ཡུ་རོབ་མཐུན་ཚོགས་ཀྱིས་རྒྱ་ནག་གཞུང་དང་ལྷན་དུ་བོད་ནང་གི་བོད་མིའི་འགྲོ་བ་མིའི་ཐོབ་ཐང་གཙོ་བྱས་པའི་བོད་ནང་གི་ངལ་རྩོལ་སྒྱུར་བཀོད་ཁང་གི་གནས་སྟངས་སོགས་ཀྱི་སྐོར་རྒྱ་ནག་གཞུང་ལ་གླེང་སློང་བྱས་ཡོད་འདུག
འདས་ལོའི་ཕྱི་ཟླ་ ༩ ནང་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པས་ (IPAC) ཡུ་རོབ་མཉམ་འབྲེལ་མཐུན་ཚོགས་ལ། རྒྱ་ནག་གཞུང་གིས་བོད་ནང་ངལ་རྩོལ་སྒྱུར་བཀོད་ཁང་བཙུགས་ཏེ་བོད་མི་རྣམས་ལ་བཙན་གྱིས་ལས་བཀོལ་བྱེད་བཞིན་པའི་ཐད། དོན་ཚན་གསུམ་གྱི་ཐོག་ནས་དོགས་འདྲི་གནང་བར། ཁ་སང་ཕྱི་ཚེས་ ༥ ཉིན་ཡུ་རོབ་མཉམ་འབྲེལ་མཐུན་ཚོགས་ཀྱི་གཞུང་འབྲེལ་དྲ་རྒྱའི་སྟེང་། ཡུ་རོབ་མཐུན་ཚོགས་ཀྱི་སྲིད་འཛིན་གཞོན་པས་ལན་འདེབས་གནང་སྟེ། བོད་ནང་ངལ་རྩོལ་སྒྱུར་བཀོད་ཀྱི་ལས་གཞི་སྤེལ་བཞིན་པ་དང་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་རྒྱ་ནག་གཞུང་ལ་གླེང་སློང་བྱས་ཡོད་སྐོར་བརྗོད་འདུག
རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པས། རྒྱ་ནག་གིས་བོད་ནང་ངལ་རྩོལ་སྒྱུར་བཀོད་ཀྱི་ལས་གཞི་སྤེལ་ཏེ། བོད་ནང་གི་བོད་མིའི་འགྲོ་བ་མིའི་གཞི་རྩའི་ཐོབ་ཐང་དང་། འགྲོ་འདུག་སྤྱོད་གསུམ་གྱི་རང་དབང་ལ་རྡོག་རོལ་གཏོང་བཞིན་པར་ཡུ་རོབ་མཐུན་ཚོགས་ནས་སྐྱོན་བརྗོད་བྱེད་ཀྱི་ཡོད་མེད་སྐོར་ལ་ཡུ་རོབ་མཐུན་ཚོགས་ཀྱིས། འདས་ལོའི་ཕྱི་ཟླ་ ༦ ཚེས་ ༢༢ ཉིན་རྒྱ་ནག་དང་ཡུ་རོབ་བར་གྱི་ཚོང་དོན་ཚོགས་འདུ་དང་། ཕྱི་ཟླ་ ༩ ཚེས་ ༡༤ ཉིན་ཕྱོགས་གཉིས་བར་གྱི་མགོ་འཁྲིད་ཚོའི་ཚོགས་འདུ་རིམ་པ་བཅས་ཀྱི་སྟེང་། རྒྱ་ནག་གི་མགོ་འཁྲིད་ཚོར་ཡུ་རོབ་མཐུན་ཚོགས་ལ་སེམས་འཚབ་གང་ཡོད་པ་གསལ་འདོན་བྱས་ཡོད། ཉེ་སྔོན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་འདུའི་ཐོག་ཡུ་རོབ་མཐུན་ཚོགས་ཀྱིས། རྒྱ་ནག་གིས་སོ་སོའི་རྒྱལ་ཁོངས་དང་རྒྱལ་སྤྱིར་ངོས་ལེན་ཞུས་པའི་དམ་བཅའ་ཁག་རྒྱུན་སྐྱོང་བྱས་ཏེ། འགྲོ་བ་མིའི་ཐོབ་ཐང་ལ་བརྩི་བཀུར་དང་དམིགས་བསལ་བོད་དང་ཤིན་ཅང་ཁུལ་གྱི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་ཀྱི་ཡོད་པ་ནན་བརྗོད་བྱས་ཡོད།
དེ་བཞིན། རྒྱ་ནག་དང་ཡུ་རོབ་བར་འགྲོ་བ་མིའི་ཐོབ་ཐང་གླེང་མོལ་བྱས་སྐབས། ཡུ་རོབ་ཀྱིས་བོད་ནང་གི་བོད་མིའི་ཆོས་དད་རང་དབང་དང་སློབ་གསོ། དེ་བཞིན། སྐད་ཡིག་རང་དབང་བཅས་ལ་དམ་དྲག་བྱེད་བཞིན་པའི་ཐད་སེམས་འཚབ་བསྟན་ཡོད་པ་མ་ཟད། བོད་ནང་གང་བྱུང་འཛིན་བཟུང་དང་གར་སོང་ཆ་མེད་དུ་གྱུར་དང་འགྱུར་བཞིན་པའི་གནས་སྟངས་ལའང་དོ་ཁུར་བྱས་ཡོད། ད་དུང་ཉེ་ལམ་རྒྱ་ནག་གཞུང་གིས་བོད་ནང་འཆར་གཞི་ལྡན་པའི་ངལ་རྩོལ་སྒྱུར་བཀོད་ཁང་བཙུགས་ཏེ། བོད་མི་རྣམས་ལ་བཙན་གྱིས་ངལ་རྩོལ་བྱེད་དུ་འཇུག་གི་ཡོད་པའི་གནད་དོན་དེ་ཡང་རྒྱ་ནག་ལ་གླེང་སློང་བྱས་ཡོད། ཅེས་བརྗོད་ཡོད་འདུག
རྒྱ་ནག་གིས་རྒྱལ་སྤྱིའི་སྟེང་འགྲོ་བ་མིའི་ཐོབ་ཐང་གི་སྒྲིག་ཁྲིམས་ཁག་སྲུང་སྐྱོང་བྱ་རྒྱུ་ཡིན་པའི་ཁས་ལེན་རྣམས་ལག་བསྟར་ཡོང་བར་ཡུ་རོབ་མཐུན་ཚོགས་ལ་འཆར་གཞི་ག་རེ་ཡོད་སྐོར་ལ་ཡུ་རོབ་མཐུན་ཚོགས་ཀྱིས། གཞི་རྩའི་རྒྱལ་སྤྱིའི་ངལ་རྩོལ་ཚོགས་པའི་གྲོས་ཆོད་ལག་བསྟར་དང་། འགྲོ་བ་མིའི་ཐོབ་ཐང་དང་ངལ་རྩོལ་བའི་ཐོབ་ཐང་། དེ་བཞིན། བྱིས་པ་དང་བཙན་དབང་ངལ་རྩོལ་སོགས་ཚུད་པའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ལ་བརྩི་བཀུར་དང་སྲུང་སྐྱོབ་བྱེད་ཀྱི་ཡོད། འོན་ཀྱང་། རྒྱ་ནག་གིས་རྒྱལ་སྤྱིའི་ངལ་རྩོལ་གྲོས་ཆོད་ ༢༩ བ་དང་དེའི་མ་ཡིག དེ་བཞིན། ཁྲིམས་དོན་བསྟུན་མི་དགོས་པའི་ངལ་རྩོལ་གྲོས་མཐུན་ ༡༠༥ བཅས་ངོས་ལེན་ཞུས་མེད་པ་དང་། རྒྱ་ནག་དང་ཡུ་རོབ་བར་འགྲོ་བ་མིའི་ཐོབ་ཐང་གི་གྲོས་མོལ་སྐབས། ཡུ་རོབ་མཐུན་ཚོགས་ཀྱིས་རྒྱ་ནག་ནས་གྲོས་མཐུན་དེ་དག་ལ་ངོས་ལེན་བྱེད་དགོས་པའི་སྐུལ་མ་བསྐྱར་ནན་བྱས་ཡོད་པ་མ་ཟད། མུ་མཐུད་རྒྱ་ནག་ལ་གྲོས་ཆོད་དེ་དག་ངོས་ལེན་བྱེད་པར་སྐུལ་མ་གཏང་གི་ཡིན། ཞེས་བརྗོད་ཡོད་པ་རེད།
མཐའ་མཇུག་ཏུ་བོད་ནང་དམིགས་ཡུལ་ལྡན་པའི་ངལ་རྩོལ་སྒྱུར་བཀོད་ཀྱི་ལས་གཞི་སྤེལ་མཁན་རྒྱ་ནག་གི་མགོ་འཁྲིད་མི་སྒེར་གྱི་ཐོངས་མཆན་དང་རྒྱུ་དངོས་སོགས་བཀག་སྡོམ་བྱེད་པའི་ཉེས་ཆད་གཏོང་འཆར་ཡོད་མེད་སྐོར་ལ། ཡུ་རོབ་མཐུན་ཚོགས་ཀྱི་གཏན་འབེབ་བཀག་སྡོམ་ཉེས་ཆད་གཞིར་བཞག་ཐོག ཡུ་རོབ་འཛིན་སྐྱོང་ལྷན་ཁང་གི་སྤྱི་མོས་ཐག་གཅོད་གང་ཡོང་ལག་བསྟར་བྱ་རྒྱུ་ཡིན་པའི་ལན་འདེབས་བྱས་འདུག
བོད་ནང་ངལ་རྩོལ་སྒྱུར་བཀོད་ཁང་བཙུགས་ཡོད་པའི་སྙན་ཐོ་དེ་འདས་ལོའི་ཕྱི་ཟླ་ ༩ ནང་ཨ་རིའི་ཇམ་སི་ཊོན་ཐེབས་རྩ་ཁང་ (Jamestown Foundation) གི་མཐུན་འགྱུར་འོག ཤིན་ཅང་ནང་གི་གནད་དོན་ཐད་ཆེད་དམིགས་ཞིབ་འཇུག་པ་དང་འཇར་མན་གྱི་མི་རིགས་རིག་པ་བ་སྐུ་ཞབས་ཨེ་ཌི་རེན་རྫན་(Adrian Zenz)ལགས་ཀྱིས་ཞིབ་འཇུག་སྙན་ཐོ་བཏོན་པ་དང་། ཟླ་དེའི་ཕྱི་ཚེས་ ༢༣ ཉིན་ཨ་རི་དང་ཨིན་ཡུལ། ཡུ་རོབ་སྤྱི་མཐུན་རྒྱལ་ཁབ། ཨོ་སི་ཊོ་ལི་ཡ། ཁེ་ན་ཌ། ཨི་ཊ་ལེ། འཇར་མན་ནི། ཉི་འོང་། ནོར་ཝེ། སུད་ཌེན། ཨིན་ཡུལ། ནི་ཐི་ལན་ཌི། ལི་ཐུ་ནི་ཡ། ཅེག་སྤྱི་མཐུན་རྒྱལ་ཁབ། ཧྥ་རན་སི། སུད་སི་རྒྱལ་ཁབ་སོགས་རྒྱ་ནག་ལ་ཁ་གཏད་གཅོག་མཁན་གྱི་གྲོས་ཚོགས་འཐུས་མི་༦༣ ཡིས་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པ་ Inter-Parliamentary Alliance on China (IPAC) ཞེས་པ་བཙུགས་ཏེ། རྒྱ་ནག་གཞུང་གིས་བོད་ནང་ངལ་རྩོལ་སྒྱུར་བཀོད་ཁང་བཙུགས་ཏེ་བཙན་དབང་གིས་བོད་མི་རྣམས་ངལ་རྩོལ་བ་བྱས་བཅུག་པར་མཐའ་གཅིག་ཏུ་ངོ་རྒོལ་ཡོད་པའི་བསྒྲགས་གཏམ་སྤེལ་ཡོད་པ་རེད།
བསྟན་འཛིན་ཕུར་བུ།
