མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་འདུའི་ཐོག་རྒྱ་ནག་གཞུང་གིས་༧པཎ་ཆེན་རིན་པོ་ཆེ་མཆོག་ལ་མཇལ་འཕྲད་ཞུ་རུ་འཇུག་གི་མེད་པ་དེས་ཁོང་སྐུ་འཚོ་གཞེས་ཡིན་མིན་ཐད་བློ་འཚབ་དང་དོགས་གཞི་སྐྲུན་གྱི་ཡོད་སྐོར་གསུངས་འདུག
ཁ་སང་ཕྱི་ཚེས་ ༡༡ ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་གར་སོང་ཆ་མེད་ཀྱི་གནད་དོན་སྐོར་ཚོགས་འདུའི་ཐོག རྒྱ་ནག་གཞུང་གིས་བོད་ནང་དམ་དྲག་ཆེན་པོ་བྱེད་ཀྱི་ཡོད་པ་དང་། ༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་གཙོ་བོར་གྱུར་བའི་གར་སོང་ཆ་མེད་དུ་གྱུར་བའི་བོད་མི་རྣམས་ཀྱི་གནད་དོན་ཐད་དོ་སྣང་ཤུགས་ཆེན་གནང་དགོས་པའི་བསྒྲགས་གཏམ་སྤེལ་ཡོད་འདུག
ཚོགས་འདུ་དེའི་ཐོག་སྐུ་ཞབས་ཀེ་མོ་ལིར་ (Kai Mueller) ལགས་ཀྱིས་ཧད་སིན་ཀེ་འགྲོ་བ་མིའི་ཐོབ་ཐང་ཐེབས་རྩ་ཁང་ (Helsinki Foundation for Human Rights) གི་ཚབ་ཞུས་ནས་བསྒྲགས་གཏམ་སྒྲོགས་སྦྱང་ཞུ་སྐབས། ང་ཚོས་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་དང་འབྲེལ་ཡོད་ཀྱི་ཚོགས་སྡེ་ཁག་གཞན་ནས་བོད་མི་རྣམས་དང་ལྷག་པར་དུ་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་གར་སོང་ཆ་མེད་དུ་གྱུར་བའི་གནས་ཚུལ་ལ་མུ་མཐུད་འདྲི་ཞིབ་དང་བློ་འཚབ་ཀྱི་རྣམ་འགྱུར་སྟོན་པའི་རེ་བ་བྱེད་ཀྱི་ཡོད། ཅེས་བརྗོད་འདུག
འགྲོ་བ་མིའི་ཐོབ་ཐང་གི་ཐེབས་རྩ་དེའི་བསྒྲགས་གཏམ་ནང་། ང་ཚོས་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བ་དང་འབྲེལ་བའི་ཚོགས་སྡེ་ཁག་ནས་བོད་ནང་གར་སོང་ཆ་མེད་དུ་གྱུར་པའི་བོད་མི་རྣམས་ཀྱི་ཚབ་ཞུས་ནས་མུ་མཐུད་ལས་དོན་སྒྲུབ་པར་ཐུགས་རྗེ་ཆེ་ཞུ་འདོད་བྱུང་བ་དང་། གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་གིས་དགོས་ངེས་ཀྱི་རྟོག་ཞིབ་བྱས་ཏེ། གར་སོང་ཆ་མེད་དུ་གྱུར་བའི་བོད་མི་ཚོ་མི་བརྗེད་པ་བྱེད་ཀྱི་ཡོད་པ་མ་ཟད། རྒྱལ་སྤྱིའི་སྤྱི་ཚོགས་ནང་ལྷག་ཡོད་པ་རེད། ཅེས་བཀོད་འདུག
དེ་བཞིན་བོད་མི་རྣམས་བཙན་དབང་གིས་གར་སོང་ཆ་མེད་དུ་གྱུར་བ་ནི་རྒྱུན་ལྡན་ཞིག་ཡིན་པ་དང་། ཉེ་ཆར་རྔ་བ་ཀིརྟི་ནས་ཡིན་པའི་གྲྭ་བློ་བཟང་རྡོ་རྗེ་ལགས་དང་གྲྭ་བློ་བཟང་ཐབས་མཁས་ལགས། དེ་བཞིན་གྲྭ་ཐུབ་པ་ལགས་བཅས་གར་སོང་ཆ་མེད་དུ་གྱུར་བའི་དགེ་འདུན་པ་གསུམ་བཙོན་འཇུག་བྱས་ཡོད་པའི་གནས་ཚུལ་ཐོན་ཡོད་པ་དང་། ད་ལྟའི་ཆར་གྲྭ་བློ་བཟང་ཐབས་མཁས་ལགས་དང་ཐུབ་པ་ལགས་གཉིས་གར་ཡོད་ཀྱི་གནས་ཚུལ་ཤེས་རྟོགས་ཐུབ་ཀྱི་མེད་སྐོར་སྙན་སེང་ཞུས་ཡོད་འདུག་ལ། ཕྱི་ལོ་ ༢༠༠༩ ལོ་ནས་ཁུལ་དེར་དམ་དྲག་ཤུགས་ཆེན་བྱེད་ཀྱི་ཡོད་སྐོར་བཀོད་འདུག
༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་ཚུལ་དང་འབྲེལ་ནས་བསྒྲགས་གཏན་དེའི་ནང་། རྒྱ་ནག་གཞུང་གིས་རིན་པོ་ཆེ་དགུང་ལོ་ ༦ ཐོག་འཛིན་བཟུང་བཙན་འཁྲིད་བྱས་ཏེ་ལོ་ངོ་ ༢༤ འཁོར་ཀྱི་ཡོད་པ་དང་། ད་བར་གར་ཡོད་ཤེས་རྟོགས་མེད་པར་གྱུར་ཡོད་པ་རེད། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་འོག་གི་ཆེས་མཐོའི་འགྲོ་བ་མིའི་ཐོབ་ཐང་ཚོགས་ཆུང་དང་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་། བྱིས་པའི་ཐོབ་ཐང་ཚོགས་ཆུང་དང་དམིགས་བསལ་རྟོག་ཞིབ་པ། དེ་བཞིན་རྒྱལ་ཁབ་ཀྱི་ཚོགས་མི་རྣམས་ནས་རྒྱ་ནག་གཞུང་ལ་དགེ་འདུན་ཆོས་ཀྱི་ཉི་མ་མཆོག་གར་ཡོད་ཀྱི་གནས་ཚུལ་དང་། ཁོང་ལ་མཇལ་འཕྲད་བྱ་རྒྱུའི་རེ་སྐུལ་ཞུས་པར་དགའ་ཚོར་སྐྱེས་ཀྱི་ཡོད། ཡིན་ནའང་། རྒྱ་ནག་གཞུང་གིས་མཇལ་འཕྲད་ཞུ་རུ་འཇུག་གི་མེད་པ་དེས། དགེ་འདུན་ཆོས་ཀྱི་ཉི་མ་མཆོག་ད་ལྟ་སྐུ་འཚོ་གཞེས་ཡིན་མིན་ལ་བློ་འཚབ་དང་དོགས་གཞི་སྐྲུན་གྱི་ཡོད་པ་རེད། ཅེས་དང་། དགེ་འདུན་ཆོས་ཀྱི་ཉི་མ་མཆོག་གར་སོང་ཆ་མེད་དུ་གྱུར་བའི་གནད་དོན་དེས་བོད་མི་མང་པོ་ཞིག་ལ་རྒྱ་ནག་གཞུང་གིས་བོད་བརྒྱུད་ནང་བསྟན་ལམ་སྲོལ་ལ་ཐེ་བྱུས་དང་། ཁྱད་གསོད་བྱས་པ་ཞིག་མཚོན་གྱི་ཡོད་ལ། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་འབྲུ་དོན་ལ་རྩིས་མེད་རྡོག་རོལ་བཏང་བ་ཞིག་ཀྱང་མཚོན་གྱི་ཡོད། ཅེས་བཀོད་འདུག
གསར་འགོད་པ། ཀླུ་མགོན་ཐར།
