རྒྱལ་སྟོན་དུས་ཆེན་ལ་རྒྱལ་དར་འཕྱར་ནས་བསྟོད་གླུ་ལེན་དགོས་པའི་བཀའ་རྒྱར་མ་ཉན་པའི་རྐྱེན་གྱིས་བོད་མི་ ༦ འཛིན་བཟུང་བྱས་ཡོད་འདུག
འབྲེལ་ཡོད་ཅིག་གིས་བརྒྱུད་ནས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༢༠ ཙམ་ལ་བོད་ནག་ཆུ་ས་ཁུལ་རྟར་ཆེན་གྲོང་རྡལ་དུ། རྒྱ་ནག་གཞུང་གིས་རྒྱ་ནག་དམར་ཤོག་ཚོགས་པ་བཙུགས་ནས་ལོ་ངོ་ ༧༠ འཁོར་བའི་དུས་སྟོན་དང་བསྟུན། བོད་མི་ཚོས་རྒྱ་ནག་གི་རྒྱལ་དར་འཕྱར་ཏེ། དམར་ཤོག་ཚོགས་པར་བསྟོད་གླུ་ལེན་དགོས་སྐོར་བཙན་སྐུལ་བྱས་པ་དྭང་ལེན་མ་བྱས་པར་བརྟེན། བོད་མི་ ༦ ལམ་བར་ནས་འཛིན་བཟུང་བཙན་འཁྲིད་བྱས་ཡོད་འདུག
བོད་མི་ ༦ དེ་ནི་རྟར་ཆེན་གྲོང་རྡལ་ཤག་རོང་པོ་དགོན་གྱི་ཡུལ་སྡེ་གེ་སོའི་ཚ་ལྷིས་དང་སྲ་བྷ་གྲོང་ནས་སྨན་པ་ཚེ་རྒྱལ་དང་དབྱངས་འཕེལ། བདུད་འདུལ་ལྷ་རྒྱས། ནོར་བཟང་། ཤེས་དབང་རྣམ་རྒྱལ། སྲིད་ཐར་དབང་རྒྱལ་བཅས་ཡིན་པ་དང་། ནང་མི་སོགས་མི་སུ་གང་ལའང་ཐུག་འཕྲད་བྱེད་དུ་བཅུག་མེད་པ་དང་། ནང་མི་ཚོས་ཟ་མ་དང་ཉལ་ཆས་སོགས་སྐྱེལ་ཆོག་པའི་རེ་བ་ཞུས་ཡོད་ཀྱང་སྤྲོད་དུ་བཅུག་མེད་པ་མ་ཟད། དེ་ལྟར་བྱས་ཚེ་ཉིན་གྲངས་མང་པོའི་རིང་བཀག་ཉར་བྱ་རྒྱུ་ཡིན་པའི་འཇིགས་སྐུལ་སོགས་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། སྨན་པ་ཚེ་རྒྱལ་ལགས་ནི་ཁོ་རང་གི་བཟའ་ཟླ་དཀར་དབྱངས་ཀྱི་ནད་གཡོག་བྱས་ཏེ་སྨན་ཁང་ནས་ཁྲིད་སོང་ཡོད་པ་དང་། སྨན་པ་ཚེ་རྒྱལ་ནི་རྒྱུན་དུ་ཕ་ཡུལ་ལ་ཕན་ཐོགས་ཆེ་བའི་སེམས་བཟང་ཅན་གྱི་སྨན་པ་ཞིག་ཡིན་པ་དང་། དེ་བཞིན་སྲིད་ཐར་དབང་རྒྱལ་ལགས་ཡང་དཔལ་འབྱོར་ཞན་པ་ཚོར་ཟས་གོས་དང་དངུལ་སོགས་ཀྱིས་རོགས་སྐྱོར་བྱེད་མཁན་ཞིག་ཡིན་པ་དང་། ཉེ་སྔོན་ནས་རྒྱ་ནག་གི་རྒྱལ་སྟོན་དུས་ཆེན་གྱི་མཛད་སྒོ་ཟེར་བའི་སྟེང་། ནག་ཆུ་རྟར་ཆེན་གྲོང་རྡལ་དུ་སྲིད་གཞུང་མི་སྣ་ལྟ་སྐོར་ལ་ཡོང་གི་ཡོད་སྐོར་བརྗོད་ནས་དམ་དྲག་ཤུགས་ཆེན་བྱེད་བཞིན་ཡོད་སྐོར་སོགས་བརྗོད་འདུག
ད་ལྟའི་ཆར་རྒྱ་ནག་གཞུང་གིས་རྒྱལ་སྟོན་དུས་ཆེན་ཟེར་བའི་འོག་བོད་ཁུལ་གྱི་ས་ཆ་སོ་སོར་དམར་ཤོག་ཚོགས་པར་བསྟོད་གླུ་དང་དགའ་བསུ་བྱེད་པའི་བྱ་འགུལ་སྣ་ཚོགས་སྤེལ་བར་བཙན་སྐུལ་གཏོང་གི་ཡོད་པ་དང་། ས་ཁུལ་མང་པོའི་ནང་བོད་མི་ཚོ་བསྡུས་ནས་རྒྱ་ནག་གི་རྒྱལ་དར་འཕྱར་བཅུག་ནས་དགའ་བསུའི་རྣམ་འགྱུར་སོགས་སྟོན་བཅུག་གི་ཡོད་པ་དང་། རྔ་བ་དང་མཛོད་དགེ་སོགས་ནས་དམར་ཤོག་ཚོགས་པར་བསྟོད་པ་ཞེས་པའི་གླུ་གཞས་འགྲན་བསྡུར་སོགས་བྱེད་བཅུག་གི་ཡོད་པ་མ་ཟད། རྒྱལ་སྟོན་དུས་ཆེན་དང་བསྟུན་མི་མང་གི་བདེ་འཇགས་ཟེར་བ་སོགས་ལ་ཁ་གཡར་ནས་བོད་མི་ཚོའི་འགྲོ་འདུག་སྤྱོད་གསུམ་དང་། གང་བྱུང་སྔོག་བཤེར་བྱེད་པ་སོགས་དཀའ་ངལ་ཆེན་པོ་བཟོ་བཞིན་ཡོད་འདུག
བོད་ཀྱི་རྒྱལ་ས་ལྷ་ས་གཙོའི་ས་ཁུལ་མང་པོའི་དགོན་པ་དང་གཙུག་ལག་ཁང་གྲོང་སྡེ་སོགས་སུ་རྒྱ་ནག་གི་རྒྱལ་དར་སྒྲེང་འཛུགས་དགོས་པའི་བཙན་བཀའ་གཏོང་བཞིན་ཡོད་པ་དང་། ད་ལྟའི་ཆར་དྲ་ལམ་ཁག་ཏུ་བོད་ཀྱི་རྒྱལ་ས་ལྷ་སའི་གཙུག་ལག་ཁང་དང་དགོན་པ་ཁག་གི་ཡང་སྟེང་སོགས་སུ་དམར་དར་མང་པོ་བཙུགས་ཡོད་པ་མ་ཟད། དགོན་པ་མང་པོའི་ནང་དམར་ཤོག་ཚོགས་པར་བསྟོད་གླུ་དང་། དགོན་པའི་གྲྭ་བཙུན་ཚོས་མེས་རྒྱལ་ཁྲི་ལོར་ཤོག་ཟེར་བའི་གླུ་གཞས་གཏོང་བཞིན་པ་སོགས་དྲིལ་བསྒྲགས་ཤུགས་ཆེན་བྱེད་ཀྱི་འདུག
གཞན་བོད་ཀྱི་རྒྱལ་ས་ལྷ་ས་སོགས་ནས་ཆེད་དུ་རྒྱལ་སྟོན་དུས་ཆེན་ཟེར་བ་དང་བསྟུན་ཆེད་དམིགས་ཉེན་རྟོག་པ་དང་དམག་མི་མཉམ་འབྲེལ་ཐོག་མི་མང་གི་འགྲོ་འདུག་སྤྱོད་གསུམ་དང་། ཟིང་འཁྲུག་རིགས་བཀག་འགོག་ཆེད་སྦྱོང་བརྡར་རིམ་པར་སྤྲད་ཡོད་པ་དང་། མཛད་སྒོའི་སྟེང་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཡིས་ཉེན་རྟོག་པ་དང་དམག་མི་ཚོས་རྒྱལ་སྟོན་དུས་ཆེན་སྐབས་དང་བསྟུན་མི་མང་ཁྲོད་ཟིང་འཁྲིག་མི་ཡོང་བ་དང་། ཟིང་འཁྲུག་བྱུང་བ་དེ་མ་ཐག་མཆོང་ཕོད་པ་དང་འཐབ་ཕོད་པ་གནད་དོན་རྩ་མེད་བཟོ་ཐུབ་པ་བྱས་ཏེ། དམར་ཤོག་ཚོགས་པ་བཙུགས་ནས་ལོ་འཁོར་ ༧༠ ལོན་པར་རྟེན་འབྲེལ་ཞུ་དགོས་པའི་བཀའ་བསྒྲགས་ཡོད་འདུག
གསར་འགོད་པ། སངས་རྒྱས་དཀོན་མཆོག
