རྒྱ་ནག་གཞུང་གིས་བོད་རིགས་རྒྱ་རིགས་ལ་བཟོ་རྒྱུ་དང་སོག་རིགས་རྒྱ་རིགས་ལ་བསྒྱུར་ཐབས་སུ་འབད་བརྩོན་བྱེད་བཞིན་ཡོད་པ་གཅིག་མཚུངས་ཡིན་པས་མཉམ་དུ་གདོང་ལེན་བྱེད་དགོས།
དེ་རིང་སྔ་དྲོའི་ཆུ་ཚོད་ ༩།༡༥ སྟེང་བོད་ཀྱི་སྲིད་བྱུས་ཉམས་ཞིབ་ཁང་གི་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག བོད་སོག་གཉིས་བར་ཆོས་དང་རིག་གཞུང་གི་བགྲོ་གླེང་ཚོགས་འདུ་ཞིག་མགོ་འཛུགས་གནང་སོང་བ་དང་། ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་དབུས་པའི་བོད་མི་མང་སྤྱི་འཐུས་ཁག་ཅིག་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཨརྱ་ཚེ་དབང་རྒྱལ་པོ་ལགས་གཙོས་པའི་སོག་ཡུལ་གྱི་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་བསྟན་འཛིན་ལེགས་བཤད་ལགས་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས། ཐའེ་ཝན་དོན་གཅོད་ཟླ་བ་ཚེ་རིང་ལགས། ཉི་ཧོང་དོན་གཅོད་ལུང་རྟོགས་ལགས། དེ་བཞིན། ནོར་གླིང་མཐོ་སློབ་ཀྱི་སློབ་སྤྱི་སྨན་ཤེར་བློ་གྲོས་ལགས་དང་། སོག་ཡུལ་ནས་ཕེབས་པའི་གནད་ཡོད་མི་སྣ་ཁག་ཅིག་དང་སྲིད་བྱུས་ཉམས་ཞིབ་ཁང་གི་ལས་བྱེད། ཟུར་ཉན་པ་ཁག་ཅིག་བཅས་ཁྱོན་མི་གྲངས་ ༤༠ ཡས་མས་ཤིག་འཛོམས་འདུག
ཐོག་མར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཨརྱ་ཚེ་དབང་རྒྱལ་པོ་ལགས་ཀྱིས་ཕེབས་བསུའི་གཏམ་བཤད་གནང་སྐབས། ང་ཚོ་བོད་པའི་ངོས་ནས་ཐེངས་འདིའི་ཚོགས་འདུ་འདི་གལ་ཆེན་པོ་ཞིག་ལ་རྩི་བཞིན་ཡོད། གང་ཡིན་ཟེར་ན། ལོ་རྒྱུས་ཐོག་ནས་བལྟས་པ་ཡིན་ན། བོད་དང་སོག་པོའི་བར་གྱི་འབྲེལ་བ་དེ་མཆོད་ཡོན་གྱི་འབྲེལ་བ་ཡིན་སྟབས་འབྲེལ་བ་དམིགས་བསལ་བ་ཞིག་དང་དམ་ཟབ་ཡོད་པ་ཞིག་ཆགས་བསྡད་ཡོད་པ་རེད། གཉིས་བོད་པ་དང་སོག་པོ་གཉི་ག་རྒྱ་འོག་དུ་ཚུད་བསྡད་ཡོད་པ་དེའང་འབྲེལ་བ་ཞིག་ཆགས་བསྡད་ཡོད་པ་རེད། དེར་བརྟེན། བོད་སོག་གཉིས་མཉམ་རུབ་ཐོག་ནས་ལས་འགུལ་སྤེལ་རྒྱུའི་གཞི་དེ་གལ་ཆེན་པོ་ཆགས་འདུག ང་རང་ཚོའི་ལོ་རྒྱུས་ང་རང་ཚོས་བདག་པོ་མ་བརྒྱབ་པ་ཡིན་ན། ད་ལྟའི་ཆར་གནས་སྟངས་ག་འདྲ་ཞིག་ཆགས་བསྡད་ཡོད་པ་རེད་ལབ་ན། རྒྱ་ནག་ཕྱོགས་ནས་ཤིན་ཧྭ་དང་གོ་ལའི་དུས་བབ། དབུས་བརྙན་འཕྲིན་ཁང་སོགས་བརྒྱུད་བོད་དང་སོག་པོ་དེ་ཡོན་རྒྱལ་རབས་ནས་རྒྱ་ནག་གི་ཆ་ཤས་ཡིན་པའི་བསྒྲགས་གཏམ་རྟག་པར་སྤེལ་གྱི་ཡོད། བསྒྲགས་གཏམ་དེ་རྫུན་མ་ཡིན་པ་ཤེས་བཞིན་དུ་ཁོ་ཚོས་སྤེལ་དགོས་དོན་ག་རེ་རེད་ཟེར་ན། ད་ལྟའི་ཕྱི་སོག་དང་བོད་པ་གཉིས་ནས་རྒྱ་ནག་ལ་གདོང་ལེན་ཤུགས་ཆེན་པོ་ཞིག་བྱེད་ཐུབ་ཀྱི་མེད་པས་རེད། རྒྱའི་ཆབ་སྲིད་ཐོག་བལྟས་པ་ཡིན་ན་ཁོ་ཚོས་ལོ་རྒྱུས་ཀྱི་འཁྱོག་བཤད་དེ་འདྲ་མང་པོ་ཞིག་བཏོན་དང་འདོན་མུས་རེད། རྒྱ་ནག་གིས་བཤད་བཞིན་པའི་ཡོན་དེ་སོག་པོའི་རྒྱལ་རབས་ཤིག་ཡིན་པ་ལས་རྒྱ་ནག་གི་རྒྱལ་རབས་ཤིག་ཆགས་ཀྱི་མེད། དེར་བརྟེན། རྒྱ་ནག་གིས་ཡོན་རྒྱལ་རབས་དེ་ཁོ་རང་ཚོའི་ཡིན་ལབ་སྟེ། བོད་དང་སོག་པོ་གཉིས་རྒྱ་ནག་གི་ཆ་ཤས་ཡིན་ཟེར་བ་དེར། ང་ཚོས་ལོ་རྒྱུས་ཐོག་ནས་གསལ་བཤད་བྱ་རྒྱུ་གལ་ཆེན་ཆགས་ཡོད། ཅེས་བརྗོད་སོང་།
དེའི་རྗེས་སྲིད་སྐྱོང་བློ་བཟང་སེང་གེ་མཆོག་གིས། གཞི་རྩའི་བོད་སོག་གི་ལོ་རྒྱུས་དང་མི་རིགས། རྩ་བའི་བླ་མ་སོགས་གཅིག་པ་ཆགས་ཀྱི་ཡོད། ༧ས་སྐྱ་པཎྡྲིཏ་མར་དེད་ཕྱིན་པ་ཡིན་ན་སྐད་ཡིག་དང་རིག་གཞུང་ཐད་ནས་གཅིག་པ་ཆགས་ཀྱི་ཡོད། དེར་བརྟེན། དེ་རིང་འདིར་བོད་སོག་གཉིས་མཉམ་དུ་འཛོམས་ཏེ། བསམ་ཚུལ་བརྗེ་རེས་ཀྱིས་མ་འོངས་པའི་ལས་དོན་སྒྲུབ་ཕྱོགས་སོགས་ཀྱི་ཐོག་བཀའ་བསྡུར་གནང་རྒྱུའི་གོ་སྐབས་བྱུང་བ་ཧ་ཅང་ཡག་པོ་རེད། ང་ད་སྔ་བར་ཡུ་གུར་དང་སོག་པོ་སོགས་ཀྱི་ཚོགས་འདུ་ཁག་ཅིག་ལ་ཞུགས་རྒྱུ་བྱུང་། ཚོགས་འདུའི་ཐོག་མིག་བཙུམ་ནས་སྐད་ཆ་ཉན་སྐབས། བོད་པ་དང་ཡུ་གུར། དེ་བཞིན། སོག་པོ་སུས་སྐད་ཆ་བཤད་ཀྱང་། རྒྱ་ནག་གིས་གདུག་རྩུབ་བཏང་བའི་ལོ་རྒྱུས་དེ་གཅིག་མཚུངས་ཆགས་ཀྱི་འདུག དེར་བརྟེན། ཉེ་བའི་ལོ་རྒྱུས་ལ་བལྟས་པ་ཡིན་ན། བོད་ཀྱི་གནས་སྟངས་ཡིད་སྐྱོ་བ་ཞིག་ཡོད་པ་དང་། བོད་དེ་རྒྱ་སྡེར་བསྒྱུར་རྒྱུ་དང་བོད་རིགས་རྒྱ་རིགས་ལ་བཟོ་རྒྱུའི་འབད་བརྩོན་བྱེད་བཞིན་ཡོད་པ་དང་། རྒྱ་ནག་གིས་སོག་པོ་རྒྱ་སྡེར་བསྒྱུར་ཐབས་དང་། སོག་རིགས་རྒྱ་རིགས་ལ་བསྒྱུར་ཐབས་སུ་འབད་བརྩོན་བྱེད་བཞིན་ཡོད་པ་གཅིག་མཚུངས་རེད། ཅེས་གསུངས་སོང་།
ཡང་སོག་པོའི་ནང་གི་འགྲོ་བ་མིའི་ཐོབ་ཐང་སོགས་ཀྱི་གནས་སྟངས་སྐོར་ལ་ཁོང་གིས། སོག་པོའི་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་གཉིས་གཅིག་པ་ཡོད་པ་རེད། འོན་ཀྱང་། བོད་པའི་གནས་སྟངས་དེ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་འོག འཛམ་གླིང་ནང་ཁྱབ་ཐུབ་པ་ཞིག་བྱུང་ཡོད། སོག་པོའི་འགྲོ་བ་མིའི་ཐོབ་ཐང་གི་གནས་སྟངས་དེ་ཁྱབ་ཐུབ་པ་ཞེ་དྲག་བྱུང་མེད། བོད་པའི་གནས་སྟངས་ལོ་ ༣༠ ནང་རྒྱལ་སྤྱིའི་སྟེང་གོ་རྟོགས་སྤེལ་ཐུབ་པ་ལ་བརྟེན་ནས་རྒྱབ་སྐྱོར་ཤུགས་ཆེན་ཐོབ་ཡོད། ད་ལྟ་ནང་སོག་གི་གནས་སྟངས་ཞེ་དྲག་ཁྱབ་ཐུབ་ཀྱི་མེད། འོན་ཀྱང་། ང་ཚོའི་གནས་སྟངས་གཅིག་པ་ཡིན་པས་སྔ་གཞུག་ཙམ་མ་གཏོགས་ནང་སོག་གི་གནས་སྟངས་ཀྱང་ཁྱབ་ཐུབ་རྒྱུ་ཡིན་པ་གསལ་པོ་རེད་ལ། དེ་དུས་གྲ་སྒྲིག་ཡག་པོ་དགོས་རྒྱུ་གལ་ཆེན་པོ་རེད། གྲ་སྒྲིག་མེད་པ་ཡིན་ན་གོ་སྐབས་འཛིན་ཐུབ་ཀྱི་མེད། བོད་ནང་རྒྱ་ནག་གིས་འབྲོག་པ་ས་ཡ་ ༡ ལྷག་རྩ་ས་ཡག་པོ་མེད་པར་ཁ་གཡར་ཏེ། གནས་སྤོར་བྱེད་དུ་བཅུག་ཡོད། གནས་སྟངས་འདིའི་ཐད་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པས་ཞིབ་འཇུག་བྱས་ཏེ། བོད་ནང་གི་འབྲོག་པ་ཚོར་གཞི་རྩའི་འགྲོ་བ་མིའི་ཐོབ་ཐང་མེད་པའི་དེབ་ཀྱང་བཏོན་ཡོད་པ་རེད། སོག་པོའི་གནས་སྟངས་ཐོག་དེབ་ཐོན་ཡོད་པ་རེད་དེ་དེ་འདྲ་མང་པོ་ཐོན་ཡོད་པ་མ་རེད། དངོས་གནས་བྱས་ན། འབྲོག་པའི་གནས་སྟངས་ཐོག་སོག་པོའི་འབྲོག་པའི་གནས་སྟངས་སྔོན་ནས་འགྱུར་བ་བཏང་སྟེ་སྡུག་པོ་བཏང་ཡོད་པས་སྡུག་ག་ཡོད། ཅེས་དང་། རྒྱ་ནག་གིས་སོག་པོའི་འབྲོག་པའི་རྩྭ་ས་གཏོར་བརླག་བཏང་རྗེས་གཏེར་ཁ་བསྔོགས་ཏེ་ས་རྡོ་ཆུ་ཡན་ཆད་འཕྲོ་བརླག་གཏོང་གི་ཡོད་སྐོར་དང་། སོག་པོར་རྒྱལ་སྤྱིའི་ཁྲོམ་རའི་ནང་ཧ་ཅང་དཀོན་པའི་གཏེར་རིགས་བརྒྱ་ཆ་ ༩༠ ཡོད་པ་རྒྱ་ནག་གིས་བསྔོག་འདོན་བྱས་ཏེ། འཛམ་གླིང་རྒྱལ་ཁབ་གང་སར་ཐོན་རྫས་བཙོང་གི་ཡོད་པ་དང་། སོག་པོའི་ནང་བྱུང་དང་འབྱུང་གི་ཡོད་པའི་གནས་སྟངས་དེ་ཚོ་རྒྱལ་སྤྱིའི་སྟེང་བསླེབ་ཐབས་སུ་སོག་པོའི་གྲོགས་པོ་ཚོས་ཤུགས་རྒྱག་དགོས་པའི་འབོད་སྐུལ་བཅས་གནང་སོང་།
གསར་འགོད་པ། སྐལ་བཟང་སྦྱིན་པ།
