རྒྱའི་ཁུང་ཙི་སློབ་གླིང་སྒོ་མ་བརྒྱབ་བར་དུ་ངོ་རྒོལ་མཚམས་འཇོག་རྒྱུ་མིན།

མེ་སེ་ཅུ་སེཌ་ཡི་བྷོ་སི་ཊོན་ནང་རྟེན་གཞི་བྱས་པའི་ཊ་ཧྥི་གཙུག་ལག་སློབ་གྲྭ་ཆེན་མོའི་(Tufts University) འཛིན་སྐྱོང་གིས་གཙུང་ལག་སློབ་གྲྭའི་ནང་གི་ཁུང་ཙི་སློབ་གླིང་དེ་སྒོ་མ་བརྒྱབ་བར་དུ་ས་གནས་བོད་རང་བཙན་སློབ་ཕྲུག་ཚོགས་པའི་ངོས་ནས་རེས་གཟའ་སྤེན་པ་ནམ་ཡིན་ལ་སློབ་རའི་ནང་དུ་ངོ་རྒོལ་སྐད་འབོད་གནང་རྒྱུ་རེད་འདུགཨ་རིའི་ཤར་བརྒྱུད་མངའ་སྡེ་མེ་སེ་ཅུ་སེཌ་ཡི་བྷོ་སི་ཊོན་ས་གནས་བོད་རང་བཙན་སློབ་ཕྲུག་ཚོགས་པ་དང་ས་གནས་བོད་རིགས་སྤྱི་མཐུན་ཚོགས་པ་གཉིས་མཉམ་འབྲེལ་ཐོག། མངའ་སྡེ་དེའི་ནང་རྟེན་གཞི་བྱས་པའི་ཊ་ཧྥི་གཙུག་ལག་སློབ་གྲྭ་ཆེན་མོའི་(Tufts University) འཛིན་སྐྱོང་གིས་གཙུང་ལག་སློབ་གྲྭའི་ནང་གི་ཁུང་ཙི་སློབ་གླིང་དེ་སྒོ་མ་བརྒྱབ་བར་དུ། རེས་གཟའ་སྤེན་པ་ནམ་ཡིན་ལ་སློབ་ཆེན་གྱི་ར་བའི་ནང་ངོ་རྒོལ་སྐད་འབོད་ལས་འགུལ་སྤེན་རྒྱུ་ཡིན་སྐོར་བསྒྲགས་འདུག

ངོ་རྒོལ་སྐད་འབོད་ལས་འགུལ་དེ་ཟླ་འདིའི་ཕྱི་ཚེས་ ༡༩ ཉིན་མགོ་བརྩམས་པ་ཞིག་ཡིན་པ་དང་། ས་གནས་ཀྱི་བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་གཡང་འཛོམས་ལགས་ཀྱིས། གཙུག་ལག་སློབ་གྲྭ་དེའི་སློབ་ཕྲུག་ལྷན་ཚོགས་ཀྱི་གསར་ཤོག་ནང་། ང་ཚོས་ཊ་ཧྥི་གཙུག་ལག་སློབ་གྲྭའི་ཁུང་ཙི་སློག་གླིང་གི་མདུན་དུ་སྐད་འབོད་དང་གཏམ་བཤད་སྤེལ་ཏེ། གཙུག་ལག་སློག་གྲྭའི་དབུ་འཛིན་མོ་ན་ཁོའི་ (Monaco) ཁྱིམ་དང་། དེ་ནས་སློག་དཔོན་རོའུ་ (Row) གྱི་ལས་ཤག་བར་སྐད་འབོད་བྱས་པ་ཡིན། ཞེས་དང་། ཐེངས་འདིའི་ལས་འགུལ་གོ་སྒྲིག་གནང་མཁན་རྣམས་ཀྱིས་གཙུག་ལག་སློབ་གྲྭའི་དབུ་འཛིན་རྣམས་ལ་ཁུང་ཙི་སློབ་གླིང་སྒོ་བརྒྱབ་དགོས་པའི་འབོད་སྐུལ་ཐེངས་མང་བྱས་ཀྱང་། ད་བར་ལན་འདེབས་ཁ་གསལ་བྱུང་མེད་སྟབས། གཙུག་ལག་སློབ་གྲྭའི་མགོ་འཁྲིད་རྣམས་ཀྱིས་གནད་དོན་དེའི་སྐོར་གོ་བསྡུར་ཡོང་ཆེད། ད་ཐེངས་སློབ་གྲྭའི་ར་བར་དངོས་སུ་ཐོན་ཏེ་སྐད་འབོད་ལས་འགུལ་སྤེལ་ཡོད་སྐོར་འགྲེལ་བརྗོད་གནང་འདུག

གཙུག་ལག་སློབ་གྲྭའི་གསར་འགོད་འབྲེལ་མཐུད་པའི་འགན་འཛིན་པེ་ཊི་རིག་ཁོ་ལིན་སི་ (Patrick Collins) ཟེར་བས། སློབ་གྲྭའི་ངོས་ནས་ད་ཐེངས་ཀྱི་ཞི་བའི་ངོ་རྒོལ་སྐད་འབོད་ལས་འགུལ་དེར་བརྩི་བཀུར་ཞུ་ཡི་ཡོད་པ་དང་། ད་བར་སློབ་གྲྭའི་ཁྱབ་ཁོངས་ཀྱི་སློབ་མ་དང་དགེ་ལས་ཁྲོད། ཁུང་ཙི་སློབ་གླིང་གིས་ཚུལ་མཐུན་མ་ཡིན་པའི་བྱ་སྤྱོད་དམ་ཤུགས་རྐྱེན་སྤེལ་ཐབས་བྱེད་ཀྱི་ཡོད་སྐོར་གྱི་ཞུ་གཏུག་བྱེད་མཁན་བྱུང་མེད་ཀྱང་། ཁུང་ཙི་སློབ་གླིང་ནང་རྒྱ་ནག་ལ་ཕྱོགས་པའི་དྲིལ་བསྒྲགས་རིགས་ཡོང་གི་ཡོད་པའི་བློ་འཚབ་བྱེད་ཀྱི་ཡོད་པར་བརྟེན། སློབ་གྲྭའི་ངོས་ནས་ཁུང་ཙི་སློབ་གླིང་ལ་ཕྱོགས་ཡོངས་ནས་བསྐྱར་ཞིབ་བྱས་ཡོད་ཅིང་། བསྐྱར་ཞིབ་བྱེད་རིང་སློབ་ཕྲུག་དང་དགེ་ལས་ཁྲོད་ཁུང་ཙི་སློབ་གླིང་གིས་ཤེས་ཡོན་དང་ཆོས་དད་རང་དབང་ལ་དོ་ཕོག་གཏོང་གི་ཡོད་པའི་གནས་སྟངས་ཞུ་མཁན་བྱུང་མེད་པ་མ་ཟད། ཁུང་ཙི་སློབ་གླིང་གི་ལས་གཞི་ལ་རྒྱབ་སྐྱོར་ཤུགས་ཆེན་པོ་ཐོན་ཡོད་སྐོར་བརྗོད་ཡོད་འདུག

འདི་ལོའི་ཕྱི་ཟླ་ ༡༠ ཚེས་ ༡ ཉིན་རྒྱ་ནག་གི་རྒྱལ་སྟོན་ཉིན་མོ་དང་བསྟུན། འཛམ་གླིང་གི་གྲོང་ཁྱེར་ ༡༠༠ ལྷག་ནང་བོད་མི་དང་། ཡུ་གུར། ཧོང་ཀོང་། ཐའེ་ཝན། ལྷོ་སོག་བཅས་ཀྱིས་རྒྱ་ནག་གཞུང་ལ་ཉིན་གཅིག་དུས་གཅིག་ལ་ངོ་རྒོལ་སྐད་འབོད་ལས་འགུལ་ཤུགས་ཆེར་སྤེལ་ཡོད་པ་ལྟར། ཉིན་དེར་ས་གནས་ཀྱི་བོད་རང་བཙན་སློབ་ཕྲུག་ཚོགས་པ་དང་ས་གནས་བོད་མི་རྣམས་ཀྱིས་ཊ་ཧྥི་གཙུག་ལག་སློབ་གྲྭའི་མདུན་དུ་ཁུང་ཙི་སློབ་གླིང་གཏན་དུ་སྒོ་བརྒྱབ་དགོས་པའི་སྐད་འབོད་ལས་འགུལ་སྤེལ་ཡོད་འདུག

ཊ་ཧྥི་གཙུག་ལག་སློབ་གྲྭས་ཕྱི་ལོ་ ༢༠༡༤ ཟླ་ ༦ པའི་ནང་། རྒྱ་ནག་དབུས་གཞུང་གི་ཤེས་རིག་ལྷན་ཁང་གི་ཁྱབ་ཁོངས་སུ་ཡོད་པའི་ཁུང་ཙི་ལྟེ་གནས་ཁང་ (Confucius Institute Headquaters (HANBAN)) ངམ། མིང་གཞན་དུ་རྒྱལ་སྤྱིའི་རྒྱ་ནག་གི་སྐད་ཡིག་ལྷན་ཚོགས་ (Office of Chinese Language Council International) དང་གན་རྒྱ་བཞག་སྟེ། ཕྱི་ལོ་ ༢༠༡༥ ཟླ་ ༦ ཚེས་ ༢༤ ཉིན་སློབ་གྲྭ་ཆེན་མོའི་ནང་དངོས་སུ་ཁུང་ཙི་སློབ་གླིང་མགོ་བཙུགས་པ་ཞིག་ཡིན་འདུག འདི་ལོ་ཕྱི་ཟླ་ ༨ པའི་ཚེས་ ༡༣ ཉིན་ཨ་རིའི་ཕྱི་སྲིད་ལྷན་ཁང་གིས་ཨ་རིའི་ནང་ཡོད་པའི་ཁུང་ཙིའི་ལྟེ་གནས་རྣམས་རྒྱ་ནག་གི་དྲིལ་བསྒྲགས་ཀྱི་ལག་ཆ་ཞིག་ཡིན་སྐོར་བསྒྲགས་ཡོད་ལ། ཨ་རིའི་ནང་ཡོད་པའི་ཁུང་ཙི་ལྟེ་གནས་རྣམས་ཕྱིའི་རྩ་འཛུགས་ལ་ངོས་འཛིན་བྱས་ཏེ། ཁུང་ཙི་ལྟེ་གནས་ཁག་གིས་རང་གི་ལས་དོན་བྱེད་ཕྱོགས་དང་འགྲོ་སོང་དང་བཅས་པའི་གནས་ཚུལ་རིགས་ཨ་རིའི་གཞུང་ལ་མཁོ་སྤྲོད་བྱེད་དགོས་ཚུལ་གྱི་བཀའ་ཁྱབ་བཏང་ཡོད་པ་རེད། དེ་བཞིན་ཨ་རིའི་ཕྱི་སྲིད་ལྷན་ཁང་གི་གཞུང་འབྲེལ་གྲངས་ཐོ་ལྟར་ན། ད་ལྟའི་ཆར་ཨ་རི་རྒྱལ་ཡོངས་ནང་ཁུང་ཙིའི་ལྟེ་གནས་ ༧༥ ཡོད་པའི་ཁྲོད་ནས། ༦༥ ཨ་རིའི་གཙུག་ལག་སློབ་གྲྭའི་ནང་ཡོད་འདུག

གསར་འགོད་པ། པ་སངས་ཚེ་རིང་།