ལ་དྭགས་ཡུལ་མི་ཞིག་གིས་གལ་སྲིད་ལ་དྭགས་ནང་གང་བྱུང་གིས་འཛུགས་སྐྲུན་དང་མི་འབོར་ལྡབ་བཅུ་གྲངས་ཤིག་འཕར་ཚེ་ས་གཞིས་འཁུར་ཐུབ་ཐབས་མེད་པས་རྩ་ཁྲིམས་ནང་གསལ་པའི་ཁྲིམས་ཤིག་ལག་བསྟར་བྱེད་པའི་རེ་འདོད་བྱེད་ཀྱི་ཡོད་སྐོར་བརྗོད་འདུག
དེ་རིང་ཕྱི་ཚེས་ ༢༢ ཉིན། ཏར་འཕྲིན་གསར་ཁང་ (The Telegraph) གིས་སྤེལ་བའི་གནས་ཚུལ་ལྟར་ན། ལ་དྭགས་ཀྱི་ཡུལ་མི་ཞིག་གིས་འདི་ལོར་ལ་དྭགས་རྒྱ་གར་དབུས་གཞུང་གི་ཐད་སྐྱོང་ས་ཁུལ་དུ་བསྒྱུར་བ་ནས་བཟུང་། ལ་དྭགས་ཡུལ་མི་ཚོས་རྒྱ་ནག་གིས་བོད་མིར་གང་བྱེད་བཞིན་པ་དེ་བཞིན་རྒྱ་གར་གཞུང་གིས་ལ་དྭགས་ལ་གནང་སྲིད་པའི་བློ་འཚབ་ཡོད་སྐོར་བརྗོད་རྗེས། རྒྱ་གར་གཞུང་འཛིན་ཚོགས་པའི་མགྲིན་ཚབ་པ་དང་གྲོས་ཚོགས་འཐུས་མིས་དབུས་གཞུང་ནས་ལ་དྭགས་ཀྱི་ངོ་བོ་དང་རིག་གཞུང་སྲུང་སྐྱོབ་སོགས་ཀྱི་ཐད་གང་གནང་དགོས་པ་གནང་བཞིན་ཡོད་པས་བློ་འཚབ་དེ་འདྲ་གནང་དགོས་དོན་མེད་སྐོར་བརྗོད་འདུག
ཏར་འཕྲིན་གསར་ཁང་གི་གནས་ཚུལ་ནང་། ལ་དྭགས་ཡུལ་མིའི་བསམ་ཚུལ་དེ་མངོན་གསལ་དོད་པོས་འདོན་མཁན་གཙོ་བོ་ཞིག་ནི་ལ་དྭགས་ཡུལ་མི་འཆར་འགོད་པ་དང་གློག་བརྙན་འཁྲབ་སྟོན་པ་བསོད་ནམས་དབང་ཕྱུག་ཞེས་པ་ཞིག་ཡིན་པ་དང་། ཁོང་གིས་རྒྱ་གར་དབུས་གཞུང་ནས་གསར་དུ་དབུས་ཐད་སྐྱོང་ས་ཁུལ་དུ་བསྒྱུར་བའི་ལ་དྭགས་ཡུལ་མི་ཚོའི་བློ་འཚབ་སྟེ། རང་ཉིད་ཀྱི་ངོ་བོ་དང་ཁོར་ཡུག་སྲུང་སྐྱོབ་བྱེད་པར་བརྡ་ལན་ཞིག་མ་སྤྲད་ཚེ། ཁོང་ལ་ཞེད་སྣང་ཞིག་ཡོད་པ་ནི་ཡུལ་མི་ཚོས་ཁ་བྲལ་གྱི་ལས་འགུལ་སྤེལ་སྲིད་སྐོར་དང་། ཕྱི་མི་ལ་དྭགས་ས་ཁུལ་དུ་ཡོང་ནས་གཏན་སྡོད་བྱེད་པའི་བློ་འཚབ་མི་ཡོང་ཆེད་ལྡི་ལི་གཞུང་ནས་ལ་དྭགས་མི་མང་ལ་གདོད་མིའི་མི་རིགས་ཀྱི་གནས་བབ་སྤྲོད་གལ་ཆེ་སྐོར་བརྗོད་འདུག
ཡང་ཁོང་གིས། ཡིད་སྐྱོ་བ་ཞིག་ལ་ལ་དྭགས་དབུས་ཐད་སྐྱོང་ས་ཁུལ་གྱི་གནས་བབ་ཏུ་བསྒྱུར་བ་ནི་ལ་དྭགས་ཀྱི་ཧ་ཅང་ཕྱུག་པའི་ཐོན་ཁུངས་སྤྱོད་རྒྱུ་ཡིན་མིན་གྱི་འཆལ་གཏམ་ཞིག་འགྲོ་བཞིན་ཡོད་པ་དེ་རེད། ཡང་རེ་འགས་ལ་དྭགས་ས་ཁུལ་དུ་བྱུང་བཞིན་པ་འདི་ནི་རྒྱ་ནག་གིས་བོད་ལ་བྱས་པ་དང་གཅིག་མཚུངས་ཡིན་མིན་ཀྱི་དོགས་སློང་བྱེད་ཀྱི་ཡོད་པ་རེད། མི་མང་གིས་རྒྱ་གར་ལ་བཅིངས་བའི་བརྩེ་སེམས་མ་ཉམས་གོང་དང་ཁ་ཁར་གྱེས་པའི་བསམ་བློ་སྐྱེས་ཏེ་ཁ་བྲལ་གྱི་ལས་འགུལ་མ་སྤེལ་གོང་ནས་གནད་དོན་འདི་སེལ་ཐུབ་རྒྱུ་ནི་ངའི་རེ་བ་ཡིན། ཞེས་བརྗོད་འདུག
ལ་དྭགས་ཡུལ་མི་ཚོར་ཁོར་ཡུག་དང་འབྲེལ་ནས་བློ་འཚབ་ཡོད་པས། རྒྱ་གར་གྱི་རྩ་ཁྲིམས་འོག་ལ་དྭགས་འདི་གདོད་མའི་མི་རིགས་འཛིན་སྐྱོང་ས་ཁུལ་ཞིག་ལ་ངོས་འཛིན་གྱིས་འཛིན་སྐྱོང་བྱེད་དགོས་སྐོར་ལ་ཁོང་གིས། ཟླ་གསུམ་ཕྱིན་ནའང་གདོད་མའི་མི་རིགས་ཀྱི་གནས་བབ་ཐད་ལ་གསལ་བསྒྲགས་གང་ཡང་བྱུང་མེད་པ་རེད། མི་མང་ཚོས་རང་ཉིད་ཀྱི་ས་གཞི་དང་ཁོར་ཡུག་ཉེན་ཁའི་ནང་ཡོད་པའི་ཞེད་སྣང་དང་སྐྲག་སྣང་སྐྱེས་ཀྱི་ཡོད། ང་ཚོའི་སྣོད་བཅུད་ནི་ཧ་ཅང་མཉེན་པོ་ཞིག་ཡིན་པས། གལ་སྲིད་གང་བྱུང་གིས་འཛུགས་སྐྲུན་དང་མི་འབོར་ལྡབ་བཅུ་གྲངས་ཤིག་འཕར་ཚེ་ས་གཞི་འདིས་འཁུར་ཐུབ་ཐབས་མེད་པ་རེད། ང་ཚོས་འདིའི་ཆེད་ཁྲིམས་གསར་པ་ཞིག་བཟོ་དགོས་པ་བརྗོད་ཀྱི་མེད་པར་རྩ་ཁྲིམས་ནང་གསལ་པའི་ཁྲིམས་ཤིག་ང་ཚོའི་ཐོག་ལག་བསྟར་བྱེད་པའི་རེ་འདོད་བྱེད་ཀྱི་ཡོད། ཅེས་བརྗོད་འདུག
རྒྱ་གར་གྱི་བྷི་ཇི་པི་ཆབ་སྲིད་ཚོགས་པའི་མགྲིན་ཚབ་པ་སུ་ནིལ་སི་ཊི་ (Sunil Sethi) ལགས་ཀྱིས། མི་མང་གི་དགོས་འདུན་མཐའ་དག་གྲུབ་ཡོད་པའི་སྐབས་སུ་བསོད་ནམས་དབང་ཕྱུག་ལགས་ནས་མི་མང་ལ་དགོས་མེད་ཀྱི་སྐུལ་སློང་མི་བྱེད་པ་དང་། ལ་དྭགས་མི་མང་གི་ངོ་བོ་དང་ཐུན་མོང་མ་ཡིན་པའི་རིག་གཞུང་བདག་ཉར་ཆེད་གཞུང་ངོས་ནས་ཅི་ཞིག་བྱེད་དགོས་པ་བྱེད་ཀྱི་ཡོད་པས། གཞུང་ལ་ཉེན་བརྡ་གཏོང་དགོས་དོན་མེད་སྐོར་བརྗོད་འདུག
དེ་བཞིན་རྒྱ་གར་དབུས་གཞུང་གི་གྲོས་ཚོགས་འཐུས་མི་ལ་དྭགས་པ་འཇམ་དབྱངས་ཚེ་རིང་རྣམ་རྒྱལ་ལགས་ཀྱིས། ལོ་ངོ་སུམ་ཅུའི་རིང་ལ་དྭགས་ནི་ཞི་བདེའི་ངང་གནས་ཡོད་པ་དང་། སུས་ཀྱང་ལ་དྭགས་ཁ་བྲལ་སྐོར་གླེང་སློང་བྱས་མེད་སྐོར་བརྗོད་དེ་བསོད་ནམས་དབང་ཕྱུག་ལ་སྐྱོན་བརྗོད་དང་། ལ་དྭགས་ཀྱི་ས་ཆའི་བེད་སྤྱོད་དང་སྟངས་འཛིན། ཡར་རྒྱས་དང་ཆ་བགོས་བྱེད་པ་སོགས་གླེ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ (Ladakh Autonomous Hill Development Council Leh) དང་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་དཀར་གྱིལ་ (Ladakh Autonomous Hill Development Council Kargil) གཉིས་ཀྱིས་གནང་གི་ཡོད་པ་དང་། ལྷན་ཚོགས་དེ་གཉིས་ནི་ས་གནས་མི་མང་གིས་འཛིན་སྐྱོང་བྱེད་ཀྱི་ཡོད་ལ། ལ་དྭགས་ནི་གདོད་མའི་མི་རིགས་འཛིན་སྐྱོང་ས་ཁུལ་ཞིག་གི་འོག་སྲུང་སྐྱོབ་དགོས་ཀྱི་མེད་པ་དགོངས་ཀྱི་ཡོད་སྐོར་བརྗོད་འདུག
འདི་ལོའི་ཕྱི་ཟླ་ ༨ པའི་ནང་རྒྱ་གར་གྱི་དབུས་གྲོས་ཚོགས་ནང་ལ་དྭགས་དབུས་ཐད་སྐྱོང་ས་ཁུལ་ཞིག་ཏུ་བསྒྱུར་བའི་ཁྲིམས་གཏན་འབེབ་གནང་ཡོད་པ་དང་། ཕྱི་ཟླ་ ༡༠ ཚེས་ ༣༡ ཉིན་དངོས་སུ་ལག་བསྟར་བྱས་ཡོད་པ་རེད། གླེ་དང་དཀར་གྱིལ་གཉིས་ནི་ལ་དྭགས་ཀྱི་གྲོང་ཁྱེར་ཆེ་ཤོས་གཉིས་ཆགས་ཡོད་སྟབས། གླེ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་དང་དཀར་གྱིལ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་གཉིས་ཀྱི་ནང་ས་གནས་འཛིན་སྐྱོང་གི་ལྟེ་གནས་ཡོད་འདུག
གསར་འགོད་པ། ཀླུ་མགོན་ཐར།
