དེ་རིང་ཚོགས་དྲུང་ལས་ཁུངས་ནས་བརྡ་ཐོ་ཞིག་བཏང་བའི་ནང་། ཉེ་ཆར་ཟླ་འདིའི་ཕྱི་ཚེས་ ༢༧ ཉིན་བོད་མི་མང་སྤྱི་འཐུས་རྒྱུན་ལས་ལྷན་ཚོགས་ནས་བཀའ་བསྡུར་བྱས་ཏེ། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ དེ་ཉིད། ཕྱི་ལོ་ ༢༠༢༡ ལོའི་ཕྱི་ཟླ་ ༣ པའི་ཚེས་ ༡༥ ནས་ཕྱི་ཟླ་ ༣ ཚེས་ ༣༡ བར་བཅས་ཁྱོན་ཉིན་གྲངས་ ༡༥ རིང་ཚུགས་གཏན་འཁེལ་ཡོད་སྐོར་བསྒྲགས་ཡོད་འདུག
སྤྱིར་འདི་ལོའི་ཕྱི་ཟླ་འདི་ལོའི་ཕྱི་ཟླ་ ༨ ཚེས་ ༡༧ ཉིན་བོད་མི་མང་སྤྱི་འཐུས་ཚོགས་གཙོ་སྦྲེལ་པོས། རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ ༡༩ རྐྱེན་པས་འཛམ་གླིང་ཁྱོན་ཡོངས་ཀྱི་གནས་སྟངས་ཆེས་ཛ་དྲག་ཏུ་འགྱུར་བཞིན་ཡོད་པ་དང་། ལྷག་པར་དུ་དྷ་ས་ནི་༧རྒྱལ་བའི་བཞུགས་སྒར་ཡིན་སྟབས་གང་ཅིའི་ཐད་འགན་འཁུར་བྱ་དགོས་པ་དང་། གྲོས་ཚོགས་ཚོགས་པའི་དབང་དུ་བཏང་ནའང་རྒྱལ་སྤྱིའི་འགྲུལ་བཞུད་སྒོ་རྒྱ་བསྡམས་པའི་རྐྱེན་གྱིས་འགྲོ་འོང་དཀའ་ངལ་གྱི་ཕྱོགས་ནས་རྒྱ་གར་ལས་གཞན་པའི་ཕྱི་རྒྱལ་དུ་ཡོད་པའི་སྤྱི་འཐུས་མང་ཆེ་བ་ཕེབས་མི་ཐུབ་པ་དང་། རྒྱ་གར་ནང་ནས་ཀྱང་སྤྱི་འཐུས་ཅི་ཙམ་ཕེབས་ཐུབ་ཀྱི་ཡོད་མེད་རྟོགས་ཐབས་དཀའ་བའི་གནས་སྟངས་བཅས་ཀྱི་ཆ་ནས་འདི་ལོའི་ཕྱི་ཟླ་ ༩ པའི་ནང་འཚོག་གཏན་འཁེལ་བའི་གྲོས་ཚོགས་ཚོགས་དུས་ ༡༠ དེ་ཉིད་བཅའ་ཁྲིམས་དོན་ཚན་ ༦ དང་། དོན་ཚན་ ༤༩ པའི་ནང་གསེས་ ༢ པའི་དགོངས་དོན་ལྟར་ཕྱི་ལོ་ ༢༠༢༡ ཟླ་ ༣ པའི་བར་ཕར་འགྱངས་གནང་ཡོད་སྐོར་གསར་འགོད་གསལ་བསྒྲགས་བསྐྱངས་ཡོད་པ་རེད།
སྤྱི་འཐུས་རྒྱུན་ལས་ལྷན་ཚོགས་ཀྱི་ཐག་གཅོད་གསལ་བསྒྲགས་དེ་དང་བསྟུན། འདི་ལོའི་ཕྱི་ཟླ་ ༩ ཚེས་ ༢༥ ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ནས་ཤོག་ངོས་ ༡༣ ཅན་གྱི་ཆད་འགེལ་བཀའ་ཁྱབ་ཅིག་བཏང་བའི་ནང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་ ༡༠ པ་ཕྱི་ལོ་ ༢༠༢༡ ཟླ་ ༣ བར་ཕར་འགྱངས་གནང་བ་དེ་བཅའ་ཁྲིམས་དོན་ཚན་ ༤༠ པར་འགལ་འཛོལ་བྱུང་ཡོད་པ་དང་། སྤྱི་འཐུས་རྒྱུན་ལས་ལྷན་ཚོགས་ཀྱི་ཚོགས་མི་གྲངས་ ༡༡ ནས་བསམ་བཞིན་དུ་བཙན་བྱོལ་བོད་མིའི་བཅའ་ཁྲིམས་ལ་བརྩི་མེད་གནང་བར་བརྟེན། ཕྱི་ཚེས་ ༢༥ ནས་བཟུང་ཕྱི་ལོ་ ༢༠༢༡ ཟླ་ ༣ ཚེས་ ༡༡ བར་དུ་སྤྱི་འཐུས་རྒྱུན་ལས་རྣམས་འོས་བསྡུའི་སྒྲིག་གཞི་དོན་ཚན་ ༤ པ་ནང་གསལ་བའི་གཞུང་འབྲེལ་འོས་བསྡུའི་འདེམས་བྱེད་ཀྱི་ཐོབ་དབང་བཀག་བསྐྱིལ་བྱས་པ་ཡོངས་བསྒྲགས་བྱས་ཡོད། 
ཡིན་ན་ཡང་། ཉིན་དེའི་དགོང་མོ་ཆུ་ཚོད་ ༨ ཡས་མས་སུ་བོད་མི་མང་སྤྱི་འཐུས་ལྷན་ཚོགས་ནས། བོད་མི་མང་སྤྱི་འཐུས་ལྷན་ཚོགས་ནི་ཆེས་མཐོའི་ཁྲིམས་ཞིབ་ཁང་གི་བཀའ་ཁྱབ་གཏོང་སའི་ཁྱབ་ཁོངས་སུ་མེད་པ་མ་ཟད། ཆེས་མཐོའི་ཁྲིམས་ཞིབ་ཁང་གི་མང་གཙོའི་ཀ་བ་གསུམ་གྱི་འགན་དབང་གྱི་ས་མཚམས་ལས་བརྒལ་ཏེ་བཅའ་ཁྲིམས་དང་ཡོངས་སུ་འགལ་བའི་བྱེད་བབ་དེར་ངོས་ལེན་ཞུ་ཐབས་བྲལ་ཡོད་པ་སོགས་ཤོག་ངོས་བཞི་ཅན་གྱི་གསལ་བསྒྲགས་ཤིག་སྤེལ་ཡོད་པ་རེད།
གཞན་ཡང་ཉེ་ཆར་ཟླ་འདིའི་ཕྱི་ཚེས་ ༩ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གཞུང་འབྲེལ་དྲ་བའི་སྟེང་། བོད་མི་མང་སྤྱི་འཐུས་རྒྱུན་ལས་བོད་མིའི་སྒྲིག་འཛུགས་ཀྱི་ལྷན་ཁང་ཡན་ལག་དང་བཅས་པའི་རྩིས་ལོ་ ༢༠༡༩་་་༢༠༢༠ ལོའི་ལོ་འཁོར་ལས་བསྡོམས་རྒྱས་བསྡུས་གཉིས་ལ་ཞིབ་འཇུག་གིས་དོགས་འདྲི་གནང་བ་དང་། དེར་བཀའ་ཤག་ནས་ལན་འདེབས་གནང་བ། དེ་བཞིན་སྤྱི་འཐུས་སྒེར་ནས་བཀའ་ཤག་གི་ལན་འདེབས་ལ་འཕྲོས་དོན་དྲི་བ་དང་དེར་ལན་འདེབས་བཅས་ཆ་ཚང་འགོད་སྤེལ་བྱས་ཡོད་འདུག དེ་བཞིན་གལ་ཏེ་ད་ལན་གསལ་བསྒྲགས་གཞིར་བཟུང་གྲོས་ཚོགས་ཚོགས་དུས་ ༡༠ དེ་ཉིད་དངོས་སུ་ཚོགས་ཐུབ་ཚེ། དེ་ནི་བོད་མི་མང་སྤྱི་འཐུས་སྐབས་ ༡༦ པའི་གྲོས་ཚོགས་ཚོགས་དུས་མཐའ་མ་དེ་ཆགས་སྲིད་པ་རེད།
གསར་འགོད་པ། པ་སངས་ཚེ་རིང་།
