རྩོམ་པ་པོ་ཤེས་རབ་དར་རྒྱས་ལགས་ཀྱིས་ཕྱི་ལོ་ ༡༩༡༣ ནས་ ༡༩༣༣ བར་གྱི་སྲིད་དོན་ལོ་རྒྱུས་ཡོ་བ་བསྲངས་ཤིང་གབ་པ་ཕྱུང་བའི་ཉེ་རབས་བོད་ཀྱི་ལོ་རྒྱུས་དང་ལྷ་སྲས་རྒྱལ་ལོ་དོན་གྲུབ་ཞེས་པའི་དཔེ་དེབ་སྟོད་སྨད་གཉིས་བརྩམས་ནས་དབུ་འབྱེད་གནང་སོང་།
དེ་རིང་སྔ་དྲོའི་ཆུ་ཚོད་ ༡༠།༣༠ ཐོག་བཞུགས་སྒར་དྷ་སའི་ནོར་བུ་གསོལ་མགྲོན་ཁང་དུ། རྩོམ་པ་པོ་ཤེས་རབ་དར་རྒྱས་ལགས་ཀྱིས་བརྩམས་པའི་དེབ་ཕྲེང་གཉིས་ཅན་གྱི་ཉེ་རབས་བོད་ཀྱི་སྲིད་དོན་ལོ་རྒྱུས་དང་ལྷ་སྲས་རྒྱལ་ལོ་དོན་གྲུབ་ཞེས་པའི་དཔེ་དེབ་སྟོད་སྨད་གཉིས་དབུ་འབྱེད་ཀྱི་མཛད་སྒོ་སྟབས་བདེ་ཞིག་ཚོགས་སོང་བ་དང་། མཛད་སྒོར་སྐུ་མགྲོན་གཙོ་བོ་ཤེས་རིག་བཀའ་བློན་པདྨ་དབྱངས་ཅན་མཆོག་དང་། བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་རྣམ་གཉིས་ནས་བརྙན་ལམ་བརྒྱུད། ཉེ་རབས་བོད་ཀྱི་ལོ་རྒྱུས་འབྲི་རྩོམ་གྱི་གལ་ཆེའི་རང་བཞིན་སྐོར་ལ་དཔེ་དེབ་དབུ་འབྱེད་དང་སྦྲགས་གསུང་བཤད་གནང་སོང་བ་དང་། གཞན། མདོ་སྨད་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཙོ་དགེ་བཤེས་གངས་རི་ལགས་དང་། ༧སྐྱབས་རྗེ་ཀིརྟི་རིན་པོ་ཆེ་མཆོག་གི་སྐུའི་དྲུང་ཡིག་ཆེན་མོ་འབྲིང་བ་འཇིགས་མེད་ལགས། དྷ་ས་རིགས་ལམ་སློབ་གཉེར་ཁང་གི་དབུ་འཛིན་དགེ་བཤེས་བསམ་གཏན་རྒྱ་མཚོ་ལགས་བཅས་ནས་མཛད་སྒོའི་སྐུ་མགྲོན་དུ་ཆེབས་ཏེ། དཔེ་དེབ་ཀྱི་གལ་ཆེའི་རང་བཞིན་སྐོར་ལ་གཏམ་བཤད་དང་། དཔེ་དེབ་རྩོམ་པ་པོ་ཤེས་རབ་དར་རྒྱས་ལགས་དང་། དཔེ་དེབ་པར་སྐྲུན་སོགས་ཀྱི་སྦྱིན་བདག་ལྷ་བྲིས་སྒྱིས་ཚང་སྐལ་བཟང་ལགས་དང་། རྣམ་རྒྱལ་ཟ་ཁང་གི་སྦྱིན་བདག་རྟ་བྷེ་ལགས། ནམ་མཁའ་བསྟན་འཛིན་ལགས་བཅས་ལ་ཐུགས་རྗེ་ཆེ་ཞུས་སོང་།
བོད་ཀྱི་ཉེ་རབས་སྲིད་དོན་ལོ་རྒྱུས་དེབ་ཕྲེང་གཉིས་ཀྱི་རྩོམ་པ་པོ་ཤེས་རབ་དར་རྒྱས་ལགས་ནས་གསར་འགོད་པར་དཔེ་དེབ་ངོ་སྤྲོད་གནང་དོན། དེབ་སྟོད་ཆ་དང་སྨད་ཆ་གཉིས་དེ་མགོ་འཛུགས་ས་དེ་དང་པོ་དབྱིན་ཇི་བོད་ལ་ཡོང་ནས་བོད་དང་འབྲེལ་བ་བྱུང་བ་དང་། རིམ་པས་བོད་ནང་ཤུགས་རྐྱེན་གང་འདྲ་སྤྲད་ཡོད་མེད་བཅས་གཙོ་བོར་བཟུང་ནས་བྲིས་པ་ཞིག་རེད། དེབ་འདིའི་ནང་ཚན་པ་ཁ་ཤས་ཤིག་ཡོད་པའི་ནང་ནས། དང་པོ་དབྱིན་ཇི་ཐོག་མར་བཀྲ་ཤིས་ལྷུན་པོ་དང་དེ་ནས་དབུས་ལ་སླེབས་པའི་རིམ་པ་དང་། གཉིས་པ་དེ་༧རྒྱལ་དབང་བཅུ་གསུམ་པའི་སྐབས་ལ་ཕྱི་ལོགས་ཀྱི་བཙན་འཛུལ་ཡོང་བའི་གནས་སྟངས། དེའི་གཞུག་ཏུ་༧གོང་ས་སྐུ་ཕྲེང་བཅུ་གསུམ་པ་རྒྱ་གར་དུ་བཙན་བྱོལ་ལ་ཕེབས་པ་དང་། དེ་ནས་ཡང་བསྐྱར་བོད་ལ་ཕེབས་པ། གང་ལྟར་ཕྱི་ལོ་ ༡༩༡༣ ནས་ ༡༩༣༣ བར་ཡོངས་བསྒྲགས་སུ་མཁས་པ་ཚོས་བོད་ཀྱི་ལོ་རྒྱུས་ནང་དུས་སྐབས་དེར་བོད་ནང་གནས་སྟངས་ཛ་དྲག་དང་ཟང་ཟིང་མེད་སྐོར་གསུང་གི་ཡོད་པ་རེད། ཡིན་ན་ཡང་། དོན་དངོས་ཐོག་བོད་ཀྱི་ལོ་རྒྱུས་ཐོག་ཞིབ་ཚགས་ཀྱིས་ཉམས་ཞིབ་བྱས་ཡོང་དུས། ནང་ཁུལ་གྱི་ཛ་དྲག་ཆེ་ཤོས་དེ་ཕྱི་ལོ་ ༡༩༡༣ ནས་ ༡༩༣༣ བར་དུ་བྱུང་བ་རེད། དེ་ཧ་ཅང་གི་གནད་འགག་ཆེན་པོ་རེད། དེའི་སྐོར་དེ་དེབ་འདིའི་ནང་ཞིབ་ཚགས་པོ་བྲིས་ཡོད་པ་རེད། དེ་ནས་ཕྱི་ལོ་ ༡༩༣༤ ནས་ ༡༩༥༢ བར་གྱི་གནས་སྟངས་རེད། རྒྱ་མིས་བོད་ལ་དངོས་སུ་བཙན་འཛུལ་བྱས་ཏེ་བོད་ནང་ཤུགས་རྐྱེན་དང་དྲག་ཤུགས་སླེབས་པ་དང་། རིམ་པས་བཙན་བྱོལ་དུ་སླེབས་པའི་རིམ་པ་རེད། དེ་ནས་བཙན་བྱོལ་ནང་གི་གནས་སྟངས་ཆེ་ཁག་དང་། ལྷག་པར་དུ་ཞི་དྲག་གཉིས་ནས་དྲག་པོའི་ལམ་ནས་རྒྱ་དམར་ལ་འགོག་རྒོལ་བྱེད་ཐབས་ཀྱི་རིམ་པ་དེ་བྲིས་ཡོད་པ་རེད། ཅེས་བརྗོད་སོང་།
ཡང་ད་ལྟའི་ལོ་རྒྱུས་དེབ་ཕྲེང་དེའི་ནང་བོད་ཀྱི་ཉེ་རབས་ཀྱི་སྲིད་དོན་ལོ་རྒྱུས་དང་ལྷ་སྲས་རྒྱལ་ལོ་དོན་གྲུབ་ལགས་གཉིས་བར་འབྲེལ་བ་འདོགས་ཐབས་ཇི་འདྲ་ཡིན་མིན་གྱི་སྐོར་ལ་ཁོང་གིས། མི་མང་པོ་ཞིག་གིས་ད་ལན་གྱི་ལོ་རྒྱུས་དེབ་ཕྲེང་དེ་ལྷ་སྲས་རྒྱལ་ལོ་དོན་གྲུབ་ལགས་ཀྱི་སྐུ་ཚེ་རྐྱང་པའི་ལོ་རྒྱུས་ཤིག་མིན་ནམ་སྙམ་པའི་དོགས་པ་ཞིག་ཡོང་གི་ཡོད་ཀྱང་། དོན་དངོས་དེ་ནི་བོད་ཀྱི་ཉེ་རབས་ལོ་རྒྱུས་ཤིག་ཡིན་པ་དང་། བོད་མི་རྣམས་བཙན་བྱོལ་དུ་གྱར་བའི་གནད་དོན་དེར་ལྷ་སྲས་རྒྱལ་ལོ་དོན་གྲུབ་ཧ་ཅང་འབྲེལ་བ་ཆེན་པོ་ཡོད་པ་དང་། ཁོང་ནི་དུས་ཕྱིས་བོད་ནས་རྒྱ་གར་ལ་བཙན་བྱོལ་ལ་འབྱོར་མཁན་བོད་མི་ཐོག་མ་དེ་ཡིན་པ་མ་ཟད། ཁོང་གིས་རྒྱ་གར་ནས་བཙན་རྒོལ་རྒྱལ་སྐྱོབ་ཀྱི་ཕྱག་ལས་དང་། ཕྱི་ལོ་ ༡༩༥༩ ལོར་༧གོང་ས་མཆོག་རྒྱ་གར་དུ་བཙན་བྱོལ་ཕེབས་ཆེད་སྐབས་དེའི་རྒྱ་གར་གྱི་ནེ་རུ་གཞུང་ལ་བཀའ་འཁྲོལ་ཞུ་རྒྱུའི་མཚོན་པའི་ཕྱག་ལ་ཁག་ལ་གཙོ་འགན་བཞེས་པ་དང་། མཉམ་འབྲེལ་རྒྱལ་ཚོགས་དང་ཕྱིའི་རྒྱལ་ཁབ་རྣམས་ལ་བོད་དོན་ཞུ་གཏུག་དང་། གློ་སྒྲིག་འཛུགས་གསར་འཛུགས་དང་ཕྱིས་སུ་བོད་རྒྱ་འབྲེལ་མོལ་སོགས་ཀྱི་ཐད་ལ་ཕྱག་ལས་མང་པོ་གནང་ཡོད་པས། བོད་ཀྱི་ཉེ་རབས་སྲིད་དོན་ལོ་རྒྱུས་ཁྲོད་ཀྱི་མེད་དུ་མི་རུང་བའི་མི་སྣ་ཞིག་ཆགས་ཡོད་སྐོར་སོགས་འགྲེལ་བརྗོད་གནང་སོང་།
ད་ལྟ་བོད་རྒྱ་འབྲེལ་མོལ་སྐོར་ནས་ཞིབ་འཇུག་བྱེད་མུས་ཡིན་སྟབས། ད་ཐེངས་ཀྱི་དེབ་ཕྲེང་སྟོད་སྨད་གཉིས་ནང་དེའི་སྐོར་ཞིབ་ཚགས་བཀོད་མེད་སྐོར་ལ་ཁོང་གིས། ཕྱི་ལོ་ ༡༩༤༧ དང་ ༡༩༤༨ བར་བོད་རང་བཙན་ཤོར་བ་རེད་ཟེར་བ་དེ་སྐབས་དེར་དོ་ནན་མ་བྱས་པའི་རྐྱེན་གྱིས་ཡིན་པ་དང་། སྐབས་དེར་བོད་རང་བཙན་བསྒྲུབ་རྒྱུའི་གོ་སྐབས་ཡག་ཤོས་དེ་ཡིན་ནའང་། དེ་དུས་ང་ཚོས་ནང་ཁུལ་གྱི་རྙོག་དྲ་རྐྱང་རྐྱང་ལ་དུས་ཚོད་བཏང་ཡོད་པ་ལོ་རྒྱུས་ལ་བལྟས་ན་ཤེས་ཐུབ་པ་ཞིག་ཡིན་སྐོར་བརྗོད་བྱུང་།
བོད་ཀྱི་ཉེ་རབས་སྲིད་དོན་ལོ་རྒྱུས་ཀྱི་དེབ་ཕྲེང་འདིའི་འབྲི་རྩོམ་གྱི་བརྒྱུད་རིམ་ནང་རྩོམ་པ་པོས་དེང་རབས་ཀྱི་ཞིབ་འཇུག་ཐབས་ལམ་བརྒྱུད། ཡིག་ཆ་གསར་རྙིང་དང་། བོད་དབྱིན་སྐད་ཡིག་ཐོག་གི་དཔེ་དེབ། བཀའ་སློབ་དང་གསུང་བཤད། བཅར་འདྲི་སོགས་དཔྱད་གཞི་མི་འདྲ་བ་ ༢༠༠ ལྷག་ལ་དབྱེ་ཞིབ་ཀྱིས། དེབ་ཕྲེང་སྟོད་སྨད་གཉིས་ལ་ཁྱོན་ཤོག་ངོས་ ༡༢༠༠ ལྷག་དང་། ཞབས་མཆན་ ༡༣༧༠ ལྷག་བཀོད་འདུག་ལ། རྩོམ་པ་པོས་དཔེ་དེབ་ཀྱི་སྔོན་གླེང་དུའང་། དཔེ་དེབ་འདིར་འཁོད་པའི་ལོ་རྒྱུས་དག་ནི་རྩོམ་པ་པོའི་ཚོར་བ་དང་བསམ་ཚུལ་མིན་ལ། ཡིན་ཀྱང་མི་རུང་། མི་སྡེ་སྤྱི་ཚོགས་ཀྱི་འདས་པའི་ལོ་རྒྱུས་གང་ཡིན་ཡང་ཚོར་བ་དང་བསམ་ཚུལ་གྱིས་འབྲི་མི་རུང་བ་ནི་ཉམས་ཞིབ་པའི་རྩ་དོན་ངོ་མ་དེ་རེད། ཉམས་ཞིབ་ཀྱི་མྱོང་གོམས་མེད་པ་དང་དཔེ་ཀློག་ཚུལ་བཞིན་བྱེད་མི་ཤེས་པ་དག་གིས་དཔེ་དེབ་ཏུ་གང་འཁོད་པ་རྣམས་རྩོམ་པ་པོའམ་ཉམས་ཞིབ་པའི་བསམ་ཚུལ་དུ་འདོད་སྲིད་ཀྱང་། དཔེ་དེབ་འདི་ལ་ཞབས་མཆན་ཅི་མང་བཀོད་དེ་ལོ་རྒྱུས་ཀྱི་ཁུངས་བསྟན་ཅིང་། མཇུག་ཏུ་ཁུངས་ལུངས་ཡིག་ཆ་སོགས་ཀྱི་མཚན་བྱང་ཞིབ་ཏུ་བཀོད་པའི་དགོས་དམིགས་ངོ་མ་མཁྱེན་རྒྱུ་དེ་ཤིན་ཏུ་གལ་ཆེ། ཞེས་བཀོད་ཡོད་འདུག
གསར་འགོད་པ། པ་སངས་ཚེ་རིང་།
