རྒྱ་གར་བྱང་ཤར་ཁུལ་དང་ལྷོ་ཕྱོགས་སུ་ཡོད་པའི་བོད་མིའི་གཞིས་ཆགས་དང་ས་གནས་ཁག་ཅིག་གི་སྨན་པ་དང་འཕྲོད་ལས་པ་སོགས་མི་གྲངས་ ༡༥༢ ལ་ཏོག་དབྱིབས་གཉན་རིམས་ཀྱི་འགོག་ཁབ་བརྒྱབ་ཚར་ཡོད་འདུག
ཁ་སང་ཕྱི་ཚེས་ ༢༩ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༤༤ སྤེལ་བའི་ནང་། ཟླ་འདིའི་ཕྱི་ཚེས་ ༡༦ ཉིན་ནས་རྒྱ་གར་རྒྱལ་ཡོངས་ནང་འཛམ་གླིང་ཐོག་རྒྱ་ཁྱབ་ཆེ་བའི་ཏོག་དབྱིབས་གཉན་རིམས་སྔོན་འགོག་སྨན་ཁབ་རྒྱག་མགོ་བཙུགས་ཏེ། དྷ་ས་དང་མོན་གྷོ་འདོད་རྒུ་གླིང་། མེའོ་ཆོས་འཕེལ་གླིང་། ཨོ་ཌི་ཤ་སྨན་ལྷ་སྨན་ཁང་། འབིར་བཅས་ནས་སྨན་པ་དང་འཕྲོད་ལས་པ་སོགས་མི་གྲངས་ ༡༥༢ ལ་ཏོག་དབྱིབས་གཉན་རིམས་ཀྱི་སྔོན་འགོག་སྨན་ཁབ་ཐེངས་དང་པོ་བརྒྱབ་ཟིན་ཡོད་འདུག
གསལ་བསྒྲགས་སྐབས་ཡང་བདེ་ལེགས་སྨན་ཁང་གི་སྨན་པ་བསྟན་འཛིན་རྣམ་སྒྲོན་(Namdon) ལགས་ཀྱིས། སྤྱི་ཚོགས་དྲ་ལམ་དུ་ཏོག་དབྱིབས་སྨན་ཁབ་སྐོར་ལ་དཀྲོག་གཏམ་དང་གནས་ཚུལ་རྫུན་མ་ལ་དོགས་ཟོན་གནང་དགོས་པ་དང་། མི་མང་ཡོངས་ནས་ས་གནས་སོ་སོའི་འཕྲོད་བསྟེན་གྱི་སྨན་པ་དང་སྨན་ཞབས་པས་ལམ་སྟོན་གནང་བར་ཉན་དགོས་སྐོར་འབོད་སྐུལ་གནང་བ་དང་སྦྲགས། ཏོག་དབྱིབས་སྨན་ཁབ་བརྒྱབ་ཚར་རྗེས་ཉིན་གཅིག་གམ་ཉིན་གཉིས་རིང་མི་ཁ་ཤས་ལ་སྨན་ཁབ་རྒྱག་སར་ན་ཟུག་ཆུང་ཆུང་དང་སྐྲངས་པ། དེ་བཞིན་ཚ་བ་དང་ཧབ་སྦྲིད་རྒྱག་པ་ལ་སོགས་པའི་ཟུར་སྐྱོན་ཡོང་གི་ཡོད་པ་མ་ཟད། འགོག་ཁབ་ཀྱིས་བརྒྱ་ཆ་བརྒྱ་ཏོག་ནད་སྔོན་འགོག་བྱེད་ཐུབ་ཀྱི་མེད་པས་ཡིད་གཟབ་གནང་རྒྱུ་གལ་ཆེ་ཤོས་ཡིན་སྐོར་བརྗོད་འདུག་ལ། དེ་བཞིན་འཕྲོད་བསྟེན་ལས་ཁུངས་ཀྱི་ལས་བྱེད་ཚེ་རིང་ལགས་ཀྱིས། ཏོག་དབྱིབས་སྨན་ཁབ་ཡོད་ཀྱང་ང་ཚོས་ཏོག་དབྱིབས་གཉན་རིམས་ཀྱི་ཛ་དྲག་གི་གནས་སྟངས་དེར་སྣང་མེད་གཏོང་རྒྱུ་མེད་པ་དང་། བོད་ཀྱི་ལོ་གསར་སྐབས་ལའང་གཉན་རིམས་སྔོན་འགོག་བྱ་བར་ནན་ཏན་བྱས་ཏེ་འདུ་འཛོམས་ཆེན་པོའི་རིགས་ལ་འཛེམས་དགོས་སྐོར་བརྗོད་སོང་།
ལས་དོན་ཚོགས་ཆུང་གི་འབྲེལ་མཐུད་པ་མཚམས་གཅོད་ལགས་ཀྱིས། བདེ་སྐྱིད་གླིང་དང་དྷ་རམ་ས་ལ། (Mainpat) སྦེལ་ཀོབ་དང་ (Pandoh) གཞིས་ཆགས་ནས་བདུན་ཕྲག་འདིའི་ནང་དུ་ཏོག་དབྱིབས་གཉན་རིམས་ཕོག་པའི་བོད་མི་ ༥ ཐོན་ཡོད་པ་དང་། ད་དུང་ (Pandoh) ནས་ཡིན་པའི་བུད་མེད་ལོ་ ༦༩ སོན་པ་ཞིག་འདས་གྲོངས་སུ་ཕྱིན་སྐོར་དང་། རྒྱ་གར་དང་བལ་ཡུལ་དུ་གནས་པའི་བོད་མིའི་གྲངས་ ༣༦༢ ཟུར་བཀག་ཏུ་ཡོད་སྐོར་སོགས་བརྗོད་འདུག
རྒྱ་གར་དང་བལ་ཡུལ་ནང་ད་བར་དུ་ནད་གཞི་ཕོག་པའི་བོད་མི་གྲངས་ ༡༤༩༥ བྱུང་བའི་ཁྲོད་ནས་མི་ ༡༤༤༠ དྲག་སྐྱེད་དང་། མི་ ༣༨ འདས་གྲོངས། ད་ལྟ་ནད་ཀྱིས་མནར་བཞིན་པ་ ༡༧ ཡོད་འདུག དེ་མིན་གྱི་ཕྱི་རྒྱལ་ཁག་ནང་ནད་གཞི་ཕོག་པའི་མི་གྲངས་ ༢༡༣ དང་། དྲག་སྐྱེད་བྱུང་བ་ ༡༦༥། འདས་གྲོངས་ཕྱིན་པ་ ༩། ད་ལྟ་ན་བཞིན་པ་ ༣༩ ཡོད་འདུག
བསྟན་འཛིན་ཕུར་བུ།
