གཏམ་རྒྱུད་ཀྱི་ལམ་ནས་མེས་པོའི་ཞབས་རྗེས་འཚོལ་བ་ཞེས་པའི་དཔེ་དེབ་ཀྱི་དགེ་མཚན་གླེང་བ།

སློབ་དགེ་རྡོ་རྗེ་རིན་ཆེན།

《གཏམ་རྒྱུད་ཀྱི་ལམ་ནས་མེས་པོའི་ཞབས་རྗེས་འཚོལ་བ་》ཞེས་པའི་དཔེ་དེབ་འདི་ཉིད་ཀྱི་དགེ་མཚན་གླེང་སྐབས། རྩོམ་པ་པོ་མི་གླེང་ཐབས་མེད་ལ་བརྟེན། དེབ་འདིའི་རྩོམ་པ་པོར་མཚོན་ན་བོད་ཕྱི་ནང་གཉིས་ནས་ཐ་སྙད་རིག་གནས་སྤྱི་དང་། ལྷག་པར་བོད་བརྒྱུད་ནང་བསྟན་གྱི་ཆོས་ཚུལ་ཐམས་ཅད་ལ་སྦྱོང་བ་མཐར་ཕྱིན་ནས་ཀིརྟི་བྱེས་པ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་གཉེར་ཁང་གི་སློབ་དཔོན་གྱི་མཚན་གནས་བཞེས་ཡོད་སྟབས་རྩོམ་པ་པོ་ཧ་ཅང་ཚད་ལྡན་ཡིན་པ་ཤོད་ཅི་དགོས།  གཉིས་པ་དཔེ་དེབ་འདི་ཉིད་རྩོམ་སྟངས་གོ་རིམ་གྱི་ཆ་ནས་གླེང་ན། 《གཏམ་རྒྱུད་ཀྱི་ལམ་ནས་མེས་པོའི་ཞབས་རྗེས་འཚོལ་བ་ 》ཞེས་པའི་དཔེ་དེབ་འདི་ཉིད་མ་བརྩམས་གོང་དུ། དཔེ་དེབ་འདི་ཉིད་ཀྱི་རྩོམ་པ་པོས་བཙོན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་དང་། སྐབས་བཅུ་གསུམ་པའི་བོད་མི་མང་སྤྱི་འཐུས་གྲོས་ཚོགས་ཀྱིས་གཏན་ལ་ཕབ་པའི་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཐོག་ཉམས་ཞིབ་མཐིལ་ཕྱིན་གནང་ཞིང་། ཉམས་ཞིབ་སྐབས་དངོས་སུ་བཙན་བྱོལ་བོད་མིའི་གཞི་རིམ་སློབ་གྲྭ་ཁག་ཏུ་ངོ་བཅར་གྱིས་གཞི་རིམ་ཤེས་ཡོན་སྲིད་བྱུས་ཀྱི་དམིགས་ཚད་དང་། ལྟ་བའི་རྒྱབ་ལྗོངས་སོགས་ལ་ཞིབ་མཇུག་མཐར་ཕྱིན་པ་མཛད་ཅིང་། དེའི་ཐད་ 《བོད་ཀྱི་ཤེས་ཡོན་ལམ་ལུགས་དང་སྲིད་བྱུས་》ཞེས་པའི་དཔེ་དེབ་ཅིག་བྲིས་ཏེ་བཙན་བྱོལ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་པར་བསྐྲུན་གྲུབ་རྗེས། སླར་ཡང་དཔེ་དེབ་འདི་ཉིད་ཀྱི་རྩོམ་པ་པོ་སྐུ་ཞབས་རེ་མདོ་སེངྒེ་ལགས་ཀྱིས་ཤེས་ཡོན་སྲིད་བྱུས་ཀྱི་དམིགས་སྒོ་གཙོ་བོ་ཏེ། བོད་མིའི་གཞི་རིམ་སློབ་གྲྭ་ཁག་གི་ན་ཆུང་སོན་རྩ་ཚོའི་ཀུན་སྤྱོད་སློབ་གསོ་དང་། སྐད་ཡིག་ཡར་རྒྱས་གཉིས་ཀར་ཕན་ཐོགས་འབྱུང་ཕྱིར། 《གཏམ་རྒྱུད་ཀྱི་ལམ་ནས་མེས་པོའི་ཞབས་རྗེས་འཚོལ་བ་ 》ཞེས་པའི་དཔེ་དེབ་འདི་ཉིད་ཤེས་ཡོན་སྲིད་བྱུས་ཀྱི་དགོས་མཁོ་གཞིར་བཞག་ནས་ཆེད་དུ་བརྩམས་པ་ཞིག་ཡིན་སྟབས།  གཞི་རིམ་བར་མ་ནས་གོང་མ་བར་གྱི་སློབ་ཕྲུག་ཚོར་དཔེ་དེབ་འདི་ཉིད་ཧ་ཅང་ཕན་ཐོགས་རྒྱ་ཆེན་པོ་ཡོད་པ་སྨོས་མ་དགོས་པ་ཞིག་རེད།

དཔེ་དེབ་འདི་ཉིད་ཀྱི་བརྗོད་བྱ་ལ་བརྟེན་ནས་བོད་ཀྱི་མེས་པོ་གོང་མ་ཚོའི་ལོ་རྒྱུས་ཀྱི་རིམ་པ་ཇི་སྙེད་ཅིག་ཤེས་རྟོགས་འབྱུང་སྟབས། ལོ་རྒྱུས་ཀྱི་དཔེ་དེབ་ཅིག་རེད་ཅེས་གླེང་ཆོག་པ་དང་། ཡང་ཆོས་དང་རིག་གཞུང་གི་འཕེལ་རིམ་སོགས་བརྗོད་སྙིང་བྱས་ཡོད་པས་ཆོས་འབྱུང་གི་དཔེ་དེབ་ཅིག་རེད་ཅེས་ཀྱང་སྨྲ་ཆོག་ལ། བོད་ཀྱི་མེས་པོ་གོང་མ་ཚོ་ཤེས་ཡོན་སློབ་སྦྱོང་དང་། ཡ་རབས་བཟང་སྤྱོད། གཞན་ཕན་གྱི་བྱ་བ་སོགས་རྩལ་དུ་བཏོན་ནས་བརྗོད་ཡོད་པས་ཀུན་སྤྱོད་སློབ་གསོའི་དཔེ་དེབ་ཅིག་རེད་ཅེས་ཀྱང་ཤོད་ཆོག དེ་མིན་འབྲི་ཐབས་ཀྱི་ཆ་ནས་ཚིག་གོ་དཀའ་བ་རྣམས་སླ་བར་བཅོས་ཤིང་གཏམ་རྒྱུད་ཀྱི་རྩོམ་ཐབས་སྤྱད་ནས་བྲིས་ཡོད་པས། བོད་ཀྱི་དངོས་བྱུང་གི་གལ་ཆེའི་མི་སྣ་དག་གི་བྱིས་སྒྲུང་ཞིག་རེད་ཅེས་བརྗོད་ཆོག་པ་མ་ཟད། ཉམས་འགྱུར་དང་ཁོར་ཡུག་རྣམས་ཧ་ཅང་གོ་བདེར་བཅོས་སྒྲིག་བྱས་ཏེ་གཏམ་བརྗོད་ཟློས་གར་གྱི་རྣམ་པ་ཐོན་ཐབས་བྱས་ཡོད་པས་ཟློས་གར་འཁྲབ་གཞུང་གི་དཔེ་དེབ་ཅིག་རེད་ཅེས་ཀྱང་ཟེར་ཆོག  ད་དུང་ནང་དོན་གྱི་ཆ་ནས་བོད་རང་གི་མི་སྣ་དང་འཚོ་བ་མཚོན་ཞིང་། རྗོད་བྱེད་ཀྱི་ཆ་ནས་བོད་རང་གི་ཐུན་མོང་མ་ཡིན་པའི་སྐད་ཡིག་གི་རྩོམ་གཤིས་དང་རྩོམ་འགྲོས་ལྡན་པར་བརྟེན། སྐད་ཡིག་སྦྱོང་མཁན་ཞིག་གི་ངོས་ནས་དཔེ་དེབ་འདི་ཉིད་སྐད་ཡིག་སློབ་དེབ་ཅིག་ལའང་ངོས་འཛིན་གནང་ཆོག

མཇུག་ཏུ་གླེང་འདོད་པ་ནི། ད་ལྟ་《གཏམ་རྒྱུད་ཀྱི་ལམ་ནས་མེས་པོའི་ཞབས་རྗེས་འཚོལ་བ་ 》ཞེས་པའི་དཔེ་དེབ་ཉིད་འཛམ་གླིང་གི་རྒྱལ་ཁབ་མི་འདྲ་བ་བཞི་བཅུ་ཙམ་ཞིག་ཏུ་ཁ་བཀྲམ་ནས་ཡོད་པའི་བོད་རིགས་གཞོན་སྐྱེས་ཚོར། ཁ་ཚ་དགོས་གཏུགས་ཀྱིས་ཕན་ཐོགས་འབྱུང་རྒྱུར་དམིགས་ནས། ཧ་ཅང་གིས་སྤྱོད་བདེ་བ་སྒྲ་དེབ་ཀྱི་ལམ་ནས་ལྟ་ཉན་གཉིས་ཀ་བྱེད་ཐུབ་པ་བཟོས་ཤིང་། དེ་ཡང་སྨྲ་བརྗོད་དག་ལ་གསལ་བ། འགྲོས་ལྷོད་ཅིང་ཚིག་སྙན་ཆ་ལྡན་པ་ཞིག་བསྐྲུན་གནང་ཡོད་སྟབས། བོད་ཡིག་མི་ཤེས་མཁན་ཞིག་ལ་མཚོན་ནའང་། འགྲོ་ཞོར་འདུག་ཞོར་མིག་གིས་བཀླགས་མ་ཐུབ་ཀྱང་རྣ་བས་ཉན་ནས་ཤེས་རྟོགས་འཕེལ་ཐུབ་པ་དང་། བོད་ཡིག་ཕྲན་བུ་ཤེས་མཁན་ཞིག་ཡིན་ཚེ། དེ་བས་ཀྱང་ལྟ་ཉན་གཉིས་ཀའི་ལམ་ནས་རང་གི་མེས་པོའི་ཞབས་རྗེས་འཚོལ་བའི་ལམ་བུ་བཟང་པོ་ཞིག་བསྐྲུན་འདུག་པས། དེ་ཡང་ཇི་སྐད་དུ། 《རླངས་ཀྱི་པོ་ཏི་བསེ་རུ་ལས་ 》ལར་སྐྱེས་པའི་མིས་རང་གི་སྐྱེ་རྒྱུད་མ་ཤེས་ན། ནགས་ཕུང་གི་སྤྲེའུ་འདྲ། མི་རང་གི་ཆོ་འབྲང་མ་ཤེས་ན། གཡུ་འབྲུག་ཟོལ་མ་དང་འདྲ། ཡབ་མེས་ཀྱི་ཡིག་ཚང་མ་ཤེས་ན། མོན་ཕྲུག་ཡལ་བོར་འདྲ། ཞེས་པ་ལྟ་བུ་ཞིག་མི་འབྱུང་བའི་ཆེད། འཛམ་གླིང་གི་ཡུལ་གྲུ་གང་སར་བཞུགས་པའི་བོད་རིགས་ན་གཞོན་སྤྱི་དང་། ལྷག་པར་གཞི་རིམ་བར་མ་དང་། གོང་མ་བར་གྱི་སློབ་ཕྲུག་ཚོས་སྒྲ་དེབ་འདི་ལ་ལྟ་ཉན་བྱས་པ་ཡིན་ན། བོད་རང་གི་སྐད་ཡིག་གོང་འཕེལ་དུ་འགྲོ་བ་མ་ཟད། སྔོན་བྱོན་བོད་ཀྱི་སྐྱེས་ཆེན་དམ་པ་མང་པོས་རང་གི་ཆོས་རིག་ཐད་བྱས་རྗེས་ཇི་འདྲ་ཞིག་བཞག་པ་དང་། ཁོང་ཚོས་བཞག་པའི་སྐུ་དྲིན་བརྟེན་ནས་ད་གཟོད་བོད་མི་རིགས་ཞེས་པ་ས་སྒང་འདིའི་སྟེང་གི་མི་འབོར་དུང་ཕྱུར་མང་པོའི་ཁྲོད། མི་རིགས་ཟུར་གསལ་བ་ཞིག་དང་། འཛམ་གླིང་སྤྱི་ལ་ཕན་བདེ་སྒྲུབ་ཐུབ་མཁན་གྱི་རིག་གཞུང་ཕྱུག་པོ་ཞིག་གི་རྒྱུད་འཛིན་པ་ཡིན་པར་ཤེས་ནས་དགའ་མོས་བྱེད་པ་རྟོགས་ཐུབ་ལ། དེ་ལས་ཀྱང་རང་གིས་རང་ཉིད་ཀྱི་འབྱུང་ཁུངས་ཤེས་ཤིང་། རང་ཉིད་བོད་མི་རྣལ་མ་ཞིག་ཏུ་འགྱུར་བར་ཕན་རྒྱ་ཆེར་ཐོགས་ཐུབ་བོ། །

སྒྲ་དེབ་ཀྱི་འབྲེལ་ཐག https://youtu.be/xziHkAn_NTI?fbclid=IwAR1N6jSFeRR-AfC3-z5YuX2HPpjHeqfvltj2C9wtTu81-2v25K7jLdVnRyk