ན་གཞོན་ནུས་སྟོབས་གོང་འཕེལ་གྱི་ཟབ་སྦྱོང་ཐེངས་དང་པོའི་ཐོག་བོད་མིའི་ས་གནས་ཁག་ ༡༡ ནས་ན་གཞོན་གྲངས་ ༡༧ མཉམ་ཞུགས་གནང་འདུག
དེ་རིང་སྔ་དྲོའི་ཆུ་ཚོད་ ༡༠ སྟེང་། དྷ་སྟེང་བོད་ཁྱིམ་སློབ་གྲྭའི་ཞི་བདེ་ཚོགས་ཁང་དུ། བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་ཚན་པ་དང་བོད་མིའི་མདུན་ལམ་ལམ་སྟོན་ལྟེ་གནས་ཁང་གི་གཉིས་ཀྱི་གོ་སྒྲིག་འོག བདུན་ཕྲག་གཅིག་རིང་གི་ན་གཞོན་ནུས་སྟོབས་གོང་འཕེལ་ཟབ་སྦྱོང་ཐེངས་དང་པོ་དབུ་འཛུགས་གནང་སོང་བ་དང་། མཛད་སྒོའི་སྟེང་ནང་སྲིད་དྲུང་ཆེ་དཔེ་ཟུར་དབང་འདུས་ཚེ་རིང་ལགས་ཀྱི་གཙོའི་ཟབ་སྦྱོང་སྤྲོད་མཁན་རྒྱ་གར་བྷིང་ལོར་ནས་ཆེད་དུ་གདན་ཞུ་གནང་བའི་རྒྱ་གར་བ་གཉིས། དེ་བཞིན་བོད་མིའི་ས་གནས་ཁག་ ༡༡ ནས་ན་གཞོན་གྲངས་ ༡༧ བཅས་ཁྱོན་མི་གྲངས་ ༣༠ ཙམ་འཛོམས་འདུག
མཛད་སྒོའི་ཐོག་མར་ནང་སྲིད་ན་གཞོན་རོགས་སྐྱོར་ཚན་པའི་འགན་འཛིན་ཐུབ་བསྟན་རིག་འཛིན་ལགས་ནས་ཟབ་སྦྱོང་གི་དམིགས་ཡུལ་སོགས་ངོ་སྤྲོད་གནང་དོན། ན་གཞོན་ནུས་སྟོབས་གོང་འཕེལ་གྱི་ཟབ་སྦྱོང་ཚོགས་པའི་དགོས་དམིགས་གཙོ་བོ་དེ། བོད་མི་ན་གཞོན་ཚོར་མི་ཚེའི་ནང་བཟང་ཕྱོགས་ཀྱི་འགྱུར་བ་དང་ཁ་ཕྱོགས་སྟོན་ཐབས་རང་ལ་དམིགས་པ་ཞིག་ཡིན་པ་དང་། མི་ཚེའི་ནང་གནད་དོན་ག་རེ་ཡིན་ན་ཡང་བྱུང་སྲིད་པ་དང་འགྱུར་བ་འགྲོ་སྲིད་པ་ཞིག་ཡིན་སྟབས། གནས་སྟངས་དང་མཐུན་པའི་སྒང་ནས་འགྱུར་བ་དེ་དག་དང་མཉམ་དུ་མི་ཚེའི་ཁ་ཕྱོགས་ཡག་པོ་ཞིག་ལ་འགྲོ་ཐུབ་པ་དང་གདོང་ལེན་ཐུབ་པ་སོགས་ཀྱི་སྒང་ལ་ཆེད་དམིགས་ཟབ་སྦྱོང་སྤྲོད་རྒྱུ་དང་། དེ་བཞིན་ཟབ་སྦྱོང་སྤྲོད་མཁན་གཉིས་ཀྱིས་མཉམ་ཞུགས་པ་ཚོར་ཟབ་སྦྱོང་སྤྲོད་ཞོར་དང་ལྷན་དུ་ཁོ་ཚོའི་འཇོན་ནུས་དང་མཉམ་ཞུགས་གནང་སྟངས། མི་ཚེའི་རྒྱབ་ལྗོངས་སོགས་ལ་རྒྱུས་ལོན་གྱིས་ཟབ་སྦྱོང་ཉིན་མཐའ་མ་དེར་ཁོ་ཚོ་མི་རེའི་མི་ཚེའི་དམིགས་ཡུལ་དང་འཆར་གཞི་ག་རེ་ཡོད་སོགས་རག་ཟིན་ཞིག་བཟོ་རྒྱུར་གྲ་སྒྲིག་ཡོད་སྐོར་བརྗོད་སོང་།
ཡང་ཁོང་གིས། ཐེངས་འདིར་ཟབ་སྦྱོང་ནང་ཞུགས་མཁན་ཚོར་མཚོན་ན། མི་ཚེའི་ནང་མདུན་ལམ་དང་ལས་དོན་ཕྱོགས་ལ་གོམ་པ་ག་འདྲ་ཞིག་རྒྱག་དགོས་པ་དེ་དག་ཐད་གསལ་བོ་མེད་པ་དང་། མི་ཚེའི་མདུན་ལམ་ཐད་རོགས་སྐྱོར་དང་མཐུན་སྦྱོར་ཞིག་དགོས་པ་དང་། གོམ་པ་རྒྱག་པར་དམིགས་ཡུལ་དང་ལམ་ཁ་གསལ་བོ་མེད་པ་ཞིག་གི་ཐོག་ནས་ཟབ་སྦྱོང་འདིར་མཉམ་ཞུགས་བྱས་པར་ངོས་འཛིན་བྱེད་བཞིན་ཡོད་ལ། ཟབ་སྦྱོང་འདི་ལ་མཚོན་ན། གློ་བུར་དྲན་ནས་གོ་སྒྲིག་གནང་བ་ཞིག་མིན་པར་མདུན་ལམ་སློབ་སྟོན་ཁང་ལ་མདུན་ལམ་ལམ་སྟོན་པ་གཉིས་ཡོད་པ་ལྟར། ལོ་ལྟར་ཁོང་གཉིས་བོད་མི་འདུས་སྡོད་ཀྱི་ས་གནས་བཅུ་ལྷག་ལ་ཕྱིན་ནས་ན་གཞོན་ཚོས་མདུན་ལམ་སློབ་སྟོན་དང་། ཕ་མ་ཚོས་རང་གི་བུ་ཕྲུག་ལ་སྲུང་སྐྱོབ་ག་འདྲ་བྱེད་དགོས་པ་དང་། ན་གཞོན་ཚོར་ལས་ཀའི་གོ་སྐབས་ག་རེ་ཡོད་སོགས་ལ་གོ་རྟོགས་སྤེལ་སྐབས། ས་གནས་དེ་དག་གི་མི་མང་དང་གཞོན་སྐྱེས་ཚོས་ན་གཞོན་མདུན་ལམ་ལམ་སྟོན་གྱི་ཟབ་སྦྱོང་རེ་ཚོགས་ཐུབ་པ་ཡིན་ན་ཡག་པོ་འདུག་ཅེས་བསམ་ཚུལ་ཤུགས་ཆེན་ཡོང་གི་ཡོད་སྟབས། ཆེད་དམིགས་ཟབ་སྦྱོང་འདི་ལྟ་བུ་གོ་སྒྲིག་བྱས་པ་རེད། ཅེས་བརྗོད་སོང་།
དེའི་རྗེས་མཉམ་ཞུགས་གནང་མཁན་ཚོས་རང་ཉིད་ངོ་སྤྲོད་དང་འབྲེལ་མི་ཚེའི་ལོ་རྒྱུས་རྒྱབ་ལྗོངས་སོགས་ཀྱི་སྐོར་་ཞུས་སོང་། མཉམ་ཞུགས་པ་མང་ཆེ་བ་བོད་མི་འདུས་སྡོད་ཀྱི་གཞིས་ཆགས་ཁག་ནས་ཕེབས་པ་ཡིན་པ་དང་། མཉམ་ཞུགས་གནང་མཁན་ཁྲོད་མཐོ་སློབ་འགྲིམས་ཚར་བ་དང་མཐོ་སློབ་ལ་འགྲོ་མ་ཐུབ་པར་སློབ་སྦྱོང་མཚམས་བཞག་ཡོད་མཁན། དེ་བཞིན་ནད་དང་ན་ཚ་སོགས་ཀྱིས་འཛིན་གྲྭ་བཅུ་གཉིས་ཐོན་རྗེས་སློབ་གྲྭར་འགྲོ་མ་ཐུབ་མཁན་ཡོད་པ་མ་ཟད། མཐོ་སློབ་ཀྱི་སློབ་སྦྱོང་སོགས་ཚར་ཡོད་ན་ཡང་ལས་ཀ་ག་རེ་གཉེར་དགོས་པ་དང་། རང་གི་དམིགས་ཡུལ་དང་མཐུན་པའི་ལས་དོན་བསྒྲུབས་མ་ཐུབ་པར་ལྷག་ཡོད་པ། སློབ་གྲྭར་འགྲོ་མཚམས་བཞག་ནས་ཚོང་ལས་གཉེར་འདུག་མཁན་སོགས་ཡོད་པ་དང་། ཁོ་ཚོ་མང་ཆེ་བས་ཟབ་སྦྱོང་འདི་དང་འབྲེལ་རང་གི་མདུན་ལམ་ཐད་སྔར་ནས་གསལ་ཁ་ཡོང་བ་དང་གོམ་པ་གང་ལ་སྤོས་དགོས་མིན་སོགས་ཀྱི་དམིགས་ཡུལ་ངེས་བརྟན་ཞིག་ཆགས་ཐུབ་པའི་རེ་བ་ཡོད་སྐོར་བརྗོད་སོང་།
མཇུག་ཏུ་ནང་སྲིད་དྲུང་ཆེ་ལགས་ནས་ཟབ་སྦྱོང་ནང་ཞུགས་མཁན་ཚོར་འཚམས་འདྲི་དང་འབྲེལ། ནང་སྲིད་ལས་ཁུངས་ཀྱི་ལས་འགན་གཙོ་བོ་བོད་མིའི་སྤྱི་ཚོགས་གང་དུ་ཡིན་ཡང་། བོད་མི་ན་གཞོན་ཚོར་སྐྱེད་སྲིང་ཡག་པོ་ག་འདྲ་བྱེད་དགོས་པ་དང་བོད་མི་ཚོའི་འཚོ་བའི་ཐབས་ལམ་ཡག་པོ་བྱུང་ཐབས་ག་འདྲ་ཡོད་པ། དམིགས་བསལ་གཞོན་སྐྱེས་ཚོར་ལམ་སྟོན་དང་མདུན་ལམ་སྟོན་ཐུབ་པ་ག་རེ་ཡོད་པ་དང་། དཀའ་ངལ་ཡོད་པ་ཚོའི་དཀའ་ངལ་དེ་དག་ག་འདྲ་བྱས་ཏེ་སེལ་དགོས་པ། གཞན་བོད་མི་འདུས་སྡོད་གཞིས་ཆགས་ཁག་གི་སོ་ནམ་ཞིང་ལས་དང་མཉམ་འབྲེལ། རྒས་ཁོག་ལྟ་སྐྱོང་སོགས་སྐབས་སུ་བབས་པའི་ལས་དོན་དེ་དག་ཆགས་ཡོད་སྟབས། དེ་རིང་གི་ན་གཞོན་ནུས་སྟོབས་གོང་འཕེལ་གྱི་ཟབ་སྦྱོང་དེ་ཡང་ཆེད་དམིགས་ན་གཞོན་ཚོའི་མདུན་ལམ་ཆེད་དུ་ཡིན་སྐོར་བརྗོད་སོང་།
གཞན་ཡང་ཁོང་གིས་ཐེངས་འདིར་ཟབ་སྦྱོང་ནང་ཞུགས་མཁན་མང་ཆེ་བ་སློབ་སྦྱོང་གང་ལ་གང་འཚམ་བྱས་མྱོང་མཁན་རྐྱང་རྐྱང་ཡིན་པ་དང་། ཁྱེར་རང་ཚོར་སློབ་སྦྱོང་གི་རྨང་གཞི་ཡོད་ན་ཡང་། ག་འདྲ་བྱས་ཏེ་བསམ་བློ་གཏོང་དགོས་པ་སོགས་ལ་ལམ་སྟོན་གྱིས་མ་འདང་བར་ལྷག་ཡོད་པ་ཞིག་ཡིན་པ་དང་། དེ་དག་གི་ཐད་ཁྱེད་རང་ཚོར་དམིགས་ཡུལ་ག་རེ་ཡོད་པ་གཞིར་བཟུང་གནད་ལ་ཁེལ་བའི་ལམ་སྟོན་ཞིག་ཐུབ་པར་གོ་སྒྲིག་བྱས་པ་ཡོད་པ་དང་། འདིར་ཆེད་དུ་ཟབ་སྦྱོང་སྤྲོད་མཁན་ཆེད་ལས་པ་གཉིས་གདན་ཞུ་ཞུས་ཡོད་པ་ལྟར། ཁོང་རང་གཉིས་ཀྱིས་ཁྱེད་ཚོའི་བསམ་བློའི་ནང་ག་རེ་ཡོད་པ་བཞིན་ཏག་ཏག་ལམ་སྟོན་གནང་ཐུབ་པའི་ཡིད་ཆེས་བྱེད་བཞིན་ཡོད། ཡིན་ན་ཡང་། གལ་ཆེ་ཤོས་མིའི་ཚེའི་ནང་ལས་དོན་ག་རེ་བྱེད་བསམ་ན་རྣམ་གྲངས་དཔེ་མང་པོ་ཡོད་པ་དང་། ལས་དོན་ག་རེ་བདམས་པ་ཡིན་ནའང་བློ་རྩེ་གཅིག་ཏུ་གཏད་ནས་དེ་ག་རང་གི་སྒང་ལ་མདུན་སྐྱོད་བྱས་པ་ཡིན་ན། ལས་ཀ་ག་རེ་ཡིན་ནའང་མི་འགྲུབ་པ་ཞིག་མེད་པ་དང་། གཞན་ཟབ་སྦྱོང་ནང་ཞུགས་མཁན་ཚོས་ལས་ཀ་མ་རག་པ་དང་རང་ཉིད་ལ་ནུས་པ་མི་འདུག་བསམ་ནས་སེམས་ཤུགས་ཆགས་རྒྱུ་མེད་པར་བརྩོན་འགྲུས་བྱས་པ་ཡིན་ན་མི་ཐུབ་པ་གང་ཡང་མེད་པ་རེད། ཅེས་བརྗོད་བྱུང་།
གསར་འགོད་པ། སངས་རྒྱས་དཀོན་མཆོག
ཟབ་སྦྱོངས་ནང་མཉམ་ཞུགས་གནང་མཁན་གྱིས་མི་འགྲོ་ག་འདྲ་བྱས་ནས་བསྡུས་པ་
རེད་ལ་མི་མང་ལ་བརྡ་ཁྱབ་ག་དུས་བཏང་བ་རེད་རྒྱུད་ལམ་ག་འདྲ་རྒྱུད་ནས་བརྡ་ཁྱབ་
བཏང་བ་རེད་ས་ཁུལ་ཆ་བགོས་རེད་དམ་བོད་མིའི་གཞིས་ཆགས་ཚང་མ་རེད་འདི་སྐོར་
འབྲེལ་ཡོད་འགན་འཁུར་ལས་བྱེད་ནས་གསལ་བཤད་ཡོང་བ་ཞུ།