ལྷ་སར་མཛེས་རྩལ་ཁང་ཆེན་པོ་ཞིག་རྒྱག་གི་ཡོད་འདུག

རྒྱ་ནག་གཞུང་གིས་བོད་ལ་བཙན་འཛུལ་དྲག་གནོན་བྱས་ཏེ་ལོ་ངོ་ ༧༠ འཁོར་བར་ལེགས་སྐྱེས་ཡིན་ཚུལ་གྱིས་བོད་ཀྱི་རྒྱལ་ས་ལྷ་ས་གྲོང་ཁྱེར་ནང་བོད་ལྗོངས་མཛེས་རྩལ་ཁང་ཞེས་པ་ཞིག་འཛུགས་སྐྲུན་མགོ་འཛུགས་བྱས་འདུག

ཁ་སང་ཕྱི་ཚེས་ ༢༩ ཉིན། རྒྱ་ནག་གཞུང་འབྲེལ་གསར་ལམ་ཁག་གིས་སྤེལ་བའི་གནས་ཚུལ་ལྟར་ན། རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་གྲོང་ཁྱེར་ནང་ས་ཁྱོན་ལ་སྨི་ ༤༧༣༤༠ ཡོད་པའི་བོད་ལྗོངས་མཛེས་རྩལ་ཁང་ཞེས་པ་ཞིག་འཛུགས་སྐྲུན་བྱེད་མགོ་བཙུགས་ཡོད་པ་དང་། མཛེས་རྩལ་ཁང་དེ་ཕྱི་ལོ་ ༢༠༢༡ ལོར་རྒྱ་ནག་དམར་ཤོག་ཚོགས་པ་བཙུགས་ཏེ་ལོ་ངོ ༡༠༠ འཁོར་བ་དང་། བོད་ཞི་བའི་བཅིངས་འགྲོལ་ཟེར་བ་བཏང་ནས་ལོ་ངོ་ ༧༠ འཁོར་བར་འཚམས་འདྲིའི་ལག་རྟགས་ལ་སྤྲོད་རྒྱུ་ཡིན་སྐོར་བཤད་འདུག

དེ་འབྲེལ་གནས་ཚུལ་ནང་། བོད་ལྗོངས་མཛེས་རྩལ་ཁང་ནི་ལྗོངས་ཏང་ཨུད་དང་སྲིད་གཞུང་གིས་བོད་ཀྱི་རིག་གནས་དང་རིག་རྩལ་བྱ་གཞག་འཕེལ་རྒྱས་འགྲོ་རྒྱུར་སྐུལ་འདེད་གཏོང་བའི་ཐབས་ཇུས་གལ་ཆེན་ཞིག་དང་། བོད་གསར་པའི་སྤྱི་ཚོགས་རིང་ལུགས་ཀྱི་རིག་གནས་འཛུགས་སྐྱོང་བྱེད་པའི་རྣམ་གྲངས་གལ་ཆེན་ཞིག་ཡིན་པ་མ་ཟད། མི་མང་གི་བསམ་པའི་དཔལ་ཡོན་ཡར་རྒྱས་གཏོང་ཐབས་ཀྱི་ལས་གཞི་གལ་ཆེན་ཞིག་ཡིན་པ་དང་། མཛེས་རྩལ་ཁང་དེར་བོད་ཀྱི་རིག་གནས་དང་ལོ་རྒྱུས། དྲིལ་བསྒྲགས་སོགས་གཞི་གཅིག་ཏུ་བསྡུས་པའི་དེང་རབས་ཅན་དང་། རྒྱལ་སྤྱི་ཅན་གྱི་ཕྱོགས་བསྡུས་མཛེས་རྩལ་ཁང་ཆེ་གྲས་ཤིག་ཡིན་སྐོར་བཤད་འདུག

གནས་ཚུལ་དེའི་ནང་མུ་མཐུད་། མཛེས་རྩལ་ཁང་དེའི་ལས་གྲྭ་དང་པོ་དང་གཉིས་པ་ཕྱི་ལོ་ ༢༠༢༡ ལོའི་ཟླ་༧ པར་འགྲུབ་པ་བྱ་རྒྱུ་ཡིན་པ་དང་། ཟླ་ ༧ པར་འགྲེམས་སྟོན་ཁང་གཙོ་བོའི་སྒོ་ཕྱེ་སྟེ་དམར་ཤོག་ཚོགས་པ་བཙུགས་ནས་ལོ་ངོ་ ༡༠༠ འཁོར་བ་དང་བོད་ཞི་བའི་བཅིངས་འགྲོལ་བཏང་ནས་ལོ་ངོ་ ༧༠ འཁོར་བ་ཟེར་བ་དེར་ལག་རྟགས་སུ་འབུལ་རྒྱུའི་མཛད་སྒོ་འཚོགས་རྒྱུ་ཡིན་སྐོར་སོགས་བརྗོད་འདུག

འདས་པའི་ལོ་ཤས་ནས་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་དེ་རྒྱ་མི་ཡུལ་སྐོར་བའི་ལྟེ་གནས་ཤིག་བཟོ་རྒྱུའི་ལས་གཞི་ཆེན་པོ་ལག་བསྟར་བྱེད་བཞིན་ཡོད་པ་ལྟར།  འདི་ལོའི་ལོ་མགོ་ནས་བོད་ཀྱི་རྒྱལ་ས་ལྷ་སར་སྨན་ཁང་དང་ཡུལ་སྐོར་བྱེད་སའི་འཛུགས་སྐྲུན་ལས་གཞི་མང་དག་ཅིག་མགོ་འཛུགས་བྱས་ཡོད་པ་ལས། མ་དངུལ་རྒྱ་སྒོར་དུང་ཕྱུར་ ༡༠ ལྷག་བཏང་ནས་སྨན་ཁང་ཆེན་པོ་ཞིག་འཛུགས་སྐྲུན་དང་། ཕོ་བྲང་པོ་ཏ་ལའི་ས་འོག་གཞུང་ལམ་ཕྱོགས་ཕྱོགས་སུ་ལམ་སྣེ་ཇེ་མང་དང་། ལྷ་ས་གྲོང་ཁྱེར་སྤྱིའི་གཞུང་ལམ་འཛུགས་སྐྲུན་སོགས་བསྐྱར་བཅོས་བཅས་འཛུགས་སྐྲུན་མང་པོ་ཞིག་བྱ་རྒྱུ་ཡིན་འདུག

རྒྱ་ནག་གཞུང་གི་གནས་ཚུལ་ནང་སྨན་ཁང་དེ་ལྷ་ས་གྲོང་ཁྱེར་སྟོད་ལུང་བདེ་ཆེན་དུ་འཛུགས་སྐྲུན་བྱེད་བཞིན་ཡོད་པ་དང་། སྨན་ཁང་དེར་རྗེས་ཕྱོགས་བཅོས་དཀའ་བའི་ནད་གཞི་དང་། ཛ་དྲག་མྱུར་སྐྱོབ། སྙིང་ཁྲག་ཀླད་རྩའི་ནད་དང་། བརྡབ་སྐྱོན། དབུགས་ལམ་སོགས་ས་མཐོའི་རང་བཞིན་གྱི་ནད་གཞི་བཅོས་ཐུབ་ཀྱི་ཡོད་སྐོར་དང་། འདི་ལོའི་ཕྱི་ཟླ་ ༦ པ་ནས་ས་འོག་ཨར་ལས་དང་ལས་བྱེད་པའི་ཁང་པ་ཚར་རྒྱུ་ཡིན་སྐོར་བརྗོད་འདུག

རྒྱ་ནག་གཞུང་གིས་འདས་པའི་ལོ་ཤས་ནས་དཔལ་འབྱོར་འཕེལ་རྒྱས་སོགས་ལ་ཁ་གཡར་ཏེ། བོད་ཀྱི་རྒྱལ་ས་ལྷ་ས་དང་བོད་ཁུལ་ཡོངས་སུ་གཞི་རྒྱ་ཆེ་བའི་མེ་འཁོར་ལྕགས་ལམ་དང་གཞུང་ལམ་སོགས་ཀྱིས་མཐུད་དེ། རྒྱ་རིགས་མི་སེར་བོད་ནང་ཡོང་བར་ཕྱོགས་ཡོངས་ནས་སྟབས་བདེ་སྐྲུན་བཞིན་ཡོད་པ་དང་། རྒྱལ་སྤྱིའི་སྟེང་ལས་གཞི་དེ་དག་ནི་རྒྱ་ནག་གཞུང་གིས་བོད་ནང་མི་སེར་སྤེལ་ཡུལ་ཤུགས་ཆེ་རུ་གཏོང་ཐབས་དང་། ཕྱོགས་གཅིག་ནས་འཛུགས་སྐྲུན་ལས་རིགས་དེ་དག་ཁྲོད་བོད་ཀྱི་བཟོ་བཀོད་སྒྱུ་རྩལ་གང་ཡང་མེད་པའི་རྒྱ་ནག་གི་རིག་གནས་བཟོ་བཀོད་དང་བསམ་བློ་སྤེལ་ཐབས་བྱེད་བཞིན་ཡོད་སྐོར་བརྗོད་ཡོད་པ་རེད།

གསར་འགོད་པ། སངས་རྒྱས་དཀོན་མཆོག