རྒྱ་གར་ལྷོ་ཕྱོགས་ཀོ་ལི་གྷལ་དོན་ལྡན་གླིང་དུ་བོད་པའི་བཙུན་པ་བསྟན་འཛིན་ཆོས་སྒྲོན་ལགས་འདས་གྲོངས་སུ་ཕྱིན་རྗེས་ཐུགས་དམ་བཞུགས་ཡོད་འདུག
ཟླ་འདིའི་ཕྱི་ཚེས་ ༢༢ ཉིན། རྒྱ་གར་ལྷོ་ཕྱོགས་ཀོ་ལི་གྷལ་དོན་ལྡན་གླིང་བོད་མིའི་གཞིས་ཆགས་སུ། ལོ་མང་རིང་སྒྲུབ་པ་ཉམས་ལེན་དང་བསྙེན་མཚམས་ལ་བཞུགས་པའི་བོད་པའི་བཙུན་མ་བསྟན་འཛིན་ཆོས་སྒྲོན་ལགས་འདས་གྲོངས་སུ་ཕྱིན་རྗེས་ཐུགས་དམ་ལ་བཞུགས་ཡོད་འདུག
འདི་གའི་གསར་འགོད་པས་བཙུན་མ་ཁོང་གི་སྤུན་མཆེད་བྱང་ཆུབ་སྒྲོལ་མ་ལགས་སུ་གནས་ཚུལ་དེའི་སྐོར་དྲིས་པར་ཁོང་གིས། བཙུན་མ་བསྟན་འཛིན་ཆོས་སྒྲོན་ལགས་ཕྱི་ཚེས་ ༢༢ ཉིན་གྱི་ཞོགས་པའི་ཆུ་ཚོད་ ༡༠ ཙམ་པ་འདས་གྲོངས་སུ་སོང་ཡོད་པ་དང་། སྤྱིར་ཁོང་མོར་དེ་སྔ་ནས་ཁྲག་ཤེད་དང་གྲིབ་སྐྱོན་ཕོག་པ་སོགས་ཀྱི་ན་ཚ་ཞིག་ཡོད་པ་དང་། ཉིན་དེར་སྲོག་རླུང་མ་འདང་བ་སོགས་ཀྱི་གནས་ཚུལ་བྱུང་སྟབས། ཛ་དྲག་ངང་ས་གནས་སྨན་ཁང་དུ་འཁྱེར་ན་ཡང་དུས་ཚོད་ཅུང་ཙམ་ལས་མ་བསྡད་པར་སྨན་ཁང་དུ་འདས་གྲོངས་སུ་ཕྱིན། ཞེས་བརྗོད་བྱུང་།
ཡང་བཙུན་མ་ཁོང་འདས་གྲོངས་སུ་ཕྱིན་རྗེས་ཀྱི་ཐུགས་དམ་རྣམ་པ་སོགས་ག་འདྲ་ཡོད་པའི་སྐོར་ལ་ཁོང་གིས། སྐུ་གཤེགས་པ་དང་ཐུགས་དམ་ལ་བཞུགས་ཡོད་པ་མ་ཟད། སྐུ་ཕུང་ཕྱིར་ཁྱིམ་དུ་གདན་འདྲེན་ཞུས་རྗེས། སྐུ་ཕུང་གི་ཉེ་འཁོར་ལ་ཙན་ཏན་གྱི་དྲི་བསུང་ལྟ་བུ་ཚུལ་ཁྲིམས་ཀྱི་དྲི་བཟང་ཞིག་འཁོར་བ་སོགས་བྱེད་པ་དང་། དྲི་བཟང་དེ་དུས་རྒྱུན་དུ་ཡོད་པ་ཞིག་མིན་པར་མཚམས་མཚམས་རེར་ཁྱབ་ཡོང་བ་ཞིག་ཡིན་པ་དང་། དེ་བཞིན་ཐུགས་དམ་ལས་གྲོལ་རྗེས་གཉན་ཅོག་གཡས་པའི་ནང་བྱང་སེམས་དཀར་པོ་དང་། སྣ་གཡས་པའི་ནང་བྱང་སེམས་དམར་པོ་འབབ་པ་སོགས་བྱུང་སོང་། ཞེས་བརྗོད་བྱུང་།
ཡང་མོས་མུ་མཐུད་ཨ་ནེ་ཁོང་ལ་མཚོན་ན་ནམ་རྒྱུན་ནས་སྒྲུབ་པ་ཉམས་ལེན་ཁོ་ནར་འབད་མཁན་ཞིག་ཡིན་པ་དང་། ནམ་རྒྱུན་ནས་སྐད་ཆ་སོགས་མང་པོ་མི་བཤད་པར་སྒྲུབ་པ་ཉམས་ལེན་ཁོ་ནར་འབད་པ་དང་།འདས་གྲོངས་སུ་ཕྱིན་ཁར་ཞལ་ཆེམས་ལྟ་བུ་གང་ཡང་མེད་པ་མ་ཟད་སྐུ་གཤེགས་ཁར་གཟུང་སྔགས་ཤིག་འདོན་བཞིན་ཡོད་པ་དང་། སྤྱིར་ལོ་འདིར་གཙོ་བོ་ཁོང་མོས་༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཞབས་པད་བརྟན་ཆེད་མཚམས་ལ་བཞུགས་ནས་བསྡད་ཡོད་པ་རེད། ཅེས་བརྗོད་བྱུང་།
བཙུན་མ་བསྟན་འཛིན་ཆོས་སྒྲོན་ལགས་ནི་ཕ་ཡུལ་བོད་བྱང་གནམ་རོལ་རྫོང་ནས་ཡིན་པ་དང་། ཁོང་མོ་བོད་དུ་ཡོད་སྐབས་འཆི་མེད་གླིང་བཙུན་དགོན་ནས་ཡིན་པ་དང་། དེའི་རྗེས་རྒྱ་གར་དུ་ཕེབས་རྗེས་འདས་པའི་མི་ལོ་ ༤༤ ཙམ་རིང་གནས་མཆོག་མཚོ་པདྨར་བསྙེན་མཚམས་ལ་བཞུགས་པ་སོགས་སྒྲུབ་པ་ཉམས་ལེན་ཁོ་ནར་གཞོལ་ནས་བཞུགས་ཡོད་པ་དང་། ཕྱི་ཟླ་ ༦ ཚེས་ ༤ ཉིན་ཁོང་མོའི་སྤུ་ཕུང་ཞུགས་འབུལ་གནང་གི་ཡོད་འདུག
གསར་འགོད་པ། སངས་རྒྱས་དཀོན་མཆོག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ད་ཉམས་ལེན་ཡག་པོ་ཡོད་ན་ཕོ་མོ་འདྲ་འདྲ་ནང་ལ་མི་འདྲ་བ་འདི་འདྲ་ཡོད་རེད།དེང་སང་གི་གྲ་སའི་མཁན་པོ་ཞིང་ལ་ཕེབས་དུ་ཀྱང་འདི་འདྲ་ཐུགས་དམ་ཡག་པོ་བཞུགས་མཁན་དཀོན་པོ་རེད།ཉམས་ལེན་སྨྱུང་གནས་ཁོ་ནར་བྱས་ནས་རི་ཁྲོད་མ་བ་འདི་ཚོ་ལ་གྲུབ་པའི་རྟགས་འཐོན་ཆེ་ནའང་མང་ཆེ་བའི་ཨ་ནེ་རེད་ཟེར་རྒན་ཆོས་བྱས་ནས་གང་ཡང་མི་ཤེས་མཁན་ཟེར་ནས་སྣང་ཆུང་བྱེད་ནའང་ད་དངོས་གནས་ངོ་མཚར་བསྟན་སོང་།ཨ་ནེ་ཁོང་གི་ཡང་སྲིད་ཡོང་སྲིད་ནའང་ཁོང་ལ་བླ་བྲང་སོགས་མེད་པས་བརྗེད་འགྲོ་གི་རེད།་གང་ལྟར་རྗེས་སུ་ཡི་རང་ཞུ་འོས་པར་སེམས།