རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་དུ་དབུ་འཛུགས་གནང་བའི་འཇང་དགུན་ཆོས་ཐེངས་ ༢༩ པའི་ཐོག་དགེ་འདུན་པ་ཞལ་གྲངས་༢༩༥༥ འཛོམས་འདུག
ཟླ་འདིའི་ཕྱི་ཚེས་༢༤ ནས་ཟླ་རྗེས་མའི་ཕྱི་ཚེས་༡༥ བར་དུས་ཡུན་ཉིན་གྲངས་ ༢༡ རིང་ཚོགས་བཞིན་ཡོད་ལ། འཇང་དགུན་ཆོས་རིང་ལ་ཚད་མ་རྣམ་འགྲེལ་དང་ཚད་མ་ཀུན་བཏུས་གཙོ་བོར་བྱས་པའི་གཞུང་ཆེན་ཁག་གི་ཐོག་ཆོས་རྩོད་གནང་གི་ཡོད་པ་དང་། འཇང་དགུན་ཆོས་འགོ་འཛུགས་ཉིན་མོར་སེ་ར་བྱེས་སྨད་གཉིས་ཀྱི་མཁན་རིན་པོ་ཆེ་རྣམ་གཉིས་ནས་སློབ་གཉེར་བ་ཚོར་འཇང་དགུན་ཆོས་རིང་གི་སྒྲིག་ལམ་ཀུན་སྤྱོད་ཐོག་བླང་དོར་གྱི་བཀའ་སློབ་གནང་སོང་།
འདི་ལོའི་འཇང་དགུན་ཆོས་ནང་སེར་སྨད་གྲྭ་ཚང་ནས་དགེ་འདུན་པ་༣༢༠ དང་སེར་བྱེས་གྲྭ་ཚང་ནས་ ༦༥༠། འབྲས་བློ་གླིང་གྲྭ་ཚང་ནས་༦༠༤། སྒོ་མང་གྲྭ་ཚང་ནས་ ༤༥༦། དགའ་ལྡན་བྱང་རྩེ་གྲྭ་ཚང་ནས་ ༣༣༩། དགའ་ལྡན་ཤར་རྩེ་གྲྭ་ཚང་ནས་ ༢༤༨། རྒྱུད་སྨད་གྲྭ་ཚང་ནས་ ༡༥། རྒྱུད་སྟོད་གྲྭ་ཚང་ནས་༢༨། སྲད་རྒྱུད་གྲྭ་ཚང་ནས་ ༢༡། བཀྲིས་ལྷུན་པོ་ནས་ ༡༢༥། རྭ་སྟོད་གྲྭ་ཚང་ནས་༢༦། རྫོང་ཆོས་གྲྭ་ཚང་ནས་༤༤། རྣམ་རྒྱལ་གྲྭ་ཚང་ནས་༢༤། བལ་ཡུལ་ཀོ་པན་དགོན་པ་ནས་༢༡། དྭགས་པོ་བཤད་སྒྲུབ་གླིང་གྲྭ་ཚང་ནས་༡༨། དཀྱིལ་དགོན་ནོར་བུ་དགེ་འཕེལ་ནས་ ༡༦ བཅས་ཁྱོན་དགེ་འདུན་པ་ཞལ་གྲངས་༢༩༥༥ མཉམ་ཞུགས་གནང་ཡོད་པ་རེད་འདུག་དེ་དག་གི་ཁྲོས་ནས་དྭགས་པོ་བཤད་སྒྲུབ་གླིང་གྲ་ཚང་། དཀྱིལ་དགོན་ནོར་བུ་དགེ་འཕེལ་གླིང གྲ་ཚང་གཉིས་འདི་ལོ་གསར་དུ་མཉམ་ཞུགས་གནང་འདུག
འཇང་དགུན་ཆོས་གོ་སྒྲིག་ཚོགས་ཆུང་གི་རྒྱུན་ལས་སེར་སྨད་དགེ་བཤེས་བློ་བཟང་རྒྱལ་མཚན་ལགས་ཀྱིས་ངོ་སྤྲོད་གནང་བ་ལྟར་ན། འཇང་དགུན་ཆོས་ལ་བཅར་བའི་སློབ་གཉེར་བ་རྣམས་ལ་སེ་ར་བྱེས་སྨད་གཉིས་ཀྱི་ཐོབ་ཁུངས་གྲྭ་ཚང་དང་ཁང་ཚན་སོ་སོའི་ངོས་ནས་སྣེ་ལེན་གོ་སྒྲིག་དང་། འཇང་དགུན་ཆོས་ཚོགས་པའི་ངོས་ནས་སེ་ར་ཐེག་ཆེན་གླིང་ཕུད་པའི་ཕྱི་ནས་ཕེབས་པའི་ཚོགས་བཅར་བ་རྣམས་ལ་ལམ་གྲོན་དང་གསོལ་དོད་བཅས་འབུལ་གྱི་ཡོད་པ་མ་ཟད། ནད་མནར་བྱུང་མཁན་རིགས་ལ་སེ་ར་བྱེས་སྨད་གཉིས་ཀྱི་འཕྲོད་བསྟེན་སྨན་ཁང་ནས་བརྟག་དཔྱད་དང་སྨན་སྦྱིན་གྱི་དམིགས་བསལ་མཐུན་འགྱུར་གནང་གི་འདུག
ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས།
དགེ་འདུན་སྡེ་རྣམས་ཡར་ངོའི་ཟླ་བཞིན་འཕེལ།།
ཀུན་ཀྱང་མང་ཐོས་ཚུལ་བཞིན་སྒྲུབ་ལ་བརྩོན།།
ཁྱད་པར་རྒྱལ་བ་གཉིས་པ་ཙོང་ཁ་བའི།།
བསྟན་པ་ཕྱོགས་བཅུར་རྒྱས་པའི་བཀྲ་ཤིས་ཤོག།