གསུམ་ཚོགས་ན།  མཇུག་འབྲས་ནི་འདི་འདྲ་རེ་ལས་ཅི་འོང་། དེ་གར་ལྷ་རྗེ་དག་གིས་སྲོལ་རྒྱུན་གྱི་ལམ་ནས་བཤའ་བཅོས་བྱས་པའི་ལག་ལྡུམ་དང་རྐང་ལྡུམ་ཡང་མཐོང་ཐོས་སུ་ཡོད།  དེང་རབས་ཀྱི་སྨན་ཁང་ནི། བི་ཇེ་ཟེར་བའི་ལུང་མཐིལ་གྱི་གྲོང་ཚོ་ཞིག་ཏུ་ནུབ་གླིང་པས་སྦྱིན་བདག་བགྱིས་ཏེ་བརྒྱབས་པ་གཅིག་རང་ཙམ་ཞིག་ཡོད་མོད། དེ་ཡང་ཆ་མི་ཚང་ལ། འགྲིམ་འགྲུལ་ཡང་ལ་མཐོན་པོ་དང་རི་ངོགས་གཟར་མོ་དག་བརྒྱུད་དགོས་པས་ནད་པ་ལྗིད་མོ་རྣམས་སླེབས་ཐབས་བྲལ། རྒན་གཞོན་ཅི་རིགས་པའི་ནད་པ་མང་པོ་ལུས་པོ་སྟན་ལ་འབྱར་ཞིང་། ཤ་སྐམ་ཁྲག་བྲི་ངང་དུ་ག་ལེར་ལྔ་ལམ་སྙེག་པ་མཐོང་དུས། དེང་རབས་ཚན་རྩལ་གྱི་བཀའ་དྲིན་ཡང་ཡིད་ལ་མི་འཁོར་བའི་རང་དབང་མེད།

ལུང་གཤོང་རྣམས་ཁོད་དོག་པའི་དབང་གིས་ཐོན་སྐྱེད་ཀྱི་བསྐྱེད་ཤིན་ཏུ་ཆུང་། དཔལ་འབྱོར་གྱི་ཡོང་ཁུངས་གཙོ་བོ་གཅིག་ནི་དབྱར་རྩྭ་དགུན་འབུ་རེད། སྤྱི་ཟླ་ལྔ་བའམ་དྲུག་པའི་བར་ཙམ་ལ། ཆུ་ཐང་དང་མེ་ཏོག་ཐང་སོགས་སུ་འབོད་པའི་ས་མཐོ་རི་ལུང་རྣམས་སུ་འབུ་འཐུ་རུ་འགྲོ། རང་རེའི་སྔ་མོའི་འཁྲུངས་རབས་རྟོགས་བརྗོད་རྣམས་སུ། དོན་མཐུན་རྣམས་ཡིད་བཞིན་གྱི་ནོར་བུ་ལེན་དུ་ཆུ་སྲིན་གྱི་མཚོ་དང་སྲིན་མོའི་གླིང་བརྒྱུད་པར་གསུངས་པ་ལྟར། འབུ་འཐུ་རྣམས་ཀྱང་ད་དུས་ན་ཉེན་ཁའི་འཕྲང་བརྒྱུད་དགོས། གང་ལ་ཟེར་ན། མེ་མདའ་ཐོགས་པའི་ཇག་རྐུན་མང་པོ་ཧམ་སྤྱོད་ཀྱི་མཚོ་བརྡོལ་བའི་མོན་ཐང་གི་གྲོང་ཁྱེར་དག་ནས་འབྱོར་ཏེ། བརྡུངས་ཏེ་འཕྲོགས་པ་དང་། བསད་དེ་འཕྲོག་པ། འཇིགས་སྣང་བསྐུལ་ཏེ་འཕྲོག་པ་སོགས། བོད་རིགས་ཉམ་ཆུང་ཚོ་ཨ་ཆད་ཨུ་ཐུག་ལ་གཏོད་གི་ཡོད། དོན་རྐྱེན་ཅི་འདྲ་ཞིག་བྱུང་ཡང་། ཉེན་རྟོག་པ་ནི་གླིང་གཞན་ཞིག་ནས་འོང་གི་ཡོད་པ་བཞིན་དུས་ལྟར་འབྱོར་དཀའ་བས། བྱ་རོག་ཁ་ཤ་ཁྱེར་ནས་འཕུར་ཤུལ་དུ་ཁྱིས་རྒྱུགས་ནས་དྲི་མ་སྣོམ་ཙམ་བྱེད་པ་དང་མཚུངས་ཏེ། ཉེས་ཅན་རྣམས་གར་སོང་ཆ་མེད་དུ་གྱུར་ནས་ཡུན་རིང་འགོར་རྗེས། ཁོང་ཚོ་སླེབས་ཏེ་སྐད་ཆ་ཙག་ཙིག་རེ་ཉན་རྗེས་ཕྱིར་ལོག་འགྲོ།  དེར་བརྟེན་རོང་པའི་ (མོན་པ་ཡང་ཟེར་ཏེ། དོལ་པོ་བས་བལ་པོ་ལ་འབོད་མིང་)། རྐུན་ཇག་ཚོས་བྷོཊ་ (རོང་པས་ཧི་མ་ལ་ཡའི་རི་རྒྱུད་ཀྱི་བོད་རིགས་ལ་འབོད་མིང་) གཅིག་དང་ཁྱི་གཅིག་བསད་པ་འདྲ་འདྲ་ཞེས་སྨྲས་པའི་གཏམ་ཡང་གོ་རྒྱུ་འདུག ལྷག་པར་འབུ་ཡི་རིན་གོང་ཇི་ལྟར་འཕེར་བ་དེ་ལྟར་རོང་ཐང་ནས་མོན་པ་འབུ་འཐུ་བའི་གྲོག་ཚང་བརྡོལ་ཏེ།  ཡུལ་ས་ཡུལ་མིའི་སྐལ་བ་དེ་ཆ་བགོས་ཡང་བགོས་སུ་འཁྱེར་གི་ཡོད།

སྤྱི་ཟླ་དྲུག་པའི་ནང་བལ་བོད་ཚོང་སྒོ་འབྱེད། དེ་དུས་ས་མཚམས་ཕྱོགས་གཉིས་ཀྱི་ཡུལ་ཚོ་ཁག་གི་དབར་བརྡ་ཡིག་སྐྱེལ་རེས་ཀྱིས་ཚོང་དུས་འདེབས། བོད་ཀྱི་འབྲོང་པ་རྫོང་དང་དོལ་པོའི་བར་ན་ལ་སྟོད་ཚོང་ར་དང་ལ་སྨད་ཚོང་ར་ཞེས་ཚོང་འདུས་ས་ཚིགས་གཉིས་ཡོད། ལོ་ལྟར་དེ་གཉིས་སུ་ཉིན་བཅོ་ལྔའམ་ཉི་ཤུ་ཙམ་གྱི་རིང་ས་མཚམས་ཀྱི་རྒྱལ་སྒོ་འབྱེད། རྒྱ་བོད་ཚོང་པ་ཚོས་ཐང་སྟོང་དུ་སྒར་བཏབ་སྟེ་ཚོང་ཟོག་སྣ་ཚོགས་བཤམས་ནས་སྒུག  དོལ་བོ་བ་རྣམས་རྟ་དྲེལ་དང་མཛོ་གཡག་ཁྱུ་འདེད་བྱས་ཏེ་ཚོང་ལ་འགྲོ། ལ་ཤས་ཀྱིས་ར་ལུག་ཀྱང་ཁེལ་མར་འདེད། ཉིན་གྲངས་གཉིས་སམ་གསུམ་མམ། ཡུལ་གྲོང་ལ་ལ་ནས་ཉིན་གྲངས་བདུན་ཡན་འགྲུལ་བཞུད་བྱེད་དགོས། ཚུར་ལོག་དུས་ཀྱང་དེ་ཙམ་མོ། །འདི་ནི་ ལོ་གཅིག་གི་མཁོ་དངོས་ཡོངས་རྫོགས་བསྒྲུབ་པའི་གོ་སྐབས་ཡག་ཤོས་ཡིན་ཏེ། དུས་ཚོད་འདི་ཡོལ་ན། བོད་ལ་ས་མཚམས་ཀྱིས་མི་ཐར། མོན་ཐང་ལ་ལམ་ཐག་གིས་སྙོབས་དཀའ། དེ་བས་ཚོང་ཟོག་རྙེད་རྒྱུ་ནི་ལས་སླ་བོ་ཞིག་གཏན་ནས་མིན། རྙེད་ཀྱང་རིན་གོང་ལྡེབ་ལྔའམ་དྲུག་ཙམ་འཕེར་འགྲོ།

ཡུལ་མི་རྣམས་ལ་དེང་དུས་ཀྱི་སློབ་སྦྱོང་མེད་པས་ཚོང་པ་ཁྲམ་པ་ཚོས་གོ་སྐབས་ལེན། དཔེར་ན། དུས་གེགས་ལོ་གསུམ་ཡན་ཡོལ་བའི་བཟའ་བཏུང་ཡང་ཉོ་ཞིང་སྤྱོད། ཚོང་འདུས་དེར་སྔར་ཡིན་ན་ཟ་ཁང་དང་ཚོང་ཁང་ལས་མེད་ཀྱང་། དེང་དུས་སུ། བོད་ས་ནས་ལོ་ཆུང་གཞོན་ནུ་མའི་ཚོགས་སླེབས་ཏེ། ཆང་ཁང་དང་ཞབས་བྲོ་ཁང་ཡང་ཕྱེས་ཏེ་མདོ་མེད་ལ་ལ་སྒྱུ་མའི་གྲོང་དུ་འཁྲིད་རྗེས་མྱ་ངམ་ཐང་དུ་འདོར་གྱི་ཡོད་ཚོད།

འགྲོས་འཕེར་བ་རྣམས་ཚོང་ལ་ཐེགས་ཤུལ་དུ་རྒན་བྱིས་འབའ་ཞིག་ལྷག་སྟེ། མཚན་གཉིད་མི་ཁུགས་ཙམ་དུ་རེ་སྒུག་བྱེད་མཁན་ནི་བྱིས་པ་ཚོ་རེད། གང་ལ་ཟེར་ན། འཕྱོས་མ་ལ་རོ་བཅུད་སྣ་ཚོགས་པའི་ཟས་རིགས་དང་། རྣམ་པ་སྣ་ཚོགས་པའི་ཆས་གོས་འབྱོར་སྟེ། ལྷམ་པ་དང་ཨི་ཁུང་སུ་རྒྱལ་འགྲན་པའི་ཞྭ་གོས་ལྷམ་རྙིང་རྣམས་ཐེངས་གཅིག་བརྗེ་བའི་དགའ་སྟོན་ཤར་རྒྱུ་ཡིན་པས་སོ།།