བོད་ཀྱི་སྨྱུག་འཛིན་པའི་སྡེ་ཁག་གིས་རྒྱ་ནག་གི་འཁྱོག་བཤད་ལ་ལན་འདེབས་གསལ་བཤད་བྱེད་པའི་དུས་ལ་བསླེབ་ཡོད་པས་བོད་ཀྱི་ལོ་རྒྱུས་ནག་གསུབ་ཏུ་མི་འགྲོ་བའི་ཆེད་ལན་འདེབས་གསལ་བཤད་གནང་བའི་འབོད་སྐུལ་ཞུས་སོང་།
དེ་རིང་སྔ་དྲོའི་ཆུ་ཚོད་ ༩།༣༠ སྟེང་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ། བོད་ཀྱི་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོ་ལགས་ཀྱིས་བརྩམས་པའི་༼བོད་བོད་ཡུལ་ན་སྐྱིད། རྒྱ་རྒྱ་ཡུལ་ན་སྐྱིད༽ཅེས་པའི་དཔེ་དེབ་གསར་པ་ཞིག་དབུ་འབྱེད་ཀྱི་མཛད་སྒོ་ཞིག་ཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་ཕེབས་འདུག་པ་དང་། དེ་བཞིན་བཞུགས་སྒར་ཁུལ་གྱི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་འགན་འཛིན་དང་སྐུ་ཚབ་འཐུས་མི། སློབ་ཕྲུག་ཁག་ཅིག་བཅས་འཛོམས་འདུག
ཐོག་མར་གྲྭ་བག་གྲོ་ལགས་ཀྱིས་རང་ཉིད་ཀྱི་མི་ཚེའི་ལོ་རྒྱུས་སྙིང་བསྡུས་ཤིག་ངོ་སྤྲོད་དང་སྦྲགས་བོད་བོད་ཡུལ་ན་སྐྱིད། རྒྱ་རྒྱ་ཡུལ་ན་སྐྱིད་ཅེས་པའི་དཔེ་དེབ་བརྩམས་པའི་དགོས་དམིགས་སྐོར་ལ་ཁོང་གིས། དེབ་འདི་བྲིས་དགོས་དོན་ནི་ང་རང་མི་སྒེར་གྱི་ལོ་རྒྱུས་གཅིག་པོ་བཤད་བསྡད་ན་འགྲིག་གི་མེད་པ་དང་། བཙན་བྱོལ་ནང་ཆབ་སྲིད་བཙོན་པའི་མིང་འཁྱེར་ནས་བསྡད་པ་ཙམ་མ་ཡིན་པར་བོད་ནས་བཏང་བཞག་པ་དེ་ཚོ་འགན་འཁུར་བའི་ཐོག་བདག་པོ་རྒྱག་དགོས་པ་དང་། བོད་ནང་གི་པར་ཞིག་ཡིན་ཕྱིན་པར་བས་སོ་སོའི་སྲོག་འབེན་ལ་བཙུགས་ཏེ་ཚུར་ང་ཚོར་གཏོང་གི་ཡོད་པས། ང་ཚོས་དེ་དག་ལ་བདག་པོ་ཡག་པོ་བརྒྱབ་སྟེ་དབྱིན་ཡིག་དང་སྐད་ཡིག་ག་རེ་ཡིན་ནའང་དེབ་ཐེར་ནང་བཞག་སྟེ་མི་རབས་ནས་མི་རབས་བར་མཐོང་བ་ཞིག་བཟོ་དགོས་བསམ་སྟེ། ང་རང་གི་ལོ་རྒྱུས་གཅིག་པོ་བཤད་མ་བསྡད་པར་ལས་འགུལ་ཡིན་ན་རྒྱ་ཆེ་རུ་བཏང་བའི་བཟོ་འདྲ་པོ་བྱས་ནས་སོ་སོའི་ངོས་ནས་ད་ལྟའི་བར་དུ་བརྗོད་གཞི་འདྲ་མིན་ཐོག་བྲིས་པའི་དེབ་བཅོ་ལྔ་པ་དེ་ཡིན། ད་རེས་དེབ་ཕྲེང་ ༡༥ པ་འདོན་དགོས་དོན་གང་ཡིན་ཟེར་ན། ང་རང་ཕྱི་ལོ་ ༡༩༩༧ ལོར་ཨ་རིའི་བོད་རང་བཙན་སློབ་ཕྲུག་ཚོགས་པས་ཨ་རིར་བོད་ནང་གི་གནས་སྟངས་སྐོར་ལ་སྐད་ཆ་བཤད་པར་སྐད་བཏང་སོང་། དེ་དུས་མེས་ནི་སོ་ཌའི་འཁྲིས་ཀྱི་སྐད་གྲགས་ཆེ་བའི་མཐོ་སློབ་ཅིག་ཏུ་སྐད་ཆ་བཤད་པའི་སྐབས་སུ། རྒྱ་མིའི་སློབ་ཕྲུག་ ༤༠ ལྷག་ཡར་ཚོགས་ཁང་དུ་རྒྱུགས་ཡོང་ནས་ཚོགས་ཁང་ནང་ཟིང་ཆ་བསླངས་པ་མ་ཟད། ངའི་མདུན་ཅོག་ཁོ་ཚོས་རྐུབ་བཀྱག་བྱས་ཏེ་ལག་གི་ཁ་པར་འཕྲོག་པ་དང་། དེ་བཞིན། ཏཱ་ལའི་རུ་ཚོགས་དང་ཁྱེད་ཚོར་བཀས་བཀོད་རྒྱུན་འཛིན་ཞིང་བྲན་ལམ་ལུགས་ཀྱི་འཚོ་བ་སྐྱེལ་རྒྱུ་མ་རག་སྟབས་ཁྱེད་ཚོས་སྐད་རྒྱག་གི་ཡོད་པ་རེད། བོད་དེ་ལོ་རྒྱུས་ཐོག་ནས་རྒྱ་ནག་གི་ཆ་ཤས་ཡིན་པ་དང་བོད་དེ་རང་བཙན་ཡིན་པའི་དཔང་རྟགས་སྟོན་ཤོག་ཅེས་ང་བཀར་བ་རེད། སྐབས་དེར་ངས་རང་ཉིད་ཀྱི་མིག་མདུན་དུ་བྱུང་བའི་གནས་ཚུལ་སེམས་ལ་བཞག་སྟེ། ང་མ་ཤི་བར་དུ་བོད་ལོ་རྒྱུས་ཐོག་ནས་རྒྱ་ནག་གི་ཆ་ཤས་མིན་པ་ཡིག་ཚགས་དང་པར་རིས་ཐོག་ནས་འཛམ་བུ་གླིང་ལ་སྟོན་གྱི་ཡིན་ཞེས་ཁོ་ཚོར་བཤད་རྒྱུ་བྱུང་། དེ་རིང་དཔེ་དེབ་འདི་བཏོན་དགོས་པའི་རྒྱུ་མཚན་གཅིག་སྐབས་དེ་དུས་བཞག་པའི་དམ་བཅའ་ཞིག་ཀྱང་ཆགས་ཀྱི་ཡོད།
གཉིས་པ། རྒྱ་ནག་གཞུང་གིས་རྒྱབ་ཤ་དཀར་པོ་གཙོ་བྱས་པའི་བོད་ཀྱི་ལོ་རྒྱུས་འཁྱོག་བཤད་ཀྱི་དེབ་རབ་དང་རིམ་པ་སྤེལ་ཡོད་པ་རེད། ལོ་གསུམ་གྱི་གོང་དུ། རྒྱ་ནག་གིས་བོད་དེ་ཀྲུང་གོའི་མངའ་ཁོངས་རྙོག་མེད་ཡིན་ཟེར་བའི་ལྟད་མོ་ཧ་ཅང་སྡུག་བཅག་ཞིག་བཟོས་འདུག་པས། དེབ་འདི་རྒྱ་ནག་གི་འཁྱོག་བཤད་ལྟད་མོ་དེར་ལན་འདེབས་ཤིག་ཀྱང་ཡིན། ཞེས་དང་། འདས་པའི་ལོ་ངོ་ ༦༠ རིང་བཙན་བྱོལ་དུ་སྐྱེད་སྲིང་བྱས་པའི་བོད་ཀྱི་རྩོམ་པ་པོ་དང་ཉམས་ཞིབ་པ་སོགས་སྨྱུག་འཛིན་པའི་སྡེ་ཁག་གིས་ནང་ཁུལ་གྱི་གནས་ཚུལ་ཆུང་ཆུང་ལ་མགོ་མ་འཐོམ་པར་རྒྱ་ནག་གི་བོད་ཀྱི་ལོ་རྒྱུས་འཁྱོག་བཤད་ལ་ལན་འདེབས་བྱེད་རན་ཡོད་སྐོར་སོགས་བརྗོད་སོང་།
མཇུག་ཏུ་ཚོགས་གཙོ་པདྨ་འབྱུང་གནས་མཆོག་གིས། གྲྭ་བག་གྲོ་ལགས་བཙན་བྱོལ་ནང་ཕེབས་པ་ནས་བཟུང་དོན་མེད་དུ་མ་བཞུགས་པར་འགྲོ་ཆགས་འདུག་གསུམ་དང་། བསམ་རྒྱུ་ལས་རྒྱུ་ག་རེ་ཡིན་ན་བོད་དོན་ཆེད་ཕྱག་ལས་གནང་བསྡད་པའི་གང་ཟག་ཞིག་ཏུ་མཐོང་བསྡད་ཡོད། དེར་བརྟེན། ད་རེས་བོད་བོད་ཡུལ་ན་སྐྱིད། རྒྱ་རྒྱ་ཡུལ་ན་སྐྱིད་ཅེས་པ་འདི་ཕྱག་དེབ་ ༡༥ པ་དེ་ཆགས་བསྡད་ཡོད་པ་དང་། དེ་ཡང་སྒྲིག་འཛུགས་ཤིག་མ་ཡིན་པར་གང་ཟག་སྒེར་ཞིག་གིས་སྐུ་ངལ་བསྐྱོན་ནས་གྲུབ་བཞག་པ་ཞིག་ཆགས་བསྡད་ཡོད་པ་རེད། ལྷག་པར་དུ་ད་རེས་ཀྱི་དེབ་ལ་ཆ་བཞག་ན་དོན་གནད་ ༣༥ ཐོག་ཡོད་པ་དང་། དེ་ཡང་བོད་དེ་ལོ་རྒྱུས་ཐོག་ནས་རང་བཙན་གཙང་མ་རེད་ཅེས་ལབ་པ་ཙམ་མ་ཡིན་པར་དོན་དམ་སྒྲུབ་བྱེད་དེ་དག་བཀོད་པའི་དེབ་ཅིག་སྟེ། ང་རང་ཚོར་ཐུན་མོང་མ་ཡིན་པའི་རྒྱལ་དར་དང་རྒྱལ་གླུ། དེ་བཞིན། དམག་མི། སྦྲག་ཐམ་ཡོད་པ་སོགས་གནའ་བོའི་ཤུལ་རྫས་ཁག་གི་པར་རིས་ལ་སོགས་པ་དང་། བོད་རང་བཙན་སྐབས་རྒྱལ་ཁབ་གང་དང་གང་གི་བར་ཆིངས་ཡིག་བཞག་པ་དང་། དེའི་ཐོག་ང་ཚོའི་ཕྱི་སྲིད་ལས་ཁུངས་ནས་ག་བ་ག་བ་ལ་ཡི་གེ་བཏང་བ་སོགས། གང་ལྟར་གནད་དོན་མང་པོ་ཞིག་ལོ་ ༣ རིང་དཀའ་ལས་བརྒྱབས་ཏེ་ཕྱོགས་སྒྲིག་གནང་བཞག་པ་ཆགས་ཀྱི་ཡོད་པ་རེད། དེ་ཚོའི་གྲས་དེ་སྒྲིག་འཛུགས་ཤིག་ཡིན་ན་འོས་ཙམ་ཡིན་མོད། གང་ཟག་སྒེར་ཞིག་གི་ངོས་ནས་ཞེ་དྲགས་ཁག་པོ་རེད། འོན་ཀྱང་། རང་གི་དམ་བཅའ་བློས་མ་བཏང་བར་འདི་འདྲ་ཞིག་གནང་ཐུབ་པར་ལེགས་གསོལ་བསྔགས་བརྗོད་ཞུ་རྒྱུ་ཡིན། ཞེས་གསུངས་སོང་།
གསར་འགོད་པ། སྐལ་བཟང་སྦྱིན་པ།
