༧གོང་ས་མཆོག་གིས་རྒྱ་ནག་སྐམ་ས་ཆེན་མོའི་ནང་ནང་ཆོས་ཉམས་ཆག་ཆེན་པོ་ཕྱིན་ཡོད་ཀྱང་ལོ་ངོ་སྟོང་ཕྲག་རིང་གི་གོམས་གཤིས་དང་རིག་གཞུང་ཞིག་ཆགས་ཡོད་དུས་མེད་པར་ཆགས་རྒྱུ་ཁག་པོ་ཡོད་སྐོར་གསུངས།
དེ་རིང་སྔ་དྲོའི་ཆུ་ཚོད་ ༩ ཐོག་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ཀྱི་ཚོགས་མི་༡༡༢༧ གཙོ་བོར་གྱུར་བའི་འཛམ་གླིང་རྒྱལ་ཁབ་ ༦༡ གི་དད་ལྡན་དོན་གཉེར་ཅན་དང་། དྷ་ས་ཁུལ་གྱི་སེར་སྐྱ་མི་མང་བཅས་ཆོས་ཞུ་བ་ ༧༥༠༠ ལྷག་ལ་ཉིན་གྲངས་ ༣ རིང་གི་དབུ་མ་རིན་ཆེན་ཕྲེང་བའི་གསུང་ཆོས་དབུ་འཛུགས་གནང་སོང་།
གསུང་ཆོས་ཀྱི་ཐོག་མར་༧གོང་ས་མཆོག་གིས་སེམས་ཀྱི་ཞི་བདེ་གལ་ཆེན་ཡིན་པའི་བཀའ་སློབ་བསྩལ་དོན། སེམས་མ་སྐྱིད་པ་ནི་སེམས་འཁྲུག་ནས་ཡོང་གི་ཡོད་སྟབས། སེམས་དཀྲུག་མཁན་ཁོང་ཁྲོ་དང་ང་རྒྱལ། ཕྲག་དོག་སོགས་ངོ་ཤེས་པར་བྱས་ཏེ། དཔེར་ན་དེ་རིང་ཁོང་ཁྲོ་ཟ་ཡི་ཡོད་པའི་མི་དེ་སང་ཉིན་གྲོགས་པོ་ཆགས་པའི་གནས་ཚུལ་དེ་འདྲ་ཡོང་གི་རེད། གང་ལྟར་གནོད་ལན་གནོད་པས་འཇལ་ནས་ཚུར་རྙོག་དྲ་བཟོ་མཁན་ལ་ཕར་ཁོང་ཁྲོ་ཟ་ནས་རྣམ་འགྱུར་སྡུག་པོ་བསྟན་ན་གནས་སྟངས་སྡུག་ཏུ་འགྲོ་བ་མ་གཏོགས་མེད་པ་རེད། ཚུར་ཏོག་ཙམ་ཟུར་ཟ་དང་སྐྱོན་བརྗོད། མ་དགའ་བ་བྱུང་ན་སོ་སོའི་ངོས་ནས་བཟོད་པ་སྒོམ་པ་མ་ཟད། བྱམས་བརྩེ་སྒོམ་ཐུབ་ཚེ་རང་བཞིན་གྱིས་སོ་སོའི་སེམས་ནང་གི་ཁོང་ཁྲོ་དེའང་ཡོང་མ་ཐུབ་པར་མེད་པ་ཆགས་འགྲོ་བ་རེད། དེ་རིང་སོ་སོར་རྒྱག་རེས་ཤོར་བའི་དགྲ་བོ་དེའང་གཉེན་དུ་འགྱུར་བ་ཡོང་ཐུབ་པ་ཞིག་རེད། དེ་བས་བསམ་བློ་ཡག་པོ་ཞིག་བཏང་བ་ཡིན་ན་ཁོང་ཁྲོ་དང་ང་རྒྱལ། ཕྲག་དོག་སོགས་ནི་འཕྲལ་སེལ་གྱི་སེམས་འཁྲུག་པ་ཙམ་དུ་མ་ཟད། ཕུགས་ལ་གྲོགས་པོ་དེ་ཚོའང་དགྲ་ཆགས་པ་དང་སོ་སོའི་ལུས་པོའང་མ་བདེ་བ་ཆགས་པ་ཞིག་ཕལ་ཆེར་ཡོང་བ་རེད། དེ་བས་སེམས་ཞི་བདེ་ཡོང་བ་ནི་དཔེ་མི་སྲིད་པའི་གལ་ཆེན་པོ་རེད། དེ་ནི་ཆོས་ཀྱི་སྐད་ཆ་མིན་པར། གང་ལྟར་ང་ཚོ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་མཁན་ཤ་སྟག་རེད། ལུས་ཚོར་བདེ་བ་དང་སེམས་ཚོར་བདེ་བ་གཉིས་ཡོད་པ་ལས་སེམས་ཚོར་བདེ་བ་གཙོ་བོ་རེད། ཅེས་གསུངས་སོང་།
ཡང་༧གོང་ས་མཆོག་ནས་སྤྱིར་འགྲོ་བ་མིའི་རིགས་ནི་སྤྱི་ཚོགས་འདུས་སྡོད་ཀྱི་སྲོག་ཆགས་ཡིན་པ་དང་། འཛམ་གླིང་གི་ཤར་ནུབ་དང་ལྷོ་བྱང་གི་འབྱུང་འགྱུར་གྱི་བདེ་སྡུག་གཅིག་ལ་གཅིག་བརྟེན་ཡིན་པས། འཛམ་གླིང་མི་འབོར་དུང་ཕྱུར་བདུན་ཅུ་ཙམ་ཡོད་པ་དེ་འཛམ་གླིང་གི་སྤྱི་ཚོགས་གཅིག་ཡིན་པ་དང་། ནང་པ་སངས་རྒྱས་ཀྱི་ཆོས་པ་ཚོས་སེམས་ཅན་ཐམས་ཅད་ཟེར་གྱི་ཡོད་པ་དེར། ཕར་མཛུབ་མོ་བཙུགས་ནས་དེད་ན་ཕལ་ཆེར་འཛམ་གླིང་གི་མི་འབོར་དུང་ཕྱུར་བདུན་ཅུ་དེ་ཚོ་ཡིན་པ་དང་། ང་ཚོ་དེའི་གྲས་ཤིག་ཆགས་ཡོད་སྟབས། ག་ཚོད་ཐུབ་ཐུབ་ཀྱིས་ཕན་ཐོགས་ཡོང་ཐུབ་པ་ཞིག་སྒྲུབ་པའི་གོ་སྐབས་ཡོད་པ་དང་། འགྲོ་བ་རིགས་དྲུག་གི་སེམས་ཅན་དུད་འགྲོ་སོགས་ལ་མིའི་རྣམ་དཔྱོད་མེད་པ་དང་གོ་བརྡ་འཕྲོད་ཁག་པོ་ཡིན་པར་བརྟེན། དུད་འགྲོ་སོགས་ལའང་ཕན་བདེའི་བློ་སྦྱང་རྒྱུ་ནི་ཞེ་དྲག་གལ་ཆེན་ཡིན་སྐོར་སོགས་འགྲོ་བ་མིའི་རྣམ་དཔྱོད་གཞན་དང་མི་འདྲ་བ་ཞིག་ཡོད་པ་དེ་ཉོན་མོངས་པའི་བྲན་གཡོག་ཏུ་མ་སོང་བར་འགྲོ་བ་མི་གཅིག་གྱུར་གྱི་འདུ་ཤེས་བསྐྲུན་གལ་ཆེ་སྐོར་གསུངས་སོང་།
ཡང་༧གོང་ས་རྒྱལ་བ་རིན་པོ་ཆེ་མཆོག་ནས་དཔལ་ནཱ་ལེནྡྲའི་ཆོས་བརྒྱུད་ཀྱི་རིགས་ལམ་ཐོག་ནས་དཔྱད་པ་བྱས་ཏེ་འགྲོ་བ་དེ་མེད་ན་མི་རྒན་སོ་མེད་པ་ཞིག་དང་འདྲ་བ་དང་། ཁ་ཟས་ལྟ་བུ་ཞིག་ཟ་དགོས་བྱུང་ན་ཁ་ནང་མུར་ནས་སྡོད་པ་ལས་སོ་བརྒྱབས་ནས་བཟའ་་ཐུབ་ཀྱི་མེད་པར། ཚད་མ་རིག་པ་ཡོད་ཚེ་ཁ་ཟས་མཁྲེགས་པོ་ཡིན་ནའང་སོ་བརྒྱབས་ནས་བཟའ་རྒྱུ་ཡོད་པ་ལྟ་བུ་ཞིག་ཡིན་པས་ཚད་མ་རིག་པ་གལ་ཆེན་ཡིན་པའི་སྐོར་དང་། འཛམ་གླིང་འདིའི་ནང་འགྲོ་བ་མི་དུང་ཕྱུར་བདུན་ཅུ་ཙམ་ཡོད་པ་ལས་རིགས་གཅིག་ལ་ཆོས་མེད་པ་དང་ཆོས་ལ་སྐྱོན་དུ་ལྟ་མཁན། ཆོས་དད་ཡོད་མཁན་བཅས་རིགས་གསུམ་དུ་ཡོད་པ་དང་། ཁོང་ཚོས་བར་བསྡུར་ཚེ་ཆོས་ཤེས་ནས་སེམས་བཟང་པོ་བྱེད་དགོས་པ་བཤད་མཁན་དེ་ཏན་ཏན་སེམས་སྐྱིད་པ་ཡོད་སྐོར་སོགས་གསུངས་སོང་།
ནང་བསྟན་ལ་སློབ་སྦྱོང་བྱེད་གལ་ཆེ་བའི་སྐོར་ལ་ཁོང་གིས། ཁྱེད་རང་ཚོ་ནི་ཐའེ་ཝན་ནས་ཡིན་ནའང་གང་ལྟར་རྒྱ་ཡི་རིག་གཞུང་རྙིང་པ་དེ་ཡོད་པ་རེད། སྐམ་ས་ཆེན་པོའི་ནང་ཉམས་ཆག་ཆེན་པོ་ཕྱིན་པ་རེད། ལྷག་པར་དུ་རིག་གནས་གསར་བརྗེ་སྐབས་སུ་ཆེད་མངགས་མེད་པ་བཟོས་པ་དེ་འདྲ་ཆགས་པ་རེད་དེ། ལོ་ངོ་སྟོང་ཕྲག་རིང་གི་གོམས་གཤིས་དང་རིག་གཞུང་ཞིག་ཆགས་ཡོད་དུས་མེད་པར་ཆགས་རྒྱུ་ཁག་པོ་ཡོད་པ་རེད། དེང་སྐབས་རྒྱ་ནག་ནང་ནང་པའི་ཆོས་ལ་དོ་སྣང་བྱེད་མཁན་ཇེ་མང་དུ་འགྲོ་ཡི་ཡོད་པས། སྐམ་ས་ཡི་ཆོས་གྲོགས་སུ་ལ་ཐུག་ནའང་སློབ་སྦྱོང་བྱེད་དགོས་པ་བཤད་ཀྱི་ཡོད། ཁྱེད་རང་ཚོར་ནམ་རྒྱུན་དད་པ་ཡོད་པ་དང་། (ཨ་མེ་ཐོ་ཧྥུ་)ལབ་ནས་ཚར་འབུམ་སྡེ་ཞིག་བསགས་ནའང་དེས་སེམས་ལ་རྟོགས་པ་སྐྱེ་ཡི་མ་རེད། སློབ་སྦྱོང་བྱས་ན་རྟོགས་པ་སྐྱེ་ཡི་རེད། བོད་པ་ཚོ་ལའང་སློབ་སྦྱོང་བྱེད་དགོས་རེད། གཞན་ཨོཾ་མ་ཎི་པདྨེ་ཧཱུྃ་ལབ་པ་གཅིག་པོས་ཕན་ཡོན་ཕྲན་བུ་ཡོང་གི་རེད། ཡིན་ནའང་དེ་གཅིག་པོས་ས་ལམ་བགྲོད་ཐུབ་ཡ་ཁག་པོ་རེད་ཟེར་གྱི་ཡོད། བྲེལ་བ་ཡིན་པའི་སྐབས་ལ་མ་ཎི་མ་ཎི་ལབ་ནས་མ་ཎི་ཟེར་བའི་ཚིག་དེ་དབྱིན་ཡིག་གི་ (Money) ཟེར་བ་དེར་གོ་གྲབ་བྱེད་ཀྱི་འདུག དེ་བས་སློབ་སྦྱོང་བྱ་རྒྱུ་དེ་དཔེ་མི་སྲིད་པའི་གལ་ཆེན་པོ་རེད། ཅེས་གསུངས་སོང་།
གསར་འགོད་པ། ཀླུ་མགོན་ཐར།
གང་གི་བཀའ་སློབ་སྨན་མཆོག་བདུད་རྩི་འདི།
སུ་ཡིས་རྣ་བར་ཐོས་ཙམ་བདེ་ཆེན་ཐོབ།
དུས་ངན་སྙིགས་མ་མི་སྲུན་ཀླ་ཀློའི་དཔུང།
དམིགས་མེད་དུལ་དུ་སློག་པའི་འཕྲིན་ལན་མཛོད།
སྐྱེ་བ་ཀུན་ཏུ་ཡང་དག་བླ་མ་དང།
བྲལ་མེད་ཆོས་ཀྱི་དཔལ་ལ་ལུང་ཐོབ་ནས།
ས་དང་ལམ་གྱི་ཡོན་ཏན་རབ་རྫོགས་ནས།
རྡོ་རྗེ་འཆང་གི་གོ་འཕང་མྱུར་ཐོབ་ཤོག།