བོད་མི་རིགས་ཀྱི་དཔའ་རྒོད་ཅིག་ང་ཚོ་དང་གཏན་དུ་ཁ་བྲལ་སོང་།

ངམ་རིང་ཡོན་ཏན་རྒྱ་མཚོ།

སྤྱིར་སྐྱེ་རྒ་ན་འཆི་ནི་ཟློག་མེད་འཇིག་རྟེན་གྱི་ཆོས་ཉིད་ཡིན་པས། ཁ་ཆེ་ཕ་ལུས་“ཡོང་གིན་ཡོང་གིན་འགྲོ་གིན་འགྲོ་གིན་འདུག དོན་དུ་ཡོང་མི་ཚང་མ་འགྲོ་མི་རེད།”གསུངས་པ་ལྟར་དུས་ཀྱི་སྔ་ཕྱི་ཙམ་མ་གཏོགས་ང་ཚོ་ཚང་མ་ལམ་བུ་དེར་འགྲོ་མི་ཡིན་སྟབས། ལོ་ན་སྨིན་པའི་སྐྱེ་བོ་སྤྱིར་བཏང་བ་ཞིག་ཕྱི་མའི་ལམ་དུ་བཞུད་པར་དེ་ཙམ་ཧང་སང་དགོས་དོན་མེད་ཀྱང་།  བོད་མི་རིགས་འདིར་ལར་ཞེན་ཆེ་ཞིང་། ཡོད་ཚད་མི་རིགས་འདིའི་ཆེད་དུ་བློས་གཏོང་གནང་སྟེ། མི་ལོ་བཅུ་ཕྲག་གསུམ་ལྷག་ཙམ་རིང་མགུལ་ལ་ལྕགས་ཐག་དང་སྐུ་ལ་བཙོན་གོས་སྔོན་པོ་གྱོན་སྟེ་རྒྱའི་བཙོན་ཁང་ནང་མནར་གཅོད་མྱངས་མྱོང་མཁན་གྱི་དཔའ་རྒོད་ཅིག་ང་ཚོ་དང་ཁ་བྲལ་ཏེ་འཇིག་རྟེན་ཕྱི་མའི་ལམ་དུ་ཕེབས་སྐབས། གཟུགས་མེད་ཡ་ཆུང་སེམས་སུ་ཇི་མི་སྙམ་པའི་ཚོར་སྣང་སྐྱུར་མོ་ཞིག་ང་ལ་རང་བཞིན་གྱིས་སྦྱིན་བྱུང་ལ། ཁྱེད་རྣམས་ལའང་དེ་ལྟར་བྱུང་ཡོད་གཤིས་ཆེ། དེ་བས་ཀྱང་བློ་ཕམ་དགོས་པ་ཞིག་ནི། ཁོང་རང་ཉིད་དང་འདྲ་བའི་རྒྱལ་གཅེས་དཔའ་རྒོད་ཚོའི་སྒེར་སེམས་མེད་པའི་བློས་གཏོང་ལ་གྲུབ་འབྲས་མ་ཐོབ་གོང་ནས་ཕྱི་ལམ་དུ་ཕེབས་དགོས་བྱུང་པ་རེད། དེ་ལྟ་བུའི་བོད་མི་རིགས་ཀྱི་རླབས་ཆེན་དཔའ་རྒོད་ནི་གཞན་སུ་ཡང་མིན་པར་དགུང་གྲངས་ ༩༣ ལ་ཕེབས་པའི་བོད་མི་རིགས་ཀྱི་རང་དབང་འཐབ་བརྩོད་པ་སྟག་སྣ་འཇིགས་བཟང་ལགས་ཡིན། ཁོང་འཇིག་རྟེན་ཕྱི་མའི་ལམ་དུ་ཕེབས་མཚམས་སུ་སྤྱི་ཚོགས་དྲ་ལམ་དུ་མྱང་ངན་གུས་འདུད་ཞུ་མཁན་མང་པོ་བྱུང་སོང་ལ། ཁོང་གི་སྐུ་པར་ཡང་མི་ཉུང་བ་ཞིག་གཅིག་རྗེས་གཉིས་མཐུད་ཀྱི་དྲ་བའི་སེང་ནས་མཐོན་བྱུང་།

ཁོང་གི་སྐུ་པར་དེ་དག་གི་ཁྲོད་ནས་ངའི་སེམས་ལ་ཟུག་གཟེར་འཕར་མ་སྦྱིན་མཁན་ཞིག་ནི་བཙོན་གོས་སྔོན་པོ་ཧྲུལ་པོ་ཞིག་གི་སྟེང་མགུལ་ལ་ལྕགས་ཐག་གཡོགས་པའི་སྐྱིད་ཡ་བའི་བཙོན་ཁང་ནང་བསྒྲོན་པའི་ཁོང་གི་སྐུ་པར་དེ་རེད། སྐམ་ལ་རིད་པའི་ཁོང་གི་བཞིན་རས་དང་། སྔོ་ལ་ཧྲུལ་བའི་བཙོན་གོས་སྔོན་པོ། ཁོང་གི་མགུལ་ལ་བཙན་གྱིས་གཡོགས་པའི་ལྕགས་ཐག་རྣམས་པར་རིས་དེའི་ནང་ནས་མཐོང་སྐབས། མིག་ཤེས་ཀྱི་ཡོལ་བའི་རྒྱབ་ལ་གབ་པའི་ངའི་མིག་ཟུང་ནས་འཆི་མ་དབང་མེད་དུ་ཤོར་སོང་ལ། ཡ་ཆུང་སེམས་སུ་ལན་འདེབས་མེད་པའི་དྲི་རྟགས་ཀྱང་མི་ཉུང་བ་ཞིག་འཁོར་བྱུང་། དེ་བཞིན་དུ་སྐུ་པར་དེའི་ཐོག་ནས་ངས་རྗེས་དཔག་ཐུབ་པ་ནི། གཤིན་རྗེའི་ར་བ་དང་གཉིས་སུ་མེད་པའི་རྒྱའི་བཙོན་ཁང་ནང་ཁོང་གིས་ལུས་སེམས་གཉིས་ཀྱིས་དཀའ་སྡུག་ཅི་ཙམ་མྱངས་མིན་དེ་རེད། ངའི་ཀླད་པའི་ནང་འཁོར་བའི་ལན་འདེབས་མེད་པའི་དྲི་རྟགས་ནི། མི་སྐུ་གཟུགས་ཆུང་ཆུང་ཞིག་ལ། དེ་ལྟ་བུའི་བློས་གཏོང་བྱེད་ཕོད་པའི་བློ་སྟོབས་དང་། ཆོད་སེམས་ཤིག་གང་ནས་བྱུང་མིན་དང་། དམར་པོའི་སྲིད་གཞུང་གི་སྒྲོམ་གཞིའི་ནང་དེ་ལྟ་བུའི་རྒྱལ་ཞེན་དེ་གང་ནས་བྱུང་མིན་དེ་རེད།

དྲི་བ་རྗེས་མ་དེའི་ལན་འདེབས་འཚོལ་ཆེད་ངས་མི་ལོ་ཉི་ཤུའི་གོང་ལ་ཕྲན་གྱི་སློབ་གྲོགས་ཆབ་སྲིད་བཙོན་ཟུར་ཞིག་གིས་དམ་པ་ཁོང་གི་སྐོར་ལ་གསུངས་པའི་བཀའ་མོལ་དུམ་བུ་ཞིག་ལ་ཕྱིར་དྲན་བྱ་དགོས་བྱུང་། དེ་ཡང་སྔོན་ཆད་རང་ཉིད་ནོར་གླིང་དུ་ཡོད་སྐབས་ཕྲན་གྱི་སློབ་གྲོགས་ཆབ་སྲིད་བཙོན་ཟུར་ཞིག་གིས་དམ་པ་དེ་ཉིད་ཀྱིས་བཙོན་ཁང་ནང་གོ་སྐབས་ནམ་བྱུང་ལ་བཙོན་གྲོགས་ཚོར་བོད་ཀྱི་བརྡོ་སྤྲོད་ལ་སོགས་པའི་བོད་ཡིག་སློབ་འཁྲིད་གནང་གི་ཡོད་ལུགས་གསུངས་ཤིང་། ཁོང་གིས་གསུངས་པའི་བཀའ་མོལ་དེའི་ཁྲོད་ནས་ངས་རྟོགས་ཐུབ་པ་ནི་ཁོང་གིས་བོད་མི་རིགས་ཀྱི་རིག་གཞུང་ལ་བཅངས་པའི་བརྩེ་སེམས་དེ་ཡིན་ཞིང་། དེ་ནི་ཁོང་གིས་མི་རིགས་འདིའི་ཆེད་ཡོད་ཚད་བློས་གཏོང་ཐུབ་པའི་རྒྱལ་ཞེན་གྱི་བསམ་བློའི་འབྱུང་ཁུངས་དེ་ཡིན་སྲིད་པའི་ཚོད་དཔག་རང་བཞིན་གྱི་ལན་འདེབས་དེ་རེད། གང་ལྟར་ཁོང་ནི་ང་དང་ང་འདྲ་བའི་སྐྱེ་བོ་མང་པོ་ཞིག་གི་སེམས་ནང་གི་དྲི་རྟགས་མང་པོ་ཞིག་ལ་ལན་འདེབས་མ་རག་གོང་ནས་ཕྱི་མའི་ཡུལ་དུ་ཕེབས་ཟིན་སོང་། ཐ་ན་ཁོང་གི་འཁྲུངས་ཡུལ་ངོ་མ་དེ་ཡང་གང་ཡིན་ང་ཚོས་གསལ་རྟོགས་མ་ཐུབ་གོང་ནས་ཁོང་བཞུད་ཟིན་སོང་།

དེ་ལྟ་བུའི་ལན་འདེབས་མེད་པའི་དྲི་རྟགས་མང་པོ་ཞིག་ང་ཚོའི་མདུན་དུ་ལྷག་པ་ནི། གཅིག་ནས་ང་ཚོ་མང་པོ་ཞིག་གིས་ཁོང་བཙོན་གྲོལ་ཐོབ་རྗེས་“ལ་བུད་སོང་ལ་རྩེ་སྐུ་བཞུགས་གནང་”ཟེར་བའི་དཔེ་ལྟར་གཞུང་འབྲེལ་གྱི་གཟིགས་སྐྱོང་འཐུས་ཚང་གནང་བ་ལས་གཞི་རིམ་སྤྱི་ཚོགས་ཀྱིས་ཁོང་གི་བློས་གཏོང་དང་རྒྱལ་ཞེན་གྱི་མཛད་རྗེས་ལ་དགོས་ངེས་ཀྱི་མཐོང་ཆེན་ཕུལ་མ་ཐུབ་པ་དང་། གཉིས་ནས་ཤེས་ལྡན་མི་སྣ་དང་འཐབ་བརྩོད་ཀྱི་དབུ་ཁྲིད་ཚོས་ཁོང་གི་རྒྱལ་ཞེན་གྱི་བསམ་བློའི་འབྱུང་རྩ་བསྔོགས་ཏེ་མི་རབས་རྗེས་མའི་སློབ་སྦྱོང་བྱ་ཡུལ་སྐུ་ཚེའི་ལོ་རྒྱུས་འཐུས་ཚང་འབྲི་ཐུབ་མེད་པ་སོགས། མདོར་ན་ང་ཚོ་གཞི་རིམ་སྤྱི་ཚོགས་ཀྱིས་དགོས་ངེས་ཀྱི་འོས་འགན་ཚུལ་བཞིན་མ་ཁྱེར་བའི་དབང་གིས་ཁོང་གིས་ང་ཚོར་ལན་འདེབས་མེད་པའི་དྲི་རྟགས་མང་པོ་ཞིག་བཞག་སྟེ་ཕེབས་སོང་། ཐ་ན་རང་རིགས་གཞོན་སྐྱེས་མི་ཉུང་བ་ཞིག་གི་སེམས་སུ་ཡང་སྙིང་སྟག་སྣ་འཇིགས་བཟང་ལགས་སུ་ཡིན་མིན་ཀྱང་མི་ཤེས་པའི་སྐབས་འདིར་རྒྱང་རིང་དུ་ཕེབས་སོང་།