རྒྱ་ནག་གཞུང་གིས་ལོ་བརྒྱ་གཉིས་ཀྱི་འབད་འཐབ་དམིགས་ཚད་གཞིར་བཟུང་བོད་ཀྱི་ལྷ་ལྡན་གཙུག་ལག་ཁང་གཙོའི་དགོན་སྡེ་ཁག་གི་འཛུགས་སྐྲུན་བཟོ་བཀོད་དང་ཐ་ན་ཆོས་ལུགས་ཀྱི་ཅ་དངོས་རྣམས་ཀྱང་རྒྱ་ནག་གི་ཁྱད་ཆོས་ཅན་དུ་བསྒྱུར་དགོས་སྐོར་བཤད་འདུག
ཟླ་འདིའི་ཕྱི་ཚེས་ ༢ ཉིན། རྒྱ་ནག་གཞུང་འབྲེལ་བོད་ལྗོངས་དྲ་བ་ཟེར་བས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་པེ་ཅིན་བོད་ལུགས་དགོན་སེར་དགོན་ཞེས་པར། བོད་བརྒྱུད་ནང་བསྟན་ཆོས་ལུགས་དང་རྒྱ་བརྒྱུད་ནང་བསྟན་ཆོས་ལུགས། ལྷོ་བརྒྱུད་ནང་བསྟན་ཆོས་ལུགས་དང་རྒྱ་ནག་གི་མཐོ་སློབ་དང་ཚན་རིག་ཞིབ་འཇུག་ལས་ཁུངས། རིག་གནས་དངོས་མང་བཤམ་སྟོན་ཁང་ཟེར་བ་སོགས་ཆོས་ལུགས་ལས་དོན་སྐོར་གྱི་ཚོགས་པ་ ༡༠ ཙམ་གྱི་ནང་། ཆེད་མཁས་པ་ཟེར་བའི་མི་སྣ་མང་པོ་ཆེད་དུ་བསྡུ་རུབ་ཀྱིས་བོད་བརྒྱུད་ནང་བསྟན་ཆོས་ལུགས་རྒྱ་ནག་ཅན་དུ་བསྒྱུར་བར་སྐུལ་འདེད་དང་། བོད་ཀྱི་ལྷ་ལྡན་གཙུག་ལག་ཁང་གཙོའི་དགོན་སྡེ་ཁག་གི་འཛུགས་སྐྲུན་རྒྱ་ནག་གི་ཁྱད་ཆོས་ཅན་དུ་སྒྱུར་ཐབས་ཟེར་བ་སོགས་ཀྱི་སྐོར་ལ་བགྲོ་གླེང་ཚོགས་འདུ་ཞིག་ཚོགས་ཡོད་འདུག
ཚོགས་འདུ་དེའི་སྟེང་པེ་ཅིང་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་ལིའུ་ཅུན་ཟེར་བ་དེས། བོད་ཀྱི་དགོན་སྡེ་ཁག་གི་བཟོ་སྐྲུན་དང་སྒྱུ་རྩལ་མཛེས་བཀོད། བཟོ་དབྱིབས་སོགས་རྒྱ་ནག་གི་ཁྱད་ཆོས་ཅན་དུ་སྒྱུར་ཐབས་བྱེད་དགོས་པ་དང་། གནད་དོན་དེ་ནི་རྒྱ་ནག་ཆིང་རྒྱལ་རབས་སྐབས་ཀྱི་བོད་ཀྱི་ནང་བསྟན་རྒྱ་ནག་ཅན་དུ་སྒྱུར་བའི་ཐབས་རྩལ་ལ་འབད་དགོས་སྐོར་དང་། ཡང་རྒྱ་ནག་ཧུ་པེ་ཞིང་ཆེན་ཀུན་བདེ་གླིང་དགོན་པའི་རྒྱ་རིགས་མཁན་པོ་མོ་རི་ཀེན་ཐུའུ་ཟེར་བ་ཞིག་གིས། ཀུན་བདེ་གླིང་དགོན་པའི་ཨར་ལས་བཟོ་སྐྲུན་ཐད་བོད་དང་རྒ་ནག་གཉིས་ཀྱི་བཟོ་བཀོད་ཁྱད་ཆོས་ཡོད་པ་ལྟར། བོད་བརྒྱུད་ནང་བསྟན་གྱི་དགེ་ལུགས་པའི་དགོན་སྡེ་ཡོངས་ཀྱི་ཨར་ལས་བཟོ་སྐྲུན་རྒྱ་ནག་གི་ཁྱད་ཆོས་ཅན་དུ་བསྒྱུར་དགོས་སྐོར་སོགས་བརྗོད་ཡོད་འདུག
གཞན་ཡང་། ཚོགས་འདུ་དེར་ཞུགས་པའི་ཚོགས་མི་ཚང་མས་ཞི་ཅིན་ཕིན་གྱི་དགོངས་དོན་ཟེར་བ་དེ་ལྟར། བོད་བརྒྱུད་ནང་བསྟན་རྒྱ་ནག་ཅན་དུ་སྒྱུར་ཐབས་ཀྱི་སྐོར་ནས་བཤད་ཡོད་པ་དང་། རྒྱ་ནག་སྤྱི་ཚོགས་ཚན་རིག་ཞིབ་འཇུག་ཁང་གི་འབུམ་རམས་ཞེ་ཅཱ་ཞིན་ཟེར་བ་ཞིག་གིས། པེ་ཅིན་ཀྲི་ཧྭ་དགོན་པའི་ཟངས་ཀྱི་ཅོང་གི་ཡི་གེ་དང་འབྲེལ་ནས། བོད་བརྒྱུད་ནང་བསྟན་གྱི་མཎྜལ་སྒྲིག་སྟངས་དང་ཆོས་ལུགས་རིག་གནས་ཀྱི་ནང་དོན་དེ། རྒྱ་ནག་གི་ཡོན་རྒྱལ་རབས་སྐབས་ཀྱི་ལུགས་སྲོལ་དང་སྒྱུར་དགོས་སྐོར་བཤད་ཡོད་པ་མ་ཟད། བོད་ལྗོངས་ཆ་འཕྲིན་ལྟེ་གནས་ཀྱི་རྒྱ་ཡིག་རྩོམ་སྒྲིག་པ་གཙོ་བོ་དབྱི་ཝུན་ཝུན་ཟེར་བ་ཞིག་གིས། རྗེ་ཙོང་ཁ་པ་ཆེན་པོའི་མཛད་རྣམ་དང་དེའི་རྗེས་རབས་ལ་ཐེབས་པའི་ཤུགས་རྐྱེན་དང་འབྲེལ་ནས། བོད་ཀྱི་དགོན་པ་ཁག་གི་ཆོས་ཀྱི་སློབ་གཉེར་ལམ་ལུགས་རྒྱ་ནག་ཅན་དུ་སྒྱུར་བའི་ཁྱད་ཆོས་དང་ཕན་ཁེ་སོགས་ཀྱི་སྐོར་ནས་བཤད་ཡོད་འདུག
ཐེངས་འདིའི་ཚོགས་འདུ་དེ་ནི་ཆེད་དམིགས་རྒྱ་ནག་གཞུང་ཕྱོགས་ནས་བཀོད་སྒྲིག་བྱས་པ་ཞིག་ཡིན་པ་དང་། ཚོགས་འདུའི་མཇུག་སྡོམ་སྐབས་རྒྱ་ནག་བོད་བརྒྱུད་ནང་བསྟན་ཟེར་བའི་འགན་འཛིན་གཞོན་པ་ལིའུ་ཕུང་ཟེར་བས། ཚོགས་འདུ་དེ་ནི་རྒྱ་ནག་གཞུང་གིས་ལོ་བརྒྱ་གཉིས་ཀྱི་འབད་འཐབ་དམིགས་ཚད་ཀྱི་ལོ་རྒྱུས་དང་འབྲེལ་བའི་ལོ་རྒྱུས་ཀྱི་དོན་སྙིང་གཏིང་ཟབ་ལྡན་པའི་ཚོགས་འདུ་གལ་ཆེན་ཞིག་ཡིན་པ་མ་ཟད། ཚོགས་འདུའི་སྟེང་གཏམ་བཤད་ཀྱི་བརྗོད་དོན་ཁ་གསལ་བ་དང་རིག་པས་ཁུངས་སྐྱེལ་བྱས་ཏེ། བོད་བརྒྱུད་ནང་བསྟན་གྱི་དགོན་སྡེའི་འཛུགས་སྐྲུན་དང་ནང་བསྟན་རྒྱ་ནག་ཅན་དུ་སྒྱུར་བར་འགྲེལ་བཤད་དང་དབྱེ་ཞིབ་གཏིང་ཟབ་ཐུབ་ཡོད་པས། གནད་དོན་དེས་ནང་བསྟན་རྒྱ་ནག་ཅན་དུ་སྒྱུར་རྒྱུ་དེ་ལོ་རྒྱུས་ཀྱི་བགྲོད་ལམ་ཞིག་ཡིན་པ་མ་ཟད། ལས་དོན་དེར་དུས་ནམ་ཡང་མཐའ་མེད་པར་ནམ་ཡང་སྤེལ་དགོས་སྐོར་བརྗོད་འདུག
འདི་ལོའི་ཕྱི་ཟླ་ ༨ ནང་རྒྱ་ནག་མགོ་ཁྲིད་ཞི་ཅིན་ཕིན་ནས་བོད་སྐོར་གྱི་ལས་དོན་ཚོགས་འདུ་ཟེར་བའི་སྟེང་། བོད་བརྒྱུད་ནང་བསྟན་གྱི་ཆོས་ལུགས་མཐའ་གཅིག་ཏུ་རྒྱ་ནག་ཅན་དང་སྤྱི་ཚོགས་རིང་ལུགས་ཅན་དུ་བསྒྱུར་དགོས་སྐོར་བརྗོད་པ་ནས་བཟུང་། རྒྱ་ནག་གཞུང་གིས་བོད་ཀྱི་ས་ཁུལ་ཡོངས་སུ་ནང་བསྟན་རྒྱ་ནག་ཅན་དུ་སྒྱུར་ཐབས་དང་ཞི་ཅིན་ཕིན་གྱི་གཏམ་བཤད་ལ་སློབ་སྦྱོང་ཟེར་བ་སོགས། བོད་ཀྱི་དགོན་སྡེ་ཁག་གི་གྲྭ་བཙུན་ཚོར་ཤུགས་ཆེར་བསྒྲགས་བཞིན་ཡོད་པ་དང་། འདི་ལོའི་ཕྱི་ཟླ་ ༡༡ ཚེས་ ༡༢ ཉིན་རྒྱ་ནག་བོད་རིག་པའི་ཞིབ་འཇུག་ལྟེ་གནས་ཁང་དང་། རྒྱ་ནག་བོད་བརྒྱུད་ནང་བསྟན་ཐུན་ཚོགས་ཟེར་བ་གཉིས་མཉམ་འབྲེལ་ཐོག་བོད་བརྒྱུད་ནང་བསྟན་གྱི་དགོངས་འགྲེལ་དཔྱད་གླེང་ཚོགས་འདུ་ཟེར་བ་ཞིག་ཚོགས་ཏེ། བོད་བརྒྱུད་ནང་བསྟན་ཁྱོན་ཡོངས་ནས་རྒྱ་ནག་ཅན་དུ་སྒྱུར་ཐབས་ཟེར་བའི་སྐོར་ལ་བགྲོ་གླེང་ཚོགས་ཡོད་པ་དང་། དེ་བཞིན་ཕྱི་ཟླ་ ༡༡ པའི་ཟླ་མཇུག་ནས་བོད་རྔ་བ་དང་འབར་ཁམས། མཛོད་དགེ་ཕྱོགས་ཀྱི་དགོན་སྡེ་ཁག་ཏུ་ཆོས་ལུགས་རྒྱ་ནག་ཅན་དུ་སྒྱུར་ཐབས་ཀྱི་ཚོགས་འདུ་དང་ཆབ་སྲིད་དྲིལ་བསྒྲགས་ཤུགས་ཆེར་སྤེལ་བཞིན་ཡོད་པའི་གནས་ཚུལ་ཐོན་ཡོད་པ་རེད།
རྒྱ་ནག་གཞུང་གིས་འདས་པའི་ལོ་ཤས་ནས་བཟུང་བོད་ཀྱི་དགོན་སྡེ་ཁག་ནང་མིང་དང་ཐ་སྙད་འདྲ་མིན་འོག་ཆོས་ལུགས་བྱེད་སྒོ་དང་། གྲྭ་བཙུན་ཚོའི་འགྲོ་འདུག་སྤྱོད་གསུམ་དང་བསམ་བློའི་འཁྱེར་ཕྱོགས་སོགས་ནས་རྒྱ་ནག་གི་ཆབ་སྲིད་དྲིལ་བསྒྲགས་ལ་སྒྱུར་ཐབས་སྣ་ཚོགས་བྱེད་ཀྱི་ཡོད་པ་དང་། འདི་ལོ་ནས་ཞི་ཅིན་ཕིན་གྱི་བོད་སྐོར་གྱི་གཏམ་བཤད་དང་འབྲེལ་ནས། བོད་ཀྱི་དགོན་སྡེ་ཁག་གི་གྲྭ་བཙུན་ཚོར་ཆབ་སྲིད་ཀྱི་དྲིལ་བསྒྲགས་ལས་ཀྱང་། བོད་བརྒྱུད་ནང་བསྟན་གྱི་གཞུང་ལུགས་ནང་དོན་རྒྱ་ནག་ཅན་དུ་སྒྱུར་དགོས་པའི་ལས་འགུལ་སྤེལ་ཐབས་བྱེད་བཞིན་ཡོད་པ་མ་ཟད། ཐེངས་འདིའི་ཚོགས་འདུ་དང་འབྲེལ་ནས་བོད་ཀྱི་དགོན་སྡེ་ཁག་གི་འདུ་ཁང་ལྷ་ཁང་གི་བཟོ་བཀོད་དང་། མཐའ་ན་དགོན་པའི་ཆོས་ལུགས་ཡོ་བྱེད་ཁག་ཀྱང་རྒྱ་ནག་གི་ཁྱད་ཆོས་ཅན་དུ་སྒྱུར་དགོས་པའི་སྲིད་བྱུས་འཐེན་བཞིན་ཡོད་འདུག
ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་ས་བྱི་ཞི་བའི་རྒྱ་རྒོལ་ལས་འགུལ་བྱུང་བ་ནས། བོད་ཀྱི་དགོན་སྡེ་ཁག་ཚང་མའི་ནང་རྒྱལ་གཅེས་ཆོས་གཅེས་དང་། གྲྭ་བཙུན་རྣམ་དག་མེས་རྒྱལ་བརྟན་བརླིང་སྲུང་སྐྱོབ་སོགས་ཀྱི་ལས་འགུལ་འདྲ་མིན་སྤེལ་བཞིན་ཡོད་པ་དང་། རྒྱལ་སྤྱིའི་སྟེང་རྒྱ་ནག་གི་བྱེད་སྤྱོད་དེ་དག་ནི་མི་རིགས་དང་རིག་གཞུང་རྩ་གཏོར་ལ་དམིགས་པའི་སྲིད་བྱུས་ལག་བསྟར་གྱི་བྱེད་ཐབས་ཤིག་ཡིན་པ་ཤེས་རྟོགས་བྱུང་སྟེ། རྒྱལ་ཚོགས་ཀྱི་ཚོགས་འདུ་གཙོའི་རྒྱལ་སྤྱིའི་སྲིད་གཞུང་ཁག་གིས་རྒྱ་ནག་ལ་སྐྱོན་བརྗོད་ཤུགས་ཆེར་བྱེད་བཞིན་ཡོད་པ་རེད།
